1-2. (a) Mwaka nshi bamo basefya? (Moneni akabokoshi akaleti “ Bushe Umwaka wa Buntungwa Wali Mwaka Nshi?”) (b) Finshi Yesu alandilepo ifyalembwa muli Luka 4:16-18?

MU FYALO fimo abantu balasefya umwaka walenga 50 uo imfumu nelyo namfumu ateka. Uku kusefya kwa uyu mwaka nalimo kubako pa bushiku bumo, pa mulungu umo nelyo ukucilapo. Lelo mu kupita kwa nshita abantu balaleka ukusefya kabili balalabako no kulabako.

² Twalasambilila pa mwaka wa buntungwa uwacila nga nshi imyaka ya buntungwa iyo abantu basefya, kabili uwacila no Mwaka wa Buntungwa uo abena Israele balesefya. Umwaka wa Buntungwa uo abena Israele balesefya walelenga balubuka. Mulandu nshi uo cicindamine ukusambilila pali uyu mwaka? Pantu Umwaka wa Buntungwa uwa bena Israele ulatwibukishako icintu icisuma nga nshi ico Yehova atupekanishisha. Ifyo Yehova apekanya fikalenga tukalubuke umuyayaya, kabili na pali ino ine nshita tulanonkelamo. Yesu alilandilepo pali uku ukulubuka.—Belengeni Luka 4:16-18.

3. Ukulingana ne fyaba mu Ubwina Lebi 25:8-12, bushe abena Israele balenonkelamo shani mu Mwaka wa Buntungwa?

³ Kuti twaishiba bwino umo Yesu aloseshe ilyo alandile pa kulubuka nga twabalilapo ukulanda pa mwaka wa Buntungwa uo Lesa aebele abena Israele ukulasefya. Yehova aebele abena Israele ati: “Mukalemona umwaka walenga amakumi yasano (50) ukuti wa mushilo kabili mukalebila ukulubuka mu calo ku bekashi ba ciko bonse. Ukaba Mwaka wa Buntungwa kuli imwe, e lyo umuntu onse akabwelele ku mpanga yakwe kabili umuntu onse akabwelele ku lupwa lwakwe.” (Belengeni  Ubwina Lebi 25:8-12.) Mu cipande cafumineko, twalisambilile ifyo abena Israele balenonkelamo mwi Sabata lya cila mulungu. Nomba bushe abena Israele balenonkelamo shani mu Mwaka wa Buntungwa? Natulande pa ca kumwenako: Umwina Israele nga akwata inkongole ishingi, aleshitisha impanga yakwe pa kuti abweshe inkongole. Mu Mwaka wa Buntungwa, uwashitile impanga yakwe alemubwesesha. Kanshi ulya umwina Israele ‘alebwelela ku mpanga yakwe,’ kabili pa numa abana bakwe balepyana ilya impanga. Na cimbi icalecitika ca kuti, umwaume nga akwata inkongole ishingi, aleshitisha umwana wakwe mu busha nelyo aleishitisha umwine mu busha pa kuti abweshe inkongole. Mu mwaka wa Buntungwa, umusha ‘alebwelela ku lupwa lwakwe.’ Kanshi takwaleba umuntu uwaletwalilila ukuba umusha ukwabula isubilo lya kuti bushiku bumo ubusha bukapwa! Ala ifi Yehova apekenye filanga ukuti alelangulukilako abantu bakwe!

4-5. Mulandu nshi cicindamine ukusambilila pa Mwaka wa Buntungwa uo abena Israele balesefya?

⁴ Finshi fimbi abena Israele balenonkelamo mu Mwaka wa Buntungwa? Yehova alandile ati: “Takuli nangu umo pali imwe uukaba umupiina, pantu Yehova akamupaala mu calo ico Yehova Lesa wenu alemupeela ukuti cibe cenu.” (Amala. 15:4) Ala ifi Yehova alandile fyalipusana sana ne ficitika mu calo muno nshiku, umo abakankaala babelako fye abakankaala na bapiina babelako fye abapiina!

