Ilyo mwaleishishanya, mwaleumfwana na bena mwenu muli fyonse fye. Nomba apo mwalyupana, ifintu fyalyaluka nga nshi, ifyo mwale-enekela te filecitika mu cupo cenu kabili ici calilenga ukuti mukane ukuba ne nsansa.

Nangu cibe ifyo, ifintu kuti fyawama mu cupo cenu. Lelo intanshi, tontonkanyeni pa calenga ukuti mwiba ne nsansa pa fyo icupo cenu caba.

Ifintu filatendeka ukwaluka. Imilimo ya pa ng’anda, ukukusha abana, e lyo ne fya kwikala na balupwa ba bena mwenu, nalimo kuti fyalenga insansa mwakwete ukutendeka ukupwa. E lyo limo kuti mwakwata amafya ayo mushale-enekela pamo nga indalama ukupwa nelyo incito, e lyo limo kuti mwatendeka ukusakamana umuntu uulwalilila mu lupwa. Ifi fyonse kuti fyalenga icitemwiko mwakwete mu cupo ukucepelako.

Ukulafilwa ukumfwana nga mwapusana. Ilingi abantu nga baleishishanya, tababika sana amona ku kumona ifyo bapusanamo. Nomba nga baupana, ilyo besa mu kumona ukuti balipusana icine cine mu fyo balanshanya, ifyo babomfya indalama, na mu fyo bapwisha amafya. Kuti mwasanga ukuti abena mwenu batendeka ukulakalipa sana pa fintu ifya kuti kale tabalebikako na mano.

Ukuleka ukubika amano ku fyo abena mwenu baleyumfwa. Nga mulakalifya abena mwenu mu milandile nelyo mu ncitilo, mu kuya kwa nshita abane mwenu kuti baleka ukulamweba ifyo baleyumfwa. E lyo ku cabulanda nalimo kuti batendeka no kutemwa umwaume nelyo umwakashi umbi.

Ukwenekela ukuti mukalaba fye ne nsansa mu cupo. Abantu bamo ilyo baleupa nelyo ukuupwa bamona fye kwati nabasanga ulya wine fye balingile ukuba nankwe mu bumi bwabo bonse. Kwena ifi batontonkanya fyaliba fye bwino, lelo ukutontonkanya kwa musango uyu e kulenga ukuti bakwate amafya mu cupo. Nomba nga batendeka ukukwata amafya mu cupo e lyo batampa ukumona kwati balilufyenye ukuupa nelyo ukuupwa kuli uyo muntu.

Mulebika sana amano ku fisuma ifyo abena mwenu bacita. Citeni ifi: Lembeni ifintu fitatu ifyo mwatemwa sana pa bena mwenu. Nalimo kuti mwalemba ifi fintu ku numa ya cikope ca pa bwinga nelyo kuti mwasungila muli foni. Mulebelengapo libili libili pa fyo mwalemba pa kuti muleibukisha icalengele mupane na bena mwenu. Nga mulebika sana amano ku fisuma ifyo abena mwenu bacita cikamwafwa ukulaikala mu mutende kabili cikalenga mukalesuulako fye ku filubo bacita.—Ilembo ilingamwafwa: Abena Roma 14:19.

Mulekwatako inshita ya kuba fye babili. Ilyo mushilaupana, mufwile mwalekwatako inshita ya kuba fye mweka babili no kucita ifintu fimo capamo. Na ino ine nshita, mulingile ukulasanga inshita ya kuba na bena mwenu. Limo limo kuti mwapekanya ukuya ku ncende imo iisuma babili fye. Ukucita ifi kukalenga mukatemwane sana ica kuti nangu mwakwata amafya, mukalaishiba ifya kucita.—Ilembo ilingamwafwa: Amapinda 5:18.

Mule-eba abena mwenu ifili ku mutima. Nga ca kuti abena mwenu balanda nelyo bacita fimo ifyamukalifya, kuti cawama ukusuulako fye. Mwilaleka ukusosha abena mwenu. Bwangu bwangu lanshanyeni pa fyacitika mu mutekatima.—Ilembo ilingamwafwa: Abena Efese 4:26.

Muleiluka. Ico mufwile ukwishiba ca kuti tapali nangu umo pali imwe uufwaya ukukalifya umunankwe. Kanshi nga mwakalifya abena mwenu, lombeni ubwelelo kabili bebeni ukuti te kubakalifya mwaciminapo. Kabili lanshanyeni pa fintu fimo ifyo mushifwile ukulacita pa kuti mwilakalifyanya. Mulekonka filya Baibolo ilanda ukuti: “Mubelane icikuuku, mube aba mitima ya nkumbu, abaitemenwa ukubelelana uluse.”—Abena Efese 4:26.

Mwilaenekela ukuti tamwakalekwata amafya. Baibolo ilanda ukuti: “Aboopa nelyo ukuupwa bakaba na macushi.” (1 Abena Korinti 7:28) Kanshi nga mwakwata amafya mu cupo cenu, tamulingile ukusondwelela bwangu ukuti mwalilufyenye ukuupa nelyo ukuupwa ku bena mwenu. Lelo bombeleni pamo pa kuti mupwishe amafya mukwete kabili twalilileni ‘ukushipikishanya no kubelelana uluse.’—Abena Kolose 3:13.