1. Cinshi tufwile ukucita pa kuti tukapusuke ubushiku bwa kwa Yehova?

 BAIBO nga yalanda pa “bushiku bwa kwa Yehova,” ninshi ilelanda pa nshita ilyo Yehova akonaula abalwani bakwe kabili ilyo akapususha abantu bakwe. Ku kale, Yehova inshita shimo alekanda inko. (Esa. 13:1, 6; Esek. 13:5; Sefa. 1:8) Muno nshiku “ubushiku bwa kwa Yehova” buli no kutendeka ilyo Babiloni Mukalamba bakamusansa, kabili bukapwa pa nkondo ya Armagedone. Pa kuti tukapusuke ubu “bushiku,” tulingile ukuipekanya pali ino ine nshita. Yesu asambilishe ukuti tulingile ukuipekanya ku “bucushi bukalamba” no kutwalilila ‘ukuba abaiteyanya.’—Mat. 24:21; Luka 12:40.

2. Finshi tusambilila mwi buuku lya 1 Abena Tesalonika?

² Muli kalata ya kubalilapo iyo umutumwa Paulo alembeele abena Tesalonika, alilandile pa filangililo ifingi ifyalengele Abena Kristu ukulaipekanya ku bushiku bukalamba ubwa bupingushi ubwa kwa Yehova. Paulo alishibe ukuti ubushiku bukalamba ubwa kwa Yehova tabwali no kwisa pali ilya nshita alembele aya mashiwi. (2 Tes. 2:1-3) Na lyo line, alyebele aba bwananyina ukulaipekanishisha kuli bulya bushiku kwati nalimo bwali no kwisa ubushiku bwakonkelepo. Kabili na ifwe bene kuti twasambililako ku fyo abebele. Natusambilile pa fyo alondolwele: (1) ifyo ubushiku bwa kwa Yehova bukesa, (2) abashakapusuke bulya bushiku, na (3) ifyo twingaipekanya pa kuti tukapusuke.

3. Bushe ubushiku bwa kwa Yehova bukesa shani ngo mupuupu ubushiku? (Moneni ne cikope.)

³ “Bukesa ngo mupuupu ubushiku.” (1 Tes. 5:2) Ici e cilangililo ca kubalilapo pa filangililo fitatu ifilondolola ifyo ubushiku bwa kwa Yehova bukesa. Ilingi abapuupu beba ubushiku ilyo  abantu abo bele mu kwibila bashile-enekela. Ubushiku bwa kwa Yehova nabo bukesa mu kupumikisha ilyo abantu abengi bashilebwenekela. Na Bena Kristu ba cine bene nalimo bakapapa sana ifyo ifintu fikalacitika bwangu bwangu. Lelo ifwe tukapusuka ilyo ababifi bakabonaula.

4. Bushe ubushiku bwa kwa Yehova bwaba shani ngo kucula kwa pa kupaapa?

⁴ Bukesa nga “filya ukucula kwa pa kupaapa kwisa pa mwanakashi uuli ne fumo.” (1 Tes. 5:3) Umwanakashi uuli ne fumo teshiba ubushiku ne nshita akapaapa. Nomba aleshiba ukuti ukupaapa kwena akapaapa. Lelo inshita ya kupaapa nga yafika, isa fye mu kupumukisha kabili umwanakashi alacula sana kabili takwata amaka ya kwalula inshita ya kupaapilapo. Na ifwe bene tatwaishiba ubushiku ne nshita ilyo ubushiku bwa kwa Yehova bukatendeka. Lelo twalishiba ukuti ukwisa kwena bukesa kabili ubupingushi ubo akapingula abacita ifyabipa bukabapumikisha, tabakapusuke.

5. Bushe ubucushi bukalamba bwaba shani nga macaca?

⁵ Bukesa nga macaca. Mu cilangililo calenga butatu ico Paulo alandile, na kabili alandile pa mupuupu uuleiba ubushiku. Kabili uno muku apashenye ubushiku bwa kwa Yehova ku macaca. (1 Tes. 5:4) Abapuupu abesa mu kwiba ubushiku balabika sana amano ku kwiba ica kuti limo tabalolesha na pa nshita. Amacaca yalabapumikisha ica kuti babasanganisha no kubasanganisha. E fyo no bucushi bukalamba bukapumikisha abapala abapuupu abashifwaya ukuleka ukucita ifyo Lesa apata. Lelo ifwe kuti twatwalilila ukuipekanya nga tulecita ifyo Yehova afwaya no kulacita “ifisuma fyeka fyeka no bulungami ne cishinka.” (Efes. 5:8-12) Lyena Paulo alandile pa filangililo fibili ifilanda pa bashakapusuke.

