1, 2. Cinshi cikalenga abantu abengi nga nshi bakalongane pamo uno mwaka, kabili mulandu nshi? (Moneni icikope pa muulu.)

PA 31 March, 2018 ilyo akasuba katendeka ukuwa, abantu ba kwa Lesa na bantu abafwaya ukusambilila pali Yehova bakalongana ku Mulaalilo wa kwa Shikulu uubako cila mwaka. Akasuba nga kawa, abantu abengi nga nshi bakalongana ku Cibukisho ca mfwa ya kwa Kristu. Cila mwaka ukulongana kwa kwibukisha imfwa ya kwa Yesu kulalenga abantu mwi sonde lyonse balongana pamo, kabili kulalenga baikatana. Uku kulongana kwalicila pa kulongana konse uko abantu bakwata!

² Kuti twaelenganya fye ifyo Yehova na Yesu basekelela nga bamona abantu abengi nga nshi pano isonde balelongana uku ukulongana kwaibela mpaka ubushiku bwa Cibukisho bwapwa. Baibolo yalisobele aiti “ibumba ilikalamba, ilyo umuntu nangu umo ashingapenda, abafumine mu nko shonse ne mitundu na bantu na bantu ne ndimi” balebilikisha, abati: “Ipusukilo lyesu lyafuma kuli Lesa wesu,  uwaikala pa cipuna ca bufumu, na ku Mwana wa mpaanga.” (Ukus. 7:9, 10) Ala Icibukisho cilalenga Yehova na Yesu bacindikwa!

3. Mepusho nshi ayalayasukwa muli cino cipande?

³ Muli cino cipande twalayasuka amepusho yakonkapo. (1) Finshi tufwile ukucita pa lwesu pa kuipekanya na pa kuti tukanonkelemo mu Cibukisho? (2) Bushe Icibukisho cilenga shani abantu ba kwa Lesa baikatana? (3) Finshi twingacita pa kuti tutwalilile ukuba abaikatana? (4) Bushe kukatala akuba Icibukisho ca kulekeleshako? Nga kukaba, ninshi ni lilali cikabako?

4. Mulandu nshi uo tulingile ukusangilwa ku Cibukisho?

⁴ Tontonkanyeni pa fyo ukuya ku Cibukisho kwacindama. Ibukisheni ukuti ukulongana kwa pa cilonganino lubali lwa kupepa kwesu. Ukwabula no kutwishika Yehova na Yesu balamona abaibikilishako ukuya kuli uku kulongana ukwacindama nga nshi mu mwaka. Ukulanda fye icishinka, tufwaya Yehova na Yesu bamona ukuti tulefwaisha ukuya ku Cibukisho kano fye nga cayafya sana. Nga ca kuti ifyo tucita filanga ukuti twalicindika ukulongana konse uko tukwata, ninshi tulanga Yehova ukuti tufwaya atulembe mwi “buuku lya kwibukisha,” e kutila “ibuuku lya mweo” umwalembwa amashina ya bantu abakapokelela umweo wa muyayaya.—Mal. 3:16; Ukus. 20:15.

5. Ilyo ubushiku bwa Cibukisho bushilafika, kuti ‘twayesha shani fwe bene pa kuti tumone nga tuli mu citetekelo’?

⁵ Ilyo kwashala inshiku ishinono pa kuti ubushiku bwa Cibukisho bufike, tulingile ukulakwatako inshita ya kulatontonkanya sana pa fyo bucibusa bwesu na Yehova bwaba. (Belengeni 2 Abena Korinti 13:5.) Kuti twacita shani ifi? Tufwile ‘ukulayesha fwe bene pa kuti tulemona nga tuli mu citetekelo.’ Pa kuyesha tulingile ukuyipusha atuti: ‘Bushe nalishininkisha ukuti icilonganino ico nabamo e cilonganino fye ceka ico Yehova asuminisha ukucita ukufwaya kwakwe? Bushe ndabombesha mu mulimo wa kubila no kusambilisha abantu imbila nsuma iya Bufumu? Bushe ifyo ncita filanga ukuti nalisumina ukutila tuleikala mu nshiku sha kulekelesha no kuti imitekele ya kwa Satana ili mu kupwa? Bushe nalicetekela Yehova na Yesu nga fintu nabacetekele ilyo fye naipeele kuli Yehova Lesa?’ (Mat. 24:14; 2 Tim. 3:1; Heb. 3:14) Nga tuletontonkanya sana pa fyasuko fya aya mepusho kuti twaishiba ifyo twaba.

6. (a) Ni nshila nshi imo fye iingalenga twaisaba no mweo wa muyayaya? (b) Finshi eluda umo acita cila mwaka ilyo ubushiku bwa Cibukisho bushilafika, kabili finshi nalimo na imwe mwingacita pa kuti muleipekanya?

