ICIPANDE CA KUSAMBILILAMO 3
ULWIMBO 35 “Mwishibe Bwino Bwino Ifyacilapo Ukucindama”
Ifyo Mwingacita pa Kuti Mulesalapo Ukucita Ifingalenga Yehova Alasekelela
“Ukutiina Yehova e ntendekelo ya kuba na mano, kabili nga waishiba Lesa Uwa Mushilo Nga Nshi, e lyo ukalailuka ifintu.”—AMAPI. 9:10.
IFYO TWALASAMBILILAPO
Ifyo twingabomfya ifyo twaishiba, amaka ya kumfwikisha e lyo na maka ya kwiluka ilyo tulesalapo ifya kucita.
1. Cinshi icacindama ico bonse tucita?
CILA BUSHIKU tulasalapo ifya kucita. Fimo ifyo tusalapo tafyakosa, pamo nga ifyo twalalya ulucelo nelyo inshita twalaya mu kulaala. Nomba fimbi fyena fyalikosa ukusalapo. Fimo ifyo twingasalapo kuti fyakuma ubumi bwesu, ifyo twingaba ne nsansa pamo no lupwa lwesu, e lyo ne fyo twingalabombela Yehova. Tulingile ukusalapo ukucita ifingalenga bonse mu lupwa twaba ne nsansa. Kabili icacindamisha, tulingile ukusalapo ifingalenga Yehova alasekelela.—Rom. 12:1, 2.
2. Finshi mufwile ukucita pa kuti mulesalapo bwino ifya kucita?
2 Pa kuti mulesalapo ukucita ifisuma, mufwile (1) ukwishiba ifishinka fyonse, (2) ukutontonkanya pa fyo Yehova amona ifyo mulefwaya ukusalapo, na (3) ukutontonkanya sana pa fyo mulesalapo pa kuti mumone ifingawama. Muli cino cipande twalasambilila pa fyo twingacita ifi fintu fitatu, kabili twalasambilila na pa fyo twingalabomfya amaka yesu aya kwiluka.—Amapi. 2:11.
MULEISHIBA IFISHINKA FYONSE
3. Landeni icilangililo icilelanga ico cacindamina ukwishiba ifishinka fyonse ilyo mushilasalapo ica kucita.
3 Ica kubalilapo ico mulingile ukucita pa kuti musalepo bwino ica kucita, kwishiba ifishinka fyonse. Mulandu nshi ici cacindamina? Elenganyeni ukuti umuntu aya mu kumona dokota pa mulandu wa kuti alilwala ubulwele ubukalamba. Bushe dokota kuti atampa fye ukumundapa ukwabula ukubalilapo ukumupima nelyo ukumwipushako amepusho? Awe nakalya. Nga filya fine dokota umusuma acita, na imwe bene mukalasalapo ukucita ifisuma nga ca kuti mulebalilapo ukufwailisha ifishinka fyonse ilyo mushilasalapo ica kucita. Kuti mwacita shani ifi twalandapo?
4. Ukulingana na Amapinda 18:13, kuti mwacita shani pa kuti mwishibe ifishinka fyonse? (Moneni ne cikope.)
4 Ilingi line kuti mwaishiba ifishinka nga muleipusha amepusho. Tutile bamwita ukuya mu kwangalila pamo ne fibusa. Bushe mulingile ukuya nelyo iyo? Nga ca kuti tamwaishiba abamwitile nelyo tamwishibe ifikabako, kuti mwaipusha abamwitile amepusho pamo nga: “Ni kwi tukala-angalila kabili ni lilali tukala-angala? Bushe bantu banga bakabako? Ni bani bakala-angalila uku kwangala? Ni bani bakabako? Finshi abantu bakalacita pali uku kwangala? Bushe kukaba ubwalwa?” Nga mwaishiba ifi fyonse mukasalapo bwino ica kucita.—Belengeni Amapinda 18:13.
