1. Nga mwatontonkanya pa citetekelo Abrahamu akwete, cipusho nshi nalimo mwingepusha?

 ABANTU abengi balyumfwapo pali Abrahamu, lelo baishiba fye ifinono pali ena. Lelo imwe mwalishiba ifingi pali Abrahamu. Ku ca kumwenako, mwalishiba ukuti Baibo ita Abrahamu ukuti “wishi wa bantu bonse ababa ne citetekelo.” (Rom. 4:11) Nalimo kuti mwatontonkanya ukuti: ‘Bushe na ine kuti nakwata icitetekelo icakosa nge cakwete Abrahamu? Ee na imwe kuti mwakwata icitetekelo cakosa nga Abrahamu.

2. Mulandu nshi cicindamine ukusambilila pa fyo Abrahamu alecita? (Yakobo 2:​22, 23)

² Cimo ico mwingacita pa kuti mube ne citetekelo icakwete Abrahamu, kusambilila pa fyo alecita ifyalangile ukuti ali ne citetekelo. Abrahamu lyonse alecita ifyo Lesa alemweba ukucita, alifumine ku calo aleikala no kuya ku calo ca kutali, alikele mu matenti pa myaka iingi, kabili ali-ipeeleshe ukutuula umwana wakwe Isaki uo atemenwe sana. Icalengele ukuti Abrahamu acite ifi fyonse, ni co alicetekele sana Yehova. Pa mulandu wa kuti Abrahamu ali ne citetekelo kabili alecita ifisuma, Yehova alimupaalile kabili aishileba cibusa wakwe. (Belengeni Yakobo 2:​22, 23.) Yehova alafwaya ukutupaala ifwe bonse ukubikako fye na imwe, kabili alafwaya twaba ifibusa fyakwe. E mulandu wine aebele Paulo na Yakobo ukulanda pa fyo Abrahamu alecita ilyo balelemba Baibo. Twalasambilila ifyo Baibo yalanda pali Abrahamu ifyaba mwi buuku lya Abena Roma icipandwa 4, na Yakobo icipandwa 2. Paulo na Yakobo balilembele ifintu ifyacindama pali Abrahamu.

3. Lilembo nshi Paulo na Yakobo balelandapo?

 ³ Ilyo Paulo na Yakobo balelemba, babomfeshe amashiwi yaba pa Ukutendeka 15:​6, ayatila “[Abrahamu] atetekele Yehova; na o amumwene ukuti mulungami.” Yehova amona umuntu ukuti mulungami nga ca kuti alecita ifilenga alesekelela. Ala lishuko nga nshi ifi Yehova amona fwe bantu ababembu ukuti tuli balungami! Ukwabula no kutwishika, na imwe mulafwaya Yehova alemumona ukuti muli balungami. Nomba natusambilile umulandu Yehova alemwena Abrahamu ukuti mulungami, e lyo ne fyo twingacita pa kuti na ifwe Yehova aletumona ukuti tuli balungami.

4. Cinshi cilenga abantu ukukaanaba abalungami?

⁴ Muli kalata Paulo alembeele abena Roma, alandile ukuti abantu bonse babembu. (Rom. 3:23) Nomba bushe Lesa kuti atumona shani ukuti tuli balungami nangu ca kuti tuli babembu? Pa kuti Abena Kristu ba cine beshibe icasuko kuli ici cipusho, Paulo alandile pali Abrahamu.

5. Cinshi calengele Yehova alemona Abrahamu ukuti mulungami? (Abena Roma 4:​2-4)

⁵ Yehova alemona Abrahamu kuti mulungami ilyo aleikala mu calo ca bena Kanaani. Mulandu nshi Yehova alemwena Abrahamu ukuti mulungami? Bushe ni co Abrahamu alekonka Amafunde ya kwa Mose? Awe, tecalengele. (Rom. 4:13) Aya Mafunde ya kwa Mose yaishilebako pa numa ya myaka 400 ukutula apo Yehova aitile Abrahamu ukuti mulungami. Kanshi mulandu nshi uukalamba uo Lesa alemwena Abrahamu kuti mulungami? Pa mulandu ne cikuuku Yehova akwata, alemona Abrahamu ukuti ali mulungami pa mulandu ne citetekelo akwete.—Belengeni Abena Roma 4:​2-4.

