ICIPANDE CA KUSAMBILILAMO 5
ULWIMBO 108 Ukutemwa kwa kwa Lesa
Ifyo Tunonkelamo Muli ifi Yehova Atutemwa
“Kristu Yesu aishile muli ici calo mu kupususha ababembu.” —1 TIM. 1:15.
IFYO TWALASAMBILILAPO
Ifyo tunonkelamo muli ifi Yehova atupeela icilubula ne fyo twingalalanga ukuti tulamutasha pa cilubula.
1. Finshi twingalacita pa kuti tulelenga Yehova alesekelela?
ELENGANYENI ukuti mwapeela umuntu icintu icisuma sana ica kuti alebomfya. Ala kuti mwaumfwa ububi sana nga ca kuti uyu muntu asunga fye ico mumupeele mu cibokoshi ukwabula ukuti alecibomfya! Lelo kuti mwatemwa nga ca kuti alebomfya bwino ico mwamupeele kabili alelanga no kuti alatasha. Cinshi tulelandapo? Yehova alitupeela Umwana wakwe uwaishiletufwila. Ala Yehova alatemwa icine cine nga ca kuti tulelanga ukuti tulatasha pali ubu ubupe ubusuma nga nshi ubo atupeela, kabili nga tulelanga ukuti tulatasha na pa fyo atutemwa. Pantu na kuba, icalengele atupeele icilubula ni co alitutemwa!—Yoh. 3:16; Rom. 5:7, 8.
2. Finshi twalasambililapo muli cino cipande?
2 Nomba mu kupita kwa nshita, kuti twaleka ukulatasha Yehova pa cilubula. Kuti caba kwati twasungila ubupe ubo Lesa atupeela mu cibokoshi umo tushingalabumona. Pa kuti tatucitile ica musango uyu, lyonse tulingile ukulatontonkanya pa fyo Lesa na Kristu batucitila. Ifili muli cino cipande kuti fyatwafwa pa kuti tulecita ifi twalandapo. Twalasambilila pa fyo tunonkelamo mu cilubula pali ino nshita, na pa fyo tukanonkelamo ku ntanshi. Twalasambilila na pa fyo twingalacita pa kulanga ukuti tulatasha Yehova pa fyo atutemwa, maka maka muli ino nshita ya Cibukisho.
IFYO TUNONKELAMO PALI INO NSHITA
3. Finshi fimo ifyo tunonkelamo mu cilubula pali ino nshita?
3 Na pali ino ine nshita tulanonkelamo mwi lambo lya cilubula ilya kwa Kristu. Ku ca kumwenako, Yehova alatwelela imembu pa mulandu wa cilubula. Ici tacipilibula ukuti Yehova afwile fye ukutwelela. Lelo aitemenwa fye ukutwelela. Kemba wa malumbo aletasha sana Yehova pa fyo abelela abantu uluse. Atile: “Pantu imwe mwe Yehova muli basuma kabili mwali-iteyanya ukwelela.”—Amalu. 86:5; 103:3, 10-13.
4. Ni bani Yehova apeele icilubula? (Luka 5:32; 1 Timote 1:15)
4 Bamo kuti balamona kwati tabalinga no kuti Yehova ababelele uluse. Kwena bonse fye tatwalinga ukutubelela uluse. Umutumwa Paulo alishibe ukuti ‘talingile no kulaitwa ukuti umutumwa.’ Lelo alandile no kuti: “Icikuuku icaibela ica kwa Lesa e calenga ukuti mbe fino ndi.” (1 Kor. 15:9, 10) Nga twalapila pa membu shesu, Yehova alatwelela. Cinshi cilenga aletwelela? Te pa mulandu wa kuti twalilinga ukutubelela uluse, lelo icilenga ni co alitutemwa. Nga ca kuti mulomfwa ububi pa mulandu wa kutila mumona ukuti tamwalinga ukubelelwa uluse, muleibukisha ukuti Yehova tapeele icilubula pa mulandu wa bantu abapwililika. Apeele icilubula pa mulandu wa bantu abashapwililika, abomfwa ububi nga balufyanya kabili abesha na maka yabo yonse pa kuti baaluke.—Belengeni Luka 5:32; 1 Timote 1:15.
5. Mulandu nshi tushilingile ukulatontonkanishisha ukuti Yehova alingile fye ukulatwelela pantu twalimubombela pa myaka iingi? Londololeni.
