1-2. Ukulingana na Mateo 5:11, bushe tufwile ukulamona shani amesho?

YESU alaile abasambi bakwe ukuti bakaba ne nsansa sha cine cine. Kabili aebele bonse abamutemwa ukuti bakalaba na mesho. (Mat. 10:22, 23; Luka 6:20-23) Twalitemwa ifi twaba abasambi ba kwa Kristu. Nomba tumfwa shani nga ca kuti balupwa baletukaanya ukubombela Yehova, aba mu buteko baletucusha, nangu nga ca kuti abo tubomba nabo nelyo abo tusambilila nabo baletutunka ukucita ifyabipa? Nga twatontonkanya pali ifi fintu, nalimo kuti twasakamikwa.

² Abantu abengi bamona ukuti ukubacusha te kuti kulenge balesekelela. Lelo Icebo ca kwa Lesa cilanda ukuti ukutucusha kuti kwalenga twalasekelela. Ku ca kumwenako, umusambi Yakobo alembele ukuti tatufwile ukumfwa kwati tapali abengatwafwa ilyo tuli na mafya. Tufwile fye ukulasekelela nelyo ukulamona ukuti twalipaalwa. (Yako. 1:2, 12) Na kabili Yesu atile tufwile ukulasekelela nelyo ukulamona ukuti twalipaalwa ilyo baletucusha. (Belengeni Mateo 5:11.) Kuti twatwalilila shani ukulasekelela na lintu tuli na mesho? Kuti twasambilila ifingi kuli fimo ifyaba muli kalata iyo Yakobo alembeele Abena Kristu ba kubalilapo. Natubalilepo ukulanda pa mafya aba Abena Kristu ba kubalilapo bakwete.

3. Finshi fyacitike ilyo papitile fye inshita iinono ukutula apo Yakobo aishilebela umusambi wa kwa Yesu?

³ Ilyo papitile inshita iinono ukutula apo Yakobo munyina wa kwa Yesu abelele umusambi wa kwa Yesu, Abena Kristu mu Yerusalemu balitendeke ukubacusha. (Imil. 1:14; 5:17, 18) Kabili ilyo  umusambi Stefani bamwipeye, Abena Kristu abengi balifulumwike mu musumba kabili “basalanganine mu Yudea na mu Samaria,” lyena pa numa balilefika ku Kupro na ku Antioke. (Imil. 7:58–8:1; 11:19) Abasambi balikwete amafya ayengi. Na lyo line, bali abacincila ukubila imbila nsuma konse uko basalanganine, kabili ifilonganino fyalepangwa mu ncende ishalekanalekana isho ubuteko bwa bena Roma bwaleteka. (1 Pet. 1:1) Lelo pa numa balishilekwata amafya ayengi.

4. Mafya nshi na yambi ayo Abena Kristu ba kubalilapo balingile ukulashipikisha?

⁴ Abena Kristu ba kubalilapo balingile ukulashipikisha amesho ayalekanalekana. Ku ca kumwenako, nalimo mu mwaka wa 50 ninshi Yesu alibwelelamo ku muulu, kateka umwina Roma Klaudi aebele abaYuda bonse ukufuma mu Roma. Kanshi abaYuda abasangwike Abena Kristu balipatikishiwe ukusha amayanda yabo no kuyaikala ku fifulo fimbi. (Imil. 18:1-3) Nalimo mu mwaka wa 61 ninshi Yesu alibwelelamo ku muulu, umutumwa Paulo alembele ukuti Abena Kristu banankwe balebapontela pa cintubwingi, balebapoosa mu fifungo, kabili balebapoka ifipe. (Heb. 10:32-34) Nga filya fine cali ku bantu bambi, Abena Kristu bamo bali abapiina kabili balelwala.—Rom. 15:26; Fil. 2:25-27.

5. Mepusho nshi twala-asuka?

⁵ Ilyo Yakobo alembele kalata yakwe ninshi umwaka wa 62 taulafika, alishibe bwino amafya ayo aba bwananyina bakwete. Yehova alengele Yakobo ukulembela aba Abena Kristu ifyebo ifyali no kubafwa ukutwalilila ukulasekelela na lintu bali na mafya. Lekeni tulande pa fyaba muli kalata Yakobo alembele no kwasuka amepusho yakonkapo: Kusekelela nshi Yakobo alelandapo? Finshi ifingalenga Umwina Kristu aleka ukulasekelela? Kabili bushe amano, icitetekelo e lyo no kushipa kuti fyatwafwa shani  ukutwalilila ukulasekelela, te mulandu na mafya twingakwata?

