IFYO BAIBOLO ILANDA
Mesia
Baibolo yalisobele ukuti Mesia ali no kwisa pe sonde kabili aali no kulubula abantu ku malwele, ku kucula, e lyo na ku mfwa. Bushe Yesu Kristu e wali no kuba Mesia?
Bushe abantu bali no kwishiba shani ukuti uyu e Mesia?
Ukulingana ne fyo Baibolo yasobele, Mesia, nelyo Kristu, ali no kwisa mu kubomba imilimo ibili iyapusana, kabili iyi imilimo aali no kuibomba pa nshita shapusana. * Pa kubomba umulimo wa kubalilapo, ali no kuba umuntu. Pa kuti abantu bengamwishiba bwangu, abalembele Baibolo balisobele ifingi ifyali no kucitika mu bumi bwakwe e lyo ne fyo ali no kubomba umulimo wa kushimikila. Na kuba, umulimo uwacindama sana uo ukusesema ukwaba mu Baibolo kwalandapo, “mulimo wa kubila pali Yesu.”—Ukusokolola 19:10.
Ifyo Yesu acitile abantu abanono ilyo ali umuntu e fyo akacitila abantu mwi sonde lyonse nga icibumbwa ca maka ica ku mupashi
IFYO BAIBOLO ISAMBILISHA
Mesia ali no . . .
-
Kufuma mu lupwa lwa Mfumu Davidi.—Esaya 9:7; Luka 3:23-31. *
-
Kufyalilwa mu Betelehemu.—Mika 5:2; Luka 2:4-7.
-
Kuba kabila wa “mbila nsuma” uwafuuka.—Esaya 61:1; Luka 4:43.
-
Kusuulwa no kumonwa nga uushacindama.—Esaya 53:3; Mateo 26:67, 68.
-
Kufutukwa pa ndalama sha silfere 30.—Sekaria 11:12, 13; Mateo 26:14, 15.
-
Kwikala tondolo ukwabula ukwasuka abalemupeela imilandu ilyo balemupingwila ukufwa apabula umulandu.—Esaya 53:6, 7; Mateo 27:12-14.
-
Kutulwa ilambo nge “mpaanga,” iyali no kufumyapo ulubembu no kulenga abantunse ukuba na bucibusa busuma na Lesa.—Esaya 53:7; Yohane 1:29, 34, 36.
-
Kwipaiwa ukwabula ukumufuna ifupa nangu fye limo.—Amalumbo 34:20; Yohane 19:33, 36.
-
Kushikwa pamo na bakankaala.—Esaya 53:9; Mateo 27:57-60.
-
Kubuushiwa pa bushiku bwalenga shitatu.—Mateo 16:21; 28:5-7.
Yesu alifikilishe ukusesema konse uku ukubikapo fye na kumbi ukwingi. Kabili aleundapa na malwele no kubuusha abafwa. Kanshi tapelelele fye pa kupeela ubushinkisho bwa kuti e wali Mesia lelo alitulangile ukuti tulingile ukuba ne citetekelo icakosa mu malayo ayaba mu Baibolo, ayalanda pa fyo akacitila abantu ku ntanshi isonde fye lyonse. (Luka 7:21-23; Ukusokolola 21:3, 4) Pa numa ya kubuushiwa, Yesu ‘aikala ku kwa kulyo’ kwa kwa Lesa, ukulolela ukuti akapwishe umulimo wakwe uwa buMesia.—Amalumbo 110:1-6.
“Ilyo Kristu akesa, bushe akacita ifipesha amano ifyacila pa fyo uyu muntu acita?”—Yohane 7:31.
Bushe Mesia akapwishishisha shani imilimo yakwe?
AbaYuda abaliko mu nshiku sha kwa Yesu bale-enekela ukuti Mesia ali no kubalubula ukufuma ku buteko bwa ciRoma kabili ali no kutendeka ukubateka. (Imilimo 1:6) Nomba pa numa e lyo aba Yuda abalekonka Yesu baishileishiba ukuti ali no kupwishishisha umulimo wakwe ku muulu nga icibumbwa ca mupashi ica maka kabili ninshi balimupeela na maka ayengi.—Mateo 28:18.
IFYO BAIBOLO ISAMBILISHA
Mu mulimo wakwe uwa bubili Mesia ali no . . .
-
Kuteka nge Mfumu ya Bufumu bwa kwa Lesa, ubuteko ubukateka icalo conse.—Daniele 7:13, 14; Ukusokolola 11:15.
-
Kupaala abantu bonse ababa ne citetekelo muli ena.—Ukutendeka 22:17, 18; Amalumbo 72:7, 8.
-
‘Ukulenga ne nko ishingi na bakateka ukupapa’ ilyo akabonaula pa mulandu wa kukanafwaya ukumunakila.—Esaya 52:15; Ukusokolola 19:19, 20.
-
Kupususha “ibumba likalamba” ilya bantu abalungama no kubengisha mwi sonde lipya.—Ukusokolola 7:9, 10, 13-17.
-
Kubombela pamo na Yehova Lesa, pa kubuusha abafwa abakulaikala muli Paradise pe sonde.—Luka 23:43; Yohane 5:21, 28, 29.
-
Kusambilisha abatekwa bakwe ifya kuba no mutende wa cine cine.—Esaya 11:1, 2, 9, 10.
-
Kufumyapo ulubembu, ululenga tulelwala no kufwa.—Yohane 1:29; Abena Roma 5:12.
-
Konaula imilimo ya kwa Satana yonse kabili akalenga abantu bakekatane ngo lupwa lumo ulukalatekwa na Yehova Lesa.—1 Abena Korinti 15:25-28; 1 Yohane 3:8.
Yesu alipwishishishe ukubomba umulimo wakwe uwa buMesia pa muku uwa kubalilapo. Na kabili akapwishishisha no mulimo wakwe uwa bubili. Kanshi icingawama ukucita kusambilila sana pali ena pantu Yesu umwine atile: “Nine nshila ne cine no mweo.”—Yohane 14:6.
“Mu nshiku shakwe abalungama bakapuuka, kabili umutende ukafula ukushinta na po umweshi ukalekela ukubapo. Kabili akakwata abatekwa . . . ukufika ku mpela sha pano isonde.”—Amalumbo 72:7, 8.
^ par. 5 Ishiwi lya kuti “Mesia” lyafuma ku ciHebere. E lyo “Kristu” lyafuma ku ciGriki.—Yohane 1:41.
^ par. 7 Ilembo ilya kubalilapo lilenda pa kusesema; ilya bubili lilenda ifyo uko kusesema kwafikilishiwe.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Amasesemo Ayalanda Pali Mesia Yalanga Ukuti Yesu E Wali Mesia?
Bushe kwaliba ba Mesia abengi?
ULUPUNGU LWA KWA KALINDA
