BUSHIKU bumo Yesu atile: “Mwaba insansa ishingi mu kupeela ukucila ishaba mu kupokelela.” (Imil. 20:35) Pa kuti tube ifibusa na Yehova, tufwile ukulamupeela. Cinshi twalandila ifi? Pantu Yehova alitupeela ifintu ifingi nga nshi ifilenga tuleba ne nsansa. Lelo kuti twaba sana ne nsansa nga ca kuti na o tulemupeelako. Finshi twingapeela Yehova? Pa Amapinda 3:9 patila: “Cindika Yehova ku fyuma fyobe.” “Ifyuma” fyesu kuti fyaba ni nshita yesu, ifyo twacenjelamo, amaka yesu, ne fyo twakwata. Nga tulebomfya ifi twalandapo pa kuti ukupepa kwa cine kuleya pa ntanshi, ninshi tulepeela Yehova ubupe kabili kuti twaba ne nsansa nga nshi.

Cinshi cingalenga twalabika amano ku kupeela Yehova ifyo twakwata? Umutumwa Paulo aebele abena Korinti ‘ukulapaatulako fimo’ ifya kusangula. (1 Kor. 16:2) Finshi mulingile ukucita nga mulefwaya ukwishiba inshila mwingasangwilamo isho babomfya mu calo cenu? Moneni akabokoshi pe samba.

Te mu fyalo fyonse umo mwingasangula ukubomfya Intaneti. Lelo kwaliba ifyebo ifyo mwingakonka pa kusangula ukubomfya inshila shimbi ifyaba pa webusaiti iyo mwingabomfya pa kusangula. Mu fyalo fimo, ifyebo babikapo filafwa abantu ukusanga amasuko ku mepusho bepusha sana pa fyo bafwile ukucita nga balefwaya ukusangula.