BA HILTON balitemenwe icangalo ca kupoosa inkonya. Batendeke ukulwa ninshi bali fye ne myaka 7! Ilyo bali ku sukulu baleendauka fye na banabo ukufwaya uwakuma. Batile, “Naleiba, naleangala ifyangalo fya cela mushuke, naletamba ifye shiku, nalecusha abanakashi, e lyo naletuka na bafyashi. Imibele yandi yalibipile sana ica kuti abafyashi bandi balemona kwati nshakaaluke. Ilyo napwile isukulu, nalifumine pa ng’anda.”

Ilyo ba Hilton babwelele pa ng’anda pa numa ya myaka 12, abafyashi babo balifililwe ukushininkisha ifyo umwana wabo ali! Ba Hilton bali abafuuka, aba cumfwila, kabili aba mucinshi. Cinshi calengele ukuti baaluke? Uko baile batampile ukutontonkanya pa fyo ubumi bwabo bwali no kuba. Na kabili batendeke ukubelenga Baibolo pa kuti ibafwe ukwalula imibele yabo. Ba Hilton batile, “Natendeke ukukonka ifyo nalesambilila muli Baibolo, ici calengele ukuti indeke imibele yandi iya kale no kulaumfwila ifunde ilyaba pa Abena Efese 6:2, 3 ilya kucindika abafyashi bandi. Nomba naliba ne nsansa sha cine cine, kabili nalilenga na bafyashi ukuba ne nsansa, nshibakalifya umutima!”

Ifyacitike kuli ba Hilton filelangilila ukuti Baibolo yalicindama kabili yalikwata amaka ya kwalula abantu. (AbaHebere 4:12) Natulande pa fintu ifyacindama pamo nga ubufumacumi, ukuilama, bucishinka mu cupo, no kutemwa e lyo tulande na pa fyo iyi mibele ingalenga imikalile yesu ukuwama.