1-2. Mafya nshi ayo ababomfi ba kwa Yehova bakwata?

 UBUMI kuti bwa-aluka nga twakwata amafya ukwabula ukwenekela. Ku ca kumwenako, munyinefwe Luis a balimusangile na kansa iishaseeka. Badokota bamwebele ukuti pali no kupita fye imyeshi inono ninshi afwa. Ba Monika na bena mwabo balebombela Yehova pamo. Lyena bushiku bumo, ba Monika baishileishiba ukuti abena mwabo abali baeluda, balebembuka mu bumfisolo pa myaka iingi. Ba Olivia bankashi abashimbe balibebele ukufuma mu ng’anda, pantu kwali no kuba icikuuku ca mwela icikalamba. Ilyo babwelele, basangile ukuti icikuuku ca mwela calionaula ing’anda. Ukwabula ukwenekela, ubumi bwaba Luis, ba Monika na ba Olivia bwalyalwike. Bushe kwaliba ifya mucitikilapo ukwabula ukwenekela ifyalengele ubumi bwenu bwaluke?

² Nangu ca kuti tuli babomfi ba kwa Yehova, tulakwata amafya, kabili tulalwala nge fyo ciba ku bantu bonse. Tufwile no kushipikisha ukutukaanya nelyo ukutucusha ku bantu abapata abantu ba kwa Lesa. Nangu ca kuti Yehova tatucingilila kuli aya mafya, alitulaya ukutila akulatwafwa. (Esa. 41:10) Yehova nga atwafwa kuti twatwalilila ukulasekelela, kuti twalasalapo bwino ifya kucita, kabili kuti twatwalilila ukuba aba cishinka kuli ena nangu ifintu fya fye shani. Muli cino cipande twalasambilila  pa fintu 4 ifyo Yehova abomfya pa kutwafwa ilyo ifyabipa fyatucitikila. Kabili twalasambilila na pa fyo tufwile ukucita pa kuti tunonkelemo mu fyo atwafwilisha.

YEHOVA AKAMUCINGILILA

3. Finshi ifingatukosela ukucita nga tuli na mafya?

³ Ubwafya. Ilyo tuli na mafya cilakosa ukutontonkanya bwino e lyo no kusalapo bwino ifya kucita. Mulandu nshi twalandila ifi? Limo cilatukalipa sana pa mulandu wa kuti tulomfwa sana ububi kabili tulasakamana sana. Cilatupesha sana amano ica kuti tatwishiba ne fya kucita. Moneni ifyo bankashi babili abo tulandilepo baumfwile ilyo bali na mafya. Ba Olivia batile: “Ilyo icikuuku ca mwela caonawile ing’anda yandi, ala calimputwile umusana kabili nshaishibe ne fya kucita.” Ilyo ba Monika balelanda pa fyo abalume babo bacitile, batile: “Nalyumfwile sana ububi ica kuti naleumfwa kwati kwali uwalendasa ku mutima. Nalefilwa fye no kucita icili conse. Nshatontonkenyepo ukutila ifi kuti fyancitikila.” Finshi Yehova atulaya ukutucitila nga tuli na mafya?

4. Ukulingana na mashiwi yaba pa Abena Filipi 4:​6, 7, finshi Yehova atulaya?

⁴ Ifyo Yehova atucitila. Alitulaya ukutupeela ico Baibo ita ukuti “umutende wa kwa Lesa.”(Belengeni Abena Filipi 4:​6, 7.) Uyu mutende untu tukwata pa mulandu wa kuti tuli fibusa sana na Yehova. ‘Walicila amatontonkanyo yonse,’ kabili uusuma nga nshi ukucila ne fyo twingelenganya. Ku ca kumwenako, bushe mwalibala amupepapo kuli Yehova e lyo pa numa ya kupepa mwaleka ukusakamana. Ifyo mwaumfwile, e “mutende wa kwa Lesa.”

