ICIPANDE CA KUSAMBILILAMO 17
Muleleka Yehova Alemwafwa pa Kuti Mulecimfya Imipashi Yabipa
“Ukushomboka kwesu . . . kwa kushomboka . . . ne mipashi ibifi iyaba mu muulu.”—EFES. 6:12.
ULWIMBO 55 Mwilatiina Abalwani!
IFYO TWALASAMBILILA *
1. Ukulingana ne fyaba pa Abena Efese 6:10-13, ni nshila nshi imo iyo Yehova alangilamo ukuti alitubikako amano? Londololeni.
INSHILA imo iyo Yehova alangilamo ukuti alibika amano kuli fwe babomfi bakwe kulatwafwa pa kuti tulecimfya abalwani besu. Abalwani besu abatucusha sana ni Satana ne fibanda fyakwe. Yehova alatucenjeshako pali aba balwani kabili alatweba ifyo tufwile ukucita pa kuti tulebacimfya. (Belengeni Abena Efese 6:10-13.) Nga twaleka Yehova aletwafwa kabili nga twamucetekela umupwilapo, kuti twacimfya Satana Kaseebanya. Na ifwe bene kuti twacetekela sana Lesa nga filya fine umutumwa Paulo amucetekele. Alembele ati: “Lesa nga ali kuli ifwe, nani engatulwisha?”—Rom. 8:31.
2. Finshi twalasambilila muli cino cipande?
2 Fwe Bena Kristu ba cine tatubika sana amano ku fyo Satana ne fibanda fyakwe bacita. Tubikisha amano ku kusambilila pali Yehova na ku kumubombela. (Amalu. 25:5) Na lyo line tufwile ukwishiba ifyo Satana acita pa kulufya abantu. Mulandu nshi? Pa kuti elatulufya. (2 Kor. 2:11) Muli cino cipande, twalalanda pa nshila iikalamba iyo Satana ne fibanda fyakwe balufishamo abantu. Twalasambilila ne fyo twingacita pa kuti tulebacimfya.
IFYO IMIPASHI YABIPA ILUFYA ABANTU
3-4. (a) Bushe ukupupa imipashi kwalola mwi? (b) Bushe bantu banga abapupa imipashi?
3 Inshila iikalamba iyo Satana ne fibanda fyakwe balufishamo abantu kupupa imipashi. Abapupa imipashi batila baleshiba ifintu fimo ifyo abantunse bashingeshiba, kabili batila balikwata amaka pa fintu fimo ifyo abantunse bashakwatapo amaka. Ku ca kumwenako, bamo batila baleshiba ifikacitika ku ntanshi nga babuka imbuko nelyo nga babukila ku ntanda. Bambi nabo balacita ifilenga abantu balabamona ukuti bacilalanda na bafwa. Bamo nabo balalowa nelyo balacita ifinjelengwe. *
4 Bushe bantu banga abapupa imipashi? Ilyo bafwailishe mu fyalo 18 ifya ku Latin America na ku Caribbean, basangile ukuti pa bantu batatu, umo alisumina mu finjelengwe nelyo mu buloshi. Na kabili abantu mupepi na iyi ine impendwa basumina ukutila umuntu kuti alanda ne mipashi. Balifwailishe na mu fyalo 18 ifya mu Africa. Mwena basangile ukuti abantu ukucila pali hafu ya bantu abo baipwishe balisumina mu buloshi. Kwena konse fye uko twikala, tulingile ukuicingilila pa kuti twilapupa imipashi pantu na kuba, Satana afwaisha ukulufya “aba pano isonde bonse.”—Ukus. 12:9.
