Twebeni icalengele musuminine ukuti ifintu fyasangwike fye.

Nangu ca kutila nalepepa ku Katolika ukufuma fye ku bwaice, naletwishikako fimo pali Lesa. Ku ca kumwenako, nalikeene sana ukusumina muli Lesa uwoca abantu mu mulilo wa pe. E ico ilyo abaletufunda ku yuniversiti bansambilishe ukuti ifya mweo fyasangwike fye, te Lesa wafipangile, nalisumiine pantu nalemona kwati kwali ifishinka ifyalelanga ukuti ifyo balelanda fya cine. Na ku calici nalepepa, balesambilisha ukuti ifintu fyasangwike fye, lelo baleti Lesa e waletungulula pa kuti fisanguke.

Cinshi calengele mutendeke ukusambilila Baibolo?

Umwina mwandi, Susana atendeke ukusambilila Baibolo ne Nte sha kwa Yehova, abamulangile ifyo Baibolo ilanda, ifilanga ukuti Lesa tooca abantu mu mulilo wa pe. * Balimulangile na filya Lesa alaya ukuti akalenga cino calo ukuba paradaise. * Ifyo balemusambilisha fyaleumfwika ukuti fya cine! Mu 1989, Nick, Inte ya kwa Yehova atendeke ukuntandalila. Ilyo twalelanshanya pa mubili wa muntu ne fyo umuntu aishilebako, nalitemenwe ifyo amashiwi abelengele pa AbaHebere 3:4 yalondolola bwino uwapangile ifintu fyonse. Yatila: “Ing’anda yonse muntu akuula, lelo uwapangile ifintu fyonse ni Lesa.”

Bushe ifyo mwasambilile pa mubili wa muntu fyalilengele mwasumina ukuti umuntu abumbilwe fye?

Ee, nalimwene ukuti ifyo Lesa apanga umubili e filenga uleiposha uwine. Ku ca kumwenako, pa kuti icilonda cipole, kulaba ifintu 4 ificitika mu mubili kabili ifi fyonse fyalilenga nailuka ukuti imibili ya  bantu abo naleundapa yalikwata amaka ya kuiposha iine.

Twebeniko ificitika umuntu nga akwata icilonda

Pa numa fye ya masekondi ayanono ifintu ifingi filatendeka ukucitika mu mubili pa kuti umulopa uleke ukufuma. Umubili ulabomba ifipapwa. Ica kubalilapo, ilyo umulopa uleshinguluka mu mishipa ya mu mubili, iyaba amakilomita 100,000 ubutali, ulacilika apalesuuma umulopa no kukonkanyapo ukupita mu mubili.

Bushe ica bubili icicitika pa kuti icilonda cipole cinshi?

Umulopa ulaleka ukusuuma mu ma-awala fye ayanono na pa numa, apali icilonda palafimba. Kulaba ifintu fya kupapusha ificitika pa kuti apali icilonda pafimbe. Intanshi, imishipa iicepa pa kuti umulopa wilafuma sana, ilakula pa kuti umulopa uulepita pa cilonda ufule. Lyena uyu umulopa umuba amaproteni ayengi ulalenga apali icilonda ukufimba. Aya amaproteni ayaba mu mulopa yalacingilila icilonda ku tushishi utwingalenga cipola, kabili yalonaula ifingengisha amalwele mu mubili, e lyo yalafumya ne nsandesande ishonaike pa cilonda. Pa kuti ifi ifilenga apali icilonda ukufimba ficitike na pa kuti fimbi ififwaikwa pa kutila icilonda cipole fitendeke ukucitika, umubili ulapanga insandesande ishingi icine cine. Ifi nga fyacitika ninshi ica butatu catendeka.

Finshi fimbi ificitika pa kuti icilonda citwalilile ukupola?

Pa numa ya nshiku fye ishinono, umubili ulatendeka ukupanga insandesande sha kuposha icilonda. Iyi e ntendekelo ya cintu calenga butatu icicitika pa kuti icilonda citwalilile ukupola. Ne ci, cisenda mupepi ne milungu ibili. Insandesande ishifwaikwa pa kuti icilonda cilundane shilaya pa cilonda no kutendeka ukufula. E lyo utumishipa utunono tulapangika apali icilonda pa kuti tulefumya ifiko pa cilonda no kutwalapo umulopa na umbi uukabilwa pa kufumyapo insansesande ishishilekabilwa e lyo na pa kuti cilundane. E lyo limo kulaba insandesande shaibela ishipangika pa kuti icilonda ciisalike.

Fingi sana ficitika mu mubili! Bushe palakokola pa kuti icilonda cipole?

Ica kulekeleshako ca kuti umubili ulatendeka ukukosha apali icilonda, ne ci cilasenda imyeshi. Amafupa ayakontweke yalakosa nga filya fine yali, e lyo utumishipa no tumicincili utushakosa utwapangike pa cilonda, tulafumapo e lyo paisa iyakosa. Ifyo icilonda cipola filanga fye ukuti Yehova e wabika amaka mu mubili ayalenga umubili uwine ukuiposha.

Twebeniko cimo icacitike icamupapwishe sana

Kwali umukashana wa myaka 16 uwacenekwe sana mu busanso bwa pa musebo. Uyu mukashana acenekwe mu mala kuli laamba kabili alesuuma umulopa mu mala mwine. Nga ni kale, nga twalimulepwile pa kumundapa nelyo nga twalimufumishe ka laamba. Pali lelo badokota balimona ukuti umubili walikwata amaka ya kuiposha uwine. E ico nshamulepwile, namupeele fye umuti wa kucingilila icilonda ku tushishi twingengisha amalwele mu mubili, no wa kufusha umulopa e lyo no wakunashako ubukali. Ilyo twamukopele mu mala pa numa ya milungu iinono, twasangile ukuti ka laamba kalipola! Nga namona ifyo umubili uiposha, ndapapa sana kabili nshitwishika ukuti Lesa e watupangile.

Finshi fyalengele mutemwe Inte sha kwa Yehova?

Ba Nte bali abasansamuka, kabili lyonse balebomfya Baibolo pa kwasuka amepusho nalebepusha. Nalitemenwe ne fyo baleshipa pa kwebako abantu ifyo basumina na pa kusambilisha abantu pali Lesa.

Bushe ukuba Nte kwalilengele mwalabomba bwino incito yenu?

Ee, kwalengafwa sana maka maka nga nakwata ubulanda ubo badokota na banasi abaikalila ukundapa abalwele sana na bacenekwe bakwata. Kabili abalwele nga balefwaya uwa kulanda nankwe, nalebalondolwela ukuti Kabumba alitulaya ukutila ukulwala no kucula * fikapwa, no kuti akaleta icalo cipya umushakabe uukatila: “Nindwala.” *