6. Ukulingana na Luka 6:22, 23, cinshi cingalenga Umwina Kristu alasekelela ilyo ali na mafya?

⁶ Abantu nalimo kuti balatontonkanya ukutila kuti baba fye ne nsansa nga ca kuti nabakwata ubumi ubusuma, indalama ishingi, e lyo no mutende mu lupwa. Nomba ukusekelela uko Yakobo alandilepo kwaba pa fisabo fya mupashi, kanshi kuti tulesekelela te mulandu ne fyo ifintu fili mu bumi. (Gal. 5:22) Umwina Kristu kuti alesekelela nelyo ukuba ne nsansa sha cine, nga ca kutila naishiba ukuti alesekesha Yehova kabili alepashanya Yesu. (Belengeni Luka 6:22, 23; Kol. 1:10, 11) Nga filya fine ulubingu lutwalilila ukwaka mwi lampi, Umwina Kristu na o kuti atwalilila ukulasekelela nangu ali na mafya. Tatwakaleke ukusekelela pa mulandu wa kuti natulwala nelyo pa mulandu wa kuti tatukwete indalama. Na kabili tukatwalilila ukulasekelela na lintu baletupumya nangu ilyo baletukaanya kuli balupwa lwesu nelyo abantu bambi. Lyonse ilyo abantu balecita ifingalenga twaleka ukusekelela, ukusekelela kwesu kukalakulilako. Amesho ayo tukwata pa mulandu ne citetekelo cesu, yalanga fye ukutila tuli basambi ba cine aba kwa Kristu. (Mat. 10:22; 24:9; Yoh. 15:20) E mulandu wine Yakobo alembeele ukuti: “Mwe bamunyinane, mulemona ukuti nga mwaponenwa ne fya kwesha fyalekanalekana, ninshi mwalipaalwa icine cine.”—Yako. 1:2.

7-8. Bushe icitetekelo cesu kuti cakoselako shani nga twaeshiwa?

⁷ Yakobo alilandile icilenga Umwina Kristu elatiina amesho nangu yakalamba. Atile: “Ukweshiwa kwa citetekelo cenu kuleta ukushipikisha.” (Yako. 1:3) Amesho kuti twayapashanya ku mulilo uo babomfya pa kufuula ulupanga lwa cela. Ulupanga nga balukafya e lyo balutalalika lulakosa icine cine. Ifi fine e fyo caba na ku citetekelo cesu. Nga twashipikisha amesho cilakoselako. E mulandu wine Yakobo alembeele ukuti: “Muleleka ukushipikisha kwenu kwapwisha umulimo wa kuko, pa kutila mube abafikapo kabili abatuntulu muli fyonse.” (Yako. 1:4) Nga twaishiba ukuti amesho tulekwata yalelenga icitetekelo cesu ukukosa, tukalasekelela ilyo tuleyashipikisha.

⁸ Muli kalata Yakobo alembele, alilandile na pa fintu fimo ifingalenga twaleka ukulasekelela. Mafya nshi Yakobo alandilepo, kabili kuti twayacimfya shani?

9. Mulandu nshi tukabila amano nga tuli na mafya?

⁹ Icingalenga twaleka ukulasekelela: Ukukanaishiba ifya kucita. Nga tuli na mafya tulafwaya ukuti Yehova atwafwe ukusala ifya kucita ifingamusekesha, ifingafwa bamunyinefwe na bankashi kabili ifingatwafwa ukutwalilila ukuba  aba cishinka kuli Yehova. (Yer. 10:23) Tulakabila amano pa kuti twishibe ifya kucita, na pa kuti twishibe ifya kwasuka abatukaanya. Nga tatwishibe ifya kucita nalimo kuti twafuupuka kabili kuti twaleka ukulasekelela.

10. Finshi ilembo lwa kwa Yakobo 1:5 litweba ukucita pa kuti tube na mano?

¹⁰ Ifyo twingacita pa kuti tutwalilile ukulasekelela: Ukulomba amano ukufuma kuli Yehova. Pa kutila tuleshipikisha amafya no kutwalilila ukulasekelela, tulingile ukubalilapo ukulomba amano kuli Yehova pa kuti tulepingula bwino pa fintu. (Belengeni Yakobo 1:5.) Finshi tufwile ukucita nga twamona ukuti Yehova taswike ipepo lyesu apo pene fye? Yakobo atile tatufwile ‘ukuleka ukulomba’ kuli Lesa. Yehova takalifiwa nga twatwalilila ukulomba amano kuli ena, kabili tatufulilwa. Shifwe wa ku muulu ‘alatupeela’ amano nga twamulomba pa kuti tutwalilile ukushipikisha amesho. (Amalu. 25:12, 13) Alamona amafya tukwata, alomfwa ububi nga tulecula, kabili alafwaisha ukutwafwa. Ukwabula no kutwishika, ici cilalenga tulesekelela! Nomba bushe Yehova atupeela shani amano?

