1-2. Finshi munyinefwe Angelito acitile ifyo na ifwe tulingile ukucita pa kuti twishibe bwino Yehova?

BUSHE abafyashi benu ni Nte sha kwa Yehova? Nga ca kuti ni ba Nte, muleibukisha ukuti te kuti mube cibusa wa kwa Yehova pa mulandu fye wa bafyashi benu. Nampo nga abafyashi benu ni ba Nte nelyo iyo, mulingile ukubombesha pa kuti mube cibusa wa kwa Yehova.

² Natulande pali munyinefwe Angelito. Abafyashi bakwe bali ni Nte sha kwa Yehova. Na lyo line, ilyo aali umwaice taleumfwa ukuti Yehova aali ni cibusa wakwe. Atile, “Nalebombela Yehova pa mulandu wa kukonkelesha fye abafyashi bandi.” Lyena mu kupita kwa nshita, munyinefwe Angelito atendeke ukubelenga Icebo ca kwa Lesa no kutontonkanya sana pa fyo alebelenga. Na kabili, atendeke ukupepa sana kuli Yehova. Finshi fyacitike? Munyinefwe Angelito atile, “Naishilesanga ukuti icingalenga fye naba cibusa wa kwa Yehova, kulaisambilisha ne mwine pali ena.” Ifi munyinefwe Angelito alandile, kuti fyalenga twalatontonkanya pali aya mepusho: Bushe ukwishiba fimo pali Yehova kwapusana shani no kumwishiba bwino? Kabili finshi tulingile ukucita pa kuti twishibe bwino Yehova?

3. Bushe ukwishiba fimo pali Yehova kwapusana shani no kumwishiba bwino?

³ Nga ca kuti twalishiba ishina lya kwa Lesa, nelyo nga twalishibako fimo ifyo Lesa alanda nelyo ifyo acita, nalimo kuti twatila twalimwishiba. Lelo ukwishiba fye fimo pali Yehova,  takwalola mu kuti ninshi twalimwishiba bwino. Kwaliba na fimbi ifyo tulingile ukucita. Tulingile ukulaisambilisha sana pali Yehova no kwishiba bwino imibele yakwe iisuma. Ukucita ifi e kukatwafwa ukwishiba ico Yehova acitila ifintu fimo nelyo ico atwebela ukucita fimo, kabili ici cikalenga tuleishiba nga ca kuti Yehova alatemwa ifyo tutontonkanya pa fintu fimo, nelyo ifyo tusalapo ukucita. Nga twaishiba ifyo Yehova afwaya tulecita, tulingile ukulacita ifyo fine.

4. Bushe ukusambilila pa malyashi ya bantu abalembwa mu Baibolo kuti kwatwafwa shani?

⁴ Nga tulefwaya ukubombela Yehova, abantu bamo kuti batendeka ukutupumya nelyo ukutucusha, maka maka nga twatendeka no kulongana. Lelo nga twacetekela Yehova, takatulekeleshe pantu ukucita ifi kukalenga tukatendeke ukuba ifibusa fyakwe. Na kuba, ubu bucibusa bukatwalilila umuyayaya. Nomba bushe fwe bantunse kuti twaishiba bwino Yehova? Ee kuti twamwishiba bwino. Twalishiba ifi pantu kale kwali abantu abalembwa mu Baibolo abali abashapwililika nga ifwe abaishibe bwino Yehova, pamo nga Mose e lyo ne Mfumu Davidi. Ilyo tulesambilila pa fyo bacitile, twalaasuka aya amepusho yabili: Finshi bacitile pa kuti beshibe bwino Yehova? Kabili finshi twingasambilila ku fyo bacitile?

5. Cinshi Mose asalilepo ukucita?

⁵ Mose asalilepo ukubombela Lesa. Ilyo Mose aali ne myaka 40, asalilepo ukuba na bantu ba kwa Lesa ukucila ukwishibikwa ukuti “mwana wa mwana mwanakashi wa kwa Farao.” (Heb. 11:24) Mose alishile icifulo icikalamba no kuba ku lubali lwa abena Israele abali abasha mu Egupti. Filya acitile nga fyalimuletelele kuli Farao. Farao ali ni mfumu ya maka ica kuti abena Egupti balemumona ukuti aali ni lesa. Icalengele Mose acite ifi, ni co alicetekele sana Yehova, kabili ici e calengele abe cibusa wa kwa Yehova.—Amapi. 3:5.

