1. Mulandu nshi cacindamina ukulasangwa ku Cibukisho ca mfwa ya kwa Kristu cila mwaka?

 UKWABULA no kutwishika, icilubula bupe ubusuma sana ubo Yehova atupeela! (2 Kor. 9:15) Pa mulandu wa kuti Yesu alimufwilile, kuti mwaba cibusa wa kwa Yehova Lesa. Kabili kuti mwaba ne subilo lya kwikala umuyayaya. Kanshi tufwile ukulatasha pa cilubula no kulatasha Yehova uwalangile ukuti alitutemwa pa kutupeela icilubula! (Rom. 5:8) Yesu alitendeke Icibukisho ca mfwa yakwe pa kuti tuletasha pa fyo atucitiile.—Luka 22:​19, 20.

 2. Finshi twalasambilila muli cino cipande?

² Uno mwaka, Icibukisho cikabako pa Cibelushi, pa 12 April, 2025. Ukwabula no kutwishika, bonse tulefwaisha ukusangwako. Tukanonkelamo sana nga ca kuti imilungu imo ilyo kushilaba Icibukisho na pa numa ya Cibukisho, tukaletontonkanya sana pa fyo Yehova no Mwana wakwe batucitila. Muli cino cipande twalasambilila ifyo icilubula citusambilisha pali Yehova na pa Mwana wakwe. Mu cipande icikonkelepo, tukasambilila ifyo tunonkelamo mu cilubula e lyo ne fyo twingalanga ukuti tulatasha pa cilubula.

IFYO ICILUBULA CITUSAMBILISHA PALI YEHOVA

 3. Bushe imfwa ya muntu umo kuti yalenga shani abantu abengi nga nshi balubulwa? (Moneni ne cikope.)

³ Icilubula cilatusambilisha ukuti Yehova wa mulinganya. (Amala. 32:4) Mulandu nshi twalandila ifi? Tontonkanyeni pali  ifi: Twalipyana ulubembu ululenga tulefwa pa mulandu wa kuti Adamu taumfwilile Yehova. (Rom. 5:12) Pa kuti Yehova atulubule ku lubembu ne mfwa, alipekenye ukuti Yesu atufwile. Nomba bushe imfwa ya muntu umo uwapwililika kuti yalubula shani abantu abengi nga nshi ku lubembu ne mfwa? Umutumwa Paulo alondolwele ati: “Pantu filya fine bucintomfwa bwa muntu umo [Adamu] bwalengele abantu abengi baba ababembu, e fyo ne cumfwila ca muntu umo [Yesu] cikalenga abantu abengi bakabe abalungama.” (Rom. 5:19; 1 Tim. 2:6) Kanshi ukukanaba ne cumfwila kwa muntu umo uwapwililika e kwalengele tube ababembu kabili tulefwa. E ico pa kuti Yehova atulubule ku lubembu ne mfwa, abomfeshe umuntu umo uwapwililika uwali ne cumfwila.

 4. Mulandu nshi Yehova ashalekele fye ukuti abana ba kwa Adamu abali ne cumfwila bekale umuyayaya?

⁴ Bushe Yesu alingile fye ukufwa pa kuti atulubule? Bushe Yehova nga talekele fye abana ba kwa Adamu abali ne cumfwila baikala umuyayaya? Fwe bantunse abashapwililika nalimo kuti twamona ukuti ukucita ifi nga kwali fye bwino kabili nga kwalipwishishe ubwafya. Lelo nga twatontonkanya ifi, ninshi twalaba ukuti Yehova wa mulinganya. Pa mulandu wa kuti Yehova wa mulinganya, tali no kulabako fye kuli filya Adamu akeene ukumumfwila.

 5. Mulandu nshi twingacetekelela ukuti Yehova lyonse alacita icalungama?

⁵ Nomba cali no kuba shani nga ca kuti Yehova tatupeele icilubula, lelo asuulako fye ku fyo Adamu alufyenye no kuleka abana bakwe abashapwililika batwalilila ukwikala umuyayaya? Abantu kuti batendeka ukumona ukuti Yehova takonka amafunde yakwe ayalanda pa calungama ne cabipa. Kabili kuti balatwishika nga akafikilisha ne fyo atulaya ku ntanshi. Ku ca kumwenako, kuti batendeka ukutwishika ukuti nalimo takacite fyonse ifyo atulaya. Tatulingile ukulatontonkanya ukuti ifya musango uyu kuti fyacitika. Apo Yehova alicitile icalungama pa kuipeelesha ukutuula Umwana wakwe uo atemwisha, cilenga twacetekela ukuti lyonse akulacita icalungama.

