BAMO balacita ifintu ifilenga baleimona kwati balicindama, lelo tabeshiba ukuti ifyo fintu tafyawama. Cilawama ukwishiba ukuti ifyo ulecita tafili bwino pantu kuti wasambililako no kubombelapo pa kuti utendeke ukucita bwino.

Bamo tabaishiba icilenga umuntu ukucindama. Fimo ifyo bamona kwati e filenga babe abacindama, te filenga umuntu ukucindama, kabili abengi besa mu kwiluka ninshi ifintu nafibipa.

Moneni ica kumwenako. Yesu Kristu inshita imo atile: “Umuntu kuti amwenamo shani nga anonka icalo conse lelo alofya umweo wakwe?” (Mateo 16:26) Aya mashiwi ya cine sana ku bantu abatontonkanya ukuti ukupoosa inshita iikalamba ku kufwaya indalama ishingi, e kulenga umuntu ukucindama. Ba Tom Denham, bakafundisha batile: “Umuntu uutontonkanya fye pa kusumbulwa pa ncito, ukukwata indalama ishingi nelyo ukukwata ifintu ifingi, tekushiwa. Ukumona kwati ukukwata indalama ishingi e kulenga umuntu ukucindama, kuibepa fye kabili kuti kwamupwishisha insansa mu kuya kwa nshita.”

Ifi fine e fyo abengi basanga. Ilyo mu America mwali ukufwailisha pa “filenga umuntu ukuba ne nsansa,” casangilwe ukuti pa fintu 22 ifyo batantike, “ukukwata indalama ishingi” kwali pa namba 20. Ifyo abengi basalile, kukwata ubumi ubusuma, ukulaumfwana na bantu bambi, e lyo ne ncito iyo umuntu atemwa.

Ukwabula no kutwishika, abantu nga babepusha, balalondolola ifilenga umuntu ukucindama ne fishingalenga acindame. Na lyo line, cilabafya ukucita ifingalenga baba abacindama.