⁶ Mulebelenga kabili muletontonkanya sana pa malyashi ayalanda pa fyo Icibukisho cacindama. (Belengeni Yohane 3:16; 17:3.) Inshila imo fye iyo twingakwatilamo umweo wa muyayaya ‘kwishiba’ Yehova no ‘kutetekela’ Yesu, Umwana wakwe uwafyalwa eka. Ilyo ubushiku bwa Cibukisho bushilafika, nalimo kuti mwalaisambilisha pa fingalenga mwapalama sana kuli Yehova na kuli Yesu. Natulande pa fyo eluda umo uwabombela Yehova pa myaka iingi acita. Pa myaka iingi uyu eluda alilonganika ifipande fya Ulupungu lwa kwa Kalinda ifilanda pa Cibukisho na pa fyo Yehova na Yesu batutemwa. Nga kwashala imilungu iinono pa kuti ubushiku bwa Cibukisho bufike, alabelenga ifi fipande na kabili no kutontonkanya sana pa fyo Icibukisho cacindama. Limo limo alalundako icipande cimo nelyo fibili pa fyo asunga kale. Uyu eluda asanga ukuti nga alebelenga ifi ifipande kabili alebelenga na Malembo ya mu nshiku sha cibukisho no kuyatontonkanyapo sana aleshibilapo na fimbi cila mwaka. Ne cawamisha ca kuti omfwa ukuti alatemenwako Yehova na Yesu cila mwaka. Na imwe bene nga mulecita ifi kuti  mwatemwa sana Yehova na Yesu kabili kuti mwanonkelamo sana mu Cibukisho.

7. (a) Cinshi Yesu apepelepo pa bushiku atendeke Umulaalilo wa kwa Shikulu? (b) Cinshi cilanga ukuti Yehova alyasuka ipepo Yesu apepele?

⁷ Pa bushiku Yesu atendeke Umulalilo wa kwa Shikulu, apepele ukuti abasambi bakwe bakabe abaikatana nga fintu ena na Wishi baba. (Belengeni Yohane 17:20, 21.) Ukwabula no kutwishika Yehova alyasuka ili pepo ilyo Umwana wakwe uo atemwa sana apepele, kabili pali ino nshita abantu abengi nga nshi balisumina ukuti Yehova alitumine Umwana wakwe. Ifi abantu ba kwa Lesa abengi nga nshi balongana pa Cibukisho filanga ifyo Inte sha kwa Yehova baikatana. Abantu abafuma mu fyalo ifingi kabili aba mishobo iyalekanalekana isonde fye lyonse balalongana pamo mu fifulo fya kulonganinamo. Mu fyalo fimo abantu aba mishobo iyalekanalekana tabalongana pamo, e lyo abantu bambi balasuula abantu abalongana pamo. Lelo Yehova na Yesu bamona ukuti ukwikatana kwa musango uyu kusuma nga nshi!

8. Finshi Yehova aebele Esekiele pa fyo abantu ba kwa Lesa bali no kwikatana?

⁸ Fwe bantu ba kwa Yehova tatupapa pa fyo twaikatana. Yehova alisobele ukutila abantu bakwe bakekatana. Natulande pa mashiwi ayo aebele kasesema Esekiele pa fyo imisambo ibili yali no kubikwa pamo, e kutila umusambo wa kwa “Yuda” no wa kwa “Yosefe.” (Belengeni Esekiele 37:15-17.) Mu cipande citila “Amepusho Ukufuma ku Babelenga” icali mu Ulupungu lwa kwa Kalinda ulwafumine mu July 2016 calondolwele ati: “Yehova aebele Esekiele ukusesema pa fyo uluko lwa bena Israele lwali no kwikatana nga lwabwelela ku Calo ca Bulayo. Ubu busesemo bwalesobela ne fyo abantu ba kwa Lesa bali no kwikatana mu nshiku sha kulekelesha.”

