ICIPANDE CA KUSAMBILILAMO 29
ULWIMBO 121 Tufwile Ukuilama
Lyonse Muleipekanya pa Kuti Mulecimfya Amatunko
“Akuloleni kabili akupepeni pa kuti mwi-ingila mu matunko.”—MAT. 26:41.
IFYO TWALALANDAPO SANA
Cino cipande calatusambilisha ifyo twingacita pa kuti tatubembwike. Twalasambilila ne fyo twingacita pa kuti tuletaluka ifintu ifingalenga twacita ulubembu ulukalamba.
1-2. (a) Finshi Yesu asokelepo abasambi bakwe? (b) Cinshi calengele abasambi bafulumuke Yesu? (Moneni ne fikope.)
“UMUTIMA wena ulefwaisha, lelo umubili naunaka.” (Mat. 26:41b) Aya amashiwi Yesu alandile yalelangilila ukuti tatwapwililika kabili kuti twalufyanya. Lelo aletusoka no kuti tatufwile ukucilamo ukuicetekela. Mu nshita ya bushiku pali bulya bwine bushiku, abasambi ba kwa Yesu balimulaile ukuti tabali no kumubutuka. (Mat. 26:35) Ifyo bamulaile fyali fye bwino. Lelo tabaishibe ukuti nga bakwata ubwafya, bali no kunenuka bwangu bwangu kabili bali no kufilwa ukucita icalungama. E co Yesu abasokele ukuti: “Akuloleni kabili akupepeni pa kuti mwi-ingila mu matunko.”—Mat. 26:41a.
2 Ica bulanda ca kuti, abasambi balifililwe ukutwalilila ukuba abalola. Ilyo Yesu bamwikete, bushe balitwalilile ukuba nankwe nelyo balyumfwile umwenso ica kuti bamufulumuka no kumufulumuka? Pa mulandu wa kuti tabatwalilile ukuba abalola, balicitile filya fine balandile ukuti tabali no kucita, balimufulumwike.—Mat. 26:56.
Yesu alikonkomeshe abasambi bakwe ukuti balingile ukuba abalola kabili balingile ukuicingilila ku matunko, lelo balimushile (Moneni paragrafu 1-2)
3. (a) Pa kuti tutwalilile ukuba aba cishinka kuli Yehova, mulandu nshi tushilingile ukucililamo ukuicetekela? (b) Finshi twalasambililapo muli cino cipande?
3 Tatufwile ukucilamo ukulaicetekela. Kwena tatufwaya ukucita nangu cimo icingakalifya Yehova. Na lyo line, tatwapwililika kabili kuti twatunkwa no kucita icabipa. (Rom. 5:12; 7:21-23) Ukwabula no kwenekela, kuti twaeshiwa ukucita icabipa. Pa kuti tutwalilile ukuba aba cishinka kuli Yehova na ku Mwana wakwe, tufwile ukukonka ifyo Yesu atufundile ukuti tulingile ukuba abalola pa kuti tatucitile ulubembu nga twatunkwa. Muli cino cipande twalasambilila ifyo twingacita ifi. Twalabalilapo ukulanda pa fintu ifyo tulingile ukucenjelako sana. Lyena twalasambilila pa fyo twingaicingilila ku matunko. Mu kulekelesha twalasambilila pa fyo twingacita pa kuti tutwalilile ukuba abalola.
TUFWILE UKWISHIBA IFYO TUTUNKWAMO SANA
4-5. Mulandu nshi tushilingile ukucitila imembu nangu fye ishinono?
4 Ne membu ishimoneka ukuti shinono, kuti shalenga bucibusa bwesu na Yehova bwabwelela panshi. Kuti shalenga twacita ne membu ishikalamba.
