Lombeni Ubwafwilisho

“Nga umo ayansha uuli eka, babili kuti bamucimfya.”—Lukala Milandu 4:12.

NGA ca kuti kuli abaletwafwilisha, kuti twacimfya icilwani, nelyo ubwafya ubuli bonse. E co nga mulefwaya ukuleka ukupeepa fwaka, kuti cawama mwalomba ubwafwilisho kuli balupwa na ku fibusa nelyo ku uuli onse uwingamutekanishisha pa kumwafwilisha.

Abo mwingafwaya ukuti bamwafwilishe ni balya abaleka ukupeepa, pantu kuti bamumfwikisha no kumulangako ifyo bacitile pa kuti baleke ukupeepa. Ba Torben, abekala ku Denmark kabili Bena Kristu, batile, “Ifyo bambi balengafwilisha e fyalengele ukuti ndeke.” Ba Abraham, abekala ku India, batile: “Ukutemwa kwine kwine uko balupwa e lyo na Bena Kristu banandi balenanga e kwangafwile ukuleka ukupeepa fwaka.” Lelo inshita shimo ukwafwa ukufuma kuli balupwa na ku fibusa takufikapo sana.

Ba Bhagwandas batile, “Nalepeepa fwaka pa myaka 27, lelo pa mulandu wa kusambilila ifyo Baibolo isosa pa fintu ifikowesha umubili, napingwilepo ukuleka ukupeepa. Nalyeseshe ukuleka. Napangile ifibusa fimbi. Kabili naile na kulya bafunda abantu pa kuti bampandeko amano. Tapali icabombele pali ifi. Bushiku bumo nasukile napepa kuli Yehova no kumulomba ukuti angafwe ukuleka ukupeepa. Lyena nasukile nalekelela ukupeepa!”

Icintu na cimbi icacindama ico mwingacita kuipekanishisha amafya yengesa. Mafya nshi aya yene? Icipande cikonkelepo calatulondolwela.

[Akabokoshi pe bula 5]

BUSHE MUFWILE UKUBOMFYA UMUTI PA KULEKA UKUPEEPA

Imiti iibomfiwa ku kwafwilisha abapeepa ukuleka ukupeepa, pamo nga uto bakambatika pa mubili utwakwata nicotine, yalenga utwampani utupanga iyi imiti ukukwatilamo indalama ishingi nga nshi. Ilyo mushilapingulapo ukubomfya iyi miti, tontonkanyeni pali aya mepusho:

Busuma nshi bwabamo? Batila imiti iingi iilenga umuntu ukuleka ukupeepa taileta amafya yambi ayesako ilyo umuntu ale-esha ukuleka ukupeepa. Lelo bambi balatwishika nga kuti yabomba fye bwino pa nshita ntali.

Bubi nshi bwingabamo? Imiti imo kuti yalenga umuntu ukuba no muselu, ukupopomenwa, no kulatontonkanya pa kuipaya. Cimbi na co ico mufwile ukwishiba ca kuti imiti ya kubomfya nicotine yabipa fye nga fwaka. Kanshi umuntu uulebomfya iyi miti ninshi acili fye uwakunkuma.

Bushe kwaba nshila shimbi ishakulekelamo ukupeepa? Ukulingana no kufwailisha kumo, abantu abengi abalekele ukupeepa balekele fye ukwabula ukubomfyapo umuti.