6. Cinshi cilenga Yehova alemona umuntu umubembu ukuti mulungami?

⁶ Paulo atile umuntu nga acetekela Lesa, “icitetekelo cakwe e cilenga alemonwa ukuti mulungami.” (Rom. 4:5) Paulo alandile no kuti: “Ifyo na Davidi atila alipaalwa umuntu uo Lesa amona uwalungama ukwabula imilimo. Atila: ‘Balipaalwa abeleelwa pali bumpulamafunde bwabo kabili abo imembu shabo shafimbwapo; alipaalwa umuntu uo Yehova takalubulwishe nangu panono pa lubembu lwakwe.’” (Rom. 4:​6-8; Amalu. 32:​1, 2) Lesa eleela abantu abamucetekela. Alabeleela umupwilapo kabili tebukisha ne membu shabo. Abamona ukuti balungami pa mulandu wa kuti balikwata icitetekelo.

7. Mulandu nshi twingalandila ukuti ababomfi ba kwa Lesa bali balungami?

⁷ Nangu ca kuti Lesa alemona Abrahamu, Davidi, e lyo na babomfi bakwe bambi ukuti balungami, bali babembu. Nomba pa mulandu ne citetekelo bakwete, Lesa alebamona ukuti balungami, maka maka nga abalinganya ku bantu abashimupepa. (Efes. 2:12) Muli kalata Paulo alembeele abena Roma, alilondolwele ukuti tulingile ukuba ne citetekelo pa kuti tube ifibusa fya kwa Lesa. Abrahamu na Davidi bali fibusa fya kwa Lesa pa mulandu wa kuti bali ne citetekelo. Na ifwe kuti twaba ifibusa fya kwa Lesa nga ca kuti tuli ne citetekelo.

8-9. Bushe finshi bamo balanda pa fyo Paulo na Yakobo balembele, kabili mulandu nshi balandila ifyo?

⁸ Pa myaka iingi, intungulushi shamapepo shilalanda ifyapusanapusana pa citetekelo e lyo ne milimo. Bashimapepo bamo basambilisha ukuti ifyo ufwile fye ukucita, kusumina muli Shikulu Yesu Kristu. Nalimo mwalyumfwapo balelanda abati: “Sumineni Yesu ukuti mupusushi wenu.” Bamo batila ifi fine  e fyo na Paulo alesambilisha pantu alandile ukuti: “alipaalwa umuntu uo Lesa amona uwalungama ukwabula imilimo.” (Rom. 4:6) Na lyo line, bambi batila kuti “waipususha we mwine” nga ca kuti uleya ku fifulo ifyo bamona ukuti fya mushillo nelyo ulecita ifisuma. Nalimo icilenga baletontonkanya ifi mashiwi yaba pali Yakobo 2:24 ayatila: “Umuntu alungamikilwa ku milimo iisuma, te ku citetekelo fye ceka.”

⁹ Pa mulandu ne fi abantu basumina mu fyapusanapusana, bamo abasambilila sana ifya mu Baibo batontonkanya ukuti ifyo Paulo na Yakobo balelanda pa fyo umuntu alingile ukucita pa kuti Lesa alemupaala fyalipusana. Bashimapepo kuti balanda abati ilyo Paulo alesambilisha ukuti umuntu kuti aba umulungami nga nakwata icitetekelo ukwabula imilimo, Yakobo ena alesambilisha ukuti imilimo yalicindama pa kuti Lesa aletumona ukuti tuli balungami. Umwaume umo uwasambilila sana ifya mapepo atile: “Yakobo taumfwikishe ifyo Paulo alandile ilyo atile umuntu kuti aba umulungami pa mulandu ne citetekelo icabula imilimo, kabili Yakobo tasumiine ifyo Paulo alandile.” Lelo Yehova e walengele Paulo na Yakobo ukulemba ifyo balembele. (2 Tim. 3:16) Kanshi kuli fimo ifyo tufwile ukucita pa kuti tumfwikishe ifyo balembele. Tufwile ukwishiba na fimbi ifyo balelandapo pa kuti tumfwinkishe ifyo balembele.

