BUSHE mulatasha? Bonse tulingile ukuyipusha ici cipusho. Baibolo yasobele ukuti abantu abengi mu nshiku sha kulekelesha bakaba “abashitasha.” (2 Tim. 3:2) Mufwile mwalikumanyapo abantu abashitasha nga babacitila ifisuma, kabili abamona kwati ifyo babacitila e fyo balingile fye ukubacitila. Nalimo na imwe te kuti mutemwe ukuba na bantu ba musango uyu.

Lelo Baibolo ikoselesha ababomfi ba kwa Yehova ukuti: “Muletootela.” Kanshi tulingile ‘ukulatootela muli fyonse.’ (Kol. 3:15; 1 Tes. 5:18) Na kuba, nga tuletootela tukalanonkelamo mu nshila ishingi.

Umulandu umo uukalamba uo tulingile ukulatashisha wa kuti, ukutasha kulalenga umuntu aba ne nsansa. Umuntu uutasha bambi alomfwa bwino, kabili alalenga abo atasha ukuba ne nsansa. Cinshi cilenga? Natulangilile: Nga ca kuti umuntu umo alefwaya ukumucitilako icintu icisuma sana, kuti mwaumfwa bwino icine cine. Kuti calenga mwaishiba ukuti icilengele afwaye ukumucitila ico cintu, ni co amumona ukuti mwalicindama kabili alimubikako amano. Ukwishiba ukuti umuntu alimubikako amano kulalenga mwalamona ukuti mwalicindama. Nalimo ifi fine e fyo na Ruti aumfwile ilyo Boasi amulangile icikuuku. Ukwabula no kutwishika, Ruti alitemenwe sana ilyo amwene ifyo Boasi amubikileko amano.—Ruti 2:10-13.

Na kabili, calicindama sana ukutasha Lesa. Ukwabula no kutwishika, mufwile mulatontonkanya pa fya kulya fya ku mupashi ifyo Lesa atupeela na pa fyo atwalilila ukutupeela ifyo tukabila mu mikalile yesu. (Amala. 8:17, 18; Imil. 14:17) Lelo tamulingile ukutontonkanyapo fye lubilo lubilo. Mulingile ukupoosapo inshita iikalamba ukutontonkanyapo pa kuti mulemona ifyo Yehova amupaala. Nga muletontonkanya sana pa fisuma ifyo Kabumba wesu amucitila, mukalamutasha sana kabili mukalamona ukuti alimutemwa nga nshi. Mukeshiba no kuti alatasha pa fyo mu mubombela.—1 Yoh. 4:9.

Mwilapelela fye pa kutontonkanya sana pa fisuma ifyo Yehova amucitila, lelo mulingile no kulamutasha pa busuma bwakwe. (Amalu. 100:4, 5) Abantu bamo batila “ukutasha abantu kulalenga baba ne nsansa.”

Umulandu na umbi uo ukutasha kwawamina, kulalenga tuleumfwana bwino na bantu. Umuntu fye onse alafwaya ukumutasha. Kanshi ukutasha umuntu ukufuma pa nshi ya mutima pa fisuma ifyo amucitila, kuti kwalenga mwalaumfwana bwino nankwe. (Rom. 16:3, 4) Na kabili, ilingi line abantu abatasha balafwa na bantu bambi. Balabika amano ku fisuma ifyo bambi babacitila kabili nabo balafwaya ukucitilako bambi ifisuma. Ukwafwa abantu kulalenga tuleba ne nsansa. Yesu atile: “Mwaba insansa ishingi mu kupeela ukucila ishaba mu kupokelela.”—Imil. 20:35.

Ba Robert Emmons, bamo pa bakalamba abalolekesha pe bumba lya pa University of California ilifwailisha pa fyo ukutasha kukuma abantu batile: “Cimo icingalenga twalatasha kwishiba ukuti tulakabila abantu banensu. Inshita shimo kuti twabafwa e lyo inshita imbi nabo kuti batwafwa.” Icishinka ca kuti, tulakabila abantu bambi pa kuti tutwalilile ukuba aba mweo na pa kuti tuleba ne nsansa. Ku ca kumwenako, abantu kuti  batupeelako ifya kulya nelyo ukutusakamana nga ca kuti natulwala. (1 Kor. 12:21) Umuntu uutasha alacitapo cimo pa kulanga ukuti natasha pa fisuma ifyo bamucitiile. Bushe lyonse mulatasha abantu nga bamucitila ifisuma?

Na cimbi ico ukutasha kwawamina ca kuti, umuntu uutasha tabika sana amano ku fintu ifingalenga alesakamikwa sana, lelo esha sana ukubika amano ku fisuma. Umuntu nga alatasha, alamona sana ifisuma ifilemucitikila, ne ci cilenga alecilanapo ukutasha. Ukutasha ku kalenga ‘mukalesekelela lyonse muli Shikulu’ nga fintu Paulo alandile.—Fil. 4:4.

Na kabili, ukutasha kukalenga mwilailishanya sana. Pantu na kuba, nga tulatasha te kuti tuleba no mufimbila, nelyo ukufulilwa abantu. Abantu abatasha tabatemwisha ifyuma lelo balateka imitima ku fintu ifyo bakwata.—Fil. 4:12.

Satana afwaya muleumfwa ububi no kufuupulwa nga mwakwata amafya. Alomfwa bwino nga mwatendeka ukulailishanya sana. Alishiba ukuti nga muleilishanya sana te kuti mulebomba bwino umulimo wa kubila imbila nsuma. Na kabili, umuntu uutasha ilingi line alaba ne fisabo fya mupashi pamo nga ukusekelela pa fintu ifisuma ifyo Lesa atucitila, e lyo no kutetekela ifyo atulaya.—Gal. 5:22, 23.

Apo muli babomfi ba kwa Yehova, mufwile na mushininkisha ukuti ifi tulandilepo muli cino cipande fya cine. Na lyo line, nalimo namumona ukuti ukutasha takwisa nga ameno ya mu kanwa, kabili inshita shimo cilafya ukukanasakamikwa nga ca kuti twaba na mafya. Nomba tamulingile ukufuupulwa pantu kwaliba ifyo mwingacita pa kuti mwilasakamikwa sana. Finshi mwingacita? Cila bushiku muletontonkanya pa fisuma ificitike ubo bushiku ifyo mwingatashishapo. Nga mulecita ifi, mukabelesha ukulatasha kabili mukalaba ne nsansa ukucila abantu abekalila fye ukutontonkanya pa mafya bakwete. Muletontonkanya pa fisuma ifyo Lesa na abantu banenu bamucitila ifilenga muleba ne nsansa. Nalimo kuti mwafwaya ne buuku pa kuti cila bushiku mulelemba ifintu ifisuma fibili nelyo fitatu ifimucitikiile ifyo mwingatemwa ukutashishapo.

Bamo abafwailisha pa fyo bongobongo yesu ibomba batile, “nga cila bushiku tuletasha pa fisuma ifyo abantu batucitila, bongobongo yesu taibika amano ku fingalenga twaba no bulanda.” Umuntu uutasha alaba ne nsansa. E ico mulemona ifyo Yehova amupaala, muleipakisha ifintu ifisuma ifyo amupeela, kabili muletasha! Ifisuma nga fya mu citikila, mwilamona kwati e fyo fyaciba fye no kuba, lelo ‘muletootela Yehova pantu musuma.’ “Mulemutootela muli fyonse.”—1 Imila. 16:34; 1 Tes. 5:18.