 6. Bushe icilubula cilanga shani ifyo Yehova atutemwa? (1 Yohane 4:​9, 10)

⁶ Icilubula cilalenga twaishiba ukuti Yehova wa mulinganya, kabili cilalenga twaishiba no kuti alitutemwa sana. (Yoh. 3:16; belengeni 1 Yohane 4:​9, 10.) Ifyo tusambilila pa cilubula filenga twaishiba ukuti Yehova afwaya ukuti tukekale umuyayaya, kabili afwaya twaba na mu lupwa lwakwe. Tontonkanyeni pali ici: Ilyo Adamu abembwike, Yehova alimutamfishe mu lupwa lwakwe ulwa bamupepa. Ici calenga bonse twilafyalilwa mu lupwa lwa kwa Lesa. Lelo pa mulandu ne cilubula, Yehova alatwelela  imembu shesu kabili ku ntanshi ali no kuleta mu lupwa lwakwe abantu bonse ababa ne citetekelo kabili abamumfwila. Na pali ino ine nshita, kuti twaba ifibusa na Yehova na Bena Kristu banensu. Cine cine, Yehova alitutemwa sana!—Rom. 5:​10, 11.

 7. Bushe ifyo Yesu aculile filenga shani twaishiba ifyo Yehova atutemwa?

⁷ Na kabili kuti twaumfwikisha ifyo Yehova atutemwa nga twatontonkanya pa fyo aumfwile sana ububi ilyo amwene Umwana wakwe alecula. Satana atila ababomfi ba kwa Yehova te kuti batwalilile ukuba ne cishinka kuli ena nga nabakwata amafya. Pa kuti Yehova alange ukuti ifi Satana alanda fya bufi, alilekele Umwana wakwe ukucula ilyo ashilafwa. (Yobo 2:​1-5; 1 Pet. 2:21) Yehova alemonako uko Umwana wakwe balemupumya kuli bashimapepo, uko balemuuma ku bashilika no kumupoopela pa cimuti. Kabili Yehova alimweneko uko Umwana wakwe uo atemwa afwile imfwa iibi. (Mat. 27:​28-31, 39) Yehova alikwete amaka aya kulesha ifi fyalecitika. Ku ca kumwenako, ilyo abalwani ba kwa Yesu baleti: “Lekeni nomba [Lesa] amupusushe nga alimutemwa,” Yehova afwaya nga alimupuswishe. (Mat. 27:​42, 43) Lelo Lesa nga alileseshe Umwana wakwe ukuti afwe, nga tatwakwete icilubula kabili nga tatwakwata ne subilo. E ico Yehova alilekele Umwana wakwe ukuti ashipikishe ilyo alecula mpaka no kufwa.

 8. Bushe Yehova alyumfwile ububi ilyo amwene Umwana wakwe alecula? Londololeni. (Moneni ne cikope.)

⁸ Tatulingile ukulatontonkanya ukuti apo Lesa wa maka yonse, tomfwa ububi. Yehova atupangile mu cipasho cakwe kabili atupangile ukuti tuleumfwa ububi nga kwacitika ifyabipa. Ici cilenga twaishiba ukuti na o wine alomfwa ububi. Baibo ilanda pali Yehova ukuti inshita shimo “balemukalifya” kabili aleba “no bulanda.” (Amalu. 78:​40, 41) Tontonkanyeni na pa fyacitikile Abrahamu na Isaki. Nga muleibukisha, Yehova aebele Abrahamu ukutuula umwana wakwe umo fye uo akwete ilambo. (Ukute. 22:​9-12; Heb. 11:​17-19) Elenganyeni ifyo Abrahamu ali no bulanda ilyo aleipekanya ukwipaya umwana wakwe! Elenganyeni ifyo Yehova aumfwile sana ubulanda ilyo abantu balecusha Umwana wakwe no kumwipaya!—Tambeni vidio pa jw.org iitila, Pashanyeni Icitetekelo Cabo—Abrahamu, Ulubali 2.

 9. Bushe amashiwi yaba pa Abena Roma 8:​32, 38, 39 yalenga shani mwaumfwikisha ifyo Yehova amutemwa icine cine pamo na bakapepa banenu?