5. Bushe umutende wa kwa Lesa uulinda shani amatontonkanyo yesu ne mitima yesu?

⁵ Ilembo limo line litila umutende wa kwa Lesa “ukalinda” nelyo ukucingilila “imitima yenu na matontonkanyo yenu.” Ishiwi ilyo bapilibula “ukulinda,” balelibomfya na lintu balelanda pa bashilika abalecingilila umusumba pa kuti beusansa. Abaleikala muli ulya musumba balelaala na ku matwi tondolo pantu baleishiba ukuti pa mpongolo pali abashilika abalebalinda. Ifi fine e fyo ciba na lintu umutende wa kwa Lesa ulelinda imitima yesu na matontonkanyo yesu. Tulaleka ukusakamikwa kabili tulomfwa ukuti natucingililwa. (Amalu. 4:8) Nga filya fine cali kuli Hana nangu ca kuti ifintu te kuti fyaluke apopene, kuti twakwata umutende. (1 Sam. 1:​10-18) Kabili nga twaleka ukusakamana, cilanguka ukutontonkanya bwino no kusalapo bwino ifya kucita.

6. Finshi tufwile ukucita pa kuti tunonkelemo mu mutende wa kwa Lesa? (Moneni ne cikope.)

⁶ Ifyo tufwile ukucita. Ilyo muli na mafya  muleita ‘abakumulinda.’ Kuti mwacita shani ifyo? Mulepepa kuli Lesa mpaka mwaumfwa umutende wa kumulinda. (Luka 11:9; 1 Tes. 5:17) Ba Luis abo tulandilepo kale, balilondolwele ifyo bena na bena mwabo ba Anna batwalilile ukushipikisha lintu baishibe ukuti bashele fye ne myeshi inono ninshi bafwa. Batile: “Ifintu nga fili ifi tacanguka ukusalapo bwino ifya kutundapa e lyo ne fintu fimbi. Lelo twaleba no mutende muli iyi nshita iya-afya pa mulandu wa kuti twalepepa.” Ba Luis na bena mwabo batile balepepa sana kuli Yehova, kabili balemulomba ukuti alebapeela umutende, umutima uwatekanya na mano ya kusalapo bwino ifya kucita. Kabili balyumfwile ukuti Yehova alebafwa. Nga na mukwata amafya mulepepa sana kuli Yehova, Kabili Yehova akamupeela umutende uukalinda umutima wenu e lyo na matontonkanyo yenu.—Rom. 12:12.

YEHOVA AKAMWIKASHA

7. Kuti twaumfwa shani nga twakwata amafya ayakalamba?

⁷ Ubwafya. Ilyo tuli na mafya ifyo tumfwa, ifyo tutontonkanya e lyo ne fyo tucita, filapusana sana ne fyo twaba ilyo tushikwete amafya. Nga filya fine ubwato busensenunwa na mabimbi ayakalamba, e fyo tumfwa nga tuli na mafya. Ba Anna abo tulandilepo baleumfwa sana ububi ilyo ba Luis bafwile. Batile: “Inshita shimo nalelwala amasakamika kabili naleililila ubulanda. Naleumfwa ububi ifi abena mwandi bafwile.” Na kabili ba Anna baletalalilwa sana kabili baleumfwa ububi ukubomba umulimo uo ba Luis balebomba bwino e kutila ukulasalapo ifya kucita. Inshita shimo baleumfwa kwati bali pa mumana apali icikuuku ca mwela. Bushe Yehova atwafwa shani nga twatendeka ukumfwa ifi?

8. Nga fintu tubelenga pali 1 Petro 5:​10, finshi Yehova atulaya?

⁸ Ifyo Yehova acita. Alitulaya ukuti akatwikasha. (Belengeni 1 Petro 5:10.) Pa mumana nga pali amabimbi ayakalamba ubwato bulasunkana sana. Ubwato nga bwacilamo ukusunkana kulaba fimo ififuma mu mbali ifilenga bwilasunkana sana. Ne ci cilenga abaninine muli ubo bwato ukucingililwa. Nomba ifilenga ubwato ukukaanasunkana filabomba bwino ubwato nga bwatwalilila ukwenda. Ifi fine e fyo na Yehova akacita kuli ifwe nga twatwalilila ukumubombela ne cishinka ilyo tuli na amafya.

