ICIPANDE CA KUSAMBILILAMO 33
ULWIMBO 130 Mule-elela
Ifyo Yehova Afwaya Icilonganino Cilemona Uwacita Ulubembu Ulukalamba
“Nga ca kuti umuntu abembuka, twalikwata kaafwa.” —1 YOH. 2:1.
IFYO TWALALANDAPO SANA
Ifyo tusambililako ku fyo babombeele pa mulandu, ilyo uwa bwananyina acitile ulubembu ulukalamba mu cilonganino cali mu Korinti.
1. Cinshi Yehova afwaya abantu bonse bacita?
ILYO Yehova abumbile abantunse, alibapeele ne nsambu sha kuisalila ifya kucita. Cila bushiku mulabomfya ishi insambu ilyo musalapo ifya kucita. Icacindamisha ico umuntu onse engasalapo ukucita, kuipeela kuli Yehova no kuba mu lupwa lwa bantu bakwe abamupepa. Yehova afwaya umuntu onse aipeela kuli ena. Cinshi Yehova afwaila abantu bonse baipeela kuli ena? Ni co alibatemwa kabili afwaya ifintu filebawamina sana. Afwaya baba ifibusa fyakwe kabili bakabe no mweo wa muyayaya.—Amala. 30:19, 20; Gal. 6:7, 8.
2. Bushe Yehova afwaya abacita imembu ishikalamba abashilalapila bacita cinshi? (1 Yohane 2:1)
2 Na lyo line, Yehova tapatikisha umuntu uuli onse ukuti alemubombela. Alaleka umuntu onse aisalilapo ifya kucita. Nomba inga ca kuti Umwina Kristu uwabatishiwa acita ulubembu ulukalamba? Nga talapiile bafwile ukumufumya mu cilonganino. (1 Kor. 5:13) Na lyo line, Yehova alafwaisha ukuti uucitile ulubembu ulukalamba abwelela kuli ena. Na kuba, ici e calengele sana ukuti atupeele icilubula pa kuti aletwelela imembu nga twalapila. (Belengeni 1 Yohane 2:1.) Lesa wesu uwatutemwa alapaapaata abacita imembu ukuti balapile.—Seka. 1:3; Rom. 2:4; Yako. 4:8.
3. Finshi twalalandapo muli cino cipande?
3 Yehova afwaya tulemona ukucita ulubembu nge fyo akumona kabili tulemona abacita ulubembu nge fyo abamona. Muli cino cipande twalalanda pa fyo tufwile ukulamona ukucita ulubembu nge fyo Yehova akumona e lyo na bacitile ulubembu nge fyo Yehova abamona. Ilyo mulebelenga cino cipande mumone (1) Ifyo babombeele pa mulandu wa muntu uwacitile ulubembu ulukalamba mu cilonganino ca mu Korinti mu nshita ya batumwa, (2) ifyo umutumwa Paulo aebele icilonganino ukucita ilyo uwacitile ulubembu alapiile, na (3) ifyo ili lyashi lya mu Baibo litusambilisha pa fyo Yehova amona Abena Kristu abacita imembu ishikalamba.
IFYO BABOMBEELE PA MULANDU WA MUNTU UWACITILE ULUBEMBU ULUKALAMBA MU NSHITA YA BATUMWA
4. Cinshi calecitika mu cilonganino ca mu Korinti mu nshita ya batumwa? (1 Abena Korinti 5:1, 2)
4 Belengeni 1 Abena Korinti 5:1, 2. Ilyo Paulo ali pa lwendo lwalenga butatu ulwa bumishonari, alyumfwile ilyashi ilibi ilyalecitika mu cilonganino icipya icali mu Korinti. Uwa bwananyina muli cilya cilonganino, alelaala no mwanakashi uo bawishi baupile. Ifi alecita fyalibipile nga nshi, ica kuti ‘nangu fye bena fyalo tabaleficita!’ Icilonganino calemona ukuti cali fye bwino ukuleka uwa bwananyina uwalecita ifi atwalilila ukuba mu cilonganino. Nalimo bamo mu cilonganino baletontonkanya ukuti ifi icilonganino tacacitilepo nangu cimo, calepashanya Lesa uwaba no luse ku bantunse abashapwililika. Lelo Yehova tatekelesha abantu bakwe abacita imembu. Ifi uyu uwa bwananyina alecita ifya nsoni, aleonaula ishina ilisuma ilyo icilonganino cakwete. Uyu uwa bwananyina atwalilila ukuba mu cilonganino, nga alilengele abo aleampana nabo balacita imembu ishikalamba nge fyo alecita. Nomba finshi Paulo aebele icilonganino ukucita?