6. Cinshi twingalandila ukuti abantu abengi balilaala? (1 Abena Tesalonika 5:6, 7)

⁶ “Abalaala.” (Belengeni 1 Abena Tesalonika 5:6, 7.) Paulo apashenye abantu abashakapusuke ilyo ubushiku bwa kwa Yehova bukesa ku bantu abalaala utulo. Tabeshiba ifilecitika ilyo baleele ne fyo inshita ilepita. Kanshi te kuti beshibe nga kwacitika ifintu ifyacindama kabili te kuti bacitepo nangu cimo. Muno nshiku abantu abengi baba kwati balilaala utulo pantu tababika amano ku fya kwa Lesa. (Rom. 11:8) Tabasumina ukuti tuli mu “nshiku sha kulekelesha” no kuti ubucushi bukalamba bwalaisa nomba line. Limo mu calo nga mwacitika fimo, abantu balafwaya ukukutika ku mbila ya Bufumu. Lelo nga papita inshita, abengi balaleka ukubika amano ku fya kwa Lesa. Na bamo abasumina ukuti ubushiku bwa kwa Yehova bukesa, bamona ukuti bucili ukutali. (2 Pet. 3:3, 4) Na lyo line twalishiba ukuti calicindama ukulalola cila bushiku nga filya fine Baibo itweba.

7. Bushe abali no konaulwa pa bushiku bwa kwa Yehova baba shani ngo muntu uukolelwe?

⁷ “Abakolwa.” Umutumwa Paulo apashenye abantu abo Lesa akonaula kuli bacakolwa. Umuntu uukolelwe alawayawaya ukucita ifintu kabili tapingula bwino pa fintu. E fyaba na bantu ababipa. Tabacitapo nangu fimo pa fyo Lesa abasoka. Basalapo ukucita ifikalenga bakeseonaulwa. Lelo Baibo yeba Abena Kristu ukutekanya, e kutila ukulatontonkanya bwino pa fintu. (1 Tes. 5:6) Umo uwasambilila sana ifya mu Baibo alondolwele ishiwi lya ukutekanya ukuti, “umuntu uwatekanya alateka umutima kabili alatontonkanyapo bwino sana pa kuti asale bwino ifya kucita.” Mulandu nshi tulingile ukutekela umutima? Pantu tatufwaya ukuitumpa mu fikansa fya calo nelyo ukufwaya ukuwamya ifintu mu calo. Ilyo ubushiku bwa kwa Yehova bwile bulepalama, e lyo tukalatunkwa sana ukuibimba mu fikansa fya calo. Nomba tatufwile ukusakamana pa fyo tukacita ilyo bakalatutunka. Umupashi wa kwa Lesa ukalatwafwa ukuteka umutima pa kutila tukapingulepo bwino.—Luka 12:11, 12.

8. Bushe amashiwi yaba pali 1 Abena Tesalonika 5:8 yalanga ukuti mibele nshi iyo tufwile ukuba nayo pa kuti tube abalola no kutekanya? (Moneni ne cikope.)

⁸ Fwaleni ica kucinga icifuba ne ca kucinga umutwe. Paulo atupashenye ku bashilika abalola kabili abaipekenye ukuya ku bulwi. (Belengeni 1 Abena Tesalonika 5:8.) Nga kwaba inkondo, abantu benekela umushilika ukuba uwaipekanya ukulwa inshita iili yonse. Na ifwe tufwile ukufwala ica kucinga icifuba ica citetekelo kabili ica kutemwa ne subilo nge ca kucinga umutwe. Iyi mibele kuti yalenga twaipekanya bwino sana ku bushiku bwa kwa Yehova.

9. Bushe icitetekelo kuti catucingilila shani?

⁹ Ica kucinga icifuba calecingilila umutima wa mushilika. Icitetekelo e lyo no kutemwa na fyo filacingilila umutima wesu uwa mampalanya. Iyi mibele kuti yalenga twatwalilila ukubombela Lesa e lyo no kukonka Yesu. Icitetekelo cilalenga twacetekela ukuti nga tulebombela Yehova no mutima onse akatulambula. (Heb. 11:6) Icitetekelo cikalenga tukatwalilile ukuba ne cishinka kuli Yesu Intungulushi yesu, no kutwalilila ukushipikisha na lintu tuli na mafya. Kuti twakosha icitetekelo cesu no kulashipikisha amafya nga ca kuti tulesambilila ku baume na banakashi aba muno nshiku abatwalilila ne cishinka nangu ca kuti balabacusha nelyo bapiina. Nga ca kuti tulepashanya abaume na banakashi aba muno nshiku aba-angusha imikalile yabo pa kuti balebombesha  mu mulimo wa kwa Lesa, te kuti tutemwishe ifyuma. b

