1. Bushe paradaise ya ku mupashi ni cinshi, kabili finshi tufwile ukufwaisha ukucita?

 MUNO nshiku pano isonde paliba paradaise iya mampalanya umwaba abantu abacita ifintu ifisuma. Muli iyi paradaise mwaliba abantu abengi nga nshi, abakwata umutende wa cine. Abantu ababa muli iyi paradaise tabafwaya nangu panono ukufumamo. Balafwaya abantu abengi nabo baisa muli iyi paradaise. Bushe iyi ni paradaise nshi? Ni paradaise ya ku mupashi! a

2. Cinshi cipapusha pali iyi paradaise ya ku mupashi?

² Mu nshila ya kupapusha, Yehova alibikako icifulo ca mampalanya umwaba abantu aba mutende kabili abaikatana nangu ca kuti bekala mu calo icabipa ica kwa Satana umwaba abantu abashatemwana. (1 Yoh. 5:19; Ukus. 12:12) Lesa wesu uwatutemwa alamona ifyo abantu bonaika muli cino calo lelo alacingilila ababomfi bakwe pa kuti balesekelela ilyo balemubombela. Icebo cakwe cilondolola iyi paradaise ya ku mupashi ukuti umwa ‘kuuba’ no kuti “ibala ilitapililwa bwino.” (Esa. 4:6; 58:11) Apo ababa muli iyi paradaise Yehova alabapaala, baliba ne nsansa kabili balicingililwa muli shino nshiku sha kulekelesha ishayafya.—Esa. 54:14; 2 Tim. 3:1.

3. Bushe ubusesemo bwalembwa mu cipandwa 65 ice buuku lya kwa Esaya bwafikilishiwe shani pa muku wa kubalilapo?

³ Ukupitila muli kasesema Esaya, Yehova alilondolwele ifyo abakaba muli paradaise ya ku mupashi bakulaikala. Ifyo Yehova  alondolola muli iyi paradaise, fyaba mu busesemo bwaba mu cipandwa 65 ice buuku lya kwa Esaya, kabili umuku wa kubalilapo ubu busesemo bwafikilishiwe ni mu mwaka wa 537 ninshi Yesu talaisa pano isonde. Muli uyu mwaka, abaYuda abalapiile balilubwike muli bunkole mu Babiloni kabili balibwelele ku mwabo. Yehova alipaalile abantu bakwe kabili alibafwile pa kuti bawamye umusumba wa Yerusalemu na kabili, na pa kuti balenge itempele libe icifulo icikalamba ica kupepelapo Yehova mu Israele.—Esa. 51:11; Seka. 8:3.

4. Bushe ubusesemo ubwaba mwi buuku lya kwa Esaya icipandwa 65 bulefikilishiwa shani muno nshiku?

⁴ Ubusesemo bwaba mwi buuku lya kwa Esaya bwatendeke ukufikilishiwa pa muku walenga bubili mu mwaka wa 1919 ninshi Yesu alibwelelamo ku muulu. Muli uyu mwaka, ababomfi ba kwa Yehova aba muno nshiku balibalubwile muli Babiloni Mukalamba. Lyena paradaise ya ku mupashi yatendeke ukukula panono panono mwi sonde lyonse. Abalebila pa Bufumu abali abacincila bapangile ifilonganino ifingi kabili balikwete imibele iisuma iyo Umwina Kristu alingile ukukwata. Abaume na banakashi abakwete imibele yabipa balifwele “ubuntu bupya ubwalengelwe ukulingana no kufwaya kwa kwa Lesa.” (Efes. 4:24) Kwena ifisuma ifingi ifyo Esaya asobele fikafikilishiwa mu calo cipya. Lelo na pali ino ine nshita tulaipakisha ifintu ifingi pa mulandu wa kuti twaba muli paradaise ya ku mupashi. Natulande pa fyo iyi paradaise ya ku mupashi yatukuma na pa co tushilingile ukufuminamo.

IFYO ABABA MULI PARADAISE YA KU MUPASHI BOMFWA

5. Nga fintu Baibo ilanda pali Esaya 65:​13, fisuma nshi tuipakisha muli paradaise ya ku mupashi?

⁵ Balakwata ifya kulya fya ku mupashi ifisuma. Ifyaba mu busesemo bwa kwa Esaya filalanga bwino bwino ubupusano bwaba pa fyo ababa muli paradaise ya ku mupashi bomfwa ne fyo abashaba muli iyi paradaise bomfwa. (Belengeni Esaya 65:13.) Yehova alapeela ababomfi bakwe fyonse ifyo bakabila pa kuti batwalilile ukuba ifibusa fyakwe. Alatupeela umupashi wakwe uwa mushilo, alitupeela Icebo cakwe Baibo, ne mpapulo ishingi ishilanda pali Baibo pa kuti ‘tulelya,’ ‘tulenwa’ kabili ‘tulesekelela.’ (Linganyeniko Ukusokolola 22:17.) Lelo abashaba muli paradaise ya ku mupashi balaba ne ‘nsala, balaba ne cilaka kabili balekatwa insoni.’ Tabaishiba Lesa.—Amose 8:11.

