1. Finshi ifyo abantu abengi babikako amano muno nshiku?

 BUSHE mwalimona ukuti abantu abengi muno nshiku babika fye amano ku fyo balefwaya ukucila ukubika amano ku fifwaya abantu bambi? Ku ca kumwenako, abantu bamo balabika ifikope pa Intaneti pa kuti balange abantu ifisuma ifilebacitikila ne fyo balecita. Nomba bantu fye abanono abapeela Yehova Lesa ubukata. Muli cino cipande, twalasambilila ifyo cipilibula ukupeela Yehova ubukata e lyo no mulandu tufwile ukumupeelela ubukata. Na kabili twalasambilila ifyo twingacita pa kupeela Lesa ubukata ubo tufwile ukumupeela ne fyo umwine akalenga ishina lyakwe ukucindikwa ku ntanshi.

IFYO CIPILIBULA UKUPEELA YEHOVA UBUKATA

 2. Bushe Yehova alangile shani ubukata bwakwe pa Lupili lwa Sinai? (Moneni ne cikope.)

² Bushe ishiwi lya kuti ubukata lyalola mwi? Mu Baibo, ishiwi lya kuti “ubukata” lilosha kuli fyonse ifilanga ukuti umuntu alicindama sana. Yehova alilangile ubukata bwakwe ilyo fye alubwile uluko lwa bena Israele mu Egupti umo bali abasha. Elenganyeni ifyacitike: Abena Israele abengi nga nshi balilongene mwi samba lya Lupili lwa Sinai pa kuti bomfwe ifyo Lesa alefwaya ukubeba. Ikumbi ilyafiita fititi lyalifimbile ulupili. Mu kupumikisha, pa lupili ponse pali icushi, lyena kwali icinkukuma icikalamba, icibulukutu no kupanta kwa nkuba. Lyena kwaumfwikike iciunda icikalamba ica ntandala. (Ukufu. 19:​16-18; 24:17; Amalu. 68:8) Elenganyeni ifyo abena Israele bapeshiwe amano ilyo Yehova alangile ubukata bwakwe.

 3. Kuti twapeela shani Yehova ubukata?

 ³ Bushe na ifwe fwe bantu kuti twapeela Yehova ubukata? Ee kuti twamupeela. Inshila imo iyo tupeelelamo Yehova ubukata kulaebako abantu pa maka yakwe ayakalamba na pa mibele yakwe iisuma. Na kabili, tupeela Lesa ubukata nga tulemutasha pali fyonse ifyo atwafwa ukucita. (Esa. 26:12) Kuti twasambililako ku Mfumu Davidi iyalepeela sana Yehova ubukata. Mwi pepo Davidi apepele pa ntanshi ya lukuta lwa bena Israele, aebele Lesa ati: “Mwe Yehova muli bakulu, muli ba maka, muli basuma, mwalisansabikwa kabili mwalicindama, pantu fyonse ifya mu muulu ne fya pano isonde fyenu.” Ilyo Davidi apwishishe ukupepa, “abali mu lukuta bonse balumbenye Yehova.”—1 Imila. 29:​11, 20.

 4. Bushe Yesu apeele shani Yehova ubukata?

⁴ Ilyo Yesu ali pano isonde, alepeela Wishi ubukata ilyo alelanda ukuti e walemupeela amaka ya kucita ifipesha mano. (Marko 5:​18-20) Yesu na kabili alepeela Yehova ubukata mu fyo alelanda pali Yehova e lyo ne fyo alecitila abantu. Bushiku bumo, Yesu ali mwi sunagoge alesambilisha abantu. Pa bantu abalekutika ifyo alesambilisha, pali no mwanakashi uwali ne cibanda icamucushishe pa myaka 18. Icibanda calengele uyu mwanakashi abe uwakongama kabili alefilwa no kololoka. Ala uyu mwanakashi aliculile! Ilyo Yesu amumwene, alimumfwilile uluse kabili amwebele cikuuku cikuuku ati: “We mwanakashi, wapola ubulwele bobe.” Lyena abikile iminwe yakwe pali ena kabili apo pene fye alyololweke “alacindika na Lesa.” Alitashishe sana Yehova pantu alimundepe! (Luka 13:​10-13) Filya Yehova acitiile uyu mwanakashi fyalengele apeele Yehova ubukata. Na ifwe bene, kwaliba ifingi ifyo Yehova acita ifilenga tulemupeela ubukata.

MULANDU NSHI TUPEELELA YEHOVA UBUKATA?

