Ukupususha kwa Kusungusha

Ku ulemba Loleni! mu BENIN

“BALYA batatu bali abomi pa mulandu fye wa kuti Inte sha kwa Yehova e shabapuswishe!” Ili e lyashi ilyasalangene kwati mulilo mu musumba onse uwa Calavi, uwabela mu calo ca ku Masamba ya Africa ica Benin, pali Citatu, pa April 19, 2000. Bushe aba batatu bali ni bani, kabili Inte sha kwa Yehova shakuminweko shani mu kubapususha?

Cali mupepi na 06:30 hrs, ilyo baPhilippe Elegbe na baRoger Kounougbe balepekanya ukuya mu kubombela pa cifulo ca kulonganinapo ica Nte sha kwa Yehova icabela mupepi ne ofeshi lya Watch Tower Society ilya Benin. Cilya cungulo icintubwingi bali no kusangwa pali ici cifulo ku Cibukisho ca mfwa ya kwa Yesu Kristu icibako cila mwaka. * Lyena mu kupumikisha, kwali icongo icikalamba icapumfyenye inshita ya lucelo lwalemoneka ukuba ulwamutalalila. Mu kashita fye akepi, baPhilippe na baRoger baishileishiba ukuti kwacitika ubusanso pa musebo.

Mu nshita fye ipi pa numa baumfwile umuntu umo alepunda ati: “Ababomfi bandi batatu nabelikishiwa ku mifuko ya sementi!” BaPhilippe na baRoger baile ulubilo ku musebo. Pa musebo bamwene cimbayambaya ica matani 20 nacibeuka. Imifuko ya sementi yapooselwe ku nse ya cimbayambaya.

BaJosué Didolanvi, nabo bene abalebombela pali ici cifulo ca kulonganinapo, balifikile kale kale apo ubusanso bwacitikile, no kutendeka ukutinta umuntu uwali pa kati ka cimbayambaya ne mifuko ya sementi. Namutekanya, uwaifumiine umwine mu cimbayambaya, alifulunganishiwe. Nangu cibe fyo, akwete ubukose ubwa kupunda ati: “Mucili abantu na bambi babili mu cimbayambaya abelikishiwe ku mifuko ya sementi!” Bamo abaletambako batendeke ukulafumyapo imifuko, lelo balilekele bwangu bwangu pa mulandu wa kuti palikabishe. Uyu sementi e lyo fye bamufumishe mu citofu umo bapangila!

Ukupususha

BaPhilippe, baRoger, na baJosué batendeke ukulafumya uyu mwina wa mifuko ya sementi panono panono. Amaboko yalikalipe ku cikabilila no kufina kwa mifuko iyafina amakilogramu 50. Kabili icabipisheko ca kuti, sementi aleitika mu mifuko iyaletulika, no kukalifya iminwe yabo e lyo no kubalenga kukanapema bwino. BaJosué pa numa batile: “Amaboko yalepya, ukucilisha mu minwe. Lelo naletontonkanya ukuti kuti limbi kwaba ukupusushako umuntu uuli onse umbi uo belikishe ku mifuko ya sementi.”

Pa numa ya kufumyapo imifuko mupepi na 40, aba bantu batatu bamwene ubutanda. Ku ca kupapusha, basangile abantu babili—pa nshi ya butanda. Abantu babili bali abomi! Ilyo ubusanso bwacitike, aba bantu baali ku numa ya cimbayambaya uko basendeme pa butanda ubwakupikile imifuko ya sementi. Ilyo baponene ukufuma pa mulu wa cimbayambaya, ubutanda bwalibakupikile, ukubacingilila ukufuma ku cikabilila ca mifuko ya sementi iyabelikishe.

Ilyo balebomba ku kwafwa na pa numa ya kwafwa, abantu abengi baishile mu kutamba. Bonse balisungwike ukuti baPhilippe, baRoger, na baJosué balimishe umwina wa mifuko iyafina amatani yabili mu kwangufyanya fye na mu mibele yabipe fi. Kabili abengi balisungwike nga nshi ukuti aba batatu baliipeleshe mu kwafwilisha abantu abo bashaishibe nakalya. Mu kwangufyanya fye uuli onse mu Calavi amoneke ukwishiba pa lwa iyi mibombele yabo iya bukangalume.

[Futunoti]

[Icikope pe bula 18]

BaRoger bekete ubutanda pa numa ya kupususha abantu