“Nalimo Kuti Lwaba fye Lwimbo”

● Ba Juliana bali bakoloci abaleikala ku calo ca Philippines. Bali Bena Kristu abo abengi batemenwe kabili balwele ubulwele bwa Alzheimer. Ubu bulwele bulenga umuntu ukulalaba sana. Tabaleishiba fye na bana babo. Nangu ca kutila tabaleishiba abantu, naleya mukubamonako nga napitila ku cifulo baleikala.

Ba Juliana tabale-enda, balelala fye mu busanshi kabili pa kumona pa nse balelolesesha fye pa windo. Caleafya ukwisha nabo pantu tabalenjibukisha. Bushiku bumo, balindolekeshe lelo tabanjishibe. Nabepwishe nati, “Bushe mucili mwalimwishiba Yehova?” Nabashimikileko ifyacitike ilyo naleshimikila no kubepusha ifipusho na fimbi, lelo bamoneke ukuti ifyo nalandile tabaishibe umo fyalolele. Lyena natendeke ukwimba ulwimbo, nomba ifyaishilecitika fyalinsansamwishe nga nshi!

Ba Juliana bapilibwile umutwe no kundolesha kabili batendeke ukwimbila pamo na ine! Lelo nshatwalilile ukwimba pantu nshasungiile ulwimbo lonse ku mutwe mu lulimi lwa ciTagalog ulo balanda kuli iyo ncende. Lelo ba Juliana bena batwalilile fye ukwimba. Balibukishe ifikomo fyonse fitatu. Mukwangufyanya naebele uo twali nankwe ukuya-ashima icitabo ca lwimbo kuli Nte uwaleikala lwa mupepi. Awe bwangu bwangu fye aliletele icitabo. Nshaishibe inambala ya lwimbo, lelo napapile fye naisula pe bula apali lulya lwine lwimbo. Iyi nshita twaimbiile pamo ulwimbo lonse! Lintu naipwishe ba Juliana nga baleibukishako inyimbo na shimbi, batendeke ukwimba ulwimbo lwa kale ulwa cintemwa ulwa mu ciFilipino.

Nabebele nati “Awe ba Juliana te lwimbo lwa pa cilimba ndefwaya lelo ulwimbo lwa ku Ng’anda ya Bufumu.” * Lyena natendeke ukwimba ulwimbo lumbi ulwaba mu citabo ca nyimbo, kabili nabo balitendeke ukwimbako. Ilyo nabaloleshe namwene ukuti bali ne nsansa. Balemoneka fye ukuti nomba baleibukishako fimo, kabili balemwentamwenta fye.

Ilyo twaleimba, abena mupalamano baishile ulubilo ukufwaya fye ukwishiba uko iciunda ca nyimbo calefuma. Baishileiminina pa windo baletamba no kumfwa uko twaleimba. Ala caliweme nga nshi ukumona ifyo inyimbo shafikile ba Juliana pa mutima! Shalengele bebukishe ulwimbo lumo.

Kuli ili lyashi, nasambilileko ukuti te kuti wishibe icingasansamusha abalwala kwati ni ba Juliana. Nalimo kuti lwaba fye lwimbo!

Tapakokwele sana apo ifi nashimika fyacitikile, ba Juliana balifwile. Icalengele njibukishe ili lyashi ni nyimbo ishipya ishifika pa mutima isho Inte sha kwa Yehova bafumishe mu 2009. Nga mulefwaya ukukwatako ishi nyimbo ishisuma, kuti mwaipusha ba Nte abo mwapalamina nabo.

[Futunoti]