IFILECITIKA MU CALO | MIDDLE EAST
Ku Middle East
Mu Middle East e mwaleikala abantu abengi ababalilepo ukuleta ubuyantanshi mwi sonde, kabili abashula ifya kushulashula, balisanga ifintu ifingi nga nshi mu Middle East.
Umwangashi uo abena Kanaani balepanga
Mu 2013, abashula ifya kushulashula balisangile umuputule umo balesungila umwangashi uo balepanga imyaka 3,700 iyapita. Muli uyu muputule mwali imitondo 40 iyo balebikamo umwangashi, umwingengila amabotolo ya mwangashi 3,000 aya muno nshiku. Ilyo umo uushula ifya kushulashula alolekeshe ifyali muli iyi imitondo, asangile ukuti abena Kanaani balebikako sana amano pa kupanga umwangashi. Atile: “Abalepanga uyu umwangashi balebikako sana amano ica kuti umwangashi uwaleba mu mitondo yonse walemoneka fye cimo cine.”
BUSHE MWALISHIBA? Baibolo yalilandapo ukuti mu Israele balepanga “umwangashi uwawamisha” kabili balebika uyu mwangashi mu mitondo iikalamba nga nshi.—Ulwimbo lwa Nyimbo 7:9; Yeremia 13:12.
Ifyo abantu bafulile mu Egypt
Inyunshipepala ya Guardian newspaper yatile: Mu Egypt, abana abafyelwe mu 2012 balifulilepo ukucila abafyelwe mu 2010. Abana 560,000 e bafyalilwepo mu 2012 ukucila pa bafyelwe mu 2010. Ba Magued Osman, ababomba ku kampani akafwailisha pa fintu mu Egypt aka Baseera, batile: “Mu Egypt tamwatala amufyalwapo abana abafula ifi.” Abasambilila sana batila, abantu mu Egypt nga batwalilila ukufula ifi, ninshi muli ici calo ifya kulya fikacepa, kabili amenshi e lyo ne fintu fimbi pamo nga amalaiti na fyo fikaafya.
BUSHE MWALISHIBA? Baibolo itila ubufwayo bwa kwa Lesa bwali bwa kuti abantu ‘bakumane isonde,’ lelo te kufula ica kuti ne fya kulya fyalacepa.—Ukutendeka 1:28; Amalumbo 72:16.
Balisangile Indalama isho Bafishile
Indalama isho bapangila na bronze ukucila pali 100 isho balembelepo ukuti “Umwaka Walenga Bune,” balishisangile mupepi no musebo uukalamba uwa mu Israel. Ifilembo ifyali pali ishi indalama fyalelanga ukuti imyaka 4 yalipitilepo ukutula apo abaYuda bapondokeele Abena Roma (e kutila 69-70 C.E.) Ici calengele Abena Roma ukonaula Yerusalemu. Ba Pablo Betzer, abakalamba ba mu kabungwe akashula ifintu batile, “Nalimo uwafishile ishi indalama aletiina Abena Roma abasanshile uyu musumba, e ico alifishile ishi indalama pa kuti akashibule inshita imbi.”
BUSHE MWALISHIBA? Mu 33 C.E., Yesu asobeele ukuti Abena Roma bakonaula Yerusalemu. Aebele Abena Kristu ukuti bakabutukile ku mpili pa kuti bakapusuke.—Luka 21:20-24.
