Amafya Yasuka Yapikululwa!

ELENGANYENI icalo umo umwana onse afwaikwa no kutemwikwa nga nshi, kabili akwata abafyashi basakamana, ababa no kutemwa kabili abafwaisha ukupanda amano no kutungulula umwana wabo. Elenganyeni icalo umo umwana onse ali no mubili usuma no muntontonkanya, umwabula abana bendauka mu musebo, kabili umushaba abana bapusulwa insambu shabo isha bwana pantu babomba incito ilyo bali abaice pa mulandu wa kufwaya ubunonshi!

Bushe icalo ca musango yo kuti mwacitemwa? Ukwabula no kutwishika. Bushe kuti mwacetekela ukuti icalo ca musango yo cikabako? E fyo Inte sha kwa Yehova shitontonkanya, kabili shitontonkanya ifyo pa kuba ne milandu ibili.

Abafyashi Kuti Bapikululako Ubwafya Bumo

Ukwabula no kutwishika mulesumina ukuti abakalamba balikwata amaka ya kupikulula—limo limo no kucincintila—amafya yamo aya bana. Kwena, ici kuti cacitika fye nga ca kuti aba  bene bakalamba, bali abaitemenwa ukucite fyo. Cine cine, abafyashi bene ebengapwisha ulubali lwa bwafya lumo.

Ku ca kumwenako, abakalamba bakonka ukufunda kwa Baibolo ukwa kuti “umukashi teti alekane no mulume wakwe . . . no mulume eleka mukashi wakwe” tabakwata abana abacula pa mulandu wa kuba pa ng’anda apo abafyashi bapaatukana nelyo ukulekana.—1 Abena Korinti 7:10, 11.

Abakalamba baitemenwa ukumfwila ukufunda kwa Baibolo ukwa ‘kwenda busaka busaka nga mu kasuba; te mu kukolwakolwa,’ tabakwata abana bacula pa mulandu wa kuba na bafyashi bakunkuma ku bwalwa nelyo abakunkuma ku miti ikola.—Abena Roma 13:13; Abena Efese 5:18.

Abakalamba baitemenwa ukumfwila ukufunda kwa Baibolo ukutila “mutalukeko ku bulalelale” balafwa mu kucefyanyako amafya ya bana babo balya aba kuti bakushiwa ukwabula ukutemwikwa, ilingi line mu lupwa lwakwata umufyashi umo.—1 Abena Tesalonika 4:3; Mateo 19:9.

Abakalamba baitemenwa ukumfwila ukufunda kwa Baibolo ukutila, “Mwisonga abana benu, epali banenuka,” kabili “abatemwa abana babo” tabakabe na bana bakalipwa pa mulandu wa kubacusha mu nshila ishalekanalekana.—Abena Kolose 3:21; Tito 2:4.

Mu kwipifya, kuti twatila ati nga ca kutila abakalamba bonse bantu baitemenwa ukumfwila ukufunda kwa mu Baibolo uko Yesu afundile, ukwa kuti, “Fyonse ifyo mufwayo kuti abantu bacite kuli imwe, e fyo na imwe mucite kuli bene,” bushe kuti kwaba imintapendwa ya bana abashifwaikwa kabili abashatemwikwa?—Mateo 7:12.

Cilaleta insansa ukwishiba ukuti, kwaliba abakalamba abengi abaitemenwa ukucita fyonse ifyalandwa pa muulu. Lelo, ku ca bulanda, te bonse abacite fyo, kabili apa pene e paba ubwafya. Kabili nangu fye ni balya bene abaitemenwa basanga ukuti ukubombesha kwabo kulafulunganishiwa ku mulandu wa kukanapwililika kwa buntunse ne fintu fimbi ifyo bashingaba na maka ya kwalula. Abantunse kuti bapwishako amafya ya bana yamo, lelo te kuti babe na maka ya kupwisha yonse.