5 Bonse fye tulatunkwa ukucita icabipa. Lelo bonse twalikwata ifyo tutunkwamo sana, nampo nga kutunkwa ukucita ulubembu ulukalamba sana, nampo kucita ifyakowela nelyo kutontonkanya nge fyo abantu ba muli cino calo batontonkanya. Ku ca kumwenako, umuntu kuti alelwisha itunko lya kucita ubulalelale. Umbi na o kuti alelwisha itunko lya kucita ifyakowela pamo nga, ukwikataula ifya mfwalo nelyo ukutamba ifye shiku. Umbi na o kuti alwishanya ne tunko lya kutiina abantu, ukulacita fye ifyo alefwaya, ukulakalipa bwangu nelyo amatunko yambi. E calengele Yakobo alembe ukuti, “umuntu onse eshiwa ilyo ulunkumbwa lwakwe umwine lwamusembeleka no kumubeleleka.”—Yako. 1:14.
6. Finshi tulingile ukusumina?
6 Bushe mwalishiba ifintu ifyo mutunkwamo sana? Tacawama ukulaibepa ukuti tatwakwata ubunake nelyo ukulamona ukuti te kuti tucite ulubembu. (1 Yoh. 1:8) Na kuba, na Paulo alilandile ukuti, na “bafikapo ukulingana na maka ayo umupashi upeela,” kuti batunkwa ukucita ifyabipa nga tabacenjele. (Gal. 6:1) Tufwile ukusumina ukuti kwaliba fimo ifyo twingatunkwamo.—2 Kor. 13:5.
7. Finshi tufwile ukubikako sana amano? Langilileni.
7 Finshi tufwile ukucita nga twaishiba ifintu ifyo tutunkwamo sana? Tufwile ukuibikilishako pa kuti twingalacimfya amatunko! Natulangilile: Mu nshita balelemba Baibo, pa mpongolo ya musumba e po caleangukila sana abalwani ukwingila mu musumba. E co pa mpongolo balebikilapo aba kulinda umusumba abengi. Na ifwe tulingile ukubika sana amano ku fintu ifyo twaishiba ukuti e fyo twingatunkwamo sana.—1 Kor. 9:27.
IFYO TWINGAICINGILILA PA KUTI TATUBEMBWIKE
8-9. Finshi ifyo umulumendo uo Baibo yalandapo mu Amapinda icipandwa 7 ashalingile ukucita pa kuti ebembuka? (Amapinda 7:8, 9, 13, 14, 21)
8 Bushe kuti twaicingilila shani pa kuti tatubembwike? Natulande pa fyo twingasambilila ku mulumendo uo Baibo yalandapo mu Amapinda icipandwa 7. Alicitile ubulalelale na cilende. Icikomo 22 citila akonkele uyu cilende “ilyo line fye.” Lelo nga fintu ifikomo fyabalilako fyalanda, uyu mulumendo kwali ifyo acitile ifyalengele abembuke.
9 Finshi ifyo uyu mulumendo acitile ifyalengele ukuti acite ulubembu ulukalamba? Ica kubalilapo, uyu mulumendo “alepita mu musebo wali mupepi ne ng’anda ya [uyu mwanakashi cilende]”ninshi na kusuba nakawa. Lyena aile mupepi ne ng’anda ya kwa uyu cilende. (Belengeni Amapinda 7:8, 9.) Na kabili ilyo amwene uyu cilende, tafumineko. Lelo alisumine ilyo bamutomwene kabili alekutika ilyo uyu cilende alemulondolwela pa malambo ya mutende ayo atuulile. Nalimo ico alemulondolwelela pali aya amalambo, ni co alefwaya amumone ukuti tali umuntu umubi. (Belengeni Amapinda 7:13, 14, 21.) Uyu mulumendo nga tacitile ifyalengele acite ulubembu, nga tatunkilwe kabili nga tabembwike.
10. Finshi uwa bwananyina muno nshiku engacita ifingalenga abembuka nga filya umulumendo uo Baibo yalandapo mu Amapinda icipandwa 7 acitile?