5 Tatufwile ukulatontonkanya ukuti Yehova alingile fye ukutubelela uluse pantu twalimubombela pa myaka iingi. Kwena Yehova alatasha pa fyo tutwalilila ukumubombela ne cishinka. (Heb. 6:10) Atupeele Umwana wakwe ngo bupe fye, te malipilo pa fyo tumubombela. Kanshi tatufwile ukulatontonkanya ukuti Yehova alingile fye ukulatwelela pantu twalimubombela imilimo iingi. Nga tuletontonkanya ifi, ninshi cimo cine no kweba Yehova ukuti Yesu afwilile apa fye.—Linganyeniko Abena Galatia 2:21.
6. Cinshi calengele Paulo alebombesha mu mulimo wa kwa Yehova?
6 Paulo alishibe ukuti ifyo alebombela Yehova, te fyali no kulenga Yehova alemubelela uluse. Nomba cinshi calengele alebombesha mu mulimo wa kwa Yehova? Ni co alefwaya ukulalanga ukuti aletasha pa cikuuku ca kwa Yehova icaibela, te kutila ni co alefwaya Yehova alemwelela imembu shakwe. (Efes. 3:7) Na ifwe bene tulabombesha nga filya fine Paulo alebombesha. Nomba tatubombesha pa kuti Yehova aletwelela imembu, lelo icilenga tulebombesha ni co tufwaya ukulalanga ukuti tulatasha Yehova pa cikuuku cakwe icaibela.
7. Cinshi cimbi ico tunonkelamo mu cilubula na pali ino ine nshita? (Abena Roma 5:1; Yakobo 2:23)
7 Na cimbi ico tunonkelamo mu cilubula, kuba ifibusa ifisuma na Yehova. a Nga fintu twasambilile mu cipande cafumineko, fwe bantu tatufyalwa ninshi tuli fibusa fya kwa Lesa. Lelo pa mulandu wa cilubula, tulaba “no mutende na Lesa” kabili kuti twaba ifibusa fyakwe.—Belengeni Abena Roma 5:1; Yakobo 2:23.
8. Mulandu nshi tulingile ukulatashisha Yehova pe shuko atupeela ilya kupepa kuli ena?
8 Natulande pali cimo ico tunonkelamo pa mulandu wa kuti tuli fibusa fya kwa Yehova. Tulapepa kuli ena. Yehova alomfwa amapepo ayo abantu bakwe bapepa nga nabalongana. Alomfwa na mapepo ayo umubomfi wakwe umo umo apepa ilyo ali fye eka. Ipepo lilalenga twilasakamikwa sana. Lelo ubu te busuma fye bweka bwaba mu kupepa kuli Yehova. Ipepo kuti lyalenga bucibusa bwesu na Lesa bwakosa. (Amalu. 65:2; Yako. 4:8; 1 Yoh. 5:14) Ilyo Yesu ali pano isonde, alepepa lyonse kuli Yehova pantu alishibe ukuti Yehova aleumfwa. Alishibe no kuti ipepo lyali no kulenga bucibusa bwakwe na Wishi bwakosa. (Luka 5:16) Ala tulatasha sana Yehova pa cilubula pantu calilenga twaba ifibusa fyakwe, kabili calilenga tulepepa kuli ena!
IFYO TUKANONKELAMO KU NTANSHI
9. Bushe ababomfi ba kwa Yehova aba cishinka bakanonkelamo shani mu cilubula ku ntanshi?
9 Bushe ababomfi ba kwa Yehova aba cishinka bakanonkelamo shani mu cilubula ku ntanshi? Yehova akabapeela umweo wa muyayaya. Abantu abengi bamona kwati ici te kuti cicitike pantu ukutula fye na kale abantu balafwa. Lelo Yehova abumbile abantu ukuti baleikala umuyayaya. Adamu nga tabembwike, nga takwaba uumona ukuti abantu te kuti bekale umuyayaya. Nangu ca kuti pali ino nshita kuti catukosela ukwelenganya ukutila kuti twaikala umuyayaya, ukusumina kwena kuti twasumina, pantu Yehova alitumine Umwana wakwe uo atemwa nga nshi ukuti ese atufwile.—Rom. 8:32.
10. Bushe abasubwa benekela ukwikala kwi, kabili aba mu mpaanga shimbi nabo benekela ukwikala kwi?
10 Nangu ca kuti ni ku ntanshi tukekala umuyayaya, Yehova afwaya ukuti na pali ino ine nshita tuletontonkanya pa kwikala umuyayaya. Abasubwa balenekela ukuyaikala ku muulu uko bakalateka isonde pamo na Kristu. (Ukus. 20:6) Ababa mu mpaanga shimbi nabo benekela ukwikala mu Paradaise pano pene pe sonde. Tabakulakalipwa, tabakulacula kabili tabakulaba no bulanda. (Ukus. 21:3, 4) Bushe na imwe mwenekela ukwikala pano isonde umuyayaya? Isubilo lya kulaikala pano isonde lyacindama fye nge subilo lya kuyaikala ku muulu. Na kuba, Yehova abumbile abantu ukuti baleikala pano isonde. Tukalaba ne nsansa sana ilyo tukalaikala pano isonde.