5. Bushe Yehova alatemwa abantu nga balepupa imipashi? Londololeni.
5 Yehova ni “Lesa wa cishinka.” (Amalu. 31:5) Bushe Yehova alatemwa abantu nga balepupa imipashi? Awe, tatemwa! Yehova aebele abena Israele ukuti: “Ekasangwa muli imwe onse uoca umwana wakwe umwaume nelyo umwana wakwe umwanakashi mu mulilo, onse uubuka imbuko, uucita ifinjelengwe nelyo onse uusobela ifya ku ntanshi nelyo ing’anga, nelyo uulowa nelyo uwipusha ku umfwana ne mipashi nelyo ku waishibisha ifya kusobela nelyo onse uwipusha ku bafwa. Pantu onse uucita ifi fintu wa bunani kuli Yehova.” (Amala. 18:10-12) Nangu ca kuti Abena Kristu tabakonka Amafunde ayo Yehova apeele abena Israele, twalishiba ukuti Yehova taaluka mu fyo amona ukupupa imipashi.—Mal. 3:6.
6. (a) Bushe Satana abomfya shani ukupupa imipashi pa kulufya abantu? (b) Ukulingana ne fyaba pali Lukala Milandu 9:5, bushe umuntu nga afwa aba shani?
6 Yehova alatucenjeshako pa kuti twilapupa imipashi pantu alishiba ukuti Satana alabomfya iyi nshila pa kulufya abantu. Satana abomfya ukupupa imipashi pa kubepa abantu, pamo nga ukubabepa ukuti umuntu nga afwa alatwalilila umumi ku cifulo cimbi. (Belengeni Lukala Milandu 9:5.) Na kabili Satana abomfya ukupupa imipashi pa kutiinya abantu na pa kuti abafumye kuli Yehova. Satana afwaya abapupa imipashi bacetekela imipashi ibifi ukucila ukucetekela Yehova.
IFYO TWINGACITA PA KUTI TULECIMFYA IMIPASHI YABIPA
7. Finshi Yehova atweba?
7 Nga fintu tumwene kale, Yehova alatweba ifyo tufwile ukwishiba pa kuti Satana ne fibanda fyakwe belatulufya. Natulande pali fimo ifyo tufwile ukulacita pa kuti tulecimfya Satana ne fibanda.
8. (a) Cinshi icikalamba ico tufwile ukulacita icingatwafwa pa kuti imipashi yabipa ilatulufya? (b) Finshi Amalumbo 146:4 yalanda ifilanga ukuti ifyo Satana alanda pa bafwa fya bufi?
8 Mulebelenga Icebo ca kwa Lesa kabili muletontonkanya sana pa fyo mulebelenga. Ici e cikalamba icitwafwa ukukaana ubufi ubo imipashi yabipa ibepa. Icebo ca kwa Lesa caba kwati lupanga ulwatwa, cilasokolola ubufi ubo Satana abepa. (Efes. 6:17) Ku ca kumwenako, Icebo ca kwa Lesa cilasokolola ubufi bwa kuti abafwa kuti balanda na ba mweo. (Belengeni Amalumbo 146:4.) Kabili cilatweba ukuti Yehova fye e wingeshiba bwino ifikacitika ku ntanshi. (Esa. 45:21; 46:10) Nga ca kuti lyonse tulebelenga Icebo ca kwa Lesa kabili tuletontonkanya sana pa fyo tulebelenga, tatwakalesumina ubufi ubo ifibanda fibepa kabili tukabupata.
9. Finshi ifyo tushilingile ukulacita pa kuti twilapupa imipashi?
9 Mwilacita nangu cimo icakuma ukupupa imipashi. Apo tuli Bena Kristu ba cine tatulingile ukulapupa imipashi nangu panono. Ku ca kumwenako, tatulingile ukuya ku bomfwana ne mipashi kabili tatufwile ukulalanda na bafwa nangu panono. Nga fintu twasambilile mu cipande cafumineko, tatukonka intambi sha pa cililo ishalenga abantu basumina ukuti umuntu nga afwa alatwalilila ukuba no bumi ku cifulo cimbi. Kabili tatulingile ukulabuka imbuko nelyo ukuya ku basobela ifikacitika ku ntanshi pa kuti twishibe ifikacitika. (Esa. 8:19) Twalishiba ukuti ukupupa imipashi kubi kabili kuti kwalenga twalaumfwana na Satana ne fibanda fyakwe.