6. Cinshi twingasambilila ku fyo Mose acitile?

⁶ Cinshi tulesambililako? Nga filya fine cali kuli Mose, bonse tulingile ukusalapo nampo nga twakulabombela Lesa no kuba mu cilonganino cakwe nelyo iyo. Kwena, pa kuti tulebombela Lesa tulingile ukuipusulako fimo, kabili inshita shimo abantu abashaishiba Yehova kuti batendeka ukutucusha. Lelo nga twacetekela Shifwe wa ku muulu, kuti atwafwa.

7-8. Bushe Mose atwalilile ukusambilila pali finshi?

⁷ Mose alitwalilile ukusambilila pa mibele ya kwa Yehova no kukonka ifyo alemweba. Ku ca kumwenako, ilyo Yehova amwebele ukuyafumya abena Israele mu busha, Mose alemona kwati tafikilepo. Yehova aali ne cikuuku kuli Mose, e kutila alyumfwikishe ifyo aleumfwa kabili alimwafwile. (Ukufu. 4:10-16) Ici calengele Mose ukushipa no kuyaeba Farao ifyo Yehova aali no ku mukanda. Lyena Mose alimwene ifyo Yehova abomfeshe amaka yakwe pa kupususha abena Israele, na lintu aonawile Farao na bashilika bakwe pali Bemba wa Kashika.—Ukufu. 14:26-31; Amalu. 136:15.

⁸ Ilyo Mose afumishe abena Israele mu Egupti, ilingi line baleilishanya. Na lyo line, Mose alimwene ifyo Yehova atekanishishe abantu bakwe abo afumishe mu busha. (Amalu. 78:40-43) Na kabili, Mose alimwene ukuti Yehova aliicefya pantu alikutike kuli ena ilyo amupaapeete ukuti eonaula abena Israele.—Ukufu. 32:9-14.

9. Ukulingana ne lembo lya AbaHebere 11:27, bushe Mose aleumfwana shani na Yehova?

 ⁹ Ilyo abena Israele bafumine mu busha, Mose aleumfwana sana na Yehova ica kuti aali kwati alemona Wishi wa ku muulu. (Belengeni AbaHebere 11:27.) Mu Baibolo mwaliba amashiwi ayalanga ifyo Mose aleumfwana sana na Yehova. Ku ca kumwenako, Baibolo itila inshita imo “Yehova alandile na Mose [ninshi] nabaloshanya ifinso, filya fine umuntu engalanda no munankwe.”—Ukufu. 33:11.

10. Finshi tulingile ukucita pa kuti twishibe bwino Yehova?

¹⁰ Finshi tulesambililako? Pa kuti twishibe bwino Yehova, tatulingile fye ukwishiba imibele yakwe, lelo tulingile no kulacita ifyo afwaya. Yehova afwaya ukuti “abantu balekanalekana bakapusuke no kwishiba bwino bwino icine.” (1 Tim. 2:3, 4) Cimo ico Yehova afwaya tulecita kulasambilisha abantu pali ena.

11. Bushe ukusambilisha abantu pali Yehova kulenga shani twamwishiba bwino?

¹¹ Na kabili, kuti twaishiba bwino Yehova nga ca kuti tulesambilisha abantu bambi pali ena. Ku ca kumwenako, nga twamona ifyo Yehova atutungulula ku bantu ababa ne mitima iisuma abafwaya ukusambilila icine, tulamona ukuti Yehova wa cikuuku. (Yoh. 6:44; Imil. 13:48) Nga twamona abo tusambilisha Baibolo baleka imisango yabipa no kutendeka ukufwala ubuntu bupya, tulamona ukuti Icebo ca kwa Lesa ca maka. (Kol. 3:9, 10) Na kabili tulamona ukuti Yehova alitekanya, pantu alitweba ukulabwelela ku bantu aba mu cifulo tushimikila pa kuti tubafwe ukumwishiba na pa kuti bakapusuke.—Rom. 10:13-15.