11. Finshi fimbi ifyo tufwile ukucita pa kuti tube na mano?

¹¹ Yehova alabomfya Icebo cakwe pa kutupeela amano. (Amapi. 2:6) Pa kuti tube na aya amano, tufwile ukulabelenga Icebo ca kwa Lesa ne mpapulo shilanda pali Baibolo. Tatulingile ukupelela fye pa kubelenga Baibolo nelyo impapulo shilanda pali Baibolo, lelo tulingile no kulacita ifyo Lesa atweba. Yakobo alembele ukuti: “Mulecita ifyo Icebo ca kwa Lesa cisosa, te kulaumfwa fye iyo.” (Yako. 1:22) Nga tulekonka ifyo Lesa atweba tulaba aba mutende, tatupampamina fye pa cintu cimo, kabili tulaba no luse. (Yako. 3:17) Iyi imibele ilatwafwa ukushipikisha amesho ayali yonse ukwabula ukuleka ukusekelela.

12. Cinshi cacindamina ukuti twaishiba bwino Baibolo?

¹² Icebo ca kwa Lesa caba kwati cilola.  Cilatwafwa ukwishiba umo tushicita bwino, e lyo ne fyo twingacita pa kuti tuwamyeko umo tushicita bwino. (Yako. 1:23-25) Ku ca kumwenako, pa numa ya kusambilila Icebo ca kwa Lesa, nalimo kuti twamona ukuti tulingile ukulalama ubukali. Yehova nga atwafwa, tulasambilila ifya kuba abatekanya abantu nga batukalifya nelyo amafya nga yalenga twakalipa. Nga tuli abatekanya tuleshiba bwino ifya kucita nga tuli na mafya. Tulatontonkanya bwino kabili tulapingula bwino pa fintu. (Yako. 3:13) Kanshi calicindama ukuti twaishiba bwino Baibolo!

13. Cinshi tulingile ukusambililila ku fyo abalembwa mu Baibolo bacitile?

¹³ Inshita shimo nga twalufyanya, e lyo twishiba ifyo tushilingile ukucita. Lelo iyi te nshila iisuma iya kusambilililamo. Inshila iisuma iya kukwatilamo amano, kusambilila ku fyo bambi bacitile bwino e lyo na ku fyo balufyenye. E mulandu wine Yakobo atukoseleseshe ukusambililako ku fyacitile abalembwa mu Baibolo pamo nga Abrahamu, Rahabu, Yobo, na Eliya. (Yako. 2:21-26; 5:10, 11, 17, 18) Aba ababomfi ba kwa Yehova aba cishinka balishipikishe amesho ayali no kulenga baleka ukusekelela. Filya bashipikishe filanga ukuti na ifwe Yehova nga atwafwa kuti twashipikisha amesho.

14-15. Cinshi tushilingile ukutwalilila ukulatwishika?

¹⁴ Icingalenga twaleka ukusekelela: Ukutwishika nga ca kuti ifyo twasuminamo fya cine. Inshita shimo nalimo kuti catukosela ukumfwikisha fimo ifyaba mu Cebo ca kwa Lesa. Nelyo nalimo Yehova te kuti asuke amapepo yesu ukulingana ne fyo tule-enekela. Nalimo ifi kuti fyalenga twalatwishika ifyo twasuminamo. Nga tatulekele ukutwishika, icitetekelo cesu kuti canaka kabili bucibusa bwesu na Yehova kuti bwapwa. (Yako. 1:7, 8) Kabili ukutwishika kuti kwalenga twaleka ukuba ne subilo lya kuti ifintu fikawama ku ntanshi.

¹⁵ Umutumwa Paulo apashenye isubilo lyesu ku nanga. (Heb. 6:19) Inanga ilalenga ubwato ukukanasensenunwa ku mabimbi no kukanaipuma mu fimabwe. Nomba inanga kuti yabomba fye nga ca kuti ceni iikete ku nanga na ku bwato taiputwike. Nga filya fine ingalawa shingalenga ceni ya ku nanga yanenuka, e fyo no kutwishika kwinganenuna icitetekelo cesu. Kabili nga ca kuti umuntu uutwishika aba na mesho, alaleka ukucetekela ukuti Yehova akafikilisha ifyo atulaya. Nga twaleka ukuba ne citetekelo, tulaleka ukuba ne subilo. Nga fintu Yakobo alandile, umuntu uutwishika “aba nga mabimbi ya pali bemba ayasendwa ku mwela no kusensenunwa.” (Yako. 1:6) Ilingi line umuntu wa musango uyu tasekelela nangu panono!

