Ukulingana Na Baibolo

Bushe Yehova Ali Mulungu wa Luko?

MU FYALO ifingi pali lelo, ishina lya kuti Yehova lyaampana sana no kuteyanya kwa Nte sha kwa Yehova ukwa muno nshiku. Lelo, ili shina talisangwa fye mu maBaibolo yabomfiwa ne Nte sha kwa Yehova, lilasangwa na mu maBaibolo yamo ayo aba mu mipepele imbi babomfya. Cine cine, ishina lya kuti Yehova ilyaimininwako na Tetragrammaton (ifilembo fya ciHebere fine ifimininako ishina lya kwa Lesa) lyalibomfiwa pa myaka iingi.

Limo limo, Yehova etwa “Lesa wa bena Israele.” (1 Imilandu 17:24) Aya mashiwi yalenga bamo ukusumina ukuti ali fye mulungu wa luko uo abaHebere baashime ku bantu bambi nelyo ukuipangila fye abene. Karen Armstrong, uwalembele ibuuku lya A History of God (Ukutendeka kwa kwa Lesa) atile: “Pa kutendeka [Yehova] ali mulungu wakaluka uwa luko lwa bena Israele. Pa numa, napamo mu mwanda wa myaka uwalenga 7 na 6 B.C., bakasesema ba mu Israele . . . , bapangile uyu mulungu wa luko ukuba icishibilo ca kuti Lesa uushingalondololwa eko aba.”

Abengi abasoma ilyashi lya kale ilya mipepele balyesha ukufwaya ishina Yehova mu fyalembwa fya bena Kanani nelyo abena Egupti. Bambi basosa ukuti “lishina lya kale ilya luko” kabili te lya kwa Lesa walandwapo mu “Cipingo Cipya.” Bushe ico ca cine? Bushe cinshi cisokololwa ilyo twapoosa amano ku kubelenga Baibolo?

Yehova ni Lesa wa Bantu Bonse

Baibolo ilasuminisha ukuti Yehova alebisha sana uluko lwa bena Israele. Lelo, uyu te mulandu wa kumumwena ukuti mulungu wa luko. Umutumwa wa Bwina Kristu Paulo aipwishe ati: “Bushe ni Lesa wa baYuda  beka, mwa? Bushe te Lesa wa Bena fyalo pamo?” Paulo ayaswike shani? Atile, “Kwena, wa bena fyalo pamo.” (Abena Roma 3:29) Bushe ni Lesa nshi Paulo alelandapo? Kwena, muli kalata uyu wine uwa ku Bena Roma, ishina lya kuti Yehova lisangwamo imiku 19 muli Baibolo wa New World Translation. Ilyo umutumwa ayambwile amashiwi ya kwa kasesema umuHebere uwa ku kale Yoele, atile, te baYuda fye lelo “umuntu onse uwalilila kwi shina lya kwa Shikulu akapusuka.”—Abena Roma 10:13; Yoele 2:32.

Abena Israele tabasalile Yehova ukuba Lesa wabo; lelo, Yehova e wabasalile ku kucita ukufwaya kwakwe, e kuti, ku kupekanya inshila ya kwa Mesia. Na kabili ificitikila umulungu wa luko filakuma sana abantu ba muli ulo luko. Ilyo abantu bacimfiwa, umulungu na o ninshi wacimfiwa. Lelo te fyo cali kuli Yehova.

Mu cipingo Yehova apingile na Abrahamu, icatendeke ukubomba imyanda ya myaka iingi ilyo ubuKristu bushilabako, alaile amapaalo ku bantu ba nko shonse, ukulanga ukuti alitemwa abantu bonse. (Ukutendeka 12:1-3; Imilimo10:34, 35; 11:18) Davidi, Imfumu ya bena Israele, alangile ukuti icalo ca bena Israele te co Yehova akwete fye iyo, alikwete na fimbi atile, “Fya kwa Yehova pano isonde, ne fyaisulapo, pano nse na baikalapo.”—Amalumbo 24:1.

Pa numa lintu umwana wa kwa Davidi Solomone apeele itempele kuli Yehova, alangile ukuti kwali inshila iyo Yehova ali no kupepelwamo ku bantu bafuuka aba mu fyalo fyonse. Mwi pepo apepele pa kupeela itempele Solomone atile: “Na umbi umbi na o, uushili wa mu bantu benu abena Israele, ilyo akesa ukufuma mu calo ca kutali . . . no kupepa ukulola ku ng’anda ino, imwe muumfwe mu muulu mu bwikalo bwenu, no kucita umwabela conse ico umbi umbi alilila kuli imwe, ku kuleka abantu na bantu bonse ba pano isonde beshibe ishina lyenu, no kumutiina nga bantu benu abena Israele.”—1 Ishamfumu 8:41-43.

Ukukaana Abena Israele

Profesa C. J. Labuschagne alembele pa cibusa cali pali Yehova no luko lwa bena Israele ati: “Ilyashi lya Bena Israele lilangilila ukuti libili libili Lesa wa ‘luko’ lwabo aleba kwati te Lesa wa luko kabili alebataluka.” Mu mwanda wa myaka uwa kubalilapo ilyo Abena Israele bakeene Mesia, Yehova na o alikeene lulya luko.

Lelo, Abena Kristu bali no kutwalilila ukubomfya ishina lya kwa Yehova. Ilyo icilonganino ca Bwina Kristu calekula, aba nko shonse baishileba muli cilya cilonganino. Umutumwa Yakobo uwali muYuda, uwatungulwile ukulongana mu Yerusalemu, alandile pa lwa kwa Lesa ati “abalile ukupempula Abena fyalo ku kubuulilamo ishina lyakwe uluko lwa bantu.” Ngo bushinino bwa kuti ici calisobelwe, Yakobo lyene ayambwile ubusesemo bwa mwi buuku lya kwa Amose umo ishina lya kwa Yehova lisangwa.—Imilimo 15:2, 12-14; Amose 9:11, 12.

Alaafwa Bonse no Kusakamana Bonse

Na kabili pa kulanga ukuti Yehova ni Lesa wa bonse, Paulo alembele ati: “Takuli muncishanya ku muYuda no mwina Hela; pantu uyo wine e Shikulu wa bonse, uwacindama kuli bonse abalilila kuli wene.” (Abena Roma 10:12) Cine cine, Yehova kuti apaala bonse aba cumfwila.

Yehova alaya inshita ya ku ntanshi iisuma ku bana bakwe bonse abantunse aba bucishinka ne cumfwila, te mulandu no luko nelyo umushobo wabo. Icebo cakwe cilondolola ukuti baba “fisuma fya nko shonse.” (Hagai 2:7) Aba bantu baleshiba Yehova no kumutemwa. Pa lwa bene ibuuku lya kulekelesha ilya mu Baibolo litila: “Abena fyalo fyonse bakesapepela ku menso yenu [Yehova]; ico nafimoneka ifya bulungami fyenu.”—Ukusokolola 15:4.

[Icikope pe bula 28]

Mose naikata Amafunde Ikumi