6. Finshi ifyo Yehova atupeela ifyo Baibo ilandapo pali Yoele 2:​21-24, kabili tunonkelamo shani muli ifi atupeela?

⁶ Mu busesemo ubo Yehova alengele Yoele alembe, mwaba ifintu ifyacindama pamo nga ingano, umwangashi, amafuta ya miolife pa kulanga ifintu ubwingi ifyo Yehova apeela abantu bakwe ukubikako ne fya kulya fya ku mupashi. (Yoele 2:​21-24) Atupekanishisha ifya kulya fya ku mupashi ukupitila muli Baibo, impapulo ishilanda pali Baibo, webusaiti yesu, ukulongana kwa pa cilonganino, ukwa muputule no kwa citungu. Tulalya ifya kulya fya ku mupashi cila bushiku kabili ici cilenga tuleumfwa ukuti tulakwata ifya kulya ifya ku mupashi ifingi kabili tatubulisha nangu cimo.

7. Finshi filenga ‘tulesekelela mu mitima’? (Esaya 65:14)

⁷ Baliba ne nsansa kabili balakwata fyonse ifyo bakabila. Abantu ba kwa Lesa ‘balaula utupundu’ pantu balatasha Yehova pa fyo abasakamana. (Belengeni Esaya 65:14.) Icine icilenga icitetekelo cesu cilekoselako, ne fisuma ifyo Lesa atulaya mu Cebo cakwe ifilenga tulesansamuka, ne subilo lya cine cine ilyo twakwata pa mulandu ne cilubula ca kwa Kristu, filenga ‘tulesekelela mu mitima.’ Nga tulelanshanya pali ifi na bamunyinefwe na bankashi, tulaba ne nsansa sana.—Amalu. 34:8; 133:​1-3.

8. Bushe fintu nshi ifikalamba fibili ifyaba muli paradaise ya ku mupashi?

 ⁸ Ifintu ifikalamba fibili ifilangilila ukuti abantu ba kwa Yehova baba muli paradaise ya ku mupashi, fintu batemwana ne fyo baikatana. Ifi ababomfi ba kwa Yehova batemwana no kwikatana muno nshiku, filangilila ifyo bakulaikala mu calo cipya umo bakatemwana sana kabili umo bakekatana sana ukucila ifyo caba muno nshiku. (Kol. 3:14) Nkashi umo alilandile ifyaba abantu ba kwa Yehova ilyo abamwene pa muku wa kubalilapo. Alandile ati: “Nshali ne nsansa, na mu lupwa lwesu mwine tamwali insansa. Umuku wa kubalilapo namwene ifyo abantu batemwana, ni lintu nali ne Nte sha kwa Yehova.” Umuntu nga alefwaya ukuba ne nsansa alingile ukuba muli paradaise yesu iya ku mupashi. Te mulandu ne fyo abantu ba muli cino calo batontonkanya pa Nte sha kwa Yehova, Inte sha kwa Yehova balipanga ishina ilisuma na Lesa na bonse abamupepa.—Esa. 65:15.

9. Finshi Baibo yatulaya pali Esaya 65:​16, 17 pa fintu ifilenga tulekwata amafya kabili tulekalipwa?

⁹ Tabasakamana nangu cimo. Baibo pali Esaya 65:14 itila bonse abashifwaya ukuba muli paradaise ya ku mupashi ‘balalila pa mulandu wa bukali mu mitima kabili balalila imisowa pa mulandu wa bulanda.’ Nomba finshi twingalanda pa fintu ifilenga abantu ba kwa Lesa balecula kabili balekalipwa? Mu kulekelesha ifi fyonse ‘fikalabwa kabili fikafiswa ku menso ya kwa Lesa.’ (Belengeni Esaya 65:​16, 17.) Yehova akafumyapo amafya yonse ayo tukwata kabili tukasuka tukalabe ifyo twaleumfwa pa mulandu wa aya amafya.

10. Cinshi mutashisha pali bamunyinefwe na bankashi abo mwaba nabo mu cilonganino ca kwa Lesa? (Moneni ne cikope.)

¹⁰ Na pali ino ine nshita, nga tulelongana na Bena Kristu banensu tatusakamana nangu cimo kabili tatubika amano ku fintu fya muli cino calo cabipa ifilenga tulesakamikwa. Tulalenga bamunyinefwe na bankashi bateka imitima nga ca kuti tulelanga imibele iyaba pa fisabo fya mupashi wa mushilo e kutila, ukutemwa, ukusekelela, umutende, icikuuku, no kufuuka. (Gal. 5:​22, 23) Tulatasha sana ifi twaba mu cilonganino ca kwa Lesa! Bonse abatwalilila ukuba muli paradaise ya ku mupashi bakamonako ilyo Lesa akaleta “imyulu ipya ne sonde lipya” ifyo atulaya.

