1, 2. Bushe Yehova abomfya shani bwino ifyuma fyakwe?

YEHOVA ni kapekape. Fyonse ifyo twakwata fyafuma kuli ena. Yehova e mwine wa golde na silfere ne fintu fyonse ifyaba mwi sonde, kabili alafibomfya pa kupeela ifya mweo ifyo fikabila pa kuti fitwalilile ukuba no bumi. (Amalu. 104:13-15; Hag. 2:8) Mu Baibolo mwaliba amalyashi ayengi ayalanda pa fyo Yehova alecita ifipesha mano pa kupeela abantu bakwe ifyo balekabila.

² Pa myaka 40 Yehova alepeela abena Israele mana ilyo bali mu matololo. (Ukufu. 16:35) Apo alebapeela ifyo balekabila, “tababulilwe akantu.” (Nehe. 9:20, 21) Yehova alicitile icipesha mano ukupitila muli kasesema Elisha ilyo afushishe amafuta ayanono aya kwa mukamfwilwa. Ifi Yehova afushishe amafuta calengele abwesha inkongole isho akwete, kabili alishelepo ne ndalama isho ena na bana bakwe abaume baleliilamo. (2 Isha. 4:1-7) Yehova alyafwile Yesu ukucita icipesha mano lintu apekanishishe abantu ifya kulya, kabili inshita imo mu cisungusho alipekenye ne ndalama iyalekabilwa.—Mat. 15:35-38; 17:27.

3. Finshi twalasambilila muli cino cipande?

 ³ Yehova alikwata ifintu ifingi nga nshi ifyo engabomfya pa kusakamana ifibumbwa fyakwe pano isonde. Na lyo line afwaya ababomfi bakwe balebomfya ifyo bakwata pa kutungilila umulimo uo icilonganino cakwe cibomba. (Ukufu. 36:3-7; belengeni Amapinda 3:9.) Cinshi Yehova afwaila ukuti tulemubwesesha ifyuma? Bushe abantu ba kwa Yehova aba cishinka balebomfya shani indalama shabo pa kutungilila ababomfi bakwe? Bushe icilonganino ca kwa Yehova cibomfya shani indalama isho tusangula muno nshiku? Aya e mepusho twalayasuka muli cino cipande.

4. Finshi tulanga Yehova nga tuletungilila umulimo wakwe?

⁴ Icilenga tulepeela Yehova ifyo twakwata ni co twalimutemwa kabili tulatasha pa fyo atupeela. Cilatupesha amano nga twatontonkanya pali fyonse ifyo Yehova atucitila. Ilyo Imfumu Davidi yalelanda pa fyalekabilwa pa kukuula itempele, yalandile ukuti fyonse ifyo twakwata fyafuma kuli Yehova no kuti fyonse ifyo tumupeela fintu atupeela kale.—Belengeni 1 Imilandu 29:11-14.

5. Bushe Amalembo yalanga shani ukuti ukupeela no mweo onse lubali ulukalamba ulwa kupepa kwa cine?

⁵ Ukupeela nako lubali lwa kupepa Yehova. Mu cimonwa, umutumwa Yohane aumfwile ababomfi ba kwa Yehova balelanda abati: “Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” (Ukus. 4:11) Ukwabula no kutwishika tufwile ukulapeela Yehova ifintu ifisuma nga nshi pantu alilinga ukupokelela ubukata no mucinshi. Ukupitila muli Mose, Yehova aebele abena Israele ukulamonekela ku cinso cakwe imiku itatu mu mwaka ku mitebeto. Pa nshita ya mitebeto, abena Israele tabalingile “ukumoneka ku cinso ca kwa Yehova minwe nkutwa.” (Amala. 16:16) Na muno nshiku mwine, ukuitemenwa ukupeela pa kulanga ukuti tulatasha kabili tulatungilila umulimo uo icilonganino ca kwa Yehova ica pano isonde cibomba, lubali ulukalamba ulwa kupepa kwesu.

6. Mulandu nshi ukupeela kwawamina? (Moneni icikope pa ntendekelo ya cino cipande.)

⁶ Na ifwe bene tulamwenamo nga tulepeela. Tulanonkelamo nga tulepeela ukucila ukulapokelela fye. (Belengeni Amapinda 29:21.) Tutile umwana apeela abafyashi bakwe ubupe pa ndalama ishinono isho abafyashi bakwe bamupeele, abafyashi bakwe kuti batasha sana! Umwana umwaume nelyo umwanakashi uubomba bupainiya kabili uucili ekala pa bafyashi, nalimo kuti apeelako abafyashi bakwe indalama isho bengashitamo tumo utwakubomfya pa ng’anda. Nalimo abafyashi te kuti benekele umwana wabo ukucita ifi, lelo nalimo kuti bapoka ubu ubupe pantu e nshila umwana engalangilamo ukuti alatasha pali fyonse ifyo bamucitila. Na Yehova wine alishiba ukuti cilawama nga tulemupeela ifyuma fyesu.

