Bushe kuti mwaibukisha ifyo mwabelenga mu Ulupungu lwa kwa Kalinda Ulwa uno mwaka? Natumone nga kuti mwaibukisha. Asukeni ifipusho fyakonkapo.

Bushe amashiwi ya kuti “mupilibuke pa kwalula amatontonkanyo yenu” yalola mwi? (Rom. 12:2)

Kuti yapilibula no kuti ukuwamya amatontonkanyo. Kanshi ici tacipilibula ukuti tufwile fye ukucita ifisuma fimo fimo. Lelo tufwile no kulatontonkanya pa fyo twaba pa kuti tulealuka no kumfwila ifyo Yehova aletweba ukucita.—w23.01, amabu. 8-9.

Kuti twalanga shani ukutila twalicenjela ilyo tulemona ifilecitika mu calo?

Kwaliba ifintu ifyacindama ifilenga twalafwaisha ukwishiba ifyo ifilecitika mu calo filefikilisha amasesemo ya mu Baibolo. Nomba mu nshita ya kulatungunya fye ifyo amasesemo yaleimininako, kuti cawama ukulanda ifyo impapulo shesu shilandapo isho icilonganino ca kwa Lesa citupeela. Ukucita ici kuti kwalenga aba bwananyina ukwikatana. (1 Kor. 1:10)—w23.02, ibu. 16.

Bushe ulubatisho lwa kwa Yesu lwapuseneko shani no lubatisho lwa basambi bakwe?

Apo Yesu afyalilwe mu luko ulwaipeela kuli Lesa, talekabila ukuipeela kuli Yehova nge fyo tucita. Yesu ali muntu wapwililika. Talekabila ukulapila ku membu shakwe.—w23.03, ibu. 5.

Finshi twingacita pa kuti abengi baleasukapo pa kulongana?

Tufwile ukwasuka ifyasuko ifipi pa kuti bambi nabo basukepo. Tatufwile ukulanda pa fishinka fyonse ilyo tuleasuka. Nga tulecita ifi tukalenga na bambi ukwasukapo pa kulongana.—w23.04, ibu. 23.

Bushe amashiwi ayaba pali Esaya 35:8 ayatila, “Inshila ya Mushilo” yalola mwi?

Iyi nshila ya mampalanya iyo balandapo muli ili buuku pa kubalilapo yalelosha ku nshila iyo abaYuda bali no kupitamo ukufuma ku Babiloni ukuya ku mwabo. Nga muno nshiku ipilibula cinshi? Ipilibula inshila iyo abantu ba kwa Lesa ababa muli Paradise ya ku mupashi bendamo icilenga balekwata amapaalo ayengi. Mu myaka ya kale ilyo umwaka wa 1919 taulafika, balitendeke ukuwamya iyi nshila. E kutila balitendeke ukupilibula no kupulinta ama Baibo e lyo ne mpapulo shimbi.—w23.05, amabu. 15-19.

Banakashi nshi babili abo Amapinda icipandwa 9 yalandapo?

Mwi buuku lya Amapinda balilanda pa “mwanakashi umuwelewele” uo inshila yakwe itwala “mu Nshiishi.” Na kabili balilanda pa “mano yene yene” ayemininako umwanakashi uo inshila yakwe itwala ku mweo kabili “mu nshila ya mucetekanya.” (Amapi. 9:​1, 6, 13, 18)—w23.06, amabu. 22-24.

Bushe Lesa alangile shani ukuti ali-icefya kabili tapampamina pa cintu cimo ilyo alelanda na Lote?

Yehova aebele Lote ukufulumukila ku mpili. Ilyo Lote alombele ukuti ena no lupwa lwakwe bafulumukile ku musumba wa Soari, Yehova alimusuminishe.—w23.07, ibu. 21.

Finshi umukashi engacita nga ca kuti abena mwakwe balatamba ifye shiku?

Afwile ukwibukisha ukuti te walenga ukuti baletamba ifye shiku. Umukashi afwile ukubika amano kuli bucibusa bwakwe na Lesa e lyo no kulatontonkanya pa banakashi bamo abakwete amafya abalembwa mu Baibo. Kuti ayafwilishako na bena mwakwe pa kuti tabakunkwime mu kutamba ifye shiku.—w23.08, amabu. 14-17.

Nga ca kuti baletupumya pa fyo twasuminamo, bushe ukwiluka kuti kwalenga shani twaba abafuuka?

Ifi nga fyacitika kuti twabomfya iyi nshita ukusambilila ifyo uyu muntu atontonkanya e lyo ne fimusakamika. Ukucita ifi kukalenga tukaleba abafuuka ilyo tuleasuka.—w23.09, ibu. 17.

Finshi twingasambilila ku Maria pa fyo tufwile ukucita pa kuba na maka?

Ilyo aishibe ukuti ali no kuba nyina wa kwa Mesia, alilengele bambi balenga aba na maka. Malaika Gabriele na Elisabete, balimukoseleshe sana. Aba bwananyina na ifwe kuti balenga twaba na maka ya kushipikisha amafya.—w23.10, ibu. 15.

Bushe Yehova kuti ayasuka shani amapepo yesu?

Alitulaya ukuti akula-asuka amapepo yesu kabili akulamona nga nayalingana no kufwaya kwakwe. (Yer. 29:12) Kuti ayasuka amapepo yamo yene mu nshila iyapusana, lelo lyonse akulatutungilila.—w23.11, amabu. 21-22.

Baibo pa Abena Roma 5:2 yalilanda pe “subilo,” nomba mulandu nshi yalandila pe subilo na kabili mu cikomo 4?

Umuntu nga aumfwa imbila nsuma kuti alafwaya ukwikala muli Paradise pe sonde. Nomba nga akwata amafya lyena ashipikisha, alatwalilila ukuba ne subilo lyakosa mu fyo Lesa alaya.—w23.12, amabu. 12-13.