⁵ Fwe Bena Kristu tatukonka Amafunde ya kwa Mose. Ici cilolele mu kuti tatukonka ne funde lyalelanda pa Mwaka wa Buntungwa umo abasha balelubuka, umo balelekelela inkongole, kabili umo balebwelela ku mpanga ya lupwa. (Rom. 7:4; 10:4; Efes. 2:15) Na lyo line nacicindama ukuti tusambilile pa Mwaka wa Buntungwa. Mulandu nshi? Pantu ukutontonkanya pa fyo abena Israele balelubulwa, kuti kwalenga twalatontonkanya na pa fyo Yehova acita pa kuti tulubuke ku lubembu ne mfwa.

6. Ni kuli cinshi abantu balingile ukulubulwa?

⁶ Bonse tulafwaya ukulubuka ku busha bwabipisha, ubusha bwa lubembu. Apo tuli babembu, tulakota, tulalwala, kabili tulafwa. Abantu abengi balamona ifilanga ukuti tuli basha  ba lubembu nga balolesha mu cilola, nelyo nga baya mu kubondapa kuli badokota. Na kabili tulomfwa ububi nga twacita ulubembu. Umutumwa Paulo alandile ukuti aletwalwa ‘bunkole kwi funde lya lubembu ilyali mu filundwa fyakwe.’ Alandile no kuti: “Yangu ne mulanda wine wine! Nani akampokolola kuli uno mubili uulentwala ku mfwa?”—Rom. 7:23, 24.

7. Finshi Esaya asobele pa kulubuka?

⁷ Caliwama ifi Lesa ateyanya icikalenga tukalubulwe ku lubembu. Yesu e ukalenga tukalubulwe. Ilyo kwashele imyaka ukucila pali 700 ukuti Yesu ese pano isonde, kasesema Esaya asobele ukuti kukaba ukulubuka ukukalamba nga nshi ukwacila ukwalebako mu mwaka wa Buntungwa uwalebako mu nshita ya bena Israele. Esaya alembele ati: “Umupashi wa kwa Shikulu Mulopwe Yehova waba pali ine, pantu Yehova alinsuba ukuti mbile imbila nsuma ku bafuuka. Alintuma ku kukakilila abali no bulanda, ku kubila ukulubuka kuli bankole.” (Esa. 61:1) Ni bani abo ubu ubusesemo bulandapo?

8. Nani ubusesemo bwa kwa Esaya ubulanda pa kulubulwa bulandapo?

⁸ Ubu ubusesemo ubulanda pa kulubuka bwatendeke ukufikilishiwa ninshi Yesu alitendeka umulimo wa kubila imbila nsuma. Ilyo Yesu aile kwi sunagoge ilyali mwi tauni lya Nasarete umo akuliile, alibelengeele abaYuda abalongene mwi sunagoge ubu busesemo. Yesu alandile ukuti bulya ubusesemo bwalelanda pali ena ilyo abelengele amashiwi ya kuti: “Umupashi wa kwa Yehova waba pali ine, pantu ansubile ukuti mbile imbila nsuma ku bapiina, antumine mu kubila ukuti abafungwa bakalubulwa no kushibula amenso ya mpofu, no kulubula abanyanyantilwa, no kubila umwaka we paalo lya kwa Yehova.” (Luka 4:16-19) Bushe Yesu afikilishe shani ubu busesemo?

9. Bushe ilyo Yesu ali pano isonde abantu abengi baleenekela ukuti bali no kulubulwa kuli finshi?

⁹ Ilyo Yesu ali pano isonde e lyo abantu batendeke ukulubuka nelyo ukukwata ubuntungwa ubo Esaya asobele kabili ubo Yesu abelengele. Kuti twatila ifi twalanda fya cine pantu Yesu atile: “Ili lembo mwaumfwa nalifikilishiwa ubushiku bwa lelo.” (Luka 4:21) Abengi abaumfwile ubusesemo Yesu abelengele nalimo baleenekela ukuti bali no kulubulwa ku mitekele ya bena Roma. Nalimo baletontonkanya nga filya abaume babili baletontonkanya abatile: “Twalesubila ukuti uyu muntu e wali no kulubula Israele.” (Luka 24:13, 21) Nomba twalishiba ukuti Yesu talekoselesha abasambi bakwe ukwimina ubuteko bwa bena Roma aba batekele  ku munga we fwafwa. Lelo abebele ati “peeleni ifya kwa Kaisare kuli Kaisare.” (Mat. 22:21) Nomba finshi Yesu alubwileko abantu pali ilya nshita?