10 Ifi Solomone alembele filanga fye ifingacitikila kapepa wa kwa Yehova uuli onse. Kuti acita ulubembu ulukalamba. Lyena pa numa atendeka ukutontonkanya ukuti fyonse fyacitike ukwabula ukwenekela. Nalimo kuti atila, “Nshaishibe ne fyalecitika.” Lelo nga atontonkanyapo bwino bwino kuti asanga ukuti kwali ifyo acitile ifyalengele ukuti abembuke. Nalimo aleangala na bantu abashatemwa Yehova, alelesesha icitendwe mu fintu ifyabipa nelyo aleya ku ncende ishabipa isho Abena Kristu bashifwile ukuyako, nelyo aleya pa mawebusaiti ayo Abena Kristu bashilingile ukuyapo. Nalimo alilekele ukulapepa kuli Yehova, ukulabelenga Baibo, ukulaya mu kulongana nelyo mu kubila imbila nsuma. Uyu uwa bwananyina nalimo alicitilepo fimo ifyalengele abembuke nga filya fine cali ku mulumendo uo Baibo yalandapo mu Amapinda icipandwa 7.
11. Finshi tushifwile ukucita pa kuti twibembuka?
11 Finshi tulesambililako? Tatulingile ukutaluka fye ulubembu, lelo tulingile no kutaluka ifintu ifingalenga twabembuka. Ifi fine e fyo Solomone alandilepo pa numa ya kulanda pa mulumendo no mwanakashi cilende. Ilyo alelanda pa mwanakashi cilende atile: “Mwilaenda mu nshila shakwe.” (Amapi. 7:25) Alandile no kuti:“Taluka kuli ena; kabili wipalama ku mwinshi wa ng’anda yakwe.” (Amapi. 5:3, 8) Ca cine, tulaicingilila ku kucita ulubembu nga tuletaluka ifintu ifingalenga twabembuka. a Ici cilepilibula ukuti ne fintu fimo ifyo Abena Kristu bengacitako, tatufwile ukuficita nga ca kutila, kuti fyalenga twatunkwa ukucita ifyabipa.—Mat. 5:29, 30.
12. Finshi Yobo apangile ukucita, kabili fyalengele shani etunkwa ukucita ifyabipa? (Yobo 31:1)
12 Tufwile ukuba abacenjela pa kuti tatulecita ifingalenga twabembuka. Ifi fine e fyo Yobo acitile. ‘Alipangene icipangano na menso yakwe’ ukuti taali no kulakumbwa abanakashi. (Belengeni Yobo 31:1.) Ifi apangile fyalengele ecita ubucende. Na ifwe bene kuti twapanga ukukanacita icili conse icingalenga twatunkwa ukucita ifyabipa.
13. Mulandu nshi tulingile ukubikila amano ku fyo tutontonkanyapo? (Moneni ne fikope.)
13 Na kabili tufwile ukubika amano ku fyo tutontonkanyapo. (Ukufu. 20:17) Abantu bamo batontonkanya ukuti tacabipa ukutontonkanya pa fyabipa cikulu fye umuntu talecita ifyo aletontonkanyapo. Nomba ukutontonkanya kwa musango uyo takwawama. Nga ca kuti umuntu aletontonkanya sana pa kucita ifyabipa, kuti alafwaisha ukuficita. Nga ca kuti aletontonkanya pa kucita ifyabipa cikamukosela ukucimfya itunko lya kucita icabipa. Kwena inshita shimo twakulatontonkanya pa fyabipa. Icacindama kuleka ukutontonkanya pa fyabipa ilyo line twatendeka ukufitontonkanyapo no kutendeka ukutontonkanya pa fisuma. Nga twacita ifi ninshi ulunkumbwa te kuti lukule ica kuti lwalenga twacita no lubembu ulukalamba.—Fil. 4:8; Kol. 3:2; Yako. 1:13-15.