Tufwile ukupashanya Abena Kristu ba mu nshita ya batumwa. Tulingile ukupoosa fyonse ifingalenga twalapupa imipashi ukubikako fye ne fya kuleseshamo icitendwe ifyo Yehova ashifwaya (Moneni paragrafu 10 ukushinta ku 12)
10-11. (a) Finshi bamo mu nshita ya batumwa bacitile ilyo basambilile icine? (b) Ukulingana na 1 Abena Korinti 10:21, cinshi tulingile ukulapashanishisha Abena Kristu ba mu nshita ya batumwa, kabili finshi tulingile ukucita pa kuti tulebapashanya?
10 Pooseni fyonse ifingalenga mwalapupa imipashi. Abantu bamo abaleikala mu musumba wa Efese balepupa imipashi. Ilyo basambilile icine, balicitilepo cimo. Baibolo itila: “Abengi abalecita ifinjelengwe balonganike amabuuku yabo no kuyoca pa menso ya bonse.” (Imil. 19:19) Aba bantu tabalefwaya nangu fye panono ukupupa imipashi. Nangu ca kuti ifitabo fyabo ifya finjelengwe fyali ifya mutengo sana, tabapeele abantu kabili tabafishitishe lelo balifyocele. Ico babikileko sana amano kusekesha Yehova, te ndalama isho bapoosele pali ifi ifitabo.
11 Kuti twacita shani pa kuti tulepashanya Abena Kristu ba mu nshita ya batumwa? Kuti cawama nga twapoosa fyonse ifyo twakwata ifingalenga twalapupa imipashi. Tulingile ukupoosa impimpi, amanga, e lyo ne fintu fimbi ifyo tufwala nelyo ifyo twakwata pa kuti tuicingilile ku mipashi ibifi.—Belengeni 1 Abena Korinti 10:21.
12. Mepusho nshi ayo tulingile ukuyipusha pa fya kuleseshamo icitendwe ifyo tusala?
12 Mulesala bwino ifya kuleseshamo icitendwe. Yipusheni amuti: ‘Bushe ndabelenga ifitabo, magazini nelyo ifyaba pa Intaneti ifilanda pa kupupa imipashi? Bushe inyimbo isho nkutika, amafilimu na maprogramu ya pa TV ayo ntamba nelyo ifyangalo fya pa TV nelyo pa kompyuta ifyo nteya fyaba shani? Bushe mu fyo ndeseshamo icitendwe mulaba ukupupa imipashi? Bushe mulaba ifibanda ne fyapala ifi? Bushe ifyo ndeseshamo icitendwe filenga camoneka kwati ukucita ifinjelengwe no kulowa kwaliba fye bwino?’ Kwena te fya kuleseshamo icitendwe fyonse umuba amalyashi ayalenga abantu balapupa imipashi. Ilyo mulesala ifya kuleseshamo icitendwe, tamufwile ukusala ifyo Yehova apata. Tulingile ukulaibikilishako pa kuti tuleba na “kampingu uwa kaele” kuli Lesa wesu.—Imil. 24:16. *
13. Finshi ifyo tushilingile ukulacita?
13 Mwilashimika amalyashi pa fibanda. Tulingile ukulapashanya Yesu uushaleshimikila abantu amalyashi pa fibanda. (1 Pet. 2:21) Ilyo Yesu ashilaisa pano calo, aleikala ku muulu kabili alishibe ifintu ifingi pali Satana e lyo na pa fibanda. Lelo taleshimikila abantu ifyo imipashi ibifi yacitile. Yesu alesambilisha abantu pali Yehova, talesabankanya ubufi bwa kwa Satana. Nga tatuleshimikila abantu amalyashi ya fibanda ninshi tulepashanya Yesu. Kanshi mu fyo tulanda natulelanga ukuti ‘umutima wesu ukulunkuntila umulandu usuma,’ e kutila icine.—Amalu. 45:1.
