IFILECITIKA MU CALO | ASIA
Asia
Mu Asia e mwaba sana abantu pano isonde. Ku ca kumwenako, mu China na mu India mwaba abantu mupepi na hafu ya bantu ababa pano isonde. Mafya nshi ifyalo fya mu Asia fikwata pa kusambilisha no kucingilila abantu babo?
Ukufunda Abana Kulabacingilila
Abasoma sana amafunde ya calo mu China batila cilanguka ukucenda abana abo abafyashi babo bashibasambilisha pa malyashi ya bwaume no bwanakashi. Ku ca kumwenako, ukufuma mu 2010 ukufika mu 2013, kwali imilandu 8000 mu filye iyo balelubulwisha abantu abo baletunganya ukuti balicendele abana. Profesa uusambilisha ifya mafunde pa Beijing Normal University atile, apo abana “te kuti baicingilile, cilanguka ukubacenda. Kanshi ukufunda abana e nshila iisuma iya kubacingililamo.”
IFYO BAIBOLO ILANDA: Abafyashi basuma balasambilisha abana ifya kuicingilila ‘ku bantu abasosa ifya kupuulula.’—Amapinda 2:1, 10-12.
Abana Abafwa pa Numa ya Nkuuka
Ukulingana ne fyo bafwailishe, basangile ukuti nga kwaba inkuuka mu Philippines, mu mwaka uukonkapo, abana abanakashi abafwa ilyo bali fye utunya balafula nalimo imiku 15 ukucila abantu abafwa ku nkuuka. Fimo ifilenga nico abafyashi abengi incito shilapwa, balatwala sana indalama ku kukuula ifintu cipya cipya, kabili tabakwata ne ndalama sha kusakamaninamo abana abanono abanakashi.
IFYO BAIBOLO ILANDA: ‘Akanyeni ifya kulya fyenu ku bali ne nsala, leteni abacula, abashakwata amayanda mu ng’anda yenu, ilyo mwamona uuli ubwamba, mumufwike.’—Esaya 58:7.
Abakote mu South Korea Baleyipaya Sana
Mu 2011, mupepi na hafu ya bantu abayipeye mu calo ca South Korea bakalamba abali ne myaka 65 no kuya pa muulu. Abasambilila bamo batila icilenga ni co abantu abengi balileka ukusakamana abafyashi babo, e lyo cimbi na co bupiina. Na kuba, muli ici calo abakote mupepi na hafu tabakwata sana indalama. Abantu abengi mu South Korea batontonkanya ukuti abana tabafwile ukusakamana abafyashi babo abakote.
IFYO BAIBOLO ILANDA: “Ulecindika wiso na noko.”—Abena Efese 6:2.
