Bamo intambi balekonka ilyo balekula shalelenga balemona abanakashi ukuti tabacindama. Ku ca kumwenako, ba Hans, bakangalila ba muputule ku Bolivia, batile: “Abaume bamo balakula ne cilumba pantu babasambilisha ukuti balicindama ukucila abanakashi, neci cilenga belacindika abanakashi.” Ba Shengxian, baeluda aba ku Taiwan, batile: “Uko nakulile, abaume abengi bamona ukuti abanakashi tabafwile ukubapandako amano. Umwaume nga alanda pa fyo umwanakashi amupandileko amano, abaume banankwe balamusula.” Kwaliba na fimbi ifyo abaume bacita ifilanga ukuti tabacindika abanakashi. Ku ca kumwenako, kuti balanda ifya kusekesha pa banakashi ifilelanga ukuti tababacindika.

Icawamako ca kuti, te mulandu ne ntambi umwaume alekonka ilyo alekula, kuti ayaluka no kulamona abanakashi ukuti balicindama. Kuti asambilila ukuti abaume tabacindamapo pa banakashi. (Efes. 4:​22-24) Kuti bacite fi nga ca kuti balepashanya ifyo Yehova acita. Muli cino cipande twalasambilila ifyo Yehova amona abanakashi, ifyo ba munyinefwe bengasambilila ukulamona abanakashi nge fyo Yehova abamona, e lyo ne fyo baeluda bengabalilapo ukulalanga ukuti balicindika abanakashi.

BUSHE YEHOVA AMONA SHANI ABANAKASHI?

Kuti twalamona abanakashi nge fyo Yehova abamona. Yehova ni Shifwe wa luse uwatemwa abana bakwe bonse. (Yoh. 3:16) Kabili bankashi aba cishinka baba kwati bana abanakashi kuli ena. Natulandeko pali fimo ifilanga ukuti Yehova alitemwa abanakashi, kabili alibacindika.

Alaba no mulinganya kuli bena. Yehova abumbile abaume na banakashi mu cipasho cakwe.  (Ukute. 1:27) Tapangile abaume ukuba sana na mano nelyo ukwishiba sana ifya kubomba imilimo ukucila abanakashi, kabili tatemwapo sana abaume ukucila abanakashi. (2 Imila. 19:7) Apangile abume na banakashi ukuti baleumfwikisha icine caba mu Baibo, no kulapashanya imibele yakwe. Yehova alicindika abaume na banakashi abamutetekela. Kabili bonse abaume na banakashi alibapeela isubilo lya kwikala umuyayaya pano isonde, nelyo ukuba ishamfumu kabili bashimapepo ku muulu. (2 Pet. 1:1) Ici calanga fye ukuti Yehova taba na kapatulula ku banakashi.

Alakutika kuli bena. Yehova alibika sana amano ku fyo abanakashi bomfwa e lyo na ku mafya bakwata. Ku ca kumwenako, Yehova alikutike kabili alyaswike amapepo ayo Rakele na Ana bapepele. (Ukute. 30:22; 1 Sam. 1:​10, 11, 19, 20) Na kabili, Yehova alilenga abaume abalembele Baibo ukulemba amalyashi aya baume abakutike ku banakashi. Ku ca kumwenako, Abrahamu alikonkele ifyo Yehova amwebele ukuti akutike kuli Sara umukashi wakwe. (Ukute. 21:​12-14) Imfumu David yalikutike kuli Abigaili. Na kuba amwene ukuti ni Yehova e wamutumine ukuti alande nankwe. (1 Sam. 25:​32-35) Yesu uupashanya bwino imibele ya kwa Wishi, alekutika kuli Maria, nyina. (Yoh. 2:​3-10) Ifi fyonse twalandapo fyalangilila ukuti Yehova alakutika ku banakashi pa kulanga ukuti alabacindika.

Alabacetekela. Ku ca kumwenako, Yehova alicetekele ukuti Efa ali no kwafwilishako ukusunga bwino isonde. (Ukute. 1:28) Ifi Yehova amupeele uyu mulimo tafyalelanga ukuti tacindeme ku mulume wakwe Adamu, lelo fyalelanga ukuti ali ni kaafwa wakwe. Yehova na kabili alicetekele kasesema mwanakashi Debora na Hulda pa kubapeela umulimo wa kupandako amano abantu, ukubikako no mupingushi e lyo ne mfumu. (Abapi. 4:​4-9; 2 Isha. 22:​14-20) Muno nshiku namo, Yehova alipeela abanakashi Abena Kristu ukulabomba umulimo wakwe. Aba bankashi aba cishinka balaba ni bakasabankanya, bapainiya, kabili ba bamishonari. Balafwilishako umulimo wa kupanga, ukukuula e lyo no kuwamya Amayanda ya Bufumu na ma Bethel. Bamo babombela pa Bethel e lyo bambi babombela pa maofeshi ya bakapilibula. Baba kwati libumba ilikalamba ilya bashilika abo Yehova abomfya pa kucita ukufwaya kwakwe. (Amalu. 68:11) Ukwabula no kutwishika Yehova tamona abanakashi ukuti tabacindama.