7, 8. Finshi abantu ba kwa Yehova aba ku kale balecita ifyo na ifwe tulingile ukucita (a) nga kuli imilimo ilekabilwa ukubombwa? (b) ku kutungilila umulimo wa kwa Lesa?

⁷ Amalembo yalilanda bwino sana pa kupeela Yehova ifyuma fyesu. Inshita shimo abantu ba kwa Yehova balesangula pa kuti babombe umulimo umo. Ku ca kumwenako, Mose aebele abantu ukuleta imisangulo pa kuti bakuule icikuulwa ca mushilo, nga fintu Imfumu Davidi nayo yacitile pa kukuula itempele. (Ukufu. 35:5; 1 Imila. 29:5-9) Ilyo Imfumu Yehoashi yaleteka, shimapepo abomfeshe indalama isho abantu basangwile pa kuwamya ing’anda ya kwa Yehova. (2 Isha. 12:4, 5) Ilyo bamunyinefwe  mu cilonganino ca Bena Kristu icaliko mu nshita ya batumwa baishibe ukuti aba bwananyina mu Yudea balekabila ubwafwilisho pa mulandu wa cipowe icaliko, “umo na umo atumine ifya kukumbusuka ku ba bwananyina abaikele mu Yudea.”—Imil. 11:27-30.

⁸ Inshita shimbi abantu ba kwa Yehova balesangula ifyo bakwete kwafwilisha abaletungulula. Ukulingana na Mafunde ya kwa Mose, abena Lebi tababapeele impanga nga fintu imikowa imbi baipeele. Lelo abena Israele balepeela abena Lebi ica pe kumi, kabili ici calengele babike amano ku mulimo balebomba pa cikuulwa ca mushilo. (Impe. 18:21) Yesu na batumwa bakwe nabo balinonkelemo muli bukapekape bwa banakashi ‘abalebafwilisha ukubomfya ifintu fyabo.’—Luka 8:1-3.

9. Bushe ifyo abantu ba kwa Lesa balesangula fyalefuma kwi?

⁹ Kwena uko abantu balefumya ifyo balesangula kwali ukwapusanapusana. Ifyo abena Israele basangwile pa kukuula icikuulwa ca mushilo mu matololo, fifwile fyali fintu bafumine na fyo ku Egupti. (Ukufu. 3:21, 22; 35:22-24) Mu nshita ya batumwa, Abena Kristu bamo balishitishe ifyo bakwete, pamo nga amabala, amayanda, kabili batwele indalama ku batumwa. Lyena abatumwa balyakenye ishi indalama ku balekabila ubwafwilisho. (Imil. 4:34, 35) Bambi balepatulapo indalama kabili balesangula lyonse pa kutungilila umulimo wa kwa Lesa. (1 Kor. 16:2) E ico abantu bonse fye, abakankaala sana na bali abapiina sana balesangula.—Luka 21:1-4.

10, 11. (a) Finshi tulingile ukucita pa kuti tulepashanya ababomfi ba kwa Yehova aba kale? (b) Bushe mumfwa shani pe shuko mwakwata ilya kutungilila umulimo wa Bufumu?

¹⁰ Muno nshiku, na ifwe kuti batweba ukusangula pa kuti umulimo umo ubombwe. Ku ca kumwenako, bushe icilonganino cenu cilepekanya ukukuula Ing’anda ya Bufumu? Nelyo bushe Ing’anda yenu iya Bufumu ilekabilwa ukuwamya ifyaonaika? Nalimo kuti batweba ukutila tufwile ukusangula indalama pa kuti bakawamye ifyaonaika ku maofeshi ya musambo, isha kubomfya pa kulongana ukukalamba, nelyo isha kwafwilisha aba bwananyina abaponenwe na kayofi. Na kabili tulasangula indalama pa kutungilila aba bwananyina ababombela pa maofeshi yakalamba na pa maofeshi ya misambo mwi sonde lyonse. Imisangulo yesu ilatungilila bamishonari, bapainiya baibela, na babombela mu miputule. Ukwabula no kutwishika na imwe mu cilonganino cenu mwalilanshanya ukulatuma indalama isha kwafwilisha ukukuula Ifikuulwa fya Kulonganinamo Ukulongana ku Kalamba na Mayanda ya Bufumu, ifyo aba bwananyina mwi sonde lyonse babomfya.