9. Bushe impapulo ishitwafwa ukusanga ifyebo, kuti shalenga shani twaleka ukusakamana? (Moneni ne cikope.)

⁹ Ifyo tufwile ukucita. Nga namukwata amafya ayakalamba, muleesha na maka yenu yonse ukutwalilila ukucita ifya kwa Lesa. Cine  ukuti nalimo te kuti mukumanishe ukucita fyonse ifyo mwalecita kale. Na lyo line, muleibukisha ukuti Yehova aleshiba amafya mukwete. (Linganyeniko Luka 21:​1-4) Mulesangako inshita ya kuisambilisha Baibo no kulatontonkanya pa fyo muleisambilisha. Mulandu nshi twalandila ifi? Yehova Lesa abomfya icilonganino cakwe, pa kutupeela impapulo na amavidio ifitwafwa ukukanalasakamikwa sana nga tuli na mafya. Nga mulefwaya ukusanga fimo kuti mwabomfya Impapulo isho tubomfya pa kusanga ifyebo ishaba mu lulimi lwenu pamo nga, JW Library^®, Icisontelelo ca Mpapulo sha Watch Tower, na Icitabo ca Kwafwa Inte sha kwa Yehova Ukusanga Ifyebo. Ba Monika abo tulandilepo batile, balebomfya impapulo ishitwafwa ukusanga ifyebo, nga balefwaya ukwishiba ifya kucita pa kuti baleke ukusakamana pa bwafya bakwete. Ku ca kumwenako, balefwailapo ifyebo ifilanda pa “bukali.” Lyena inshita shimo balefwaya ifyebo ifilanda pali “bucishinka” e lyo no kukaanaba “uwa cishinka.” Balebelenga ifi fyebo mpaka batendeka ukumfwako bwino. Batile: “Ilyo natendeke ukubelenga nalesakamana sana. Nomba ilyo natwalilile ukulabelenga ifyebo, nalishilemona ifyo Yehova ambikileko amano. Naishileishiba ukuti Yehova aleishiba ifyo naleumfwa kabili alengafwa.” Na imwe bene Yehova kuti amwafwa ukubomfya ifyebo fiba mu mpapulo mpaka mwaleka ukusakamikwa.—Amalu. 119:​143, 144.

YEHOVA AKAMUTUNGILILA

10. Kuti twalaumfwa shani nga kwacitika ubwafya ubukalamba?

¹⁰ Ubwafya. Nga ca kuti kwacitika ubwafya, ubukalamba kulaba inshita shimo, ilyo tushikwata amaka ya kucita ifili fyonse. Kuti twaumfwa kwati muntu uwalebutuka sana ulubilo lwa ku cimfyanya lelo nomba uusunta pa kwenda. Kuti twalafilwa no kubomba imilimo iyo twalebomba, nelyo kuti twaleka ukutemwa ukulafwaya ukucita ifyo twalecita kale. Kuti twaumfwa nge fyo Eliya aumfwile uwalefwaya fye ukutwalilila ukulala. (1 Isha. 19:​5-7) Finshi Yehova atulaya ukutucitila nga tatukwete amaka?

11. Ni nshila nshi imbi Yehova atwafwilamo? (Amalumbo 94:18)

¹¹ Ifyo Yeova acita. Alitulaya ukuti akulatutungilila. (Belengeni Amalumbo 94:18.) Nga filya fine uubutuka engafwaya ukuti bamwafwe pa kuti atendeke ukwenda, na ifwe bene tulafwaya Yehova ukulatutungilila pa kuti tutwalilile ukumubombela.  Nga kwacitika ubwafya ubukalamba Yehova atulaya ukuti: “Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’” (Esa. 41:13) Yehova alyafwilepo imfumu Davidi ilyo yali na mafya kabili abalwani baiko balefwaya ukuipaya. Yaebele Yehova aiti: “Ukuboko kwenu ukwa ku kulyo kukankosha.” (Amalu. 18:35) Nomba bushe Yehova atutungilila shani?

12. Ni bani abo Yehova engabomfya pa kutwafwa ilyo tushikwete amaka?

¹² Yehova ilingi alalenga abantu bambi ukutwafwa pa kututungilila. Ku ca kumwenako, inshita imo ilyo Davidi ashakwete amaka, cibusa wakwe Yonatani alimutandalile kabili alimukoseshe. (1 Sam. 23:​16, 17) Na kabili Yehova asalile Elisha ukuti alekoselesha Eliya. (1 Isha. 19:​16, 21; 2 Isha. 2:2) Muno nshiku, Yehova kuti abomfya ba lupwa nelyo baeluda pa kututungilila. Na lyo line, ilyo tuli no bwafya tufwaya fye ukuba fweka, tatufwaya ukuba na bantu. Kwena fwe bengi ifi fine e fyo tumfwa. Finshi twingacita pa kuti Yehova atutungilile?