⁹ Icilubula citusambilisha ukuti takwaba uwatutemwa nge fyo Yehova atutemwa, nangu fye ni balupwa lwesu nelyo cibusa wesu uwa pa mutima. (Belengeni Abena Roma 8:​32, 38, 39.) Ukwabula no kutwishika Yehova alitutemwa ukucila ne fyo twaitemwa. Bushe mulafwaya ukwikala umuyayaya? Yehova ena cicilenapo. Bushe mulafwaya ukumwelela imembu?  Yehova ena alafwaya sana ukumwelela imembu. Ico afwaya fye kutila tuletasha pa fyo atucitila, kabili kuti twalanga ukuti tulatasha nga tuli ne citetekelo e lyo ne cumfwila. Icilubula bupe ubukalamba ubulanga ifyo Yehova atutemwa icine cine. Kabili mu calo cipya, tukasambilila ifingi ifilanga ifyo Yehova atutemwa.—Luk. Mil. 3:11.

IFYO ICILUBULA CITUSAMBILISHA PALI YESU

10. (a) Finshi fyalengele Yesu asakamane sana pa mfwa ali no kufwa? (b) Bushe Yesu alengele shani ishina lya kwa Yehova lyacindikwa? (Moneni na kabokoshi akaleti “ Filya Yesu Ali ne Cishinka Calengele Ishina lya kwa Yehova Lyacindikwa.”)

¹⁰ Yesu alibika sana amano ku fyo abantu batontonkanya pali Wishi. (Yoh. 14:31) Yesu alisakamikwe sana ilyo bamupeele umulandu wa kuti alepontela Lesa no kuti alepondokela ubuteko. Iyi milandu yali no kuleta umuseebanya pe shina lya kwa Wishi. E calengele apepe ati: “Tata, nga kuti cacitika, fumyeni iyi kapu pali ine.” (Mat. 26:39) Nomba filya Yesu atwalilile uwa cishinka kuli Wishi mpaka afwa, fyalangilile fye ukuti filya Satana alelanda pali Wishi fyali fya bufi.

11. Bushe Yesu alangile shani ukuti alitemwa abantu icine cine? (Yohane 13:1)

¹¹ Icilubula citusambilisha no kuti Yesu alibika sana amano ku bantu, maka maka ku basambi bakwe. (Amapi. 8:31; belengeni Yohane 13:1.) Ku ca kumwenako, Yesu alishibe ukuti fimo ifyo ali no kucita pano calo, fyali no kwafya pamo nga imfwa yakwe iyabipisha. Lelo ilyo alebomba umulimo wakwe pano isonde, Yesu talecita fye ifintu pantu e fyo Wishi amwebele ukuti e fyo alecita. Yesu alebombesha, ne calengele ni co alitemenwe abantu. E mulandu wine alebilila kuli bena, alebasambilishisha, no kulabafwilisha. Ilyo ali mupepi no kufwa, alisambile amakasa ya batumwa bakwe, alibasambilishe, alibakoseleshe kabili alibasansamwishe. (Yoh. 13:​12-15) Na lintu bamupoopeele  pa cimuti, Yesu alipeele isubilo icipondo ico bamupoopeele pamo naco ilyo acebele ukuti uli no kuba na ine mu paradaise. Na kabili alilangile ukuti alibikile amano kuli nyina ilyo aebele Yohane ukuti alemusakamana. (Luka 23:​42, 43; Yoh. 19:​26, 27) Yesu tapelelele fye pa kufwila abantu pa kubalanga ukuti alibatemwa, alibatemenwe icine cine kabili aleba ne cikuuku kuli bena.

12. Bushe Yesu atwafwa shani na muno nshiku?

¹² Nangu ca kuti Kristu “afwilile fye umuku walimo,” acili ali-ipeelesha ukutwafwilisha na muno nshiku. (Rom. 6:10) Atwafwilisha shani? Alitwalilila ukubomba pa kuti aletupeela ifintu ifisuma ifyo tukwata pali ino nshita pa mulandu wa cilubula. Tontonkanyeni pa milimo ubwingi iyo alebomba! Pali ino nshita ni Mfumu yesu, ni Shimapepo Mukalamba, kabili e mutwe wa cilonganino. (1 Kor. 15:25; Efes. 5:23; Heb. 2:17) E utungulula umulimo wa kulonganika abasubwa na ba mwi bumba likalamba. Uyu mulimo wa kulonganika ukapwa ilyo ubucushi bukalamba bushilapwa. a (Mat. 25:32; Marko 13:27) Kabili alashininkisha ukuti ababomfi bakwe aba cishinka nabakwata ifya kulya fya ku mupashi muli shino nshiku sha kulekelesha. (Mat. 24:45) Na lintu akalateka pa myaka 1,000, akatwalilila ukutwafwilisha. Yehova tatupeele fye Umwana wakwe ukuti atufwile, lelo atupeele no kuti aletucitila ne fintu ifingi!