5. Finshi Paulo aebele icilonganino ukucita, kabili ni mwi aloseshe? (1 Abena Korinti 5:13) (Moneni ne cikope.)
5 Belengeni 1 Abena Korinti 5:13. Lesa alengele Paulo alembe kalata umo aebele icilonganino ukuti ulya umubembu uushalapiile bamufumye mu cilonganino. Bushe aba mu cilonganino bali no kulamumona shani? Paulo abebele ukuti “muleke ukwampana” nankwe. Ni mwi Paulo aloseshe? Paulo alondolwele ukuti, muli ifi abebele ukucita mwali ‘no kukanalya nankwe.’ (1 Kor. 5:11) Ukuliila pamo ifya kulya no muntu kulenga twakwata inshita iikalamba iya kuba nankwe no kulanda nankwe. Ukwabula no kutwishika Paulo aloseshe mu kuti icilonganino tacalingile ukulaba sana pamo nankwe no kulanshanya nankwe. Ifi fyali no kulenga aba mu cilonganino betendeka ukucita ifyabipa. (1 Kor. 5:5-7) Na kabili aba mu cilonganino nga baleka ukulaba sana pamo nankwe no kulalanshanya nankwe, cali no kulenga ailuka ukuti alikalifye sana Yehova, kabili cali no kulenga aumfwa ububi ica kuti alapila no kulapila.
Lesa alengele Paulo alemba kalata, umo alandile ukutila umubembu uushalapiile bamufumye mu cilonganino (Moneni paragrafu 5)
6. Bushe aba mu cilonganino bacitile shani ilyo bapokelele kalata Paulo abalembeele, kabili finshi ulya mwaume uwacitile ulubembu ulukalamba acitile?
6 Ilyo Paulo atumiine Abena Kristu mu Korinti kalata, atendeke ukutontonkanya ukuti nalimo tabakakonke ifyo abebele. Ilyo papitile inshita, Tito aebele Paulo ilyashi ilisuma nga nshi. Aba mu cilonganino balikonkele ifyo Paulo abebele muli kalata. (2 Kor. 7:6, 7) Balifumishe uwalecita ulubembu mu cilonganino. Na kabili, ilyo papitile fye imyeshi iinono ukutula apo Paulo abalembeele ilya kalata, ulya mwaume uwacitile ulubembu ulukalamba alilapiile! Alilekele ukucita ifyabipa kabili alitendeke ukukonka amafunde ya kwa Yehova ayalungama. (2 Kor. 7:8-11) Finshi Paulo aebele icilonganino ukucita?
IFYO ICILONGANINO CALINGILE UKULAMONA UMUBEMBU UWALAPIILE
7. Fisuma nshi fyacitike filya bafumishe umubembu mu cilonganino? (2 Abena Korinti 2:5-8)
7 Belengeni 2 Abena Korinti 2:5-8. Paulo alandile ukuti ‘ifyo abengi bakalipiile uwabembwike fyalilingile.’ Mu nshila imbi kuti twatila filya ulya mwaume bamufumishe mu cilonganino fyalengele alapila. Kanshi icilonganino tacalingile ukutwalilila ukumusalapula.—Heb. 12:11.