16. Finshi tufwile ukucita nga tuletwishika ifyo twasuminamo?

¹⁶ Ifyo twingacita pa kuti tutwalilile ukusekelela: Ukuleka ukutwishika no kukosha icitetekelo. Muleangufyanya ukucitapo cimo. Mu nshiku sha kwa kasesema Eliya, abantu ba kwa Yehova batendeke ukutwishika nga ca kuti ifyo basumiinemo fyali fya cine. Eliya abebele ukuti: “Bushe kufika lilali mukaba aba mitima ibili? Nga Yehova e Lesa wa cine, mukonkeni; nga ni Baali, mukonkeni.” (1 Isha. 18:21) Na muno nshiku mwine tufwile ukwangufyanya ukucitapo cimo. Tulingile ukufwailisha ifyebo ifingalenga twashininkisha ukuti Yehova e Lesa wa cine, Baibolo Cebo cakwe, no kuti Inte sha kwa Yehova bantu bakwe. (1 Tes. 5:21) Nga tulecita ifi tukaleka ukutwishika kabili tukakosha icitetekelo cesu. Nga tulakabila abakutwafwa pa kuti tuleke ukutwishika, kuti twaeba baeluda. Tufwile ukwangufyanya ukucitapo cimo pa kuti tutwalilile ukulasekelela ilyo tulebombela Yehova!

17. Finshi fingacitika nga twaleka ukuba abashipa?

¹⁷ Icingalenga twaleka ukusekelela: Ukufuupuka nelyo ukunenuka. Icebo ca kwa Lesa citila: “Bushe ulanenuka mu bushiku bwa macushi? Awe ninshi amaka yobe yanono.” (Amapi. 24:10) Ishiwi lya ciHebere ilyo bapilibula ukuti “ukunenuka,” kuti lyapilibula no kuti “ukuleka  ukuba uwashipa.” Kanshi nga mwaleka ukuba abashipa mukaleka ukusekelela.

18. Bushe ukushipikisha kwalola mwi?

¹⁸ Ifyo tufwile ukucita pa kuti tutwalilile ukusekelela: Muleshintilila pali Yehova ukuti e o alemupeela amaka ya kushipikisha. Tulakabila ukuba abashipa pa kuti tuleshipikisha amesho. (Yako. 5:11) Ishiwi Yakobo abomfeshe ilyo bapilibula ukuti “ukushipikisha,” lilenga twalatontonkanya pa muntu uwashipa uutwalilile ukwiminina pamo pene ukwabula ukusela. Nalimo kuti twatontonkanya pa mushilika uwashipa sana uwiminine fye pamo pene, kabili uushilefwaya ukufulumuka abalwani bakwe.

19. Finshi twingasambililako ku mutumwa Paulo?

¹⁹ Umutumwa Paulo ali uwashipa sana kabili aleshipikisha. Inshita shimo alenaka. Lelo aleshipikisha pantu alicetekele ukuti Yehova ali no kulamupeela amaka ayo alekabila pa kuti aleshipikisha. (2 Kor. 12:8-10; Fil. 4:13) Na ifwe bene kuti twaba abashipa no kushipikisha amesho nga ca kuti tuli abaicefya kabili tuleibukisha ukuti tulakabila Yehova ukutwafwa.—Yako. 4:10.

20-21. Finshi tufwile ukushininkisha?

²⁰ Tufwile ukwishiba ukuti nga twaba na mesho, tacipilibula ukuti ni Yehova ayaletele pa kuti atukande. Yakabo atile: “Ilyo umuntu atunkwa, etila: ‘Ni Lesa e ulentunka.’ Pantu takuli uwingatunka Lesa ukucita ifyabipa, kabili umwine tatunka umuntu iyo.” (Yako. 1:13) Nga twashininkisha ici icishinka, tulapalama sana kuli Shifwe wa ku muulu uwatutemwa.—Yako. 4:8.

²¹ Yehova “taluka-aluka.” (Yako. 1:17) Alyafwile Abena Kristu ba kubalilapo ilyo bali na mesho, kabili na muno nshiku mwine alatwafwa. Mulelomba Yehova ukufuma pa nshi ya mutima pa kuti amulenge ukuba na mano, ukuba ne citetekelo, e lyo no kuba abashipa. Akasuka amapepo yenu. Lyena mukashininkisha ukuti akamwafwa ukutwalilila ukusekelela ilyo muleshipikisha amesho!