MWIKALEKA UKUSAMBILILA

13. Bushe ukutontonkanya pa cilubula kuti kwalenga shani twatwalilila ukusambilila pa fyo Lesa na Kristu batutemwa?

¹³ Kuti mwatwalilila ukusambilila ifyo Yehova Lesa na Kristu Yesu batutemwa nga mwatwalilila ukutontonkanya pa cilubula. Nalimo uno mwaka nga kwashala imilungu iinono ukuti kube Icibukisho na pa numa ya Cibukisho, kuti mwabelengako ibuuku limo ilya Mbila Nsuma nelyo kuti mwabelengelapo amabuuku na yambi aya Mbila Nsuma. Mwikalabelenga ifingi pa muku umo. Lelo mukaletekanya pa kuti mukalemona imilandu na imbi iingalenga twatemwa Yehova na Yesu. Kabili mukale-ebako abantu bambi ifyo mukalasambilila.

14. Ukulingana na mashiwi yaba pa Amalumbo 119:97 na futunoti, bushe ukufwailapo ifyebo na fimbi pa fyo tuleisambilisha kuti kwalenga shani twatwalilila ukusambilila pa cilubula na pali fimbi ifyo Baibo isambilisha? (Moneni ne cikope.)

¹⁴ Nga ca kuti mwalibombela Yehova pa myaka iingi, nalimo kuti mwalatontonkanya ukuti,  ‘Bushe pali na fimbi ifyo ningasambililapo pa malyashi pamo nga ifyo Lesa aba no mulinganya, ifyo aba no kutemwa e lyo na pa cilubula?’ Icishinka ca kuti fingi ifyo twingasambilila pali ili lyashi na pa malyashi yambi. Kuti mwacita shani pa kuti musambililepo na fimbi? Mulebelenga no kuisambilisha ifyebo ifisuma sana ifyaba mu mpapulo shesu. Nga mwabelenga fimo mu Baibo ifyo mushumfwikishe, mulefwailapo ifyebo na fimbi. Lyena akasuba konse, muletontonkanya pa fyo musambilile, ifyo musambilile pali Yehova, pa Mwana wakwe, na pa fyo bamutemwa.—Belengeni Amalumbo 119:97 na futunoti.

15. Mulandu nshi cacindamina ukutwalilila ukufwailapo ifyebo ilyo tuleisambilisha Baibo?

¹⁵ Nga ca kuti ilyo muleisambilisha nelyo ilyo mulefwailapo ifyebo tamusangilepo ifipya, tamulingile ukufuupuka. Mule-elenganya ukuti muli ngo muntu uulefwaya golde. Ilingi line pa kuti umuntu uulefwaya golde aisange, palapita ama-awala ayengi nelyo inshiku pa kuti fye aisange. Lelo alatwalilila ukufwaya pantu aleshiba ukuti golde iili yonse iyo engasanga nangu icepe shani, yalicindama. Nomba ifipya ifyo tusambilila mu Baibo fyalicindama sana ukucila na golde! (Amalu. 119:127; Amapi. 8:10) Kanshi tekwesha ukuleka ukubelenga Baibo no kulafwailapo ifyebo.—Amalu. 1:2.

16. Kuti twapashanya shani Yehova na Yesu?

¹⁶ Ilyo muleisambilisha Baibo, muletontonkanya na pa fyo mwingabomfya ifyo mulesambilila. Ku ca kumwenako, mwilaba na kapaatulula nga filya Yehova ashaba na kapaatulula. Pa kuti mulepashanya filya Yesu atemenwe Wishi na bantu, muleitemenwa ukucita ifyo Yehova afwaya kabili muleitemenwa ukwafwa abantu nangu ca kuti limo kuti ca-afya ukucita ifyo. Na kabili mulebila imbila nsuma nga filya Yesu alecita, pa kuti abantu baishiba ifintu ifisuma ifyo Yehova atucitila ifingalenga bamucetekela, bacetekela ne cilubula.

17. Finshi tukasambilila mu cipande cikonkelepo?

¹⁷ Nga twatwalilila ukusambilila pa cilubula, tukatemenwako Yehova na Yesu. Ici cikalenga nabo bakatutemwe sana. (Yoh. 14:21; Yako. 4:8) Kanshi natulebomfya fyonse ifyo Yehova atupeela pa kuti tutwalilile ukusambilila pa cilubula. Mu cipande cikonkelepo, tuli no kusambilila ifyo tunonkelamo mu cilubula ne fyo twingalanga ukuti tulatasha pa fyo Yehova atutemwa.