¹¹ Bonse kuti twatungilila umulimo uo Yehova alefwaya ukuti ubombwe muno nshiku sha kulekelesha. Imisangulo iingi tatwishiba na basangula. Ilyo tubika indalama mu tubokoshi utwaba mu Ng’anda ya Bufumu nelyo ilyo tusangula ukubomfya webusaiti yesu iya jw.org, tatweba nangu umo indalama isho twasangula. Nalimo kuti twalamona kwati imisangulo iinono iyo tusangula tayacindama sana. Na kuba pa misangulo iyo icilonganino ca kwa Lesa cipokelela, imisangulo iikalamba iba fye iinono, lelo iifula sana misangulo iinono. Na ba bwananyina abapiina nabo baba nga filya aba ku Makedonia abali “abapiina nga nshi” bali. Nangu bali abapiina nga nshi balipapaate ukuti babasuminishe ukusangula kabili balisangwile ne mitima yonse.—2 Kor. 8:1-4.

12. Finshi icilonganino cicita pa kuti cilebomfya bwino imisangulo?

¹² Ibumba Litungulula lilapepa pa kuti lileba ilya cishinka kabili ilyashilimuka pa  kubomfya indalama sha cilonganino ca kwa Lesa. (Mat. 24:45) Aba mwi Bumba Litungulula balapekanya bwino ifya kubomfya indalama tusangula kabili ifi fine e fyo bakonka. (Luka 14:28) Kale abalelolekesha pa misangulo baleshininkisha ukuti babomfya imisangulo ku milimo iilingile ukubombwa. Ku ca kumwenako, ilyo Esra alebwelelamo ku Yerusalemu aile ne fintu ifyo imfumu ya ku Persia yasangwile, e kutila golde, silfere, ne fintu fimbi ifingafika ku ndalama ukucila pali 903 milioni kwacha pali lelo. Esra alemona ukuti ilya misangulo yali mutuulo wa kuitemenwa kuli Yehova, kabili aebele abasendele ifi fyuma ifya kucita pa kuficingilila ku balwani mu nshila. (Esra 8:24-34) Umutumwa Paulo alilonganike ifya ku kumbusuka aba bwananyina mu Yudea. Alicitilepo fimo pa kuti abaletwala imisangulo babe “abafumacumi muli fyonse, te ku menso fye ya kwa Yehova eka, lelo na ku menso ya bantu.” (Belengeni 2 Abena Korinti 8:18-21.) Muno nshiku icilonganino cesu cilapashanya Esra na Paulo mu fyo cibomfya imisangulo.

13. Bushe tulingile ukulamona shani ukwaluka ukulecitika mu cilonganino ca kwa Lesa?

¹³ Ulupwa kuti lwalanshanya ifyo lwingacita pa kuti belapoosa sana indalama ukucila pa sho bakwata, nangu kuti bafwaya ukwangushako imikalile no kucefyako ifya kushita pa kuti balebombesha mu mulimo wa kwa Yehova. Ifi fine e fyo ne cilonganino ca kwa Yehova cicita. Muno nshiku kwaliba ifipya ifisuma ifyacitika mu cilonganino ca kwa Lesa. Inshita shimo, ifi filenga indalama ishilebomfiwa shilefulapo ukucila ishilesangulwa. Kanshi icilonganino cilacitapo fimo pa kucefyako indalama ishilebomfiwa, kabili cilangushako inshila sha kubombelamo imilimo pa kuti ilebombwa bwino ukwabula ukubomfya indalama ishingi isho musangula.

14-16. (a) Finshi fimo fimo ifyo icilonganino cilecita mu misangulo iyo tusangula? (b) Finshi mwanonkelamo mu fyo icilonganino cilepekanya?

¹⁴ Ababomfi ba kwa Yehova abamubombela pa myaka iingi balanda abati pali nomba kwaliba ifintu ifingi ifisuma ifyo Lesa atupeela ukucila ifyo cali kale. Tontonkanyeni pali ici! Muno nshiku kwaliba webusaiti ya jw.org no mulabasa wa JW Broadcasting. Baibolo ya Amalembo ya Calo Cipya yalifuma mu ndimi ishingi sana. Mu 2014 na 2015 kwali ukulongana kwa nshiku shitatu ukwa bantu abafuma ku fyalo ifyalekanalekana ukwaleti, “Intanshi Mulefwaya Ubufumu Bwa Kwa Lesa!” Aba bwananyina balonganine mu fibansa fimo ifikalamba mu misumba 14 mwi sonde lyonse. Abasangilwe kuli uku kulongana balitemenwe nga nshi.