10. Bushe ukutemwa Lesa no kutemwa abantu kulenga shani tuleshipikisha amafya?

¹⁰ Ukutemwa nako kwalicindama sana pa kuti tutwalilile ukuba abalola no kuba abatekanya. (Mat. 22:37-39) Ukutemwa Lesa e kulenga tuleshipikisha ilyo tulebila imbila nsuma na lintu twakwata amafya. (2 Tim. 1:7, 8) Apo twalitemwa na bantu abashibombela Yehova, tulatwalilila ukubila imbila nsuma e lyo no kubombela mu cifulo ico batweba ukubilamo imbila nsuma. Na kabili tulabila imbila nsuma ukubomfya foni e lyo no kulemba amakalata. Tatuleka ukusubila ukuti abantu abo tubilako imbila nsuma bushiku bumo kuti ba-aluka no kutendeka ukucita ifyalungama.—Esek. 18:27, 28.

11. Bushe ukutemwa bamunyinefwe na bankashi kulenga twalacita finshi? (1 Abena Tesalonika 5:11)

¹¹ Twalitemwa na Bena Kristu banensu. Tulanga ukuti twalitemwana nga ‘tulesansamushanya no kukuulana.’ (Belengeni 1 Abena Tesalonika 5:11.) Nga filya abashilika bakoseleshanya nga kuli inkondo, na ifwe tulakoseleshanya. Kwena limo ilyo abashilika balelwa inkondo, umushilika umo kuti acena umushilika munankwe mu kukanaishiba, lelo te kuti amucenene fye ku mufulo. Na ifwe bene te kuti tukalifye uwa bwananyina ku mufulo fye nelyo ukubwesesha ububi pa bubi. (1 Tes. 5:13, 15) Na kabili tulanga ukuti twaliba no kutemwa nga ca kuti tulecindika bamunyinefwe abatungulula mu cilonganino. (1 Tes. 5:12) Ilyo Paulo alembeele abena Tesalonika iyi kalata, ninshi no mwaka umo taulakumana ukutula apo ici cilonganino capangiilwe. Abaume abo basontele ukulatungulula bafwile bali bapya kabili nalimo balelufyanya no kulufyanya. Na lyo line, aba bwananyina balingile ukulabacindika. Ilyo ubucushi bukalamba bukapalama sana, tukakabila ukulashintilila sana pali baeluda no kulakonka ifyo bakalatweba. Pali ilya nshita, nalimo cikafya sana ukupokelela ubutungulushi ukufuma ku maofeshi yakalamba nelyo kuli bamunyinefwe ku  Bethel. Kanshi nacicindama sana ukusambilila ukutemwa no kucindika baeluda twaba nabo mu cilonganino pali ino ine nshita. Te mulandu ne fikacitika, natutwalilile ukuba abatekanya, ukukanabika amano ku fyo balufyanya, lelo tuleibukisha ukuti Yehova abomfya Kristu ukutungulula aba baume ba cishinka.

12. Bushe isubilo licingilila shani ifyo tutontonkanya?

¹² Nga filya fine icisote ca mushilika calecingilila umutwe wakwe, isubilo lya kuti tukapusuka lilacingilila amatontonkanyo yesu. Nga twaliba ne subilo lyakosa, tuleshiba ukuti ifya muli cino calo fya fye. (Fil. 3:8) Isubilo lilalenga twaba abatekanya kabili twilasakamikwa. Ifi fine e fyo cali kuli ba Wallace na bena mwabo ba Laurinda ababombela pa Bethel mu Africa. Mu milingu fye itatu, banyina ba ba Laurinda balifwile na bawishi ba ba Wallace nabo balifwile. Nomba pa mulandu wa kuti kwali icikuko ca COVID-19, balifililwe ukubwelelamo ku mwabo pa kuti bayeloosesha pamo ne ndupwa shabo. Ba Wallace batile: “Isubilo lya kubuuka lilalenga ndetontonkanya pa fyo bakaba ilyo bakabuushiwa mu calo cipya, mu cifulo ca kulatontonkanya ifyo bali ilyo bashilafwa. Ili subilo lilansansamusha sana nga naba no bulanda nelyo napelelwa.”

