INSHITA shimo baleyabomfya. Natulande pa ca kumwenako cimo. Pa Amalango 24:14, 15 patila: “Wilacenjesha uubombela amalipilo uuli mu bwafya kabili umupiina, abe wa muli bamunonko nelyo uwa mu balebeshi benu abali mu calo cenu . . . ukuti elilila kuli Yehova pa co wamucita, pantu nga caba ifi ninshi wabembuka.”

Kwali ifyacitike ifyakumine ili ifunde ifyalembelwe mu mwaka wa 600 ninshi Yesu talaisa pano isonde. Ifi ifyalembwa bafisangile mupepi no musumba wa Ashdode. Cimoneka kwati balembeleko umubomfi uwalebomba mwi bala uo baletunganya ukuti tatutiile ingano nge fyo bamwebele, balembele pa mutondo uwatobeka abati: “Ilyo umubomfi wenu apwishishe ukututila ingano inshiku fye ishinono ishapitapo, Hoshayahu umwana mwaume wa kwa Shobay alishile no kusenda ica kufwala ca mubomfi wenu. . . . Bonse abo nalebomba nabo mu kasuba bakasumina . . . ukuti ifi fine e fyo cali. Nshalufyenye nangu cimo. . . . Nga ca kuti mwe balashi mulemona kwati umubomfi wenu tabalingile ukumubwesesha ica kufwala, mumfwileniko uluse no kumubwesesha! Tamufwile ukwikala tondolo umubomfi wenu nga takwete ica kufwala.”

Kalemba wa lyashi lya kale Simon Schama alandile pa fyo uyu mwanakashi alepapaata, atile: ‘Ifyo alembele tafilanga fye ukuti alefwaisha ukuti bamubweseshe ica kufwala. Lelo filanga no kuti uwalepapaata alishibe amafunde ya mu baibolo, maka maka ayaba mu Ubwina Lebi na mu Amalango ayalanda pa kukanafyenga abapiina.’