Muleipusha amepusho pa kuti muleishiba ifishinka fyonse (Moneni paragrafu 4) a
5. Cinshi mufwile ukucita nga mwaishiba ifishinka fyonse?
5 Nga mwaishiba ifishinka fyonse, nomba mulingile ukutontonkanya pali fyonse ifikumine ifyo mulesalapo. Ku ca kumwenako, kuti mwacita shani nga mwaishiba ukuti kuli uku kwangala kukaba na bantu abashikonka amashinte ya mafunde ya mu Baibo, nelyo mwaishiba ukuti kukaba ubwalwa kabili abantu bakalanwa fye apo balefwaila? Bushe mwamona ukutila kuli uku kwangala kuti kwacitika ifyabipa? (1 Pet. 4:3) Na kabili kuti mwacita shani nga ca kuti inshita kukaba uku kwangala, e nshita mulongana nelyo e nshita muya mu kubila imbila nsuma? Nga mwatontonkanya pa fishinka fyonse ifikumine ifyo mulefwaya ukusalapo, cikamwangukila ukusalapo icisuma. Lelo kuli na cimbi ico mufwile ukucita. Apo nomba namwishiba ico mulefwaya ukucita, mulingile ukuyipusha amuti, ‘Inga Yehova ena alemona shani ifi ndefwaya ukucita?’—Amapi. 2:6.
MULETONTONKANYA PA FYO YEHOVA ALEMONA IFYO MULEFWAYA UKUSALAPO UKUCITA
6. Ukulingana na mashiwi yaba pali Yakobo 1:5, mulandu nshi tulingile ukulombela Yehova ukuti atwafwe?
6 Pepeni kuli Yehova no kumulomba ukuti amwafwe pa kuti mwishibe ifyo alemona ifyo mulefwaya ukusalapo ukucita. Yehova alitulaya ukuti akalatupeela amano ya kwiluka pa kuti tulemona nampo nga ifyo tulefwaya ukucita kuti fyalenga asekelela nelyo iyo. “Apeela fye bonse” aya mano “ukwabula ukubakalipila.”—Belengeni Yakobo 1:5.
7. Kuti mwaishiba shani ifyo Yehova alemona ifyo mulefwaya ukusalapo ukucita? Langilileni.
7 Nga mwalomba ukuti Yehova amutungulule, mulingile ukubikako sana amano pa kuti mumone ifyo aswike ipepo lyenu. Natulangilile: Tutile muleya kumo, nomba mwaluba. Cinshi mwingacita? Nalimo kuti mwaipusha uwikala uko kwine pa kuti amulangilile ifya kwenda. Nomba bushe kuti mwatendeka ukwenda ilyo ashilamweba ifyo mulingile ukwenda? Awe nakalya. Kuti mwakutikisha ilyo alemulangilila ifya kwenda. Ifi fine e fyo caba. Nga ca kuti mwalomba Yehova ukuti amupandeko amano, mufwile ukwesha na maka yenu yonse ukwiluka ifyo aswike ipepo lyenu. Kuti amwasuka nga mwamona amashinte ya mu Baibo ayalanda pa fyo mulefwaya ukusalapo ifya kucita. Ku ca kumwenako, ilyo mulesalapo nampo nga kuya uko bamwitile nelyo iyo, kuti mwatontonkanya pa fyo Baibo ilanda pa kuya mu kwangala ukuli iciwowo, no kwangala na bantu abakwata imibele iyabipa. Kuti mwatontonkanyako na pa kubika Ubufumu pa ntanshi ukucila ukubika fye amano ku fyo mulefwaya.—Mat. 6:33; Rom. 13:13; 1 Kor. 15:33.
8. Kuti mwacita shani pa kuti musange ifyebo ifingalenga mwasalapo ifya kucita ifisuma? (Moneni ne cikope.)
8 Nomba inshita shimbi kuti mwafwaya ukwishibilapo na fimbi pa kuti musalepo bwino ica kucita. Kuti mwaeba munyinefwe nelyo nkashi umukalamba mu fya kwa Lesa ukuti amupandeko amano. Lelo kuti mwaishiba ifingi nga ca kuti mwe bene mwaifwaila ifyebo. Kuti mwasanga ifyebo ifingi mu mpapulo shesu, pamo nga mu Icitabo ca Kwafwa Inte sha kwa Yehova Ukusanga Ifyebo na mu citabo citila Amalembo Ayengafwa Abena Kristu mu Mikalile. Muleibukisha ukuti ico mulefwaila ifyebo fyonse ifi, ni co mulefwaya ukusalapo ifingalenga Yehova asekelela.