10. “Milimo” nshi Paulo alelandapo? (Abena Roma 3:​21, 28) (Moneni ne cikope.)

¹⁰ Milimo nshi Paulo alelandapo mwi buuku lya Abena Roma icipandwa 3 na 4? Paulo alelanda fye pa “milimo ya mafunde,” e kuti amafunde, ayo Lesa apeele Mose pa lupili lwa Sinai. (Belengeni Abena Roma 3:​21, 28.) Mu nshiku sha kwa Paulo nalimo Abena Kristu  abaYuda bamo calebakosela ukusumina ukuti Amafunde ya kwa Mose e lyo ne milimo ya Mafunde yalilekele ukubomba. E calengele ukuti Paulo alande pali Abrahamu pa kuti alange ukuti umuntu kuti aba umulungami nangu ca kuti takuli amafunde ayo alingile ukukonka. Kanshi Paulo atile tufwile ukuba ne citetekelo. Ukwishiba ifi kulatukoselesha sana pantu kulalenga twaishiba ukuti Yehova kuti alatumona ukuti tuli balungami nga ca kuti twamucetekela kabili twacetekela na Kristu.

11. “Milimo” nshi Yakobo alelandapo?

¹¹ Nomba imilimo Yakobo alelandapo mwi buuku lya kwa Yakobo icipandwa 2, te “milimo ya mafunde” iyo Paulo alelandapo. Yakobo alelanda pa milimo nelyo ifyo Abena Kristu bacita cila bushiku. Iyi milimo ilalanga nga ca kuti Umwina Kristu alicetekela Lesa nelyo iyo. Natulande pa fya kumwenako fibili fyo Yakobo alandilepo.

12. Bushe Yakobo alondolwele shani ifyo icitetekelo ne milimo fibombela pamo? (Moneni ne cikope.)

¹² Ica kubalilapo, Yakobo alandile ukuti Abena Kristu tabalingile ukuba na kapatulula. Ilyo alelondolola pali ici cishinka abomfenshe icilangililo ca mwaume uwapokelele bwino umukankala lelo uushapokelele bwino umupiina. Yakobo atile uyu mwaume kuti atila alikwata icitetekelo, lelo ifyo acitile filanga ukuti tali ne citetekelo. (Yako. 2:​1-5, 9) Ilyo Yakobo alelanda pa calenga bubili, alandile pa muntu uusha-afwile munyina nelyo nkashi uwasapwile kabili uushakwete ifya kulya. Nangu ca kuti uyo muntu kuti atila alikwata icitetekelo, ifyo alecita fyalelangilila ukuti takwete icitetekelo. Ici e calengele Yakobo alembe ukuti, “icitetekelo nga tacakwata imilimo, ninshi califwa.”—Yako. 2:​14-17.

13. Finshi Yakobo alandilepo pa kulangilila ukuti tulingile ukuba ne citetekelo e lyo ne milimo? (Yakobo 2:​25, 26)

 ¹³ Yakobo alandile ukuti Rahabu aba ca kumwenako icisuma pantu alilangile ukuti alikwete icitetekelo mu fyo alecita. (Belengeni Yakobo 2:​25, 26.) Alyumfwileko fimo pali Yehova kabili alishibe no kuti e walecingilila abena Israele. (Yosh. 2:​9-11) Alilangile ukuti alikwete icitetekelo mu fyo acitile ilyo afishile inengu sha bena Israele. Ne cafuminemo ca kuti, uyu umwanakashi nangu ca kuti ali uushapwililika kabili tali mwina Israele, Yehova alemumona ukuti mulungami nga filya fine alemona Abrahamu. Ifyo acitile fitulanga umulandu cacindamina ukuba ne citetekelo icakwata imilimo.