IFYO BA MUNYINEFWE BENGASAMBILILA UKULAMONA ABANAKASHI NGE FYO YEHOVA ABAMONA

Ba munyinefwe, pa kuti mwishibe nga mumona bankashi nge fyo Yehova abamona, mulingile ukumona ifyo mutontonkanya pali bena e lyo ne fyo mucita. Nomba pa kuti tucite fi, kufwile kwaba bamo abakutwafwa. Nga filya fine mashini ya X-ray imona ubwafya umuntu akwete ku mutima, cibusa wesu umusuma e lyo ne cebo ca kwa Lesa kuti fyatwafwa ukwishiba nga ca kuti tulatontonkanya ifyabipa pa banakashi. Finshi twingacita pa kuti cibusa umusuma e lyo ne cebo ca kwa Lesa filetwafwa?

Kuti mwaipusha cibusa wenu. (Amapi. 18:17) Kuti mwaipushako cibusa wenu uo mwacetekela kabili uwa cikuuku ifipusho pamo nge fi: “Bushe imona shani bankashi? Bushe kuti batila nalibacindika? Bushe kuli ifyo ningacita pa kuti ndeumfwana bwino na bena?” Cibusa wenu nga amweba umo mulingile ukuwamyako, tamufwile ukufulwa nelyo ukulaipokolola. Lelo muleitemenwa ukwaluka.

Muleisambilisha icebo ca kwa Lesa. Cimo ico twingacita pa kuti twishibe ifyo tumona bankashi, kulaisambilisha icebo ca kwa Lesa. (Heb. 4:12) Ilyo tulebenga Baibo, tulasambilila pa baume abalecindika abanakashi e lyo na baume abashalecindika abanakashi. Kanshi kuti twalinganya ifyo balecita ku fyo tucita. Na kabili ukubelenga Amalembo ayengi ayalanda pa fyo tulingile ukumona abanakashi, kuti kwalenga abaume ukukanalabomfya Amalembo bubi bubi nga ca kuti tabacindika abanakashi. Ku ca kumwenako, ukulingana na mashiwi yaba pali 1 Petro 3:​7, abalume balingile ‘ukucindika abakashi babo nge cipe icanaka.’ b Bushe ici cilepilibula ukuti abanakashi  tabacindama, e kuti tabakwata sana amano nelyo tabaishibisha ifya kubomba imilimo nga baume? Awe nakalya! Linganyeni amashiwi Petro alandile ku mashiwi yaba pa Abena Galatia 3:​26-29, ayalangilila ifyo Yehova asalile abanakashi e lyo na baume ukuteka pamo na Yesu ku muulu. Nga tuleisambilisha Icebo ca kwa Lesa kabili tuleipushako na cibusa umusuma pa fyo tumona abanakashi, kuti twasambilila ukulacindika bankashi abo twabo nabo.

BUSHE BAELUDA BALANGA SHANI UKUTI BALICINDIKA BANKASHI?

Ba muyinefwe kuti basambilila ukulacindika bankashi mu cilonganino nga balemona ifyo baeluda bacita. Finshi baeluda bengacita pa kuti balebalilapo ukulacindika abanakashi? Natulandeko pali fimo.

Balatasha bankashi. Baeluda kuti bapashanya ifyo Paulo alecita pa kucindika abanakashi. Alitashishe abanakashi pa cintubwingi muli kalata alembeele icilonganino cali mu Roma. (Rom. 16:12) Elenganyeni ifyo aba bankashi baumfwile ilyo babelengele kalata umutumwa Paulo alembele ku cilonganino. Ifi fine e fyo na baeluda bacita muno nshiku, balatasha bankashi pa mibele yabo iisuma e lyo na pa fyo babombela Yehova. Ici cilalenga bankashi ukwishiba ukuti aba mu cilonganino balibacindika, kabili balatasha pa fyo babombesha. Amashiwi ya kukoselesha ayo eluda engeba nkashi, nalimo e mashiwi alekabila pa kutwalilila ukubombela Yehova ne cishinka.—Amapi. 15:23.

Baeluda nga baletasha bankashi, balabeba no mulandu balebatashisha. Mulandu nshi bacitila ifi? Bankashi Jessica batile: “Cilomfwika bwino bamuyina nga batasha nkashi ukuti mwabomba bwino. Nomba cilacilapo ukuwama nga balanda mu kulungatika ifyo tulecitamo bwino. Ku ca kumwenako, kuti batutasha pa fyo tusambilisha bwino abana pa kuti belapanga icongo ilyo tuli pa  kulongana, nelyo Ifyo tubombesha ukuyasenda umusambi wa Baibo pa kuti aleisa mu kulongana.” Baeluda nga batasha bankashi mu kulungatika, balalenga baleumfwa ukuti balicindama mu cilonganino.

