IFYUNI fyaba fye mu fifulo fyonse pano calo, kabili calyanguka sana ukufitamba. E lyo kabili pa mulandu wa kuti ifyuni fyalipusanapusana mu fyo fyapangwa, mu kumoneka, na muli fimo fimo ifyo ficita, abantu balomfwa bwino ukufitamba.

Limo tulamona ne fyo ifyuni ficita cila bushiku ilyo tuli fye na pa ng’anda. Limo kuti twamona insalabubenshi shilelya utushiishi, inkunda iilume ileangala ne ikota, akamimbi kalepanga icinsa, ing’uni ileliisha utwana utuli ne nsala, e lyo kuti twatamba ne fyuni ifilya imyambo mu mushili.

Tulomfwa bwino ukutamba ifyuni fimo pamo nga bakapumpe, bapungwa na utukoshi ilyo filepupuka mu lwelele. Ifyuni fimo kuti fyamusekesha. Ku ca kumwenako, kuti mwaseka nga mwamona inseba shilelwila aka kulya, akapeele akalume kaletutumuna icifuba pa kuti kacebushe akakota, nelyo ba mucence abakashikila no kufitulukila balelila ninshi bali pa ntambo ya malaiti pa kuti bepona. E lyo limo tulomfwa bwino nga twamona uko ifyuni fimo pamo nga ba kabaso, ba namungoli nelyo ifyoso filekuuka ukufuma ku calo cimo ukuya ku calo cimbi. Abantu balimona uko ifyuni fikuuka pa myaka  iingi, kabili balapapa ukumona ifyo fikuuka ukuya ku fyalo ifyaba ukutali pa nshita iyalinga. Na kuba, Kabumba umwine atile: “Kabaso wa mu lwelele ena alishiba inshita yakwe; ne cipele, na kamimbi, na pwele, filasunga inshita ya kwisa kwa fiko.”—Yeremia 8:7.

Baibolo ilalanda sana pa fyuni, ilingi line pa kutusambilisha ifintu fimo ifyacindama. Ku ca kumwenako, Lesa aebele Yobo pa fyo mwakatala abutuka ati: “Ilyo apampaila amapindo yakwe, aseka kabalwe no waninapo.” * (Yobo 39:13, 18) Na kabili Lesa alipwishe Yobo ati: “Bushe mucetekanya obe ulenga pungwa ukulela, . . . nelyo bushe ni we weba kapumpe ukupupukila mu muulu?” (Yobo 39:26, 27) Cinshi tulesambililako? Ifyuni filaicitila ifintu fyeka ukwabula ifwe ukufyafwako. Ifyo ficita filanga fye ukuti Lesa uwafipangile, wa mano.

Imfumu Solomone yalandile pa “kulila kwa cipele” ukuti, e kulanga ukutila inshita ya kulobolola naifika. (Ulwimbo lwa Nyimbo 2:12) Kalemba wa nyimbo uwakumbilwe ifyuni ifyali pa ng’anda ya kwa Lesa, apo alefwaya ukulabombela, atile: “Nangu fye cuni nacipangamo ing’anda, na kamimbi nakapangamo icisansala, umo kabikile abana ba kako, mupepi ne cipailo cenu icikalamba, mwe Yehova.”—Amalumbo 84:1-3.

Yesu Kristu na o alilandilepo bwino sana pa fyuni. Tontonkanyeni pa mashiwi yaba pali Mateo 6:26 ayatila: “Lolekesheni ifyuni fya mu muulu, pantu tafibyala imbuto nelyo ukulobolola nelyo ukusunga ifya kulya mu matala; na lyo line Shinwe wa mu muulu alafiliisha. Bushe tamwaficila ukucindama?” Ici icilangililo, cisambilisha abasambi ba kwa Yesu ukuti balicindama sana kuli Lesa kabili tabafwile ukulasakamikwa pa fyo bakabila.—Mateo 6:31-33.

Abantu balitemwa sana ukutamba ifyuni pantu filabapapusha nga bamona ifyo ficita, ifyo fimoneka bwino, ifyo filila ne fyo ifilume fyangala ne fikota. Ne cacindamisha ca kuti, abantu kuti basambililako fimo ku fyuni. Bushe ‘mwakulalolekesha ifyuni’?