11. Ukulingana na Esaya 65:​18, 19, bushe paradaise ya ku mupashi iyo Yehova abikako yatukuma shani?

¹¹ Balatasha kabili balasekelela. Lyena Esaya alandile pa cilenga ‘tulesekelela kabili tuleanga’ pa mulandu wa kuti twaliba muli paradaise ya ku mupashi. Yehova e walenga kube iyi paradaise ya ku mupashi. (Belengeni Esaya 65:​18, 19.) E mulandu wine Yehova atupeelela  umulimo wa kweba abantu ukuti bafume mu filonganino fya muli cino calo ifishibasambilisha icine pali Lesa pa kuti bese muli paradaise yesu iya ku mupashi. Tulatemwa sana pa mapaalo twakwata pa mulandu wa kuti twalishiba icine, kabili ici cilenga tule-ebako abantu pali aya mapaalo.—Yer. 31:12.

12. Bushe mumfwa shani nga mwabelenga ifyo Yehova atulaya pali Esaya 65:​20-24, kabili mulandu nshi mumfwila ifyo?

¹² Na kabili twaliba ne nsansa kabili tulatasha pe subilo twakwata pa mulandu wa kuti twaliba muli paradaise ya ku mupashi. Tontonkanyeni pa fintu fyonse ifyo tukalamona ne fyo tukalacita mu calo cipya ica kwa Lesa! Baibo yatulaya ukuti: “Tamwakabe akanya akoonka akakekala fye inshiku ishinono, nangu umukote uushafisha inshiku shakwe.” ‘Tukakuula amayanda no kwikalamo, tukalima na mabala ya myangashi no kulya ifisabo fya yako.’ ‘Tatwakaculile apa fye’ pantu Yehova akatupaala. Alitulaya ukuti tukacingililwa kabili tukalaikala bwino sana. “Ilyo bashilaita,” akeshiba ifyo cila muntu akulakabila kabili “akapeela ica mweo conse ifyo cilefwaya.”—Esa. 65:​20-24; Amalu. 145:16.

13. Bushe amashiwi yaba pali Esaya 65:25 yalondolola shani ifyo abantu baaluka nga batampa ukubombela Yehova?

¹³ Aba mutende kabili abacingililwa. Lesa alilenga abantu abengi abakwete imibele iyabipa sana ba-aluka, baba abantu abasuma sana. (Belengeni Esaya 65:25.) Balileka ukuba ne mibele yabipa. (Rom. 12:2; Efes. 4:​22-24) Kwena abantu ba kwa Lesa bacili tabapwililika, e ico tukatwalilila ukupanga ifilubo. Na lyo line, Yehova alilonganika “abantu abalekanalekana” abamutemwa kabili abatemwana. Ne ci cilenga babe aba mutende kabili abaikatana. (Tito 2:11) Uwingacita fye ifi, ni Lesa wa maka yonse!

14. Bushe ifyacitikile munyinefwe umo filanga shani ukuti amashiwi ayaba pali Esaya 65:25 ya cine?

¹⁴ Bushe cine cine abantu kuti ba-alula imibele yabo? Natulande pali ici cacitike. Umulumendo umo balimukakilepo mu cifungo pa miku iingi kabili ilyo alefisha imyaka 20 ninshi alikwata imibele yabipa kabili ninshi wa lubuli. Balimukakilepo pa kwiba motoka, pa kutoba ifikuulwa no kwiba, na pa milandu imbi iikalamba. Ali wa lubuli sana. Ilyo aumfwile icine ca mu Baibo pa muku wa kubalilapo, kabili ilyo atendeke ukulongana ne Nte sha kwa Yehova, alishininkishe ukuti alisangile paradaise ya ku mupashi. Ilyo abatishiwe aba ne Nte ya kwa Yehova, ilingi line aletontonkanya pa fyo amashiwi yaba pali Esaya 65:25 yamukumine. Alilekele ukuba nge nkalamo, e kutila ukuba uwa lubuli, no kuba nge mpaanga e kutila, ukuba umuntu uwa mutende.