Tatufwile ukulatiina imipashi yabipa. Yehova, Yesu, na bamalaika ba maka sana ukucila imipashi yabipa (Moneni paragrafu 14 na 15) *
14-15. (a) Mulandu nshi tushilingile ukulatiinina imipashi yabipa? (b) Cinshi cilanga ukuti Yehova alacingilila abantu bakwe muno nshiku?
14 Mwilatiina imipashi yabipa. Muli cino calo cabipa, nalimo ifyabipa kuti fyatucitikila. Kuti twaba mu busanso, kuti twalwala nelyo kuti twafwa ukwabula no kwenekela. Lelo tatulingile ukulamona ukuti imipashi iyabipa e yalenga ifya musango uyu fitucitikile. Baibolo itila “inshita ya fintu fyabula ukwenekela” kuti yafikila umuntu fye onse. (Luk. Mil. 9:11) Yehova alilanga ukuti alikwata sana amaka ukucila ifibanda. Ku ca kumwenako, Lesa talekele Satana aipaya Yobo. (Yobo 2:6) Ilyo Mose ali umumi, Yehova alicitile ifyalangile ukuti alikwata sana amaka ukucila bashimapepo ba finjelengwe aba mu Egupti. (Ukufu. 8:18; 9:11) Ilyo Yehova apeele Yesu amaka, Yesu alicimfishe Satana ne fibanda ilyo abafumishe ku muulu no ku batamfisha pano isonde. Nomba line fye Yesu ali no kupoosa Satana ne fibanda fyakwe mu cilindi icabula impela pa kuti bekalufya nangu umo.—Ukus. 12:9; 20:2, 3.
15 Muno nshiku calimoneka fye apabuuta tuutu ukuti Yehova alacingilila abantu bakwe. Tontonkanyeni pali ici: Pali lelo tulabila imbila nsuma kabili tulasambilisha abantu icine mwi sonde lyonse. (Mat. 28:19, 20) Ifi tucita filenga abantu baishiba imilimo yabipa iya kwa Satana Kaseebanya. Bushe kwena Satana akwata amaka, nga tatulesha ukubomba uyu mulimo? Kanshi tatulingile ukulatiina imipashi yabipa. Twalishiba ukuti “amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” (2 Imila. 16:9) Ifibanda te kuti fitucite akantu nangu kamo nga ca kuti tuli ba cishinka kuli Yehova.
IFYO YEHOVA APAALA ABASHIPUPA IMIPASHI
16-17. Landeni ifyo umo alangile ukuti alishipile pa kuti elapupa imipashi.
16 Tufwile ukushipa maka maka ilyo ifibusa fyesu na balupwa lwesu balefwaya ukuti na ifwe tulepupa imipashi. Ababa abashipa pa kuti belapupa imipashi Yehova alabapaala. Natulande pali nkashi Erica uwikala ku Ghana. Erica ali ne myaka 21 ilyo asumine ukusambilila Baibolo. Apo ali mwana wa kwa shimapepo uwalecita ifinjelengwe, alingile ukulakonka intambi sha kulalya inama isho balebala bashituula kuli tulesa twa bawishi. Ilyo Erica akeene ukulya inama, balupwa lwakwe bamwene ukuti alisaalwile tulesa. Na kabili bamwene ukuti tulesa twali no kubakanda, e kutila twali no kubapenya kabili twali no kubalwalika.
