ICIPANDE CIKALAMBA | NGA MWAPONENWA NA MASANSO
Ifipe Fyenu nga Fyaonaika
Pali Cisano, pa March 11, mu 2011, ku Japan kwalicitike icinkukuma icikalamba sana icaipeye abantu 15,000 no konaula ifipe apengapooswa amadola ya ku America, 200 bilioni. Ilyo ba Kei, abali ne myaka 32 baumfwile ukusoka kwa kuti kwalaba icinkukuma, babutukiile ku mulundu. Batile: “Ulucelo, nalibwelelemo ku ng’anda ku kuyasendako tumo, lelo nasangile ukuti ifipe fyandi fyonse, kumo ne ng’anda nafyonaika kabili nafisendwa na menshi. Umufula wa ng’anda, e washelepo fye.”
“Palipitile inshita pa kuti nsumine ukuti fyonse ifyo nakwete fyalyonaike. Motoka yandi, amakompyuta nalebomfya ku ncito, amatebulo, imipando, ne fipuna apo naleikala na beni, piano, amabanjo, umutoolilo, ifyo nalebomfya pa kulenga ifintu, e lyo ne fyo nalengele no kupenta, fyonse fyalyonaike.”
IFINGAMWAFWA UKUSHIPIKISHA
Muletontonkanya sana pa fyo mwashala nafyo ukucila ukutontonkanya sana pa fyaonaike. Baibolo itila: “Umuntu nangu akwate shani ifingi, ubumi bwakwe tabwaba mu fintu akwata.” (Luka 12:15) Ba Kei balondolwele ifyabacitikiile abati: “Pa kubala, nalilembele ifyo nalefwaya, lelo ici calengele nilafumyako amano ku fintu fyandi ifyaonaike. E ico pa numa nalembele fye ifyo nalekabila sana, kabili naleya ndefumyapo ifyo nakwata. Ifyo nalembele fyalingafwile ukukanabika amano ku fyaonaike.”
Mu nshita ya kulatontonkanya fye pa fyaonaike, kuti mwashimikilako bambi ifyamucitikiile pa kuti mubakoseleshe. Ba Kei batile: “Aba mu tubungwe twafwa abalanda e lyo ne fibusa fyandi balingafwile, lelo apo nalibeleele ukupeelwa fye, natendeke ukuisuula. Lyena naibukishe ifyo Baibolo yalanda pa Imilimo 20:35 apatila ‘mwaba insansa ishingi mu kupeela ukucila ishaba mu kupokelela.’ Apo nshakwete ifyuma ifya kupeelako bambi, natendeke ukulakoselesha abantu abaponenwe na masanso. Ukukoselesha abantu bambi kwalingafwile sana.”
Mulelomba amano kuli Lesa pa kuti yalemwafwa ukushipikisha. Ba Kei balicetekele filya Baibolo yalanda ukuti Lesa “akakutika kwi pepo lya bantu abo bapoka fye fyonse.” (Amalumbo 102:17) Na imwe kuti mwacetekela ukuti Lesa akakutika ipepo lyenu.
Bushe mwalishiba? Baibolo itila inshita ikafika ilyo takwakabe uwa kulasakamikwa pa mafya tukwata pa mulandu wa masanso. *—Esaya 65:21-23.
^ para. 9 Pa kuti mwishibe ifyo Lesa afwaya icalo cikabe, belengeni icipandwa 3 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Finshi Baibolo Ilanda pa Masanso Ayacitika pa Mulandu ne fyo Lesa Abumba?
Bushe Lesa abomfya amasanso pa kuti atukande? Bushe Lesa alafwa abaponenwa na masanso?
ULUPUNGU LWA KWA KALINDA
