Muli cilya cipande twalisambilile ukuti kwaliba umulandu uukalamba uwakuma ifwe bonse ukubikako fye ne fibumbwa fya mupashi. No yo mulandu, kulenga ishina lya kwa Lesa ukuba ilya mushilo. Ukwishiba nampo nga Lesa alikwata insambu sha kuteka abantu nelyo iyo, kwalikuma ukulenga ishina lyakwe ukuba ilya mushilo. Ifyo abantu basalapo nampo nga kuba aba cishinka kuli Yehova nelyo iyo na fyo fyalikuma ishina lya kwa Lesa.

Mulandu nshi pali ino nshita tulelandila ukuti umulandu uukalamba ukumine ishina lya kwa Lesa no kulilenga ukuba iya mushilo? Natulandeko pa milandu itatu.

Umulandu wa kubalilapo wa kuti, mwi bala lya Edeni Satana aliponteele ishina lya kwa Lesa nelyo ifyo Lesa aba. Icipusho Satana aipwishe Efa cali kwati alemweba ukuti Yehova te kapekape kabili alilufyenye ukubalesha ukulya kuli cilya cimuti. Lyena Satana aebele Efa ifyo Lesa ashabebele kabili ifi acitile ale-eba Lesa ukuti wa bufi. E ico aliponteele ishina lya kwa Lesa. Aishileba “Kaseebanya” icalola mu kuti “uwa lwambo.” (Yoh. 8:44) Filya Efa aumfwilile ifyo Satana alandile, fyalangilile ukuti talefwaya Lesa ukuba kateka wakwe. (Ukute. 3:1-6) Ukufika na ino ine inshita, Satana alitwalilila ukulanda ifya bufi pali Yehova. Abomfwila ifyo Satana alanda balapondokela Yehova. Nomba abantu ba kwa Lesa bamona ukuti ukupondokela ishina lya kwa Lesa ilya mushilo lufyengo ulwine lwine. Uyu e mulandu wine ifyabipa fyafulila ifi mwi sonde.

Umulandu walenga bubili, Yehova alafwaisha ukulenga ishina lyakwe ukuba ilya mushilo no kufumyapo umuseebanya onse pa kuti bamalaika e lyo na bantu banonkelemo. Ukucita ifi kwalicindama sana kuli Yehova. E mulandu wine alandila ukuti: “Nkalenga ishina lyandi ilikalamba ukuba ilya mushilo.” (Esek. 36:23) Kabili Yesu na o alisambilishe ababomfi ba kwa Yehova aba cishinka icacindama ico balingile ukulapepela, atile: “ishina lyenu libe ilya mushilo.” (Mat. 6:9) Imiku iingi mu Baibo balilanda pa co cacindamina ukulengela ishina lya kwa Lesa ukuba ilya mushilo. Moneni Amalembo yamo ayalanda pali ifi. “Peeleni Yehova ubukata ubwalinga ishina lyakwe.” (1 Imila. 16:29; Amalu. 96:8) “Lumbanishisheni ubukata bwe shina lyakwe pa filimba.” (Amalu. 66:2) “Nakulacindika ishina lyenu umuyayaya.” (Amalu. 86:12) Inshita imo ilyo Yehova alandile ukufuma ku muulu pe tempele mu Yerusalemu, ni lilya Yesu atile: “Tata, cindikeni ishina lyenu.” Yehova na o atile: “Nindicindika e lyo nkalicindika na kabili.”—Yoh. 12:28. a

Umulandu walenga butatu, ifyo Yehova afwaisha ukucita fyalikuma sana ishina lyakwe nelyo ifyo aba. Tontonkanyeni pa fikacitika ilyo kukaba ubwesho bwa kulekeleshako pa mpela ya kuteka  kwa kwa Kristu ukwa myaka 1,000, ifilangilila ifyo ishina lya kwa Lesa lyabela ilyacindama. Bushe bamalaika e lyo na bantu bonse bakomfwa shani pe shina lya kwa Lesa pali ilya nshita? Pa kuti twasuke bwino ici cipusho, intanshi ibukisheni imilandu ibili iikalamba iyo tulandilepo e kutila, abantu ukuba aba cishinka kuli Yehova e lyo no kuti Yehova e wakwata insambu sha kuteka. Bushe abantu bakalafilwa ukuba aba cishinka kuli ena? Awe. Bakaba abapwililika kabili bakacimfya amesho yonse. Bakapokelela umweo wa muyayaya. Bushe bamalaika e lyo na bantu bakatwalilila ukulanda pa walinga ukuteka? Awe. Bonse abakaba ku muulu e lyo na bakaba pe sonde bakekatana kabili tabakaletwishika ukuti Yehova e walinga ukuteka ku muulu na pe sonde. Nomba bushe na pali ilya nshita ishina lya kwa Yehova likatwalilila ukuba ilyacindama ku bantu ba kwa Lesa?

Pali ilya nshita bonse bakeshiba icine pe shina lya kwa Lesa kabili abantu bakacindika ishina lyakwe umupwilapo. Na lyo line, ishina lya kwa Lesa likatwalilila ukuba ilyacindama mu muulu na pe sonde. Mulandu nshi twalandila ifi? Pantu bonse bakalamona ifyo Yehova akalawamya ifintu ukulingana ne fyo afwaya. Apo Yesu akabwesesha ubufumu kuli Yehova, Lesa akaba “fyonse kuli bonse.” (1 Kor. 15:28) Lyena abantunse bonse ‘bakalubuka . . . no kuba abana ba kwa Lesa.’ (Rom. 8:21) Kabili Yehova akafikilisha ifyo afwaya ukucita, e kutila ukulenga ifibumbwa fya mupashi mu muulu e lyo na bantu ukuba ulupwa lumo ulwaikatana.—Efes. 1:10.

llyo ifi fikacitika, bushe bamalaika e lyo na bantu bakomfwa shani? Ukwabula no kutwishika tukalafwaisha ukulumbanya ishina lya kwa Lesa ilya kuti Yehova. Davidi uwaimbile amalumbo alembele ukuti: “Acindikwe Yehova Lesa . . . Ne shina lyakwe libe ilyapaalwa umuyayaya.” (Amalu. 72:18, 19) Lyonse tukalaishibilako ifintu ifisuma ifya kucindikilapo ishina lya kwa Lesa umuyayaya.

Na kuba, ishina lya kwa Yehova limininako fyonse ifyo aba. Nga twatontonkanya pe shina lya kwa Lesa tulatontonkanya na pa fyo atutemwa. (1 Yoh. 4:8) Lyonse tukalaibukisha ukuti icalengele Yehova ukutubumba ni co alitutemwa, icalengele atupeele icilubula ni co alitutemwa kabili icalengele atusambilishe ukuti e walinga ukuteka ni co alitutemwa. Tukatwalilila ukumona ifyo Yehova atutemwa umuyayaya. Tukapalama sana kuli ena kabili tukalalumbanya ne shina lyakwe umuyayaya.—Amalu. 73:28.