9. Finshi ficitika cila mwaka pa bushiku bwa Cibukisho ifilanga ukuti ubusesemo bwa kwa Esekiele bulefikilishiwa?

⁹ Ukutendekela mu mwaka wa 1919 Yehova abalilepo kuteyanya no kwikatanya abasubwa abo umusambo wa kwa “Yuda” waleimininako. Lyena ilyo abakwata isubilo lya kwikala pano isonde, e kutila abo umusambo wa kwa “Yosefe” waleiminako balefulilako, bailundile ku basubwa, kabili aya amabumba yabili yaishileba “umukuni umo.” (Yoh. 10:16; Seka. 8:23) Yehova alilaile ukuti ali no kubika iyi misambo ibili pamo kabili yali no kuba umo mu minwe yakwe. (Esek. 37:19) Pali lelo amabumba yonse yabili yabombela pamo, kabili yatungululwa ne Mfumu imo Yesu Kristu iyo Lesa alandilepo mu busesemo ukuti “umubomfi wandi Davidi.” (Esek. 37:24, 25) Uku ukwikatana uko balondolola mwi buuku lya kwa Esekiele kulamoneka sana cila mwaka ilyo abasubwa abashalapo ne “mpaanga shimbi” balongana pamo ku kwibukisha imfwa ya kwa Kristu! Nomba finshi twingacita pa kuti tutwalilile ukuba abaikatana?

10. Kuti twacita shani pa kuti fwe bantu ba kwa Lesa tutwalilile ukuba abaikatana?

¹⁰ Cimo ico twingacita icingalenga twatwalilila ukuba abaikatana na bantu ba kwa Lesa, kuba abaicefya. Ilyo Yesu ali pano isonde aebele abasambi bakwe ukuba abaicefya. (Mat. 23:12) Nga tuli abaicefya tatwakalekonkelela abantu ba muli ici calo abatemwa ukuibililika. Lelo tukalanakila abaletutungulula, kabili nga tulecita ifi tukekatana mu cilonganino. Ne cacindama sana ca kuti, nga tuli abaicefya Lesa akalasekelela pantu “acincintila aba matutumuko, lelo apeela icikuuku cakwe ku baicefya.”—1 Pet. 5:5.

11. Bushe ukutontonkanya pa fyo umukate no mwangashi fimininako kuti kwatwafwa shani ukutwalilila ukuba abaikatana?

¹¹ Ica bubili ico twingacita pa kuti tutwalilile  ukuba abaikatana, kulatontonkanya pa fyo ifimpashanya fya Cibukisho fimininako. Ilyo ubu bushiku ubwaibela bushilafika, kabili maka maka pali ubu bwine bushiku, tufwile ukutontonkanya sana pa bucindami bwa mukate uushatutumuka na pa mwangashi wa kashika. (1 Kor. 11:23-25) Umukate wimininako umubili wa kwa Yesu uwapwililika uo atuulile, kabili umwangashi wimininako umulopa wakwe uwasuumine. Lelo tatufwile ukwishiba fye ifyo ifimpashanya fimininako. Muleibukisha ukuti ilambo lya cilubula ilya kwa Kristu lilanga ifyo Yehova atutemwa nga nshi pa kutupeela Umwana wakwe, ne fyo Yesu atutemwa pa kuitemenwa ukutufwila. Ukutontonkanya pa fyo batutemwa kufwile ukulenga na ifwe twabatemwa. Na kabili ukutemwa uko ifwe na ba bwananyina twatemwa Yehova, kwaba kwati mwando uutukaka pamo kabili uulenga twaikatana sana.

12. Bushe Yesu alangile shani ifyo Yehova afwaya tuleelela bambi mu cilangililo alandile ica mfumu iyabelele uluse umusha?

¹² Icalenga butatu ico twingacita pa kuti tutwalilile ukuba abaikatana, kulaelela abantu bambi. Nga tulebelela uluse abatulufyanya, ninshi tulelanga ukuti tulatasha pa fyo icilubula ce lambo lya kwa Kristu calenga tuleelelwa imembu shesu. Natulande pa cilangililo cimo ico Yesu alandile icalembwa muli Mateo 18:23-34. Yipusheni amuti: ‘Bushe ndacita ifyo Yesu alandile? Bushe naliba uwatekanya ku ba bwananyina kabili nshaumina kumo? Bushe ndaitemenwa ukwelela abandufyanya?’ Kwena, ifilubo filapusapusana kabili ifilubo fimo filatwafya ukwelela uutulufyenye pantu tatwapwililika. Lelo ici cilangililo citusambilisha ifyo Yehova afwaya tulecita. (Belengeni Mateo 18:35.) Yesu alandile ukuti Yehova te kuti atubelele uluse nga ca kuti tatulebelela abatulufyenye uluse nga nabalapila. Bonse tulingile ukutontonkanyapo sana pali ifi! Nga tulebelela abatulufyenye uluse nga fintu Yesu atwebele, ninshi tulecita ifingalenga twatwalilila ukuba abaikatana.