15. Mulandu nshi tufwaila ukwitila abantu na bambi pa kuti bese muli paradaise ya ku mupashi, kabili kuti twabeta shani?

¹⁵ Baibo pali Esaya 65:13 yatendeka na mashiwi ya kuti: “Shikulu Mulopwe Yehova atila.” Icikomo 25 calekeleshako na mashiwi ya kuti “e fyo Yehova asosa.” Lyonse alafikilisha ifyo alaya. (Esa. 55:​10, 11) Paradaise ya ku mupashi e ko yaba pali ino nshita. Yehova alipanga ulupwa ulwa ba bwananyina ulwaibela icine cine. Twalikwata umutende kabili tumfwa ukuti twalicingililwa muli cino calo umwaba abantu abacita ifyabipa. (Amalu. 72:7) Pa mulandu ne fyo twalandapo, tufwaya ukwafwa abantu abengi nga nshi pa kuti nabo bengesa muli ulu lupwa lwa Bena Kristu. Kuti twacita ifi nga tulebika amano ku kulenga abantu baba abasambi.—Mat. 28:​19, 20.

IFYO TWINGACITA PA KUTI TWITE ABANTU NA BAMBI BESE MULI PARADAISE YA KU MUPASHI

16. Finshi filenga abantu balafwaya ukwisa muli paradaise ya ku mupashi?

¹⁶ Bonse kuti twacitapo fimo pa kuti tulenge abantu batemwe paradaise ya ku mupashi. Kuti  twacita ifi nga tulepashanya Yehova. Tapatikisha abantu ukwisa mu cilonganino cakwe. Lelo alaba uwanakilila ilyo ‘alekulila’ abantu mu cilonganino cakwe. (Yoh. 6:44; Yer. 31:3) Abantu abakwata imitima iisuma abasambilila pa fyo Yehova aba no kutemwa na pa mibele yakwe iisuma, balafwaisha ukupalama kuli ena. Bushe nga tuli ne mibele iisuma kabili tulecita ifintu ifisuma, kuti twalenga shani abantu balafwaya ukwisa muli paradaise ya ku mupashi?

17. Finshi twingacita pa kuti tulenge abantu balefwaya ukwisa muli paradaise ya ku mupashi?

¹⁷ Cimo ico twingacita pa kulenga abantu balafwaya ukwisa muli paradaise ya ku mupashi, kutemwa aba bwananyina no kuba ne cikuuku kuli bena. Nga ca kuti abantu baisa mu kulongana na ifwe pa muku wa kubalilapo, tufwile ukulenga balaumfwa nge fyo abali mu Korinti nalimo baumfwile ilyo baile mu kulongana pa muku wa kubalilapo. Batile: “Lesa aba muli imwe icine cine.” (1 Kor. 14:​24, 25; Seka. 8:23) Kanshi tulingile ukulakonka ifyo Baibo itufunda ukuti “muleikala umutende na banenu.”—1 Tes. 5:13.

18. Cinshi cingalenga abantu baisa mu cilonganino cesu?

¹⁸ Tulingile ukulaesha na maka yonse pa kuti tulemona aba bwananyina nge fyo Yehova abamona. Kuti twacita ifi nga tulebika amano ku mibele yabo iisuma ukucila ukulabika amano ku fyo balufyanya, pantu ifi fikapwa ku ntanshi. Kuti tulepwisha amafya yonse ayo twingakwata nga ca kuti ‘tulebelana icikuuku, tuleba ne mitima ya nkumbu, tuleitemenwa ukubelelana uluse.’ (Efes. 4:32) Nga tulecita ifi, abantu abafwaya ukubalanga imibele ya musango uyu bakesa muli paradaise ya ku mupashi. b

 IKALILILENI MULI PARADAISE YA KU MUPASHI

19. (a) Nga fintu akabokoshi kaleti “ Balifumine Kabili Balibwelele” kalelanda, finshi bamo balandapo pa numa ya kubwelela muli paradaise ya ku mupashi? (b) Cinshi tulingile ukulafwaisha ukucita? (Moneni ne cikope.)

¹⁹ Tulatasha sana pa kuba muli paradaise ya ku mupashi! Pali ino nshita paradaise ya ku mupashi yaliwaminako kabili mwaliba abantu abengi abalumbanya Yehova ukucila ifyo cali kale. Natutwalilile ukulatasha pali paradaise ya ku mupashi iyo Yehova atupeela. Bonse abafwaya ukulaikala bwino, ukuteka imitima, ukukanasakamikwa, no kucingililwa bafwile ukwisa muli paradaise ya ku mupashi kabili tabafwile ukufumamo. Lelo tulingile ukuba abacenjela pantu Satana ale-esha na maka yakwe yonse pa kuti atufumye muli iyi paradaise. (1 Pet. 5:8; Ukus. 12:9) Tatufwile ukumuleka atufumya muli iyi paradaise. Natulebombesha pa kuti iyi paradaise ya ku mupashi itwalilile ukuba iisuma, iyasanguluka kabili umwaba umutende.