8. Finshi Paulo aebele icilonganino ukucita ilyo ulya mwaume alapiile?
8 E ico Paulo aebele icilonganino ati: “Mulingile fye ukumubelela uluse no kumusansamusha” kabili “mumulange ukuti mwalimutemwa.” Moneni ukuti Paulo talefwaya icilonganino ukupelela fye pa kusuminisha ulya mwaume uwalapiile ukubwelela pa bantu ba kwa Yehova. Paulo alefwaya aba mu cilonganino balelanga mu fyo balelanda na mu fyo balecita ukuti balibelele ulya mwaume uluse kabili balimutemenwe. Ifi fyali no kulenga ulya uwa bwananyina alaumfwa ukuti balimupokelele mu cilonganino.
9. Mulandu nshi nalimo bamo baleshimunukila ukubelela uluse umubembu uwalapile?
9 Bushe kwali bamo mu cilonganino abaleshimunuka ukupokelela ulya umubembu uwalapiile? Baibo tayalandapo, lelo nalimo eko bali. Pantu na kuba ifyo acitile fyalilengele mu cilonganino mwaba amafya kabili aba mu cilonganino bamo nalimo balyumfwile sana ububi. Bamo nalimo baleumfwa ukuti tacali bwino ukubwesha ulya uwa bwananyina mu cilonganino, pantu bena bale-esha na maka yabo yonse ukulakonka amafunde ya kwa Yehova ayalanda pa kuba ne mibele isuma. (Linganyeniko Luka 15:28-30.) Nomba mulandu nshi cacindamine ku ba mu cilonganino ukulanga ukuti balitemenwe icine cine uwa bwananyina uwabwelele mu cilonganino?
10-11. Finshi fyali no kucitika baeluda abakaana ukwelela umubembu uwalapiile?
10 Elenganyeni ifyali no kucitika kuli uyu mwaume uwalapiile icine cine baeluda nga tabamusuminishe ukubwelela mu cilonganino, nelyo aba mu cilonganino nga tabamulangile ukuti balimutemwa ilyo abwelele mu cilonganino. Uyu mwaume ali no kuba sana no bulanda kabili nga alifuupwike. Nalimo nga ali no kulaumfwa ukuti, te kuti abombele Yehova na kabili. Kabili nalimo nga ali no kuleka ukucita ifyali no kulenga aba cibusa wa kwa Lesa na kabili.
11 Cali no kubipa sana aba bwananyina mu cilonganino abakaana ukwelela uyu mubembu uwalapiile, pantu bucibusa bwabo na Yehova nga bwalipwile. Cinshi twalandila ifi? Ni co tabali no kupashanya Yehova uwelela ababembu abalapila, lelo bali no kupashanya Satana umunkalwe kabili uushaba na luse. Abacita ifi nga balilekele Satana Kaseebanya ababomfya pa kulenga ulya mwaume eba cibusa wa kwa Yehova na kabili.—2 Kor. 2:10, 11; Efes. 4:27.
12. Bushe aba mu cilonganino bali no kulapashanya shani Yehova?
12 Finshi nomba aba mu cilonganino ca mu Korinti bali no kulacita pa kuti belapashanya Satana lelo balepashanya Yehova? Balingile ukulabelela uluse umuntu uwalapila, nga filya Yehova acita. Moneni ifyo abalembeleko Baibo bamo balandile pali Yehova. Davidi alandile ati: “Mwe Yehova muli basuma kabili mwali-iteyanya ukwelela.” (Amalu. 86:5) Mika alembele ati: “Ni Lesa nshi uwaba nga imwe, uusuula ku filubo kabili uwelela imembu?” (Mika 7:18) Esaya na o alandile ati: “Umubifi naleke ukucita ifyabipa kabili uucita ifyabipa, naleke ukutontonkanya ifyabipa; nabwelele kuli Yehova, uukamubelela uluse, nabwelele kuli Lesa wesu pantu akamwelela nga nshi.”—Esa. 55:7.
13. Cinshi balingile ukubwesesha umwaume uwalapiile mu cilonganino? (Moneni akabokoshi akaleti “ Ni Lilali Babweseshe Umwaume mu Cilonganino Icali mu Korinti?”)
