Bomfyeni Inshita ku Fyacindama

“Inshita iisheleko naicepa.”—1 Abena Korinti 7:29.

“UKUTOLAUKA fye mu menshi no kulayasabaula te kutila ninshi umuntu alishiba ukusamba,” e fyo ba Michael LeBoeuf balembele mu citabo cabo icitila Working Smart.

Kanshi umuntu nga alicincila, te kutila ninshi alacita ifyacindama. Pitulukeni mu fyo mwacitile umulungu wapwile. Mwabomfeshe shani inshita yenu? Finshi mwalecita ifyalengele ukuti mupamfiwe sana? Bushe mulemona ukuti mulingile ukulashako inshita pa kuti mulecita ifintu ifyo mwacindamika?

Tontonkanyeni pa fyo Yesu asobele pali shino nshiku umo abantu baba abapamfiwa. Atile ilyo impela ya cino calo ikapalama na lintu icalo cipya icalungama ica kwa Lesa cikaba mupepi, abasambi bakwe bakaba abapamfiwa. Finshi bakalacita? Bakalabila “imbila nsuma ya bufumu [bwa kwa Lesa].” Yesu alandile no kuti abantu abengi bakaba abapamfiwa sana ica kuti bakafilwa no kukutika ku mbila nsuma. Bakaba abapamfiwa ne fintu fya mikalile ya pano sonde. Akonkenyepo no kuti abakapamfiwa ica kuti bafilwa no kukutika ku mbila nsuma iya Bufumu bakonaulwa.—Mateo 24:14, 37-39; Luka 17:28-30.

Pali lelo, Inte sha kwa Yehova baleshimikila imbila nsuma iya Bufumu mu fyalo ukucila pali 230. Nga filya Yesu asobele, abantu abengi balakaana ukukutika, batila “tabakwete inshita.” Nomba nangu ca kutila mwalipamfiwa, tulemulomba ukuti musangeko inshita iya kusambilila Baibolo pa kuti mwishibe ifyo isambilisha pa Bufumu bwa kwa Lesa. Tulesubila ukuti nga mwasambilila pa mapaalo ayo Lesa akapeela abantu, mukasumina ukuti ukukutika ku mashiwi yaba muli Baibolo no kuyakonka e nshila isuma iya kubomfeshamo inshita, no kuti kwalicindama nga nshi. *

[Futunoti]