 5. Finshi filenga tulecindika Yehova?

⁵ Tulapeela Yehova ubukata pantu twalimucindika sana. Kwaliba ifingi ifilenga tulecindika Yehova. Yehova alikwata amaka aya kucita conse ico alefwaya kabili tanaka. (Amalu. 96:​4-7) Ifintu ifyo abumba filanga ukuti alikwata sana amano. E watupeele ubumi kabili alatupeela na fyonse ifyo tukabila pa kuti tutwalilile ukuba abomi. (Ukus. 4:11) Wa cishinka. (Ukus. 15:4) Alacita fyonse ifyo alefwaya ukucita kabili alafikilisha fyonse ifyo alaya. (Yosh. 23:14) E calengele kasesema Yeremia ebe Yehova ati: “Pa ba mano bonse aba mu nko na pa mabufumu yabo yonse, tapaba nangu umo uwaba nga imwe.” (Yer. 10:​6, 7) Ukwabula no kutwishika, kwaliba ifingi ifilenga tulecindika Shifwe wa ku muulu. Nomba tatupelela fye pa kucindika Yehova, twalimutemwa no kumutemwa.

 6. Mulandu nshi twatemenwa Yehova?

⁶ Tulapeela Yehova ubukata pantu twalimutemwa sana. Twalitemwa Yehova pantu alikwata imibele iisuma iingi. Wa luse nga nshi. (Amalu. 103:13; Esa. 49:15) Nga tulecula, na o alomfwa ububi. (Seka. 2:8) Alalenga catwangukila ukupalama kuli ena pa kuti tube ifibusa fyakwe. (Amalu. 25:14; Imil. 17:27) Ali-icefya. “Alakontama pa kuti aloleshe pa myulu na pe sonde, emya uushakwata wa kumwafwa mu lukungu.” (Amalu. 113:​6, 7) Nani uushingafwaya ukupeela Lesa wesu ubukata?—Amalu. 86:12.

 7. Mulimo nshi uwacindama uo twakwata?

⁷ Tulapeela Yehova ubukata pantu tulafwaya abantu bambi bamwishiba. Abantu abengi tabaishiba icine pali Yehova. Cinshi calenga? Pantu Satana alipofwisha amatontonkanyo yabo pa kubepa ubufi pali Yehova. (2 Kor. 4:4) Satana alilenga abantu abengi basumina ukuti  Yehova alikalipa, tatubikako amano, kabili e ulenga tulecula. Nomba ifwe twalishiba icine pali Lesa wesu. Kanshi tufwile ukwebako abantu icine pali Yehova pa kuti nabo bamwishibe no kumona ukuti musuma pa kuti balemupeela ubukata. (Esa. 43:10) Baibo pa Amalumbo 96:10 ilanda sana pa fyo tufwile ukulapeela Yehova ubukata. Muli ili lumbo twalasambilila ifyo twingapeela Yehova ubukata ubo tufwile ukumupeela.

KUTI TWAPEELA SHANI YEHOVA UBUKATA UBO TUFWILE UKUMUPEELA?

 8. Ni nshila nshi imo iyo twigapeelelamo Yehova ubukata? (Amalumbo 96:​1-3)

⁸ Belengeni Amalumbo 96:​1-3. Tupeela Yehova ubukata mu fyo tulanda pali ena. Muli ifi ifikomo, abantu ba kwa Yehova babeba ati, “Imbileni Yehova,” “lumbanyeni ishina lyakwe,” “mulebila imbila nsuma pa fyo apususha abantu bakwe.” Babeba no kuti “bilisheni ubukata bwakwe mu nko.” Ishi shonse ni nshila isho twingapeelelamo Shifwe wa ku muulu ubukata. AbaYuda ba cishinka na Bena Kristu ba kubalilapo bale-eba abantu pa fisuma ifyo Yehova abacitile kabili balemulandilako. (Dan. 3:​16-18; Imil. 4:29) Bushe kuti twabapashanya shani?

9-10. Finshi mulesambilila ku fyacitikile ba Angelena? (Moneni ne cikope.)

⁹ Natulandeko pa fyacitikile nkashi Angelena, a uwikala ku United States. Ba Angelena balishipile kabili balilandile pali Yehova ilyo bali ku ncito. Ba Angelena e lyo batendeke fye ukubomba kuli aka akampani, e ico bena na babomfi bambi abatendeke ukubomba kuli iyi ine kampani balibetile ku kukumana uko abapya bonse bali no kuilondolola. Ba Angelena balipekenye ifikope ifyo balefwaya ukulanga ababomfi banabo pa nsansa isho bakwata pa mulandu wa kuti ni Nte ya kwa Yehova. Lelo ilyo inshita iya kuti ba Angelena batendeke ukulanda ishilafika, umwaume umo uo balebomba nankwe alimine no kutendeka ukuilondolola ukuti abafyashi bakwe bali ni Nte sha kwa Yehova. Uyu mwaume atendeke ukusuusha ifyo twasuminamo. Ba Angelena batile: “Nalyumfwile umwenso pa fyo nali no kulanda. Natontonkenye ukuti: ‘Bushe nalalekapo fye ilyo uyu muntu alebepa ubufi pali Yehova, nelyo bushe nalalandilako Yehova?’”