11-12. Mapaalo nshi yamo ayo twenekela ukwisakwata mu Paradaise? (Moneni ne fikope.)
11 Elenganyeni ifyo mukalaikala bwino mu Paradaise pano isonde. Tamwakulasakamana pa mulandu wa kutila kuti mwalwala nelyo kuti mwafwa. (Esa. 25:8; 33:24) Yehova akamupeela ifisuma fyonse ifyo mufwaya. Finshi mufwaya ukwisasambililapo? Bushe mufwaya ukwisasambilila pa nama, pa fyuni, ifya kulisha ifilimba, ifya kwimba inyimbo nelyo ukusambilila ifya kulenga ifintu? Ukwabula no kutwishika, mu Paradaise mukalafwaikwa abaishiba ukupanga amapulani ya fikuulwa, abaishiba ukukuula e lyo na balimi. Mukalafwaikwa na ba kulima ifya kulya, aba kupekanya ifya kulya, aba kupanga ifya kubomfya pa kubomba, aba kubyala amaluba na ba kuyasakamana. (Esa. 35:1; 65:21) Apo mukekala umuyayaya, mukakwata inshita iikalamba iya kusambilila pali ifi fyonse na pali fimbi.
12 Ala cikawama nga nshi ilyo tukalasengela abantu abakabuushiwa! (Imil. 24:15) Elenganyeni ifyo mukalasekelela ilyo mukeshiba ifintu ifingi pali Yehova, na pa fintu ifingi ifyo abumba. (Amalu. 104:24; Esa. 11:9) Ne cawamisha ca kuti tukalapepa Yehova ukwabula ukumfwa ububi pa mulandu wa kukanapwililika! Bushe kuti mwafwaya ukupanya yonse aya amapaalo pa mulandu fye wa “kuipakisha ifisuma fya lubembu ifya pa kashita fye akanono”? (Heb. 11:25) Awe nakalya! Aya amapaalo yakacila pali fyonse ifyo twingakwata pali ino nshita. Muleibukisha ukuti tatwakatwalilile fye ukusubila ukuti tukalaikala mu Paradaise pano isonde. Bushiku bumo tukekalamo. Tukakwata amapaalo yonse aya pa mulandu wa kuti Yehova alitupeela Umwana wakwe pa kuti abe icilubula!
Fisuma nshi mufwaisha fikabe mu Paradaise? (Moneni paragrafu 11-12)
IFYO MWINGALANGA UKUTI MULATASHA PA FYO YEHOVA ATUTEMWA
13. Kuti twalanga shani ukuti tulatasha Yehova pa fyo atutemwa? (2 Abena Korinti 6:1)
13 Kuti twalanga shani ukuti tulatasha Yehova pa kutupeela icilubula? Kuti twalanga ifi nga tulebika sana mano ku kubomba umulimo wa kwa Yehova. (Mat. 6:33) Na kuba, Yesu afwilile bonse “pa kuti aba mweo belacita fye ifya kuisekesha, lelo balecita ifya kusekesha uwabafwilile kabili uwabuushiwe.” (2 Kor. 5:15) Yehova alitulanga icikuuku kabili alitwelela. Nga tulebombesha mu mulimo wakwe, ninshi tulelanga ukuti tulatasha pali fyonse ifyo atucitila.—Belengeni 2 Abena Korinti 6:1.
14. Kuti twalanga shani ukuti twalicetekela ifyo Yehova atweba ukucita?
14 Cimbi ico twingacita pa kulanga ukuti tulatasha Yehova pa fyo atutemwa, kumucetekela no kulakonka ifyo atweba. Kuti twacita shani ifi? Ilyo tulesalapo ifya kucita, nampo nga tufwile ukuya ku masambililo ya pa muulu nelyo nga ni ncito nshi tulingile ukwingila, tufwile ukutontonkanya pa fyo Yehova engafwaya twacita. (1 Kor. 10:31; 2 Kor. 5:7) Nga twasalapo ifya kucita pa mulandu wa kuti twalicetekela sana Yehova, tulamutetekela sana kabili bucibusa bwesu na ena bulakoselako. Na kabili tulashininkisha ukuti tukekala umuyayaya.—Rom. 5:3-5; Yako. 2:21, 22.