Tulingile ukutaluka fyonse ifingalenga twatunkwa (Moneni paragrafu 13)
14. Finshi fimbi twingacita pa kuti tatutunkilwe ukucita ifyabipa?
14 Finshi fimbi twingacita pa kuti tatutunkilwe ukucita ifyabipa? Tufwile ukushininkisha ukuti ifintu filatuwamina nga tulekonka amafunde ya kwa Yehova. Inshita shimo kuti catukosela ukutontonkanya nelyo ukucita ifintu nge fyo Yehova afwaya tulecita. Nomba nga tule-esha na maka ukucita ifyo Yehova afwaya, tukaba ne nsansa.
15. Cinshi twingalandila ukuti cikalatwangukila ukucimfya amatunko nga tulefwaisha ukucita ifisuma?
15 Tulingile ukulafwaisha ukucita ifisuma. Nga twasambilila ‘ukupata ifyabipa no kutemwa ifisuma,’ twakulafwaisha ukucita ifisuma kabili tukalataluka ifingalenga twabembuka. (Amose 5:15) Nga tulefwaisha ukucita ifisuma, tukalacimfya amatunko ayo tukwata ukwabula ukwenekela.
16. Bushe nga tulecita ifilenga twatwalilila ukutemwa Yehova, citwangukila shani ukutwalilila ukuba abalola? (Moneni ne fikope.)
16 Kuti twacita shani pa kuti tulefwaisha ukucita icisuma? Kuti twacita ifi nga ca kuti tulecita ifintu ifingalenga twatemwa sana Yehova. Nga tuli pa kulongana nelyo ilyo tulebila imbila nsuma, te lingi tutunkwa ukucita ifyabipa. Lelo tucita ifilenga tulefwaisha ukusekesha Yehova. (Mat. 28:19, 20; Heb. 10:24, 25) Nga tulebelenga no kulaisambilisha sana Icebo ca kwa Lesa kabili nga tuletontonkanyapo sana, tukalafwaisha ukucita ifisuma kabili tukalapata ifyabipa. (Yosh. 1:8; Amalu. 1:2, 3; 119:97, 101) Tuleibukisha ukuti Yesu aebele abasambi bakwe ati: “Akupepeni pa kuti mwi-ingila mu matunko.” (Mat. 26:41) Nga tulepepa kuli Shifwe wa ku muulu, tulaleka atwafwa kabili cilalenga tulefwaisha ukulacita ifilenga alesekelela.—Yako. 4:8.
Nga tulecita ifingalenga twatwalilila ukutemwa Lesa, kuti twacimfya amatunko (Moneni paragrafu 16) b
TWALILILENI UKUBA ABALOLA
17. Bwafya nshi Petro akwete nalimo ubushapwile?
17 Kwaliba imibele imo iyo twingaleka umupwilapo. Lelo kuti twasanga ukuti imibele imbi yena yalikosa ukuileka umupwilapo. Natulande pa mutumwa Petro. Pa mulandu wa kuti aletiina abantu, alikeene Yesu imiku itatu. (Mat. 26:69-75) Camoneke kwati Petro alilekele ukutiina abantu ilyo abilile mu cilye ca Sanhedrini ukwabula umwenso. (Imil. 5:27-29) Nomba ilyo papitile imyaka imo, inshita imo alilekele ukulya na Bena Kristu abashali abaYuda “pantu aletiina abasembululwa.” (Gal. 2:11, 12) Petro alitampile ukutiina abantu na kabili. Nalimo talekele ukutiina abantu umupwilapo.