 ¹⁵ Aba bwananyina abengi balatasha pa fintu ifisuma ifyo icilonganino ca kwa Yehova cilebapekanishisha. Ku ca kumwenako, abaupana bamo ababombela mu calo cimo mu Asia balembele pa mulabasa wa JW Broadcasting abati: “Tubombela mu musumba uunono. Ici cilenga inshita shimo tuleumfwa kwati tatwaba mu cilonganino ca kwa Yehova kabili tulalaba bwangu ukuti umulimo wakwe ulebombwa mwi sonde lyonse. Lelo nga twatamba amaprogramu ya pa JW Broadcasting, tulebukisha ukuti twaba mu lupwa ulwa ba bwananyina mwi sonde lyonse. Aba bwananyina abo twaba nabo mu cilonganino balitemwa sana JW Broadcasting. Ilingi line nga batamba programu ya cila mweshi balanda ukutila bomfwa ukuti balapalama sana ku baba mwi Bumba Litungulula. Pali lelo balomfwa bwino sana ukuba mu cilonganino ca kwa Lesa.”

¹⁶ Mwi sonde lyonse balekuula no kuwamya Amayanda ya Bufumu nalimo 2,500. Ilyo aba bwananyina ba mu cilonganino cimo mu calo ca Honduras batendeke ukubomfya Ing’anda ya Bufumu iipya balembele abati: “Twaliba sana ne nsansa pa kuba mu lupwa lwa kwa Yehova ulwa pe sonde na ku muulu kabili tulomfwa bwino ukuba pamo na ba bwananyina abatwafwile ukukuula Ing’anda ya Bufumu kuno mwesu.” Aba bwananyina abengi nabo balatasha sana nga bapokelela Baibolo ne mpapulo isho bapilibwila mu ndimi shabo, nga babafwilisha ilyo baponenwa no tukofi, nelyo nga bamona ifisuma ififuma mu kubila nsuma mu fifulo fya makwebo mu misumba iikalamba na ku cintubwingi.

17. Bushe ifyo icilonganino ca kwa Yehova cilebomba muno nshiku filanga shani ukuti Yehova alatwafwa?

¹⁷ Abo tushipepa nabo te kuti beshibe ifyo tubomba imilimo yonse iyi ukubomfya fye imisangulo ya kuitemenwa. Ilyo umukalamba wa kampani imo iikalamba atandalile ifikuulwa fyesu ifya kupulintilamo, alipapile sana ilyo aishibe ukuti ababomba umulimo babomfi bakuitemenwa, no kuti tubomfya imisangulo ya kuitemenwa, kabili tatucita amakwebo nangu yamo nelyo ukulombelesha indalama. Alandile ukuti umulimo tubomba te kuti ubombwe ukubomfya fye imisangulo. Na ifwe bene tulasumina ifyo alandile! Twalishiba ukuti icilenga tulebomba uyu mulimo ni co Yehova alatwafwa.—Yobo 42:2.

18. (a) Bushe Yehova atupaala shani nga tuletungilila Ubufumu? (b) Finshi tufwile ukucita pa kusambilisha abana besu na balongana na ifwe pa kuti basambilile ukulapeela?

¹⁸ Yehova alitucindamika pa kutupeela ishuko lya kutungilila umulimo uukalamba uulebombwa muno nshiku. Alitulaya ukuti akatupaala nga ca kuti tulepeela pa kuti tutungilile Ubufumu. (Mal. 3:10) Yehova alilaya ukuti uupeela ukufuma pa nshi ya mutima akapaalwa. (Belengeni Amapinda 11:24, 25.) Na kabili ukupeela kulalenga tuleba ne nsansa, pantu “mwaba insansa ishingi mu kupeela ukucila ishaba mu kupokelela.” (Imil. 20:35) Mu fyo tulanda na mu fyo tucita kuti twasambilisha abana na batendeke fye ukulongana ukwishiba ifyo bengacita pa kuti balepeela e lyo ne fyo Yehova engabapaala.

19. Bushe cino cipande ca mukoselesha ukulacita finshi?

¹⁹ Fyonse ifyo twakwata fyafuma kuli Yehova. Nga tulemupeela ninshi tulelanga ukuti twalimutemwa kabili tulatasha pali fyonse ifyo atucitila. (1 Imila. 29:17) Ilyo abantu balesangula pa kukuula itempele, “balisekelele pa kutuula imituulo ya kuitemenwa, pantu bapeele ne mitima yonse mu kuitemenwa kuli Yehova.” (1 Imila. 29:9) Na ifwe natutwalilile ukulasekelela no kuba ne nsansa ilyo tulebwesesha Yehova ifyo atupeela.