13. Cinshi tulingile ukucita pa kuti tulenonkelamo mu fyo Yehova atutungilila? (Moneni ne cikope.)

¹³ Ifyo tulingile ukucita. Mwilaba mweka. Nga natukwata ubwafya e lyo tuli fweka, ilingi tutendeka fye ukutontonkanya pa bwafya tukwete. Ukucite fi kuti kwalenga twafilwa ukusalapo bwino ifya kucita. (Amapi. 18:1) Kwena bonse fye tulafwaya inshita yakuba fweka maka maka nga nakucitika ifyabipa. Nga tuleba fweka pa nshita iitali kuti tulekaana ukuba na bantu abo Yehova alebomfya ukuti atutungilile. Kanshi nangu mukwate amafya ayakalamba muleleka balupwa lwenu, ifibusa e lyo na baeluda ukulamwafwa. Mulebamona ukuti ni Yehova alebabomfya ukumutungilila.—Amapi. 17:17; Esa. 32:​1, 2.

YEHOVA AKAMUSANSAMUSHA

14. Mafya nshi ayengatutiinya ayo twingakwata?

¹⁴ Ubwafya. Kulaba inshita shimo ilyo tumfwa sana umwenso. Baibo yalilanda pa babomfi ba kwa Lesa aba cishinka abali na mafya kabili abaletiina pa mulandu wa balwani babo nelyo amafya. (Amalu. 18:4; 55:​1, 5) Na ifwe bene kuti balatucusha ku sukulu, pa ncito, kuli balupwa wesu, nelyo ku buteko. Nalimo kuti tuli no mwenso wa kuti twalafwa pa mulandu wa bulwele tulwele. Ilyo ifi filecitika kuti twalaumfwa kwati mwana ushikwete wa kumwafwa. Bushe Yehova atwafwa shani ifi nga fyacitika?

15. Finshi Yehova atulaya pa Amalumbo 94:19?

 ¹⁵ Ifyo Yehova acita. Alatusansamusha. (Belengeni Amalumbo 94:19.) Aya mashiwi yaba pa Amalumbo yalalenga twatontonkanya pa mwana umunono uuli no mwenso, kabili uufililwe ukulala pa mulandu no kubyata kwa nkuba. Kuti twaelenganya uko bawishi baisa mukumufukatila mpaka alala. Nangu ca kuti inkuba tashilekele, filya ba wishi bamufukatile fyalenga aumfwa ukuti nacingililwa. Nga twakwata amafya ayaletutiinya, Na ifwe tulakabila Shifwe wa ku muulu ukutufukatila mu mampalanya mpaka amafya yapwa. Kuti twacita shani pa kuti Yehova aletusansamusha?

16. Finshi twingacita pa kuti Yehova aletusansamusha? (Moneni ne cikope.)

¹⁶ Ifyo tulingile ukucita. Muleba pamo na Yehova inshita iikalamba ukupitila mu kupepa kuli ena no kubelenga Icebo cakwe. (Amalu. 77:​1, 12-14) Nga ca kuti mulecita ifi lyonse, ilyo mukakwata amafya ico mukabalilapo ukucita kuya kuli Yehova ukuti amwafwe. Mule-eba Yehova ifilemutiinya e lyo ne filemusakamika. Muleleka alelanda na imwe no kumusansamusha ukubomfya Amalembo. (Amalu. 119:28) Mukasanga ukuti ilyashi limo ilya mu Baibo kuti lya musansamusha nga muletiina. Ku ca kumwenako, nalimo amashiwi ayaba mwi buuku lya kwa Yobo, Amalumbo, Amapinda nelyo amashiwi Yesu alandile muli Mateo icipandwa 6, kuti yamukoselesha. Nga mulepepa kuli Yehova no kubelenga Icebo cakwe, mukomfwa ukuti alemusansamusha.

17. Finshi twingacetekela?

¹⁷ Kuti twacetekela ukutila Yehova akulaba na ifwe mu nshita ya mafya. Takatulekeleshe. (Amalu. 23:4; 94:14) Yehova alitulaya ukutucingilila, ukutwikasha, ukututungilila e lyo no kutusansamusha. Esaya 26:3 ilanda pali Yehova ukuti: “Mukabacingilila no mutende wa pe, pantu ni mwe batetekela.” Kanshi mulecetekela Yehova kabili muleleka alemwafwa ilyo muli na mafya. Nga mulecita ifi mukaba na maka ilyo mukwete amafya.