12. Ukulingana ne lembo lya Ukufuma 33:13, cinshi Mose alombele, kabili mulandu nshi?

¹² Mose alicindamike bucibusa bwakwe na Yehova. Yehova alilengele Mose ukucita ifipesha amano ifingi, kabili ici calengele Mose eshibe bwino Yehova. Na lyo line, Mose alilombele Yehova ukuti amwafwe ukumwishiba bwino. (Belengeni Ukufuma 33:13.) Pali iyi nshita ninshi Mose ali ne myaka ukucila pali 80. Na lyo line, alishibe ukuti alingile ukutwalilila ukusambilila pali Wishi wa ku muulu uwaba no kutemwa.

13. Cinshi cimo ico twingacita pa kukosha bucibusa bwesu na Lesa?

¹³ Finshi tulesambililako ku fyo Mose acitile? Nampo nga twalibombela Yehova pa myaka iingi nelyo iyo, tulingile ukubika amano ku kukosha bucibusa bwesu na ena. Cimo ico twingacita pa kukosha bucibusa bwesu na Lesa kulapepa kuli ena.

14. Mulandu nshi ipepo lyacindamina nga tulefwaya ukwisha bwino Yehova?

¹⁴ Abantu nga balelanshanya bwino bucibusa bwabo bulakoselako. Kanshi kuti twakosha bucibusa bwesu na Lesa nga tulepepa kuli ena lyonse no kumulondolwela ifyo tuletontonkanya ne fyo tuleumfwa. (Efes. 6:18) Ba Krista abekala ku Turkey batile: “Lyonse nga nalondolwela Yehova ifyo ndetontonkanya kabili nga namona ifyo angafwa, ndamutemenwako kabili ndamucetekela sana. Nga namona ifyo Yehova asuka amapepo yandi, kwalilenga nalamona ukuti Yehova ni Tata kabili Munandi.”

15. Bushe Yehova alemona shani Imfumu Davidi?

¹⁵ Imfumu Davidi yafyaliilwe mu luko ulwaipeele kuli Yehova Lesa. Lelo Davidi  talepepa fye Yehova pa mulandu wa kuti ulupwa lwakwe e fyo lwalecita. Alibombeshe ukuba cibusa wa kwa Lesa, kabili Yehova alimutemenwe sana. Yehova atile: Davidi “muntu uo umutima wandi watemwa.” (Imil. 13:22) Finshi Davidi acitile ifyalengele Yehova amutemwe sana?

16. Finshi Davidi alesambilila pali Yehova nga alolesha ifyo abumba?

¹⁶ Davidi alebika amano ku fyo Yehova abumba kabili alesambililako fimo. Ilyo Davidi aali umwaice aleikala inshita iikalamba pa nse alecema impaanga sha bawishi. Nalimo iyi ine nshita e lyo aletontonkanya sana pa fyo Yehova abumba. Ku ca kumwenako, mu nshita ya bushiku Davidi alemona intanda ishingi nga nshi. Talepelela fye pa kushimona, lelo aletontonkanya na pa mibele ya wapangile intanda. Davidi alembele ukuti: “Imyulu ilebila ubukata bwa kwa Lesa; no lwelele lulesosa umulimo wa minwe yakwe.” (Amalu. 19:1, 2) Na kabili, Davidi nga atontonkanya pa fyo Yehova abumba abantu, alemona ukuti Yehova wa mano icine cine. (Amalu. 139:14) Ukutontonkanya pa fyo Yehova abumba kwalelenga Davidi ukuicefya.—Amalu. 139:6.

17. Finshi twingasambilila pali Yehova nga tuletontonkanya pa fyo abumba?

¹⁷ Finshi tulesambililako? Tulingile ukulabika amano ku fyo Yehova abumba no kulatontonkanya pa fyo afibumba bwino. Kanshi cila bushiku nga twamona ifyo Yehova abumba pamo nga ifimenwa, inama e lyo na bantu, tulesambililako imibele yakwe. Nga tulecita ifi ninshi cila bushiku tukalasambilila ifingi pali shifwe wa ku muulu uwatutemwa. (Rom. 1:20) Ici cikalenga tukaletemenwako Yehova cila bushiku.

