Ifyo Baibolo Isambilisha

Bushe Ifibanda Ni Bani?

ABABA mu filonganino fya mapepo ifyalekanalekana basumina ukuti kwaliba ifiwa, ifipuku, ne fibanda. Bambi batila iyi mipashi ibi, bambi nabo batila yaliba bwino, e lyo bambi nabo batila ibi kabili isuma. Bambi balakaana abati takwaba imipashi, ifyo abantu batila e mipashi fyakwelenganya fye. Nga Baibolo yena ilandapo shani?

Baibolo isambilisha ukuti Lesa Mupashi kabili isosa no kuti ilyo alepanga ifintu, abalilepo ukupanga imipashi. (Yohane 4:24; AbaHebere 1:13, 14) Kabili Baibolo ilalanda na pa mipashi yabipa, iyo limo limo ita ati ifibanda. (1 Abena Korinti 10:20, 21; Yakobo 2:19) Lelo taisambilisha ukuti Lesa e wapangile ifibanda. Ninshi aba beta ati ifibanda ni bani, kabili bafumine kwi?

“Bamalaika Ababembwike”

Ilyo Lesa apangile bamalaika alibapeele amaka ya kuisalila, nampo nga kucita icisuma nelyo icabipa. Ku ca bulanda, pa numa ya kubumbwa kwa bantunse, bamalaika iminshipendwa basalilepo ukucita icabipa pa kupondokela Lesa.

Satana, malaika uwabipisha e wabalilepo ukupondoka. Yesu Kristu asosele ukuti: “Tatwalilile mu cine.” (Yohane 8:44) Cinshi calengele ukuti Satana apondokele Lesa? Atendeke ukukumbwa nelyo ukufwaya ukupepwa ukufwile ukuya fye kuli Kabumba eka, kabili acitile ifyalingene no kufwaisha kwakwe ukwa kuba lesa. E fyo aipangile umwine “Satana,” ishiwi ilipilibula ukuti “kakaanya.” Ilyo Ilyeshi lya mu nshiku sha kwa Noa lishilabako, bamalaika bambi bali-ilundileko kuli Satana lintu bashiile ififulo fyabo ifya ku muulu, ukufwala imibili ya bantu no kwisaikala pano isonde. (Ukutendeka 6:1-4; Yakobo 1:13-15) Ilyo kwali Ilyeshi, cimoneka kwati “bamalaika ababembwike” balisangwike imipashi na kabili. (2 Petro 2:4; Ukutendeka 7:17-24) Mu kuya kwa nshita, baishileishibikwa ukuti ifibanda.—Amalango 32:17; Marko 1:34.

Bamalaika ababula icumfwila nomba baisangile mu mibele iyapusanako na ilya baleipakisha ilyo bashilapondoka. Pali Yuda 6 tubelengapo ukuti: “Bamalaika abashasungile ififulo ifyo bakwete pa kubalilapo lelo abashile ififulo fyabo ifyabalinga, [Lesa] abasungila mu cifungo ca pe umwafiita fititi ukulolela ubupingushi pa bushiku bukalamba.” Ca cine, Lesa tasuminishe aba bamalaika ukubwelela mu fifulo bakwete ku muulu. Lelo, abapoosele umwaba kwati “cifungo ca pe umwafiita fititi,” ica kuti tabeshiba nangu fimo ifilecita Lesa.

“Icilufya Aba Pano Isonde Bonse”

Nangu ca kutila ifibanda fyalibindwa ukufwala na kabili imibili ya bantunse, fyalikwata sana amaka ya kulenga abantu ukulatontonkanya pa fyabipa no kulacita ifyabipa. Na kuba, Satana pamo ne fibanda fyakwe ‘balalufya aba pano isonde bonse.’ (Ukusokolola 12:9; 16:14) Mu nshila nshi? Maka maka ukupitila mu “fisambilisho fya fibanda.” (1 Timote 4:1) Ifi fisambilisho, maka maka ifya macalici, fyalipofwisha amatontonkanyo aya bantu abengi pa kuti beishiba icine pali Lesa. (2 Abena Korinti 4:4) Moneni ifya kumwenako fimo fimo.

● Icisambilisho ca kuti umuntu nga afwa tafwa. Ifibanda e fi-ipanga kwati bantu abafwa no kumonekela ku ba mweo nelyo ukulanda nabo pa kutila fye filenge abantu ukucetekela ukuti aba mweo kuti baumfwana na bafwa. Kabili ubu bufi bulenga abantu ukucetekela ukuti umuntu nga afwa, alakonkanyapo ukuba uwa mweo. Lelo Baibolo itila: “Abafwa, tabaishiba  akantu nangu kamo.” (Lukala Milandu 9:5, 6) Apo abafwa ‘balitentemukila ukwatalala tondolo,’ te kuti balumbanye Lesa.—Amalumbo 115:17. *

● Ukubipa kwa mibele. 1 Yohane 5:19 itila: “Icalo conse calaala mu maka ya mubifi.” Satana ne fibanda fyakwe balabomfya bubi bubi amaka yabo ukupitila mu fya kusabankanishishamo ilyashi ne nshila shimbi ku kulenga abantu balemona kwati kuti bacita fye fyonse ifyo balefwaya. (Abena Efese 2:1-3) E calenga ukuti imibele yabipa iyalekanalekana, ukusanshako fye ne misango iishili ya cifyalilwa iya bulalelale, ukuseeka nga nshi pali lelo. Iyi mibele yabipa e yo abantu bamona ukuti e isuma, kumfwa imibele iisuma iyo Baibolo ilandapo abengi batila mano ya kale nelyo ati uulekonka ifyo ilanda ninshi tashiba ifingi.

● Ukutungilila ukupupa imipashi. Umutumwa Paulo akumenye umukashana umo umubomfi, uwali no “mupashi wa kubuka,” kabili “aleletela bashikulu wakwe ifyuma ifingi mu kubuka.” (Imilimo 16:16) Paulo alikeene ukukutika kuli ulya mukashana pantu alishibe ukuti ifibanda e fyamupeele amaka. Kabili Paulo talefwaya ukufulwisha Lesa pantu kuli ena imisango yonse iya kupupa imipashi pamo nga ukubomfya intanda pa kusobela ifintu no kwipusha ku mipashi fya bunani.—Amalango 18:10-12.

Icingilileni ku Fibanda

Bushe kuti mwaicingilila shani ku mipashi yabipa? Baibolo isosa ukuti: “Nakileni Lesa; lelo kaaneni Satana Kaseebanya, na o akafulumuka kuli imwe.” (Yakobo 4:7) Tukaicingilila ku fibanda nga tulekonka uku kufunda kwa mu Baibolo, icitabo ca mushilo icisokolola “imicenjelo” ya kwa Satana ne ya fibanda fyakwe. (Abena Efese 6:11; 2 Abena Korinti 2:11) Na kabili Baibolo ilatweba ukuti, imipashi yabipa na bonse abakaanya Lesa tabakatwalilile ukubapo. (Abena Roma 16:20) Pa Amapinda 2:21 patila: “Abalungama e bakekala pa calo, na ba kaele e bakashalapo.”

[Futunoti]

BUSHE MWALITONTONKANYAPO?

● Bushe Lesa e wapangile ifibanda?—2 Petro 2:4.

● Bushe kuti mwalanda na bafwa?—Lukala Milandu 9:5, 6.

● Bushe kuti mwaicingila shani ku fibanda?—Yakobo 4:7.

[Icikope pe bula 13]

Ifibanda filenga abantu ukucita ifyabipa mu nshila ishingi