ICIPANDE CA KUSAMBILILAMO 25
ULWIMBO 7 Yehova E Maka Yesu
Muleibukisha Ukuti Yehova ni “Lesa wa Mweo”
“Yehova wa mweo!”—AMALU. 18:46.
IFYO TWALALANDAPO SANA
Tulanonkelamo sana nga ca kuti tuleibukisha ukuti Lesa tupepa ni “Lesa wa mweo.”
1. Cinshi cilenga abantu ba kwa Yehova batwalilile ukumubombela nangu ca kuti balakwata amafya?
BAIBO itila inshiku tuleikalamo ni “nshita ishayafya nga nshi.” (2 Tim. 3:1) Fwe bantu ba kwa Yehova tulakwata amafya ayo abantu bonse muli cino calo cabipa ica kwa Satana bakwata. Lelo abantu balatucusha no kutucusha pa mulandu wa kuti tulabombela Yehova. Cinshi cilenga tuletwalilila ukubombela Yehova nangu ca kuti tulakwata aya mafya? Icikalamba icalenga tutwalilile ni co twalishiba ukuti Yehova ni “Lesa wa mweo.”—Yer. 10:10; 2 Tim. 1:12.
2. Finshi twaishiba pali Yehova ifingalenga twalashipikisha amafya?
2 Yehova alamona amafya yonse ayo tukwata kabili lyonse alafwaya ukutwafwa. (2 Imila. 16:9; Amalu. 23:4) Nga tuleibukisha ukuti Lesa wesu alatusakamana kabili lyonse alafwaya ukutwafwa, tukalakwata amaka ya kushipikisha amafya yonse ayo twingakwata. Natulande pa fyo cali ku Mfumu Davidi.
3. Bushe Davidi aloseshe mwi ilyo atile “Yehova wa mweo”?
3 Davidi alishibe Yehova kabili alimucetekele sana. Ilyo Imfumu Shauli na bantu bambi balefwaya ukwipaya Davidi, Davidi alipepele kuli Yehova ukuti amwafwe. (Amalu. 18:6) Ilyo Lesa ayaswike ipepo lya kwa Davidi kabili amupususha no kumupususha, Davidi alandile ati: “Yehova wa mweo!” (Amalu. 18:46) Aya mashiwi Davidi alandile tayalepilibula fye ukuti alisumine ukuti Lesa e ko aba. Icitabo cimo citila, aya amashiwi Davidi alandile yalangilila ukuti alicetekele sana Yehova ukuti “ni Lesa wa mweo uwafwa abantu bakwe lyonse.” Davidi alishibe ukuti Lesa alemona amafya yonse ayo alekwata kabili ali no kulamwafwa, ici calengele Davidi atwalilile ukubombela Yehova no kumulumbanya.—Amalu. 18:28, 29, 49.
4. Bushe tunonkelamo shani nga ca kuti tulemona ukuti Yehova ni Lesa wa mweo?
4 Nga twashininkisha ukuti Yehova ni Lesa wa mweo kuti twaba abacincila ilyo tulemubombela. Tukalakwata amaka ya kushipikisha amesho kabili tukalafwaisha ukutwalilila ukubombesha mu mulimo wa kwa Lesa. Na kabili tukalafwaisha ukutwalilila ukuba ifibusa fya kwa Yehova.
LESA WA MWEO AKALAMUKOSHA
5. Cinshi cingalenga twacetekela ukuti Yehova akatwafwa nga twakwata amafya? (Abena Filipi 4:13)
5 Tukalashipikisha amafya ayanono na yakalamba nga ca kuti tuleibukisha ukuti Yehova wa mweo, kabili lyonse alafwaya ukutwafwa. Na kuba kuti atwafwa nga twakwata amafya. Pantu takwaba ubwafya ubwingamucila amaka, ni Lesa wa Maka Yonse kabili kuti atupeela amaka ya kushipikisha. (Belengeni Abena Filipi 4:13.) Ici cilenga twacetekela ukuti, kuti twashipikisha nga twakwata amafya. Nga twamona ifyo Yehova atwafwa nga twakwata amafya ayanono tulacetekela no kuti akatwafwa na lintu tukakwata amafya ayakalamba.
6. Finshi fyacitike ilyo Davidi ali umwaice ifyalengele acetekele sana Yehova?
6 Natulande pa fintu fibili ifyacitike ifyalengele Davidi acetekele sana Yehova. Bushiku bumo ilyo Davidi alecema impaanga sha kwa wishi ninshi ali umwaice, bere aliketepo impaanga. Ubushiku bumbi na bo, inkalamo yaliketepo impaanga. Pali iyi imiku yonse ibili, Davidi alishipile kabili alipepeeke ifi ifiswango no kupokolola impaanga. Lelo Davidi talemona ukuti acimfishe ifi ifiswango ku maka yakwe. Alishibe ukuti Yehova e wamupeele amaka ya kuti aficimfye. (1 Sam. 17:34-37) Davidi talabile ifi ifyacitike. Pa mulandu wa kuti aletontonkanya sana pali ifi ifyacitike, alicetekele sana ukuti Lesa wa mweo ali no kumwafwa na ku ntanshi.