10. Ni kuli finshi Yesu alubwile abantu?

¹⁰ Umwana wa kwa Lesa aishile pano calo pa kuti alubule abantu ku fintu fibili. Ica kubalilapo, Yesu alyafwile abantu pa kuti balubuke ku fisambilisho fya bufi ifyo bashimapepo balesambilisha. AbaYuda abengi pali ilya nshita balitekelwe ubusha ku ntambi na ku fisambilisho fya bufi. (Mat. 5:31-37; 15:1-11) Bashimapepo tabalebombela Lesa, lelo baleti baleafwa abantu pa kuti balebombela Lesa, kanshi bali kwati ni mpomfu. Filya bakene Mesia no kukana ukusumina icine ico alesambilisha, fyalengele beishiba Lesa kabili batwalilile ukuba nge mpofu. Na kablili, Lesa taelelele imembu shabo. (Yoh. 9:1, 14-16, 35-41) Filya Yesu alesambilisha icine e lyo na filya alecita ifisuma, alangile abantu abaicefya ifyo baali no kulubulwa ku fisambilisho fya bufi.—Marko 1:22; 2:23–3:5.

11. Ni kuli cinshi na cimbi Yesu alubwile abantu?

¹¹ Ica bubili, Yesu alilengele abantu balubulwa ku busha bwa lubembu. Pa mulandu wa kuti Yesu alipeele ubumi bwakwe ukuba icilubula, Lesa alelela imembu sha batetekela ilambo lya cilubula kabili abacita ifilanga ukuti balikwata icitetekelo. (Heb. 10:12-18) Yesu atile: “Umwana nga amulubula, mukalubuka icine cine.” (Yoh. 8:36) Uku ukulubulwa kwalicilile sana pa fyo abantu balelubulwa mu Mwaka wa Buntungwa! Ku ca kumwenako, umwaume uo balelubula mu Mwaka wa Buntungwa nalimo aleba umusha na kabili, na mu kuya kwa nshita alefwa no kufwa.

12. Ni bani babalilepo ukunonkelamo mu kulubuka uko Yesu abilishe?

¹² Pa bushiku bwa Pentekoste mu mwaka wa 33 ninshi Yesu alibwelelamo ku muulu, Yehova alibomfeshe umupashi wa mushilo pa kusuba abatumwa na bantu bambi abaume na banakashi abali ne cishinka. Alengele baba abana bakwe pa kuti ku ntanshi bakabuukile ku muulu uko bakalateka pamo na Yesu. (Rom. 8:2, 15-17) Aba e babalilepo ukunonkelamo mu kulubuka uko Yesu abilishe mwi sunagoge ilyali mu Nasarete. Balya abaume na banakashi balilubwilwe ku fisambilisho fya bufi ne ntambi isho bashimapepo abaYuda balekonka ishapusene ne fyo Icebo ca kwa Lesa calelanda. Na kabili Lesa alebamona ukuti balilubwilwe ku lubembu ululenga abantu balefwa. Umwaka wa Buntungwa uwa mampalanya uwatendeke ilyo Yehova asubile abasambi ba kwa Kristu mu mwaka wa 33 ninshi Yesu alibwelelamo ku muulu, ukapwa pa mpela ya Myaka  Ikana Limo iyo Yesu akateka. Fisuma nshi fikacitika ilyo Umwaka wa Buntungwa uwa mampalanya ushilapwa?

13-14. Ni bani bambi abenganonkelamo mu kulubuka uko Yesu abilishe?