14. Mulandu nshi twingalandila ukuti ifyo Paulo na Yakobo balelandapo tafyapusana?

¹⁴ Kanshi ifyo Paulo na Yakobo balelandapo fimo fine lelo bafilondolwele mu nshila iyapusana. Paulo ale-eba fye Abena Kristu abaYuda ukuti Yehova tali no kulabamona ukuti balungami pa mulandu fye wa kuti balekonka imilimo ya mafunde ya kwa Mose, e lyo Yakobo ena alelanda ukuti Abena Kristu bonse balingile ukulanga ukuti balikwata icitetekelo ukupitila mukulacitila abantu bambi ifisuma.

15. Finshi twingacita pa kuti tulange ukuti twalikwata icitetekelo? (Moneni ne cikope.)

¹⁵ Yehova talanda ukuti tufwile ukulacita fye filya fine Abrahamu alecita pa kuti tube abalungami. Na kuba kwaliba ifingi ifyo twingacita pa kulanga ukuti twalikwata icitetekelo. Kuti tulepokelelako abantu abesa pa muku wa kubalilapo mukulongana, ukwafwilishako aba bwananyina abalekabila ubwafwilisho, e lyo no kulacitila balupwa lwesu ifisuma, ifyo Lesa atemwa kabili ifyo engapaala. (Rom. 15:7; 1 Tim. 5:​4, 8; 1 Yoh. 3:18) Umulimo uwacindama  sana uo twingalangilamo ukuti twalikwata icitetekelo, kulaebako bambi imbila nsuma. (1 Tim. 4:16) Bonse fye kuti twalanga ukupitila mu fyo tucita ukuti twalicetekela ifyo Yehova atulaya ukuti fikacitika na mu fyo atweba ukucita ukuti fyaliba fye bwino. Kabili nga twacita ifi, kuti twashininkisha ukuti Lesa akulatumona ukuti tuli balungami kabili kuti twaba ifibusa fyakwe.

16. Finshi Abrahamu asubiile, kabili finshi acetekele?

¹⁶ Mwi buuku lya Abena Roma icipandwa 4, mwaliba na fimbi ifyo twingasambililako kuli Abrahamu. E kutila ico isubilo lya cindamina. Yehova alaile Abrahamu ukuti inko ishingi shikapaalilwa muli ena. Tontonkanyeni pe subilo ilisuma ilyo Abrahamu akwete! (Ukute. 12:3; 15:5; 17:4; Rom. 4:17) Na lyo line, na lintu Abrahamu ali imyaka 100 e lyo Sara imyaka 90, tabakwete umwana uo babalaile. Ukulingana ne fyo abantu bamona, nalimo camoneke kwati Abrahamu na Sara te kuti bakwate umwana. Ici cali no kulenga Abrahamu afilwa ukucetekela ifyo Yehova amulaile. “Lelo apo ali ne subilo, ali ne citetekelo, pa kuti abe wishi wa nko ishingi.” (Rom. 4:​18, 19) Kabili ilyo papitile inshita, ifyo alesubila fyalicitike. Aishileba wishi wa kwa Isaki, umwana uo balelolela pa nshita iitali.—Rom. 4:​20-22.

17. Twaishiba shani ukuti Lesa kuti atumona ukuti tuli fibusa fyakwe ifyalungama?

¹⁷ Lesa kuti atupaala kabili kuti atumona no kuti tuli fibusa fyakwe ifyalungama nga filya alemona Abrahamu. Na kuba, Paulo alilandile pali ifi ilyo atile: “Aya mashiwi ya kuti, ‘Lesa amumwene ukuti mulungami’ tayalembeelwe Abrahamu eka iyo, lelo yalembeelwe na ifwe fwe bali no kumonwa abalungami, pantu twalitetekela uwabuushishe Yesu.” (Rom. 4:​23, 24) Nga filya Abrahamu ali, na ifwe tufwile ukuba ne citetekelo icakwata imilimo e lyo ne subilo. Paulo na kabili alitwalilile ukulanda pe subilo mwi buuku lya Abena Roma icipandwa 5, ilyo tukalandapo mu cipandwa cikonkelepo.