Muletontonkanya pa fyo Yehova amona ifyo mulefwaya ukusalapo (Moneni paragrafu 8) b
9. Kuti twacita shani pa kuti ifyo tulesalapo ukucita filelenga Yehova alesekelela? (Abena Efese 5:17)
9 Kuti twacita shani pa kuti twishibe nga ca kuti ifyo tulesalapo ukucita kuti fyalenga Yehova asekelela? Ica kubalilapo ico tulingile ukucita, kumwishiba bwino. Baibo itila: “Nga waishiba Lesa Uwa Mushilo Nga Nshi, e lyo ukalailuka ifintu.” (Amapi. 9:10) Ca cine, nga twaishiba Yehova, tukeshiba imibele yakwe, ifyo afwaya, ifyo atemwa kabili tukeshiba ne fyo apata. Yipusheni amuti, ‘Ukulingana ne fyo naishiba Yehova, finshi ningasalapo ukucita ifingalenga asekelela?’—Belengeni Abena Efese 5:17.
10. Mulandu nshi cacindamina ukukonka amashinte ya mafunde ya mu Baibo ukucila ukukonka intambi?
10 Inshita shimo tufwile fye ukusalapo ukucita ifyo tulemona ukutila kuti fyasekesha Yehova nangu ca kutila kuti fyalenga balupwa lwesu ne fibusa bakalipa. Ku ca kumwenako, abafyashi bamo kuti balapatikisha umwana wabo umukashana umukalamba ukuti opwe ku mwaume uwa cuma nelyo uwingabalipila impango ishingi, nangu ca kuti uyu mwaume tabika amano kuli bucibusa bwakwe na Yehova. Kwena balefwaya umwana wabo akaleikala bwino. Nomba bushe uyu mwaume, akala-afwa umwana wabo ica kuti akabe cibusa wa kwa Yehova uwakosa? Inga Yehova ena alandapo shani? Icasuko kuti twacisanga pali Mateo 6:33. Pali ili ilembo Yesu akonkomeshe Abena Kristu ukuti, “ico mulebika pa ntanshi, kufwaya Ubufumu.” Nangu ca kuti tufwaya ukulacindika abafyashi besu na bantu abekala ku ncende twikala, ico twabikako sana amano kulenga Yehova asekelela.
MULETONTONKANYA SANA PA FYO MULESALAPO PA KUTI MUMONE IFINGAWAMA
11. Mibele nshi iyaba pa Abena Filipi 1:9, 10 iingalenga mwatontonkanya sana pa fyo mulefwaya ukusalapo pa kuti mumone ifingawama?
11 Nga mwaishiba amashinte ya mafunde ya mu Baibo ayo mwingakonka pa kusalapo ica kucita, mulingile ukutontonkanya sana pa fyo mulesalapo pa kuti mumone ifingawama. (Belengeni Abena Filipi 1:9, 10.) Nga muleiluka, mukeshiba ifingafuma mu fyo mwingasalapo ukucita. Inshita shimo cilanguka ukusalapo ica kucita. Lelo inshita shimbi cilakosa. Nga muleiluka, mukasalapo ukucita ifisuma na lintu cikosele ukwishiba bwino ica kusalapo.
12-13. Kuti mwacita shani pa kuti musalepo bwino incito ya kubomba?
12 Natulande pa ca kumwenako cimo. Tutile mulefwaya incito pa kuti mwingalasakamana ulupwa lwenu. Nomba kwamoneka incito shibili. Mwatontonkanya pa fishinka fyonse, pamo nga ifyo incito yaba, ifyo imibombele yaba, inshita mukalapoosapo pa kufika pa ncito e lyo ne fishinka fimbi. Mwasanga ukuti ishi ncito shonse shibili, Umwina Kristu kuti abomba. Nalimo kuti mwasalapo incito imo pantu namuitemwa nelyo pantu mukalafola indalama ishingipo. Lelo kwaliba na fimbi ifyo mulingile ukutontonkanyapo ilyo mushilasalapo incito mwingalabomba.
13 Ku ca kumwenako, bushe iyi incito ikalalenga mulefilwa ukulaya mu kulongana? Bushe ikalalenga mwikalakwata inshita ya kuba pamo na ba mu lupwa lwenu pa kuti baleumfwa ukuti balicingililwa, baliba ne nsansa, kabili fibusa fya kwa Yehova? Nga mwalayipusha amepusho ya musango uyu, mukalabika sana amano ku “fyacilapo ukucindama” e kutila, bucibusa bwenu na Yehova na ku fyo ulupwa lwenu lukabila, ukucila ukulabika fye amano ku kukwata indalama ishingi. Lyena kuti mwasalapo incito iingalenga Yehova amupaala.