¹³ Muno nshiku abantu abengi nga nshi abafuma mu nko shonse baba mwi bumba lya “mpaanga shimbi.” (Yoh. 10:16) Lesa tabasala ukuyateka na Yesu ku muulu. Lelo basubila ukwisaikala umuyayaya pano isonde nga fintu Baibolo ilanda. Bushe na imwe musubila ukwisaikala pano isonde?

¹⁴ Na muno nshiku mwine kuti mwanonkelamo mu fisuma fimo ifyo na basubwa banonkelamo. Nga mwatetekela ilambo lya kwa Yesu, kuti mwalomba Lesa ukuti amwelele imembu. Nga Lesa aelela imembu shenu, kuti amutemwa kabili kuti mwaba na kampingu iisuma. (Efes. 1:7; Ukus. 7:14, 15) Na kabili tontonkanyeni pa fyo Lesa amupaala pa mulandu wa kuti alimulubula ku fisambilisho fya bufi. Yesu atile: “Mukeshiba icine, ne cine cikamulenga ukuba abantungwa.” (Yoh. 8:32) Ala twaliba ne nsansa ifi twalubulwa!

15. Finshi tukalubukako kabili mapaalo nshi tukakwata ku ntanshi?

¹⁵ Kuti mwaenekela ubuntungwa ubwacila pali ubu twalandapo. Nomba line Yesu ali no konaula imipepele yonse iya bufi e lyo na mabuteko ayatitikisha abantu. Lesa akacingilila “ibumba ilikalamba” ilya bantu abamubombela,  kabili akalenga bakaipakishe amapaalo muli paradaise pano isonde. (Ukus. 7:9, 14) Abantu abengi nga nshi bakabuushiwa kabili bakalubuka ku fyabipa fyonse ifyafuma mu lubembu lwa kwa Adamu.—Imil. 24:15.

16. Buntungwa nshi ubusuma ubo abantu bakakwata ku ntanshi?

¹⁶ Mu Myaka Ikana Limo iyo Yesu akateka, ena na abo akateka nabo bakalenga abantunse bakabe no bumi ubwapwililika, kabili bakakwate bucibusa ubusuma na Lesa. Iyi inshita ikaba ngo Mwaka wa Buntungwa uwalebako mu nshita ya bena Israele, pantu abantunse bakakwata bucibusa ubusuma na Lesa kabili bakalubulwa. Ifi fikalenga abantunse bonse ababombela Yehova ne cishinka bakabe abapwililika kabili tabakalebembuka.

17. Ukulingana ne fyaba pali Esaya 65:21-23, bushe abantu ba kwa Lesa bakalaikala shani? (Moneni icikope pa nkupo.)

¹⁷ Baibolo pali Esaya 65:21-23 (Belengeni.) yalisobela ifyo abantu bakalaikala pano isonde ku ntanshi. Mu calo cipya tukakwata ifya kucita ifingi. Baibolo itila abantu ba kwa Lesa pali ilya nshita bakalabomba imilimo iisuma iikalalenga baleba ne nsansa. Te kuti tutwishike no kutwishika ukuti ilyo Imyaka Ikana Limo ikapwa, “ifibumbwa na fyo fikalubuka ku busha bwa kubola no kuba abana ba kwa Lesa.”—Rom. 8:21.

18. Cinshi twingashininkishisha ukuti ku ntanshi tukaba ne nsansa?

¹⁸ Nga filya fine Yehova apekenye ukuti abena Israele balekwata inshita ya kubomba ne ya kutuusha, e fyo akacita na ku bantu bakwe mu Myaka Ikana Limo iyo Kristu akateka. Ukwabula no kutwishika kukaba inshita ya kupepa Lesa. Tufwile ukulapepa Lesa pa kuti tuleba ne nsansa pali ino nshita, kabili mu calo cipya tukalakwata inshita ya kumupepa. Abantu bonse aba cishinka bakalasekelela ilyo Kristu akalateka mu Myaka Ikana Limo, pantu bonse tukalabomba imilimo iikalalenga tukaleba ne nsansa kabili bonse tukalabombela Lesa.