Amepusho Ukufuma ku Babelenga

TINIKENI

Baibolo itila pa kushinina umuntu ukuti nacita umulandu pafwile ukuba inte shibili. (Impe. 35:30; Amala. 17:6; 19:15; Mat. 18:16; 1 Tim. 5:19) Lelo ukulingana na Mafunde ya kwa Mose, umwaume nga aikata umwanakashi uwakobekelwa “mu mpanga” no kuulungana nankwe, kabili umwanakashi apunda, tabalemupeela umulandu wa kucita ubucende lelo umwaume ena balemupeela umulandu. Mulandu nshi umwanakashi alebela uwa kaele e lyo umwaume ena aleba no mulandu nangu ca kuti takwaleba abalemonako ifyalecitika?

Ilyashi ilyaba mu Amalango 22:25-27, talilanda fye pa kushinina umwaume ukuti ali no mulandu, pantu nga asendama no mwanakashi uwakobekelwa ninshi ali no mulandu. Ili ifunde lyabeleleko maka maka ku kwishibilako nga ca kuti umwanakashi wa kaele. Moneni ifyo lyalandapo.

Ifikomo 23 na 24 filanda pa mwaume uwasendeme “mu musumba” no mwanakashi uwakobekelwe. Ifi acitile fyalengele abe no mulandu wa kucita ubucende pantu abantu balemona umwanakashi uwakobekelwe ngo waupwa. Inga umwanakashi ena cali shani? “Tapundile mu musumba.” Nga ca kuti alipundile, abantu nga balyumfwile kabili nga balimupokolweko. Lelo tapundile. E ico na o wine ali no mulandu wa kucita ubucende. Kanshi bonse babili balibapeele umulandu.—Amala. 22:23, 24.

Ifunde lyalandile no kuti: “Lelo nga ni mu mpanga umwaume asangile umukashana uwakobekelwa, no mwaume alimwikete no kulaala nankwe, umwaume uwaleele nankwe akafwa eka, kabili mwikacita nangu cimo ku mukashana. Umukashana tacitile ulubembu lwa kufwilapo, pantu filya fine umwaume emina umwaume munankwe no kumwipaya, e fyo cili na kuli uyu mulandu. Pantu ni mu mpanga amusangile. Umukashana uwakobekelwa alipundile, lelo takwali nangu umo uwa kumupokololako.”—Amala. 22:25-27.

Ifi ifunde lyalandile nga fyacitika, bakapingula balemona umwanakashi ukuti tali na mulandu. Cinshi balemwena ifi? Ni co balemona ukuti umwanakashi afwile “alipundile, lelo takwali nangu umo uwa kumupokololako.” E ico tabalemupeela umulandu wa kucita ubucende. Lelo umwaume ena balemupeela umulandu wa kwikata umwanakashi no kulaala nankwe, e lyo no mulandu wa kucita ubucende pantu alebomfya amaka pa kuti alaale no mwanakashi uwakobekelwa.

Kanshi kuti twatila, nangu ca kuti ili ifunde lilanda maka maka pa fyo umwanakashi aleba uwa kaele, ili lyashi lilanda na pa fyo umwaume aleba no mulandu wa kwikata umwanakashi no kulaala nankwe, e lyo no mulandu wa kucita ubucende. Kuti twacetekela ukuti abapingushi ‘balefwailisha’ bwino bwino umulandu kabili balepingula ukulingana na mafunde ayo Lesa abapeele pa miku iingi.—Amala. 13:14; 17:4; Ukufu. 20:14.