Balakutika kuli bankashi. Baeluda abaicefya, balebukisha ukuti tebaishiba fye ifya kupingula bwino pa fintu. Baeluda ababa ifi, balebako na bankashi ukuti ba bapandeko amano kabili balakutikisha ilyo bankashi balelanda. Baeluda nga balecita ifi, balakoselesha bankashi kabili na bene balanonkelamo. Banonkelamo shani? Ba Gerardo, baeluda ababombela pa Bethel, batile: “Nasanga ukuti ukwipushako bankashi ukuti balandepo nabo ifyo baletontonkanya pa mulimo tulebomba kulalenga ndebomba bwino. Ilingi balabomba imilimo imo pa nshita iitali ukucila bamunyina.” Mu cilonganino, bankashi abengi ni bapainiya ba nshita yonse, kanshi baleshiba ifingi pa bantu ababa mu cifulo icilonganino cibilamo imbila nsuma. Munyinefwe Bryan, eluda, atile: “Bankashi kuti babomba imilimo iingi mu cilonganino. Kanshi mulesambililako kuli bena!”

Baeluda ababomba bwino tabangufyanya ukukaana ifyo bankashi balebeba. Mulandu nshi? Ba Edward, baeluda, batile: “Nkashi nga alanda ifyo aletontonkanya, kuti fyalenga baeluda baumfwikisha umulandu, kabili kuti fyalenga baba ne cikuuku.” (Amapi. 1:5) Nangu ca kuti eluda tekuti abomfye fyonse ifyo nkashi acilanda, kuti amutasha pa mano yakwe.

Balasambilisha bankashi imilimo. Baeluda abeluka balasangako inshita ya kusambilishako bankashi imilimo. Ku ca kumwenako, baeluda balasambilisha bankashi ifya kutungulula ukukumana kwa kuya mu kubila imbila nsuma nga ca kuti muyinefwe uwabatishiwa talipo. Kuti babasambilisha ne fya kubomfya ifibombelo fimo nelyo fimashini pa kuti balebombako umilimo wa kuwamya no kukuula ifikuulwa fya kupepelamo. Pa Bethel, bakangalila ba ma departmenti balasambilisha bankashi imilimo iyalekanalekana, pamo nge fya kuwamya ifintu, ifya kushita ifintu, ifya ndalama, ifya ma kompyuta, e lyo ne milimo imbi. Baeluda nga balesambilisha bankashi imilimo, ninshi balelanga ukuti babamona ukuti balifikapo kabili kuti balibacetekela.

Bankashi abengi balabomfya ifyo babasambilishe kuli baeluda pa kwafwa abantu bambi. Ku ca kumwenako, bankashi bamo balabomfya ifyo babasambilishe mu mulimo wa makuule ukwafwa abaponenwe na masanso ayakalamba ukukuula cipya cipya amayanda yabo. Bankashi bamo balabomfya ifyo babasambilishe mu mulimo wa kubila ku cintubwingi ilyo balesambilisha bankashi abengi ukubomba uyu mulimo. Finshi bankashi bamo balanda pali baeluda ababasambilishe imilimo? Bankashi Jennifer batile: “Ilyo twalekuula Ing’anda ya Bufumu imo, abaleangalila umulimo balesangako inshita ya kunsambilisha ifya kubomba imilimo. Balemona ifyo nalebomba bwino kabili balentasha. Nalitemenwe sana ukubomba na uyu munyina pantu naleumfwa ukuti nalicindama kabili alincetekela.”

UBUSUMA BWABA MUKUMONA BANKASHI UKUTI LUPWA LWESU

Twalitemwa bankashi nge fyo Yehova abatemwa! Kanshi tubamona fye ukuti ni balupwa lwesu. (1 Tim. 5:​1, 2) Tulatemwa ukubombela pamo na bena. Kabili tulatemwa nga baishiba ukuti twalibatemwa kabili tulabatungilila. Bankashi Vanessa batile: “Ndatasha sana Yehova ifi naba mu cilonganino cakwe umwaba bamunyinefwe abankoselesha sana.” Bankashi ba ku Taiwan batile: “Ndatasha sana Yehova ifi aba mu cilonganino batucindika e lyo ne fyo bacindika ifyo tumfwa. Ici cilakosha sana icitetekelo candi kabili cilalenga ndetasha sana pe shuko nakwata ilya kuba mu cilonganino cakwe.”

Yehova afwile alomfwa bwino nga amona bamunyinefwe balebombesha apo bengapesha ukulamona abanakashi nge fyo abamona! (Amapi. 27:11) Ba Benjamin, baeluda aba ku Scotland , batile: “Abantu muli cino calo tabacindika abanakashi, kanshi tufwaya abanakashi nga baisa ku Ing’anda ya Bufumu balemona ukuti twalibacindika kabili twalibatemwa.” Kanshi natulecindika no kutemwa abanakashi nge fyo Yehova abamona.—Rom. 12:10.