¹⁰ Ilyo uyu mwaume apwishishe ukulanda, ba Angelena balipepele ipepo ilipi mu mutima. Lyena baebele uyu mwaume cikuuku cikuuku  abati: “Na ine wine abafyashi bandi ni Nte sha kwa Yehova kabili na ine ndi Nte ya kwa Yehova.” Nangu ca kuti ba Angelena bali no mwenso sana, balitekenye kabili balilangile abo balebomba nabo ifikope ifyo bakopelwe pamo ne fibusa fyabo ifyalelangilila ukuti bali ne nsansa ilyo balebombela Yehova. Kabili ba Angelena bali no mucinshi sana ilyo balelondolola ifyo basuminamo. (1 Pet. 3:15) Finshi fyacitike pa numa? Ilyo ba Angelena bapwishishe ukulanda, ulya mwaume alilekele ukufulwa. Alilandile na pa fisuma ifyalecitika ilyo baleya mu kulongana na bafyashi bakwe ilyo ali umwaice. Ba Angelena batile: “Tulingile ukulalandilako Yehova. Lishuko nga nshi ukwebako abantu icine pali Yehova.” Na ifwe bene kuti twalumbanya Yehova no kumupeela ubukata nangu ca kuti abantu bambi balamusaalula.

11. Ukutula na kale, bushe ababomfi ba kwa Lesa bakonka shani ifyaba pa Amalumbo 96:8?

¹¹ Belengeni Amalumbo 96:8. Kuti twapeela Yehova ubukata ukubomfya ifyo twakwata. Ukutula na kale, ababomfi ba kwa Yehova aba cishinka balamupeela ubukata ukubomfya ifyo bakwata. (Amapi. 3:9) Ku ca kumwenako, abena Israele balipeele ifyo bakwete pa kuti bakuule itempele na pa kuti balelisunga bwino. (2 Isha. 12:​4, 5; 1 Imila. 29:​3-9) Abasambi ba kwa Kristu bamo balebomfya “ifintu fyabo” pa kumwafwilisha e lyo no kwafwilisha abatumwa bakwe. (Luka 8:​1-3) Abena Kristu ba kubalilapo nabo balitumine ifya kwafwilisha aba bwananyina abalekabila ubwafwilisho. (Imil. 11:​27-29) Muno nshiku namo, na ifwe bene kuti twapeela Yehova ubukata nga tuleitemenwa ukusangwilako ifyo tukwete.

12. Bushe imisangulo yesu kuti yalenga shani Yehova acindikwa? (Moneni ne cikope.)

¹² Natulande pali cimo icacitike icilanga ifyo imisangulo yesu ilenga Yehova acindikwa. Mu 2020, mu Zimbabwe mwali icilala icakokwele sana. Ici cilala calengele kube icipowe icikalamba kabili abantu abengi tabakwete ifya kulya ukubikako fye na nkashi yesu Prisca. Nangu ca kuti icilala calitwalilile, ba Prisca balitwalilile ukubila imbila nsuma lyonse pali Citatu na pali Cisano. Balecita ifi na lintu yali ni nshita ya kulima. Abena mupalamano babo balebaseka ifi baleya mu kubila imbila nsuma mu nshita ya kulima. Balebeba abati: “Mukafwa ku nsala.” Ba Prisca balicetekele ukuti Yehova ali no kulabasakamana, e ico baleasuka abati, “Yehova talekelesha ababomfi bakwe.” Tapakokwele, ba Prisca balipokelele ifyo balekabila ukufuma  ku cilonganino ca kwa Yehova. Icalengele ba Prisca bapokelele ifi fyonse ifyo balekabila, mulandu wa misangulo iyo tusangula. Abena mupalamano ba ba Prisca balipapile sana kabili balebeba ukutila, “Lesa alamusakamana. Kanshi na ifwe tulefwaya ukusambilila pali ena.” Abena mupalamano babo 7 balitendeke ukulaya mu kulongana.

