Putuleni no Kusunga

Inshila 20 Isha Kusangilamo Inshita

“Mule-enda mano mano . . . , mulebomfya bwino inshita yonse iyo mwashukila.”—Abena Kolose 4:5.

NGA mwaishiba ifyo mufwile ukucita ne nshita mufwile ukuficita, icafya kutendeka ukucita ifyo fine mulefwaya. Ifyebo fyakonkapo kuti fyamwafwa.

1 MULELEMBA IFYO MULEFWAYA UKUCITA CILA BUSHIKU. Tantikeni ifyo mulefwaya ukucita ukulingana ne fyo mulefwaya ukubalilapo. Shileni pa fyo mwalapoosapo inshita iikalamba. Congenipo ifyo mwapwisha. Ifyo mushipwishishe, mufisanshe pa fya bushiku bukonkelepo.

2 NGA MWAKWATA AMAKALENDA AYENGI LEMBENI FIMO FINE PALI YONSE. Nga tamulelemba fimo fine pa makalenda yonse, kuti mwalabako na ku fyo mwacilinga ukucita. Nga ca kutila kalenda imo yaba pa kompyuta e lyo imbi yaba pali kakompyuta ka mu minwe, lembenipo fimo fine pali yonse yabili.

3 LEMBENI IFYA KUBOMBA IYO MILIMO no kulondolola fyonse ifikumine iyo milimo e lyo no kufitantika ukulingana ne fyo mukatampilapo ne fyo mukalekeleshako.

4 MULEBALILAPO UKUTANTIKA IMILIMO IICINDAMISHE. Tacakaleyafya ukusanga inshita ya kucita ifishicindeme sana.

5 PANGENI UKUCITA IFYO MWINGAKUMANISHA. Mwilaimikila amabuyo ayo mushingakumanisha ukufikapo, lelo imikeni ubuyo bwa kuwamyako imibombele yenu.

6 MULEIBUKISHA UKUTI TAMWAKAKWATE INSHITA YA KUCITA FYONSE. Balilenipo ukucita ifyacindamisha. Kuti mwacita shani nga kwaisa milimo imbi iilefwaikwa ukubombelwapo bwangu nelyo iifwile fye ukubombelwapo? Nga te kuti muileke fye nangu ukupeelako bambi abakumwafwa, kuti cawama ukukanapoosapo inshita iikalamba. Imilimo imo iishicindeme kuti mwaisaibombelapo imyeshi ya ku ntanshi nga cakabilwa, nelyo limbi te kuti muibombelepo no kuibombela. Mulepoosa inshita iikalamba pa fyo mulemona ukuti e ficindeme sana ifingamulenga mwafikilisha amapange yenu.

7 LEMBENI IFYO MUPOOSAPO INSHITA. Pa kwishiba uko inshita ipwila, mulelemba inshita iyo mulepoosa pa fyo mulecita pa mulungu umo nelyo ibili. Bushe inshita iikalamba ipwila ku fintu ifishacindama? Bushe abamupumfyanya ilyo mulebomba bamo bene? Bushe ni inshita nshi nelyo ni nshiku nshi bamupumfyanya sana? Mwilacita ifyo mushacipanga ukucita pantu kuti fyamupwishisha fye nshita.

8 MULETANTIKA FYE IFINONO. Nga mwatantika ifintu ifingi mu bushiku bumo, pamo nga ukuya mu kushita ifya kulya, ukulungisha motoka, ukutangata abeni, ukuya mu kutamba filimu, no kubelenga ifyo mushilabelenga, mukalabutauka fye kabili tamwakaipakishe ukucita ifi fintu.

 9 CEFYENIKO IFYA KUMUPUMFYANYA. Bikenipo icishibilo ca kuti kwiba aba kumupumfyanya inshita imo ilyo mulebomba kano fye nga cayafya sana. Nga mulefwaya kuti mwashimya na foni pali iyi yine nshita. Na kabili, shimyeni fyonse ifingamupumfyanya.

10 TANTIKENI UKUBOMBA IMILIMO IYAKOSA PA NSHITA MULI NA MAKA.

11 BOMBELENI BWANGU PA MILIMO IYO MUSHITEMENWE. Nga mwaibombelapo mukakwata amaka ya kubomba imilimo iishayafya sana.

12 MULESHAKO INSHITA YA KUCITAMO IFYO MUSHILE-ENEKELA. Nga mulemona ukuti pa kuti mufike uko muleya kuti mwaenda amamineti 15, tendekeniko ilyo kwashala amamineti 25. Nga mule-enekela ukuti uko muleya mwalapwako iawala limo, lundeniko amamineti 20. Muleshako inshita iyabula ukutantikapo ifili fyonse.

13 MULEBOMFYA BWINO INSHITA MUSHILATENDEKA UKUBOMBA UMULIMO UMBI. Ilyo mulebeya imyefu, kuti mulekutikako na ku lyashi lya pa mulabasa nelyo ku fyo mwakopa pa matepu nelyo pa ma CD. Ilyo mulelolela motoka nangu ilyo muli mu motoka, kuti mulebelengako fimo. Kwena kuti mwabomfya iyi nshita na ku kutuushako. Nomba mwilayonaula ica kuti pa numa mwalalanguluka no kulanguluka.

14 MULEANGUSHA INCITO. Tutile mukwete ifyakucita ifili 10, bushe pali fibili ificindeme sana? Bushe incito mulebomba te kuti yanguke nga mwabalilapo ukubombela apalemoneka ukwafya sana?

15 NGA MWAMONA UKUTI IMILIMO YAFULA, lembeni umulimo umo na umo pa kapepala kamo kamo. Lyena akanyeni utupepala pabili, no kulembapo ukuti: “Imilimo ya Lelo” ne “Milimo ya Mailo.” No bushiku bukonkelepo, mufwile ukucita cimo cine.

16 MULETUUSHAKO MU NSHITA MU NSHITA PA KUTI MULEKWATA AMAKA. Nga muletuusha bwino mwakulakwata amaka ya kubomba imilimo mu nshita mwapiminwa kabili te kuti muleshala pa ncito pa kuti mupwishishishe imilimo.

17 LEMBENI IFYO MULETONTONKANYA. Lembeni ubwafya, londololeni umulandu bulemupumfyanishisha kabili lembeni inshila shalekanalekana isho mwingapwishishamo ubwafya.

18 MWILAPOOSA INSHITA PA MULIMO UUPWILE. Umulimo nga naupwa tendekeni bwangu bwangu ukubomba umbi uukonkelepo ukucindama.

19 MWILALALIKISHA IMILIMO. Mwilalolela lilya umutima ulefwaisha ukubomba e lyo mwatendeka. Tendekeniko fye apo pene.

20 KONKENI IFIKAMUWAMINA. Ifi twalandapo te kutila e fyo mufwile fye ukulakonka. Kuti mwamona mwe bene ifingabomba bwino ukulingana ne fyo ifintu fili e lyo ne fyo mulekabila.