13. Bushe ukulacita ifilanga ukuti tuli ba mutende kuti kwalenga shani twaikatana?

¹³ Nga tulebelela abantu uluse, ninshi tulanga ukuti tuli ba mutende. Umutumwa Paulo atufundile ukuti “Mule-esha nga nshi ukusungilila  ukwikatana uko umupashi wamupeela mu mutende uwikatanya.” (Efes. 4:3) Muli ino nshita ya Cibukisho muletontonkanya sana pa fyo mucita ku bantu. Kuti cawama ukucita ifi maka maka pa bushiku bwa Cibukisho. Muleyipusha amuti: ‘Bushe ifyo ncita filanga ukuti nshisunga ifilubo ku mukoshi? Bushe abantu banjishiba ukuti ndacita ifilenga twaba no mutende kabili twaba abaikatana?’ Aya e mepusho ayo tufwile ukulayipusha mu nshita ya Cibukisho.

14. Finshi tulingile ukucita pa kulanga ukuti ‘tulashipikishanya mu kutemwa’?

¹⁴ Inshila yalenga bune iyo twingalangilamo ukuti tufwaya twatwalilila ukuba abaikatana, kuba no kutemwa nga fintu Yehova, Lesa uwaba no kutemwa aba. (1 Yoh. 4:8) Tatufwile ukulalanda pa ba bwananyina atuti, “Nabatemenwa fye ico cine pantu ba bwananyina”! Ukutontonkanya kwa musango uyu kwalipusana ne fyo Paulo atufundile ukuti ‘tuleshipikishanya mu kutemwa.’ (Efes. 4:2) Paulo talandile fye ukuti tulingile ‘ukulashipikishanya,’ lelo alandile no kuti tufwile ukulashipikishanya “mu kutemwa.” Paliba ubupusano pa kushipikishanya fye na pa kushipikishanya mu kutemwa. Mu filonganino twaba mwaba abantu abalekanalekana abo Yehova akula. (Yoh. 6:44) Apo Yehova e wabakula, ninshi alibatemwa. Nomba mulandu nshi twingalandila ukuti tatulingile ukutemwa uwa bwananyina? Tufwile ukutemwa aba bwananyina nga fintu Yehova afwaya!—1 Yoh. 4:20, 21.

15. Cinshi calenga ukuti twishibe ukutila kukaba Icibukisho ca kulekeleshako?

¹⁵ Bushiku bumo kukaba Icibukisho ca kulekeleshako. Twaishiba shani? Muli kalata ya kubalilapo iyo Paulo alembeele abena Korinti, aebele Abena Kristu abasubwa ukuti nga baleibukisha imfwa ya kwa Yesu cila mwaka, ‘ninshi balebila imfwa ya kwa Shikulu, akasuke akese.’ (1 Kor. 11:26) Muli ili ilembo ishiwi lya kuti “akese” lilosha ku ‘kwisa’ kwa kwa Yesu uko Yesu umwine alandilepo mu busesemo ubulanda pa nshita ya ku mpela. Yesu alandile pa bucushi bukalamba ubuli no kwisa ati: “Icishibilo ca Mwana wa muntu cikamoneka mu muulu, e lyo ne mitundu yonse iya bantu pano isonde ikaloosha nga nshi, no kumona Umwana wa muntu aleisa pa makumbi ya mu muulu ali na maka no bukata ubukalamba. Kabili [Yesu] akatuma bamalaika bakwe ne ciunda icikalamba ice penga, kabili bakalonganika pamo abasalwa bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela imo iya mu muulu no kufika ku mpela ibiye.” (Mat. 24:29-31) Uku ‘ukulonganikwa kwa basalwa’ kulosha ku nshita ilyo Abena Kristu abasubwa abakaba abomi pano isonde bakapokelela icilambu cabo ku muulu. Ifi fikacitika ilyo ulubali lwa kubalilapo ulwa bucushi bukalamba lwapita, lelo ilyo inkondo ya Armagedone ishilatendeka. Lyena ba 144,000 bonse bakaba pamo na Yesu pa kucimfya ishamfumu sha pano isonde. (Ukus. 17:12-14) Icibukisho ico tukakwata ilyo abasubwa bashilalonganikwa ku muulu e cikaba ica kulekeleshako pantu ilyo bakalalonganikwa ninshi Yesu ‘aalisa.’

16. Mulandu nshi mulefwaila ukusangwa ku Cibukisho ca uno mwaka?

¹⁶ Bonse natubombeshe pa kuti tukasangwe ku Cibukisho pa 31 March 2018. Na kabili natulelomba Yehova ukuti aletwafwa ukulacita ifingalenga twatwalilila ukuba abaikatana na bantu bakwe! (Belengeni Amalumbo 133:1.) Muleibukisha ukuti bushiku bumo tukakwata Icibukisho ca kulekeleshako. Pali ino nshita natulebombesha pa kuti tukasangweko, kabili natulecita ifilanga ukuti twalitemwa ifyo tuba abaikatana pa Cibukisho.