15. Kuti twalanga shani ukuti tulatasha Yehova mu nshita ya Cibukisho?
15 Kwaliba na cimbi ico twingacita pa kulanga ukuti tulatasha Yehova pa fyo atutemwa. Kulabombesha mu mulimo wa kwa Yehova muli ino nshita ya Cibukisho, pa kulanga ukuti tulatasha Yehova pa cilubula. Ilyo tuleipekanya ukuti tukaye ku Cibukisho, tuleitako na bambi pa kuti nabo bene bakaye ku Cibukisho. (1 Tim. 2:4) Abo muketa ku Cibukisho, mukabalondolwele ifyo Icibukisho ciba. Nalimo kuti mwabatambishako vidio iyaba pa jw.org iitila Mulandu Nshi Yesu Afwilile? ne itila Muleibukisha Imfwa ya kwa Yesu. Baeluda bafwile ukwita aba bwananyina bonse abaleka ukulongana no kubila imbila nsuma. Elenganyeni ifyo aba ku muulu na fwe ba pano isonde bonse tukasekelela, nga ca kuti impaanga sha kwa Yehova shimo ishafuma mwi cinka shabwela! (Luka 15:4-7) Ilyo tukalalongana Icibukisho, twikabika fye amano ku kuposha bamunyinefwe na bankashi. Lelo tukabike na mano ku kuposha aba kuti e muku wa kubalilapo baisa mu kulongana, na ba bwananyina aba kuti kale baishilepo mu kulongana Icibukisho. Tukabalange ukuti natubapokelela.—Rom. 12:13.
16. Mulandu nshi tulingile ukulafwaila ukubombesha mu nshita ya Cibukisho?
16 Bushe kuti mwabombeshako mu mulimo wa kwa Yehova mu nshita ya Cibukisho? Nga mwabombesha ninshi mulelanga ukuti mulatasha pa fyo Lesa na Kristu batucitila. Nga tulebombesha mu mulimo wa kubila imbila nsuma, tukalamona ifyo Yehova akalatutungilila kabili tukamucetekela sana. (1 Kor. 3:9) Na kabili, mukalebelenga Amalembo ya kubelenga mu nshiku sha Cibukisho ayaba mu katabo ka Ukubebeta Amalembo Cila Bushiku nelyo ayaba muli charti iiba mu Akatabo ka Mikalile no Mulimo Tubomba. Nga mulefwaya kuti mwalabelenga aya Amalembo pa kuisambilisha Baibo.
17. Cinshi cilenga Yehova alesekelela? (Moneni na kabokoshi akaleti “ Ifyo Twingalanga Ukuti Tulatasha Yehova pa fyo Atutemwa.”)
17 Kwena, nalimo te kuti mukumanishe ukubomba umulimo wa kwa Yehova, nga fintu mwingafwaya uku-ubomba pa mulandu ne fyo ifintu fyaba. Lelo muleibukisha ukuti Yehova talinganya ifyo mumubombela ku fyo aba bwananyina bambi bamubombela. Alatasha sana pa fyo mulanga ukuti mwalimutemwa. Alatemwa nga amona ifyo mutasha pa bupe ubusuma nga nshi ubo atupeela, e kutila icilubula.—1 Sam. 16:7; Marko 12:41-44.
18. Mulandu nshi tutashisha Yehova Lesa na Yesu Kristu?
18 Icilubula calilenga Yehova aletubelela uluse pa membu shesu, calilenga twaba ifibusa fyakwe kabili calilenga tukwate isubilo lya kwisakwata umweo wa muyayaya. Natulelanga ukuti tulatasha Yehova pa fyo atutemwa, pantu na kuba icalenga tukwate aya amapaalo yonse ni co alitutemwa. (1 Yoh. 4:19) Natulelanga no kuti tulatasha Yesu pa fyo aitemenwe ukwisatufwila!—Yoh. 15:13.
ULWIMBO 154 Ukutemwa Ukushipwa
a Yehova alibelele uluse na babomfi bakwe abafwile ninshi Kristu talaituula pa kuti abe icilubula. Ico Yehova acitiile ifi ni co alishininkishe ukuti Umwana wakwe ali no kutwalilila ukuba uwa cishinka mpaka ne mfwa. Kanshi Yehova alemona fye ukuti Yesu ali-ituulile icilubula ninshi talafwa no kufwa.—Rom. 3: 25.