13 Pa kuti aba mu cilonganino ca mu Korinti bapashanye Yehova, balingile ukupokelela umwaume uwalapiile mu cilonganino no kumulanga ukuti balimutemenwe. Filya aba mu cilonganino bakonkele ifyo Paulo abebele ukuti bapokelele umubembu uwalapiile mu cilonganino, balangile ukuti “ba cumfwila mu fintu fyonse.” (2 Kor. 2:9) Kwena papitile fye imyeshi iinono ukutula apo bamufumishe mu cilonganino, lelo filya bamufumishe mu cilonganino fyalengele alapila. Kanshi apo alilapiile, tabalingile ukukokola ukumubwesha mu cilonganino.
IFYO TWINGABA NO MULINGANYA NO LUSE NGA FILYA YEHOVA ABA
14-15. Finshi twasambilila ku fyo babombeele pa mulandu uwaliko mu cilonganino ca mu Korinti? (2 Petro 3:9) (Moneni ne cikope.)
14 Ico ilyashi ililanda pa fyo babombeele pa mulandu uwali mu cilongnino ca mu Korinti balilembeele mu Baibo, ni “pa kuti tulesambililako.” (Rom. 15:4) Kuli ili lyashi tulasambililako ukuti Yehova taleka abacita imembu ishikalamba abashilapila batwalilila ukuba mu cilonganino. Yehova tamona ukuti umubembu uushilapila afwile ukubelelwa uluse no kumuleka atwalilila ukuba mu cilonganino. Yehova wa luse, lelo tatekelesha abacita ifyabipa kabili tangusha amafunde yakwe. (Yuda 4) Nga ca kuti Yehova aleka ababembu abashilapila batwalilila ukuba mu cilonganino ninshi taaba na luse, pantu mu cilonganino kuti mwaba imibele yabipa.—Amapi. 13:20; 1 Kor. 15:33.
15 Na lyo line, twalishiba ukuti Yehova tafwaya umuntu nangu umo akonaike. Alafwaisha ukupususha abantu. Alabelela abantu uluse abaleka ukucita ifyabipa kabili abafwaya ukuba ifibusa fyakwe na kabili. (Esek. 33:11; belengeni 2 Petro 3:9.) Kanshi ilyo umwaume wa mu Korinti alapiile no kuleka ukucita ulubembu, Yehova abomfeshe Paulo pa kulondolwela aba mu cilonganino ukuti balingile ukubelela uluse ulya mwaume no kumupokelela mu cilonganino.
Pa kuti aba mu cilonganino balepashanya Yehova filya aba no kutemwa no luse, bafwile ukutemwa no kuba ne cikuuku ku o babwesha mu cilonganino (Moneni amaparagrafu 14-15)
16. Bushe ifi twasambilila pa fyo babombeele pa mulandu uwali mu cilonganino ca mu Korinti, fyalenga muleumfwa shani?
16 Ilyashi twasambililapo ililanda pa fyo babombeele pa mulandu uwali mu cilonganino ca mu Korinti, lyalenga tumone ifyo Yehova aba no kutemwa, ifyo aba uwalungama ne fyo aba no mulinganya. (Amalu. 33:5) Bushe ifi tafilengele mwalafwaya ukulumbanya sana Lesa wesu? Pantu na kuba bonse fye tuli babembu kabili tulafwaya ukuti aletwelela. Bonse fye tufwile ukulatasha Yehova pa kutupeela icilubula pantu cilalenga aletwelela imembu. Tulasansamuka sana ifi twaishiba ukuti Yehova alitemwa nga nshi abantu bakwe kabili afwaya ukuti ifintu filebawamina sana!
17. Mepusho nshi tukasuka mu fipande fikonkelepo?
17 Nga ca kuti Umwina Kristu acita ulubembu ulukalamba muno nshiku, bushe baeluda kuti bapashanya shani Yehova filya aba no kutemwa? Kabili bushe kuti ba-afwa shani uubembwike pa kuti alapile? Finshi aba mu cilonganino bafwile ukucita nga ca kuti baeluda bapingulapo ukufumya umuntu mu cilonganino nelyo ukumubwesha mu cilonganino? Tukasuka aya mepusho mu fipande fikonkelepo.
ULWIMBO 109 Tuletemwana nga Nshi
