“Mwalisuula amafunde ya kwa Lesa, kabili mukonka intambi sha bantu.”—Marko 7:8.

IFYO BAIBOLO ILANDA Mu cifyalilwa fye, abantu balafwaya Lesa, kabili ici e cilenga balemupepa. (Mateo 5:3)

Pa kuti balepepa Lesa, abengi balipanga ifilonganino fya mapepo ifisambilisha amafunde ya bantu mu nshita ya kusambilisha abantu ifya kwa Lesa.

Umfweni ifyo Baibolo yalanda pa cilonganino ca mapepo cimo icaliko mu nshita ya batumwa. Itila: “Ukupimpa kwa kubombela Lesa kwena balikwata; lelo te kupimpa ukwalingana no kwishiba kwine kwine; pantu, pa kukanaishiba ubulungami bwa kwa Lesa lelo ukufwaya ukukosha ubulungami bwabo abene, tabanakiile ku bulungami bwa kwa Lesa.” (Abena Roma 10:2, 3) Na muno nshiku, kwaliba ifilonganino fya mapepo ifingi umo “basambilisha amafunde ya bantu.”—Marko 7:7.

“Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana.”—AbaHebere 10:24, 25.

IFYO BAIBOLO ILANDA Pa AbaHebere 10:25, Baibolo itila, “twilapuswa ku kulongana.”

Aya mashiwi yalanga fye ukuti Lesa afwaya abantu balelongana pamo pa kumupepa. Lelo bushe kapepa umo na umo alingile ukukonka fye ifyo umwine eka aishiba pali Lesa ne fyo amona ukuti e fyo Lesa afwaya? Iyo. Baibolo itila abapepa Lesa mu nshila iyo afwaya bafwile ‘ukusosa fimo fine’ no kuba “abaikatana mu mano yamo yene na mu kutontonkanya kumo kwine.” (1 Abena Korinti 1:10) Balingile ukuba mu cilonganino cimo icateyanishiwa bwino kabili bafwile ‘ukutemwa aba bwananyina bonse’ pe sonde. (1 Petro 2:17; 1 Abena Korinti 11:16) Kanshi Lesa afwaya bakapepa bakwe ukwikatana no kulalongana pamo.

“Nga muletemwana, e lyo bonse bakeshiba ukuti muli basambi bandi.”—Yohane 13:35.

IFYO BAIBOLO ILANDA Pa kulangilila ifyo twingeshiba ukupepa kwa cine, Baibolo itila: “Mukabeshibila ku fisabo fyabo.

Bushe abantu kuti basaba imyangashi ku myunga nelyo amakunyu kuli bacilasa?” (Mateo 7:16) Nangu fye umuntu tasambilila pa filimwa, kuti amona ukuti imyunga na makunyu fyalipusana. Kanshi pa kwishiba ukupepa kwa cine no kwa bufi, tamulingile ukusambilila pa mipepele. Finshi fimo ifyo twingeshibilako ukupepa kwa cine?

• Ababa mu kupepa kwa cine basambilila icine ukufuma mu Cebo ca kwa Lesa, Baibolo. (Yohane 4:24; 17:17) Tabasambilila amano ya bantunse.

• Ababa mu kupepa kwa cine balaafwa abantu ukwishiba Lesa, no kwishiba ishina lyakwe ilya kuti Yehova.—Yohane 17:3, 6.

• Ababa mu kupepa kwa cine baishiba ukuti Ubufumu bwa kwa Lesa, e bukawamya ifintu pa calo, te mitekele ya bantunse.—Mateo 10:7; 24:14.

• Bakapepa ba cine babasambilisha ukuti baletemwana. (Yohane 13:35) Babasambilisha no kuti balecindika imitundu yonse iya bantu, no kubomfya inshita ne ndalama ku kwafwa abantu bambi, e lyo no kukanalwako inkondo.—Mika 4:1-4.

• Ababa mu kupepa kwa cine balakonka ifyo Baibolo ilanda muli fyonse ifyo bacita kabili balacita ifyo basambilisha bambi.—Abena Roma 2:21; 1 Yohane 3:18.

Inte sha kwa Yehova, abalemba ino magazini, balafwaya sana ukucindika Lesa mu fyo balanda na mu fyo bacita. Kuti twatemwa mwaisa mu kulongana pa Ng’anda ya Bufumu no kuimwena mwe bene.