13. Kuti twacita shani pa kuti Lesa atupeele umupashi wa mushilo?

¹³ “Mwilashimya umupashi.” (1 Tes. 5:19) Paulo apashenye umupashi wa mushilo ku mulilo uwaba muli ifwe. Umupashi wa kwa Lesa nga uli muli ifwe, tulaba abacincila ukucita icalungama kabili tulakwata na maka ya kubombela Yehova. (Rom. 12:11) Kuti twacita shani pa kuti Lesa atupeele umupashi wa mushilo? Tufwile ukulaupepela, ukulasambilila Icebo ca kwa Lesa, e lyo no kuba mu cilonganino cakwe ico atungulula ukubomfya umupashi wakwe uwa mushilo. Nga tulecita ifi, tukaba ne “fisabo fya mupashi.”—Gal. 5:22, 23.

14. Finshi tushifwile ukulacita pa kuti tutwalilile ukulapokelela umupashi wa mushilo? (Moneni ne cikope.)

¹⁴ Lesa nga atupeela umupashi wa mushilo, tulingile ukucenjela sana pa kuti ‘tatu-ushimishe.’ Lesa apeela fye umupashi wakwe  ku bantu abatontonkanya pa fisuma kabili ababa ne mibele iisuma. Kuti aleka ukutupeela umupashi wa mushilo nga ca kuti tuletontonkanya pa fyakowela kabili tuleficita no kuficita. (1 Tes. 4:7, 8) Pa kuti tutwalilile ukupokelela umupashi wa mushilo, tatufwile ‘ukulasuula amashiwi ya kusesema.’ (1 Tes. 5:20) Pali ili lembo, amashiwi ya kuti “amashiwi ya kuseseema” yalosha ku mashiwi ayo Yehova atupeela ukubomfya umupashi wa mushilo. Pa mashiwi ayo Yehova atupeela paba na yalanda pa bushiku bwa kwa Yehova, e lyo ne nshita tuleikalamo. Tatutontonkanya ukuti ubushiku bwa kwa Yehova nelyo Armagedone fili sana ukutali. Lelo tulanga ukuti twalishiba ukuti ubushiku bwa kwa Yehova buli mupepi nga tuli ne mibele isuma no kubombesha mu “milimo ya bukapepa.”—2 Pet. 3:11, 12.

15. Kuti twacita shani pa kuti tatubepelwe ku fyo abantu balanda e lyo na ku mashiwi ayafuma ku fibanda? (1 Abena Tesalonika 5:21)

¹⁵ Nomba line, abalwani ba kwa Lesa bali no kubilisha ukuti: “Umutende no mutelelwe!” (1 Tes. 5:3) Aya mashiwi ayakafuma ku fibanda yakaba fye mpanga yonse kabili yakalufya abengi. (Ukus. 16:13, 14) Bushe na ifwe tukabepwa? Tatwakabepwe nga ca kuti ‘tuleshininkisha ifintu fyonse.’ (Belengeni 1 Abena Tesalonika 5:21.) Ishiwi lya ciGriki ilyo bapilibula ukuti “muleshininkisha,” balelibomfya ku fyo abantu balecita pa kuti bamone nga ca kuti amabwe pamo nga golde nelyo silfere ya cine. Kanshi na ifwe tulingile ukushininkisha ifyo tumfwa nelyo ifyo tubelenga pa kuti tumone nga fya cine. Ifi fine e fyo abena Tesalonika balecita pantu balishibe ukuti ukucita ifi kwalicindeme. Kanshi na ifwe e fyo tufwile ukulacita ilyo ubucushi bukalamba bulepalama. Mu nshita ya kulasumina fye fyonse ifyo twaumfwa, tulingile ukulalinganya ifyo twabelenga nelyo ifyo twaumfwa ku fyo Baibo e lyo ne cilonganino ca kwa Yehova cilanda. Nga tulecita ifi, tatwakabepwe ku mashiwi ayafuma ku fibanda.—Amapi. 14:15; 1 Tim. 4:1.

16. Lisubilo nshi twakwata, kabili lilenga twalafwaya ukucita cinshi?

¹⁶ Twalishiba ukuti abantu ba kwa Lesa nge bumba bakapusuka ubucushi bukalamba. Lelo ngo muntu umo umo tatwingeshiba icingatucitikila mailo. (Yako. 4:14) Kanshi, nampo nga twafwa pali ino nshita nelyo twaisapusuka ubucushi bukalamba, Yehova ali no kwisatupeela umweo wa muyayaya nga twatwalilila aba cishinka. Abasubwa bakaba na Kristu ku muulu. Ababa mu mpaanga shimbi bakaba muli paradaise pano isonde. Natuletontonkanya sana pe subilo ilyo twakwata no kulaipekanishisha ku bushiku bwa kwa Yehova.