Ifyo Baibolo Isambilisha

Bushe Mufwile Ukulipila Bashimapepo pa Milimo Bamubombela?

MU FYALO ifingi, bashimapepo ba mu macalici ya Bena Kristu na ba mu macalici yashili ya Bena Kristu balalipilisha pa milimo babombela abantu. Iyi milimo kuti yaba kubatisha abantu, ukuufya abantu, nelyo ukupepesha pa fililo. Kabili umutengo bapingula ulakula sana.

Bashimapepo bamo ubuteko bulabafolesha pa kubomba imilimo yabo iya bushimapepo na lintu bapepa amapepo cila bushiku ilyo aba buteko tabalatendeka ukulanshanya imilandu ya calo. Abantu kuti batasha pa milimo ya musango uyu, kabili amacalici yalakabila indalama pa kuti ifintu file-enda bwino. Lelo bushe Baibolo isosa ukuti abantu bafwile ukulipila pa milimo ya musango uyo nelyo ukulenga abantu ukulayumfwa ukuti bafwile fye ukulipila?

Bushe ‘Mayanda ya Makwebo’?

Ilyo Yesu Kristu ali pano isonde, bashimapepo ba baYuda ne ntungulushi shimbi baleshukila nshita ya mapepo nge nshita ya kupangilamo ulupiya, maka maka pa nshita ya Ca Kucilila. Bushe Yesu alemona ifi balecita ukuti fyali fye bwino? Iyo! Na kuba, Baibolo itweba ukuti “aposaike ne ndalama sha balekabula indalama no kupenuna amatebulo yabo.” Atile: “Mwilacita ing’anda ya kwa Tata ing’anda ya makwebo!”—Yohane 2:14-16.

Ica musango uyu calicitike na mu nshita ya kwa kasesema Mika, uwaliko mu myaka ya ba 700 B.C.E. Baibolo itila intungulushi sha mapepo isha bena Israele, ‘shalipatile umulinganya,’ kabili bashimapepo ‘balefwaya ukubalipila ilyo balefunda.’ Lelo, pa nshita imo ine, baletila Lesa alebatungilila, kabili baleti: “Bushe Yehova tali mu kati kesu?” (Mika 3:9, 11) Lelo Yehova Lesa tali mu kati kabo kabili talebatungilila. Alipatile ifyo balecita kabili abomfeshe kasesema wakwe ukulenga abantu ukwishiba ifyo apatile imicitile yabo.

Bashimapepo abengi na lelo line bacita fimo fine ne fyalecita bashimapepo ba kale. Pa mulandu wa fyo bacita balenga umo bapepela ukuba ‘amayanda ya makwebo.’ Na kuba, ifilonganino fya mapepo ifingi filacita amakwebo, kabili ilingi line fishitisha ifipasho ne fintu fimbi ifyo babomfya mu mipepele yabo pa mutengo uukalamba. *—1 Yohane 5:21.

“Mwapeelwe fye Ubupe, na Imwe Mulepeela Fye”

Ilyo Yesu alepeela abatumwa bakwe umulimo wa kushimikila imbila nsuma, uwa kuposha abalwele, no wa kubusha abafwa, atile: “Mwapeelwe  fye ubupe, na imwe mulepeela fye.” (Mateo 10:7, 8) Cailanga fye ukuti abasambi bakwe aba cine tabalingile ukulalipilisha abantu pa milimo balebabombela. Kabili, Yesu umwine alibalangile ku fyo alebombela bambi ukwabula ukubalipilisha.

Ukukonka ifyo Yesu alecita, umutumwa Paulo abombele umulimo wakwe “ukwabula ukulipililwapo.” (1 Abena Korinti 9:18) Ilyo alekabila indalama, alebomba umulimo wa kupanga amatenti ayo aleshitisha. (Imilimo 18:1-3) Kanshi, e co alandiileko bamishonari banankwe ati: “Tatuli nga bengi abaya baleshitisha icebo ca kwa Lesa.” (2 Abena Korinti 2:17) Nomba inga indalama sha cilonganino, ishibomfiwa mukushita apa kupepela nelyo ukusonkela umwa kupepela, shifuma kwi?

“Lesa Atemwa Uupeela ne Nsansa”

Indalama isho Inte sha kwa Yehova shibomfya shifuma ku bantu abaitemenwa fye ukusangula. Bakonka amashiwi ya mu Baibolo ayatila: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Pali uyu wine mulandu, ba Nte tabashitisha amabuuku yabo nelyo ukulipilisha pa milimo ya mapepo iyo babomba, pamo nga ukubatisha abantu, ukuufya abantu, nelyo ukulanda ilyashi lya cililo. Kabili tabapoka ica pe kumi nelyo ukupishamo imbale ilyo balelongana. Onse uulefwaya ukusangwilako ku mulimo wabo uwa kushimikila uubombwa icalo conse kuti apoosamo isho alefwaya mu tubokoshi tuba pa fifulo balonganinapo ukwabula uuli onse ukwishiba isho apoosamo.

Inte sha kwa Yehova isonde fye lyonse balasangula indalama isha kubomfya ku Mayanda ya Bufumu, ku Fikuulwa fya Kulonganinamo, isha kubomfya mu maofeshi yabo ayakalamba, ne sha kubomfya mu fikuulwa bapulintila amabuuku yabo, e lyo ne sho babomfya pa kwafwilisha abaponenwa na masanso. Bamo bapeela fye ishinono nga mukamfwilwa umupiina uo Yesu atashishe. (Luka 21:2) Bamo balapeela ishingi. Te mulandu ne sho umuntu apeela, bonse abakonka ifyo Baibolo ilanda no kupeela ukulingana ne fyo bakwete balomfwa bwino ilyo bapeela kabili Lesa alabapaala e lyo balaba ne nsansa.—Imilimo 20:35; 2 Abena Korinti 8:12.

[Futunoti]

BUSHE MWALITONTONKANYAPO PALI AYA MEPUSHO?

● Mashiwi nshi Yesu aebele abaleshitisha mwi tempele?—Yohane 2:14-16.

● Bushe umutumwa Paulo alelipilisha pa milimo ya kwa Lesa iyo alebombela abantu?—2 Abena Korinti 2: 17.

● Kupeela nshi Yehova atemwa?—2 Abena Korinti 9:7.

[Amashiwi pe bula 15]

“Mwilacita ing’anda ya kwa Tata ing’anda ya makwebo!”—Yohane 2:14-16