ABAKASHANA babili balepita mu ncende ya makwebo mu musumba wa Baguio City mu Philippines. Balimwene ka standi ka mpapulo lelo tabailepo. Nkashi Helen uwali pali ka standi alibamwentwilile. Aba abakashana balitwalilile ukuya lelo balitemenwe pa fyo nkashi Helen abamwentwilile.

Ilyo aba abakashana bali muli basi baleya ku ng’anda balimwene ifilembo ifikalamba ifya jw.org pa Ng’anda ya Bufumu. Baibukishe ukuti ifi ifilembo e fyo bacimona na pali ka standi ka mpapulo. Bonse babili balikile no kuya mukumona inshita sha kulongana ishali pa cipampa pa Ng’anda ya Bufumu.

Aba abakashana babili balisangilwe ku kulongana kumo ukwa konkelepo. Lintu baingile fye mu Ng’anda ya Bufumu, balipapile ilyo bamwene nkashi Helen! Apo pene fye balibukishe ukuti e wabamwentwilile. Nkashi Helen atile: “Ilyo banungeme nalyumfwile umwenso pantu naleti nalimo pali ifyo nalufyenye.” Lelo aba abakashana balilondolwelele nkashi Helen ukuti balimumwene pali ka standi ka kubikapo impapulo.

Aba abakashana bali-ipakishe ukulongana kabili balyumfwile bwino ukuba pamo na bamunyinefwe na bankashi. Ilyo aba abakashana bamwene bamunyinefwe na bankashi balewamya Ing’anda ya Bufumu pa numa ya kulongana balipwishe nga kuti babombako. Umo pali aba abakashana alikuukila ku calo cimbi, lelo umbi ena alitendeke ukusangwa ku kulongana no kusambilila Baibolo—ifi fyonse fyacitike pa mulandu wa kuti ba Helen balimwentwile!