17 Balupwa lwa kwa Erica balyeseshe ukumupatikisha ukukonka intambi, lelo alikaaninine fye nangu ca kuti alishibe ukuti bali no kumutamfya pa ng’anda. Ba Nte bamo batendeke ukulamusunga pa ng’anda pa mwabo. Ifi aba ba Nte bacitile fyalangile ukuti Yehova alipeele Erica ulupwa ulupya, e kutila ba Nte baishileba nga bandume yakwe kabili nga bankashi nankwe. (Marko 10:29, 30) Nangu ca kuti balupwa lwa kwa Erica balimukeene kabili balimocelele ne fyo akwete, talekele ukuba uwa cishinka kuli Yehova. Alibatishiwe kabili ino nshita ni painiya wa nshita yonse. Tatiina ifibanda. Erica alandile pali balupwa lwakwe ati: “Ndapepa cila bushiku ukuti balupwa lwandi bakeshibe Yehova kabili bakabe ne nsansa no buntungwa ifyo abantu ababombela Lesa uwaba no kutemwa baba.”
18. Bushe Yehova atupaala shani nga natumucetekela?
18 Kwena te bonse tukakwata ubwesho bwa musango uyu. Lelo bonse fye tulingile ukulalwisha imipashi yabipa kabili tufwile ukucetekela Yehova. Nga tulecita ifi, Yehova akalatupaala kabili Satana takaletubepa. Na kabili tatwakaleke ukubombela Yehova pa mulandu wa kutiina ifibanda. Ne cacila pali fyonse, bucibusa bwesu na Yehova bukaba ubwakosa. Umusambi Yakobo alembele ati: “Nakileni Lesa; lelo kaaneni Satana Kaseebanya, na o akafulumuka kuli imwe. Palameni kuli Lesa, na o akapalama kuli imwe.”—Yako. 4:7, 8.
ULWIMBO 150 Fwayeni Lesa pa Kuti Mukapusuke
^ para. 5 Apo Yehova alitutemwa, alitucenjeshako pa mipashi yabipa e lyo ne fyabipa ifyo icita. Bushe imipashi yabipa ilufya shani abantu? Finshi tufwile ukucita pa kuti tulecimfya imipashi yabipa? Muli cino cipande twalasambilila ifyo Yehova atwafwa pa kuti imipashi yabipa ilatulufya.
^ para. 3 UBULONDOLOSHI: Ukupupa imipashi kucetekela ifintu ifyakuma ifibanda nelyo ukulaficita. Mu kupupa imipashi mwaba no kusumina ukuti imipashi ya bafwa ilatwalilila ukubako umuntu nga afwa kabili iyi imipashi ilalanda na bantu aba mweo maka maka ukupitila mu muntu umbi uumfwana ne mipashi. Ubuloshi no kubuka imbuko nako kupupa imipashi. Muli cino cipande, ishiwi lya kuti ifinjelengwe lilepilibula ifintu ifyakuma imipashi yabipa. Ili ishiwi kuti lyapilibula no kulowa umuntu nelyo ukumupeela umuti pa kuti icibanda cimufume pa mubili. Talilepilibula ukucita ifintu ifyo abantu bamo bangufyanya ukucita ku minwe pa kuti bapapushe abaletamba.
^ para. 12 Baeluda tabakwata insambu isha kutweba ifyo tufwile ukulaleseshamo icitendwe. Umwina Kristu onse alingile ukulabomfya kampingu yakwe iyo asambilisha Baibolo ilyo alesala ifya kubelenga, ifya kutamba, nelyo ifyangalo fya kuteya. Imitwe ya ndupwa abakonka ifyo Baibolo isambilisha balashininkisha ukuti ifyo aba mu lupwa lwabo baleleseshamo icitendwe nafilingana ne fyo amashinte ya mafunde ya mu Baibolo yalanda. Moneni icipande ca pa jw.org/bem icitila, “Bushe Mulalesha Ukutamba Amafilimu yamo, Ukubelenga Ifitabo Fimo, no Kukutika ku Nyimbo Shimo?” Kabiyeni apo balemba ati, PA NTE SHA KWA YEHOVA > AMEPUSHO ABANTU BEPUSHA SANA.
^ para. 54 UBULONDOLOSHI BWA CIKOPE: Yesu Imfumu ya mu muulu iya maka aletungulula ibumba lya bamalaika. Ubukata bwa kwa Yehova buli pa muulu wabo.