18. Bushe imibele imo iyo tukwata yaba shani?
18 Nalimo na ifwe bene kuti twaba nga Petro. Cinshi twalandila ifi? Imibele imo iyo tumona ukuti twalileka kuti yabwela na kabili. Ku ca kumwenako, munyinefwe umo atile: “Nalilekele ukutamba ifye shiku pa myaka 10 kabili nalishininkishe ukuti ubu bwafya bwalipwile. Lelo inshita shimo naletunkwa ukutamba na kabili.” Icawemeko ca kuti uyu munyinefwe tanenwike. Alilwike ukuti alingile ukulaibikilishako cila bushiku pa kuti alelwisha ici cimusango. Nalimo alingile ukutwalilila ukulwisha ici cimusango mpaka ne mfwa muli cino calo cabipa. Pa mulandu wa kuti umwina mwakwe na baeluda mu cilonganino balamwafwa, alesha na maka yakwe yonse pa kuti elatamba ifye shiku.
19. Finshi tufwile ukucita nga ca kuti twalikwata imibele iyo tushilaleka?
19 Finshi twingacita pa kuti imibele imo iyo twakwata tailengele twacita ifyabipa? Tufwile ukukonka ifyo Yesu atufundile pa fyo twingacita pa kucimfya amatunko, atile: “Akuloleni.” Na lintu mulemona ukuti te kuti mulufyanye, muletaluka ku fintu ifingalenga mwatunkwa. (1 Kor. 10:12) Muletwalilila ukucita ifintu ifingalenga mwacimfya amatunko. Baibo pa Amapinda 28:14 itila: “Wa nsansa umuntu uushifwaya lyonse ukucita ifyabipa.”—2 Pet. 3:14.
UBUSUMA BWABA MU KUTWALILILA UKUBA ABALOLA
20-21. (a) Bushe ifintu fikatuwamina shani nga twatwalilila ukucimfya amatunko? (b) Nga twabomfya amaka yesu pa kucimfya amatunko, finshi Yehova akatupeela? (2 Abena Korinti 4:7)
20 Kuti twashininkisha ukuti lyonse ifintu fikalatuwamina nga ca kuti twatwalilila ukuba abalola. “Ukuipakisha ifisuma fya lubembu ifya pa kashita fye akanono,” te kuti kulingane ne nsansa tukwata nga ca kuti tulekonka amafunde ya kwa Yehova. (Heb. 11:25; Amalu. 19:8) Cinshi twalandila ifi? Pantu Yehova atubumbile ukuti tuleikala ukulingana na mafunde yakwe. (Ukute. 1:27) Nga tulecita ifi tukaba na kampingu iisuma kabili tukesaikala umuyayaya.—1 Tim. 6:12; 2 Tim. 1:3; Yuda 20, 21.
21 Ca cine ukuti ‘umubili walinaka.’ Nomba ici tacalola mu kuti tapali nangu cimo ico twingacita pa mibele yabipa. Yehova ali-iteyanya ukutupeela amaka. (Belengeni 2 Abena Korinti 4:7.) Lelo ico tufwile ukwishiba ca kuti Lesa atupeela amaka ayacila aya bantunse. Nomba tufwile ukubomfya amaka yesu pa kulwisha amatunko. Nga twabomfya amaka yesu kuti twacetekela ukuti Yehova nga twamulomba, akatupeela amaka ayacila aya bantunse ilyo tuleyakabila. (1 Kor. 10:13) Ukwabula no kutwishika Yehova nga atwafwa kuti twacimfya amatunko.
ULWIMBO 47 Mulepepa Kuli Yehova Lyonse
a Uwa bwananyina nga acita ulubembu ulukalamba, kuti abelenga isambililo 57 ifishinka 1-3 mu citabo citila Kuti Mwaba ne Nsansa Umuyayaya! kabili kuti abelenga ne cipande caba mu Ulupungu lwa kwa Kalinda ulwa November 2020, amabu. 27-29, para. 12-17 icitila, “‘Mulelolesha fye ku Ntanshi,’” pa kuti engamona ifingamwafwa.
b UBULONDOLOSHI BWA CIKOPE: Munyinefwe alebelenga ilembo lya bushiku ulucelo, akasuba alebelenga Baibo pa nshita ya kulya, lyena icungulo ubushiku alelongana ukulongana kwa mikalile.