14. Bushe ukwiluka no kutemwa abantu kukalenga shani twilabapunwisha?
14 Na kabili nga tuleiluka tukalatontonkanya pa fyo abantu bengamona ifyo twasalapo ukucita pa kuti ‘twilapunwisha bambi.’ (Fil. 1:10) Calicindama ukucita ifi, maka maka ilyo tulesalapo ifya kufwala ifyo twalafwala nelyo ifyo twalaiyemfya. Ku ca kumwenako, nalimo kwaliba ifya kufwala fimo ifyo twatemwa nelyo inshila imo iya kuiyemfeshamo iyo twatemwa. Nomba kuti twacita shani nga ca kuti ifi ifyo twatemwa kuti fyakalifya aba bwananyina mu cilonganino nelyo abantu abo tushilongana nabo? Nga tuleiluka, kuti twabika amano ku fyo bengomfwa. Apo twalitemwa abantu, tukalafwaisha ukucita ‘ifingawamina abanensu,’ tukalafwala ifyalinga kabili tukalaiyemfya bwino. (1 Kor. 10:23, 24, 32; 1 Tim. 2:9, 10) Lyena ifyo tukalasalapo ukucita fikalalanga ukuti twalitemwa abantu kabili twalibacindika.
15. Finshi mulingile ukutontonkanyapo nga ca kuti ico mulefwaya ukusalapo nacicindama?
15 Nga ca kuti ifyo mulefwaya ukusalapo ukucita naficindama sana, mulingile ukutontonkanya na pa fyo mufwile ukucita pa kuti ifyo mwasalapo ukucita fikabombe. Yesu atusambilishe ukuti nga tulefwaya ukucita fimo, tulingile “ukupenda ishingapooswapo.” (Luka 14:28) Kanshi mulingile ukutontonkanya pa nshita mukapoosapo, indalama na maka pa kuti ifyo mwasalapo ukucita fikabombe. Ilyo mulesalapo ukucita ifintu fimo, kuti mwaipusha aba mu lupwa lwenu ifyo cila muntu alingile ukucita pa kuti ifyo mulefwaya ukusalapo ukucita fikabombe. Mulandu nshi cacindamina ukucita ifi twalandapo? Pantu kuti mwaishiba fimo ifyo mulingile ukwalulako ku fyo musalilepo ukucita nelyo kuti mwailuka ukuti mufwile ukusalapo fimbi. Na kabili nga mwaipushako aba mu lupwa lwenu, kabili mwakonka ifyo bamupandako amano, bakaitemenwa ukumwafwa pa kuti ifyo musalilepo fikabombe.—Amapi. 15:22.
MULESALA BWINO IFYA KUCITA
16. Finshi mwingacita pa kuti musalepo bwino ifya kucita? (Moneni na kabokoshi akaleti “ Ifyo Mwingacita pa Kuti Musalepo Bwino Ifya Kucita.”)
16 Nga mulekonka fyonse ifyo tulandilepo muli cino cipande, mukalasala bwino ifya kucita. Nga mwakwata ifishinka fyonse kabili mwatontonkanya na pa mashinte ya mafunde ya mu Baibo ayo mwingakonka pa kuti mwingasalapo ifingalenga Yehova asekelela, lyena kuti mwalomba Yehova ukuti amwafwe pa kuti ifyo mwasalapo fikabombe.
17. Cintu nshi icikalamba icingalenga mwasalapo bwino ifya kucita?
17 Nangu ca kuti ifingi ifyo mwasalapo ukucita fyalibomba fye bwino, muleibukisha ukuti icikalamba icingalenga mwasalapo ukucita ifisuma, te kushintilila pa mano yenu nelyo pa fintu ifingi ifyo mwaishiba. Lelo icingalenga, kushintilila pa mano ayo Yehova atupanda. Yehova fye e wingamupeela amano, amaka ya kwishiba ifintu na maka ya kwiluka. Mulingile ukukwata iyi mibele pa kuti mulesala bwino ifya kucita. (Amapi. 2:1-5) Yehova kuti amwafwa pa kuti mulesalapo ukucita ifingalalenga alesekelela.—Amalu. 23:2, 3.
ULWIMBO 28 Ukuba Cibusa wa kwa Yehova