18. Ukulingana ne fyaba pa Amalumbo 18, bushe Davidi alemona ukuti ni nani walemwafwa?

¹⁸ Davidi alemona ifyo Yehova alemwafwa. Ku ca kumwenako, ilyo Davidi apokolwele impaanga sha ba wishi ku nkalamo e lyo na kuli bere, alishibe ukuti Yehova e wamwafwile ukwipaya filya finama fya maka. Na kabili, ilyo Davidi acimfishe umushilika wa maka Galyati, alimwene ukuti uwamwafwile ni Yehova. (1 Sam. 17:37) Nangu fye ni lintu afulumwike Imfumu Shauli iyalefwaya ukumwipaya, Davidi atile Yehova e wamupokolwele. (Amalu. 18, amashiwi ya pa muulu) Nga ca kuti Davidi aali wa cilumba, nga taletila ni Yehova walemwafwa. Lelo Davidi aali uwaicefya, kabili ici e calengele alemona ukuti Yehova e walemwafwa.—Amalu. 138:6.

19. Finshi twingasambililako kuli Davidi?

¹⁹ Finshi tulesambililako kuli Davidi? Tatulingile ukulalomba fye ukuti Yehova atwafwe, lelo tulingile no kulamona ifyo atwafwa e lyo ne nshila atwafwilamo. Nga ca kuti tuli abaicefya, tukeshiba ukuti Yehova e utwafwa ukucita ifintu ifyo tushingacita pa lwesu. Kabili lyonse ilyo twamona ifyo Yehova aletwafwa, bucibusa bwesu na ena bulakoselako. Munyinefwe Isaac, uwikala ku Fiji kabili uwabombela Yehova pa myaka iingi alimwene ukuti ifi twalanda fya cine. Atile: “Ndamona ifyo Yehova angafwa ukutula fye ilyo natendeke ukusambilila Baibolo. Ici cilalenga bucibusa bwandi na Yehova bulekoselako.”

20. Cinshi calengele Davidi abe cibusa wa kwa Yehova, kabili finshi twingasambililako?

²⁰ Davidi alepashanya Yehova. Yehova atupangile mu nshila ya kutila kuti twapashanya imibele yakwe. (Ukute. 1:26) Nga tulesambilila sana pa mibele ya kwa Yehova, cikatwangukila  ukumupashanya. Davidi alishibe bwino wishi wa ku muulu Yehova, kabili ici calengele alemupashanya. Ku ca kumwenako, inshita imo Davidi acitile ubucende na Bati-sheba no kwipaya umulume wakwe. Ifyo acitile lwali lubembu ulukalamba kuli Yehova. (2 Sam. 11:1-4, 15) Lelo Yehova alimubelele uluse pantu na o alebelela bambi uluse. Pa mulandu wa kuti Davidi aali sana cibusa wa kwa Yehova, abena Israele balimutemenwe sana kabili Yehova alelinganya ifyo imfumu shimbi isha mu Israele shalecita ku fyo Davidi alecita ilyo aleteka.—1 Isha. 15:11; 2 Isha. 14:1-3.

21. Busuma nshi bwaba mu kupashanya Lesa nga fintu ilembo lya Abena Efese 4:24 na 5:1 lilanda?

²¹ Finshi tulesambilila kuli ili lyashi? Tulingile ‘ukulapashanya Lesa.’ Nga tulemupashanya tukalanonkelamo, tukamwishiba bwino, kabili tukalalanga ukuti tuli bana bakwe.—Belengeni Abena Efese 4:24; 5:1.

22-23. Finshi fikacitika nga tulekonka ifyo tusambilila pali Yehova ku fyo abumba e lyo na mu Cebo cakwe?

²² Nga fintu tulandilepo, kuti twasambilila pali Yehova nga tulebika amano ku fyo abumba e lyo no kulasambilila Icebo cakwe, Baibolo. Mu Baibolo mwaliba amalyashi ayengi ayalanda pa bantu ababombeele Lesa mu cishinka pamo nga Mose na Davidi abo twingapashanya. Yehova alitupeela fyonse ifyo tukabila pa kuti tumwishibe. Kanshi na ifwe tulingile ukucitapo cimo pa kuti tumwishibe bwino.

²³ Tukatwalilila fye ukusambilila pali Yehova. (Luk. Mil. 3:11) Icacindama sana te kwishiba ifintu ifingi pali Yehova, lelo kulakonka ifyo tulesambilila. Nga tulekonka ifyo tusambilila pali Yehova mu Cebo cakwe e lyo na ku fyo abumba kabili nga tulemupashanya, akapalama kuli ifwe. (Yako. 4:8) Alitweba mu Cebo cakwe ukuti takatale asha abesha na maka ukumwishiba bwino.