Ubuteko bwa Bulesa Ubukapwisha Amafya Yonse

Kalemba John Ruskin, uwacilumbulwa mu cipande cifumineko, acetekele sana amashiwi ya kuti “umulimo wa kubalilapo uo Icalo cakwata wa kumona ukuti umwana onse uwafyalilwa muli ico calo afwile ukuba mu ng’anda isuma, ukukwata ifya kufwala, ifya kulya, afwile no ukusambilila, ukufikila pa myaka ya kwishiba ukuipingwila.” Ruskin asumine ukuti, nangu cibe fyo, “pa kuti kube ukucite fyo Ubuteko bufwile ukukwata amaka pa bantu ayo pali ndakai tushitontonkanyapo.”

Ubuteko fye bweka ubutungililwa na maka ya bulesa e bwingaba na maka yasuma yantu Ruskin alandilepo. Kabili ubuteko bwa musango yo bwalilaiwa—bulya Yesu alumbwile pali Mateo 6:9, 10. Ilyo ubu buteko Lesa apanga bukalatungulula ifintu fyonse pe sonde, bukabomfya amaka ya buko pa bantu bonse—ukubateyanishisha amayanda, ifya kufwala, ifya kulya, no kusambilisha abatekwa ba buko bonse, na bana bene. (Esaya 65:17-25) Lelo ubu buteko bwapwililika bukacita na fimbi.

Ubufumu bwa kwa Lesa bukabwesesha abantu ku kupwililika, ukubafwa ukukusha abana mu kupwililika kwalinga. (Yobo 33:24-26) Abana bakakushiwa mu mutende na muli bumunyina bwa mwi sonde lyonse, nga fintu calembwa mu lupapulo lulanda pa Nsambu sha Bana. (Amalumbo 46:8, 9) Takwakatale akukabilwa na kabili Umwaka wa Bana uwa mu Calo Conse nelyo Ibungano ilya kulanda pa Nsambu sha Bana.

Ukubwesesha ubumi bwapwililika ku bafyashi na ku bana balemana ikaba milimo yayanguka kuli Kristu Yesu, Imfumu ya buteko bwa ku muulu. Ukuposha kwa kupapusha uko acitile ilyo ali pe sonde kwaba cishininkisho ca kuti akacite fyo. (Luka 6:17-19; Yohane 5:3-9; 9:1-7) Nangu fye kubuusha abana na bafyashi abafwa tawakabe mulimo wakosa uo ashingabomba!—Mateo 9:18-25.

Mwandi tulasekelela ukwishiba ukuti inshita ili mupepi ilyo Lesa akafwa abana pe sonde!

 [Akabokoshi ne Fikope pe bula 12]

Ubwafwilisho ku Bacaice

Inte sha kwa Yehova shifwaisha nga nshi ukwafwa abacaice ukutaluka ku mafya no kubalanga inshila isuma iya kubombelamo na mafya yashingatalukwa. E co pa myaka iingi balisabankanya impapulo ishingi ishalembelwa mu nshila ya kwafwa ku bacaice—e kutila ukutampila fye ku banono abashilafika pa mushinku wa kuya ku sukulu ukufika fye na ku bapungwe. Ishi mpapulo shisanshamo ifitabo pamo nga Icitabo Candi ca Malyashi ya mu Baibolo na Ifipusho Abacaice Bepusha—Ifyasuko Fibomba ukubikapo na tepu wa vidio uwakwata umutwe wa kuti Young People Ask—How Can I Make Real Friends? Kuti mwasanga ifi fyonse ku Nte sha kwa Yehova sha mu ncende mwikalamo nelyo kuti mwalembela kuli bakasabankanya ba uno magazini.

Kumfwa ku bana babo, Inte sha kwa Yehova shilanga abana ukuti balafwaikwa kabili balitemwikwa mu kulanshanya lyonse na bo amafya yabo. Abafyashi ilingi line babomfya amalyashi yasuma ayaba mu fya kwafwa filumbwilwe pa muulu kabili e pashimpwa programu ubako lyonse mu kukansha abacaice. Napamo kuti mwatemwa ukubomfya programu wapalako ku kukansha abana benu.