13. Bushe ifyo tucita kuti fyalenga shani Yehova acindikwa? (Amalumbo 96:9)

¹³ Belengeni Amalumbo 96:9. Kuti twapeela Yehova ubukata mu fyo tucita. Bashimapepo abalebombela pe tempele lya kwa Yehova balingile ukuba aba busaka. (Ukufu. 40:​30-32) Lelo ukuba ne mibele isuma kwalicindamapo ukucila ukuba fye no busaka. (Amalu. 24:​3, 4; 1 Pet. 1:​15, 16) Baibo itila tufwile ukufuula “ubuntu bwa kale” no kufwala “ubuntu bupya.” Ici cilolele mu kuti tufwile ukuleka ukutontonkanya ifyabipa no kukanacita ifyo Lesa apata. Lelo tufwile ukulatontonkanya no kulacita ifintu ifilanga ukuti tupashanya Yehova kabili tulafwaya ukuba ne mibele yakwe iisuma. (Kol. 3:​9, 10) Yehova kuti alenga na bantu abalecita ifintu ifibi sana ba-aluka bafwala no buntu bupya.

14. Finshi mulesambilila ku lyashi lya ba Jack? (Moneni ne cikope.)

¹⁴ Natulandeko pa ca kumwenako ca ba Jack. Ba Jack bali sana abankalwe ica kuti balebeta ukuti Iciwa. Pa mulandu ne milandu ubwingi iyo bacitile, ba Jack babapingwile ukubepaya. Nomba ilyo ba Jack bali mu cifungo balelolela ukuti babepaye, balisumine ukutendeka ukusambilila Baibo na munyinefwe uwaleya mu kubila imbila nsuma mu cifungo. Nangu ca kuti ba Jack bali cipondo, balifuulile ubuntu bwa kale kabili mu kupita kwa nshita balibatishiwe no kuba Inte ya kwa Yehova. Ba Jack balyalwike sana ica kuti pa bushiku balebepaya, bamo abalinda abafungwa baleloosha ilyo balebashalikapo. Umushilika umo uwalebomba pa cifungo alandile ukuti: “Kale ba Jack e bafungwa babipishe pa bafungwa baba pano. Nomba ino nshita baba pa bafungwa abasuma sana.” Ilyo bamunyinefwe baile mu kutungulula ukulongana mu cifungo ilyo papitile umulungu umo ukutula apo ba Jack babepaile, kwali umufungwa umo uwaile mu kulongana pa muku wa kubalilapo. Cinshi calengele aye mu kulongana? Alitemenwe ifyo ba Jack ba-alwike kabili alefwaya ukwishiba ifyo engacita pa kuti alepepa Yehova. Cailanga fye  apabuuta tuutu ukutila imibele yesu iisuma kuti yalenga abantu bacindika Shifwe wa ku muulu!—1 Pet. 2:12.

BUSHE YEHOVA AKALENGA SHANI ISHINA LYAKWE UKUBA ILYA MUSHILO KU NTANSHI?

15. Bushe Yehova akalenga shani ishina lyakwe ukuba ilya mushilo ku ntanshi? (Amalumbo 96:​10-13)

¹⁵ Belengeni Amalumbo 96:​10-13. Ifi fikomo fya kulekeleshako mu Amalumbo 96 filondolola Yehova ukuti ni Mfumu kabili Kapingula uwalungama. Bushe Yehova akalenga shani ishina lyakwe ukuba ilya mushilo ku ntanshi? Akalenga ishina lyakwe ukuba ilya mushilo ilyo akapingula mu bulungami. Nomba line akakanda Babiloni Mukalamba pa fyo aseebanya ishina lyakwe ilya mushilo. (Ukus. 17:​5, 16; 19:​1, 2) Bamo abakamona ifyo Babiloni Mukalamba bakamonaula, nalimo bakasalapo ukwisa mu kupepa kwa cine. Lyena pa nkondo ya Armagedone, Yehova akonaula icalo ca kwa Satana, na bonse abamulwisha na bapontela ishina lyakwe. Lelo akapususha bonse abamutemwa kabili abamumfwila e lyo na bonse abamupeela ubukata. (Marko 8:38; 2 Tes. 1:​6-10) Imyaka 1,000 iya kuteka kwa kwa Kristu na yapwa, Yehova akalenga ishina lyakwe likabe ilya mushilo. (Ukus. 20:​7-10) Pali ilya nshita, “isonde likesulamo ukwishiba [ubukata bwa] kwa Yehova nga filya amenshi yaisula muli bemba.”—Haba. 2:14.

16. Finshi mulefwaisha ukulacita? (Moneni ne cikope.)

¹⁶ Ala cikawama sana ilyo bonse pe sonde bakalapeela Yehova ubukata ubwalinga ishina lyakwe! Na pali ino ine nshita, kuti twapeela Lesa ubukata nga tulebila pali ena. Na kabili kuti twamupeela ubukata na mu fyo tucita. Pa kuti lyonse tuletontonkanya pa co cacindamina ukupeela Yehova ubukata, Ibumba Litungulula nalisala ilembo lya Amalumbo 96:8 ukuba ilembo lya mwaka wa 2025. Litila: “Peeleni Yehova ubukata ubwalinga ishina lyakwe.”