7. Cinshi Davidi abikileko sana amano, kabili calengele shani ukuti alwe na Galyati?
7 Pa numa, ninshi Davidi acili umulumendo, aile ku nkambi ya bashilika abena Israele. Asangile ukuti abashilika abena Israeli bali no mwenso sana pantu Galyati umuPelishiti uwali ipaka ‘aleseebanya abashilika ba kwa Israele.’ (1 Sam. 17:10, 11) Icalengele abashilika babe no mwenso sana, ni co babikile amano ku fyo Galyati alemoneka na ku fyo alebeba. (1 Sam. 17:24, 25) Lelo ifi, te fyo Davidi ena abikileko sana amano. Talemona ukuti Galyati aleseebanya abashilika abena Israele lelo alemona ukuti aleseebanya “abashilika ba kwa Lesa wa mweo.” (1 Sam. 17:26) Davidi aletontonkanya sana pali Yehova. Alicetekele ukuti Lesa uwamwafwile ilyo ali kacema ali no kumwafwa na pali ilya ine nshita. E ico apo alicetekele ukuti Lesa ali no kumwafwa, alile mu kulwa na Galyati!—1 Sam. 17:45-51.
8. Cinshi cingalenga twacetekela sana ukuti Yehova akatwafwa nga twakwata amafya? (Moneni ne cikope.)
8 Na ifwe bene kuti twacimfya amesho nga ca kuti tuleibukisha ukuti Lesa wa mweo ali-ipekanya ukutwafwa. (Amalu. 118:6) Kuti twacetekela sana ukuti Yehova akulatwafwa nga ca kuti tuletontonkanya pa fyo ayafwile ababomfi bakwe ku numa. Mulebelenga amalyashi ya mu Baibo ayalanda pa fyo Yehova apuswishe ababomfi bakwe. (Esa. 37:17, 33-37) Na kabili mulebelenga nelyo muletamba ifyaba pa webusaiti yesu iya jw.org ifilanga ifyo Yehova afwa bamunyinefwe na bankashi muno nshiku. Muleibukisha ne fyo Yehova amwafwapo. Nalimo kuti mwalatontonkanya ukuti tamucitilapo nangu cimo ico mwingalinganya ku kumupususha ku nkalamo nelyo kuli bere. Icishinka ca kuti Yehova alimucitila ifintu ifingi! Alilenga mwaba cibusa wakwe. (Yoh. 6:44) Icalenga mutwalilile ukumubombela ukufika na ino nshita ni co alamwafwa. E ico mulelomba Yehova ukuti alemwafwa pa kuti muleibukisha ilyo aaswike amapepo yenu, ilyo amupeele ifyo mwalekabila pa nshita mwalefikabila, na lintu amwafwile ilyo mwakwete ubwafya. Nga muletontonkanya pa fintu fya musango uyu mukashininkisha sana ukuti Yehova akatwalilila ukumwafwa.
Ifyo tucita nga twakwata amesho filakuma ifyo Yehova omfwa (Moneni paragrafu 8-9)
9. Bushe tufwile ukulamona shani amesho tukwata? (Amapinda 27:11)
9 Nga tuleibukisha ukuti Yehova e ko aba tukeshiba ifyo tulingile ukulamona amesho ayo tukwata. Nga twakwata amesho tulingile ukubika amano ku cintu icacindama pali fyonse. Satana atila nga twakwata amafya kuti twaleka ukubombela Yehova. Kanshi ifyo tucita nga twakwata amesho filakuma ifyo Yehova omfwa. (Yobo 1:10, 11; belengeni Amapinda 27:11.) Lelo nga twatwalilila aba cishinka kuli Yehova na lintu tukwete amafya, tulanga ukuti twalitemwa Yehova kabili tulenga caishibikwa ukuti Satana Kaseebanya wa bufi. Bushe ubuteko bulamucusha pa mulandu wa kuti muli Nte ya kwa Yehova? Bushe tamulekwata indalama? Bushe abo mubilako imbila nsuma tabakutika, nelyo bushe namukwata ubwafya bumbi? Nga ca kuti ifi twalandapo e fyo cili, muleibukisha ukuti amafya ya musango uyu, yalalenga mwakwata inshita ya kulenga Yehova alasekelela. Muleibukisha no kuti, Yehova takaleke mukakwate ubwesho ubo mushingashipikisha. (1 Kor. 10:13) Akamupeela amaka ya kushipikisha amesho.
LESA WA MWEO AKAMULAMBULA
10. Finshi Lesa wa mweo akacitila abamupepa?
10 Lyonse Yehova alalambula abamupepa. (Heb. 11:6) Pali ino nshita alalenga tuleba no mutende kabili tuleteka imitima. Lyena ku ntanshi akatupeela umweo wa muyayaya. Kuti twacetekela umupwilapo ukuti Yehova alafwaya ukutulambula. Kabili ukwabula no kutwishika akatulambula. Ici cilenga tulemubombela na maka yesu yonse, nga filya fine ababomfi bakwe aba ku kale balecita. Ifi fine e fyo Timote alecita.—Heb. 6:10-12.
11. Cinshi calengele Timote alebombesha mu cilonganino? (1 Timote 4:10)
11 Belengeni 1 Timote 4:10. Timote alicetekele sana ukuti Lesa wa mweo ali no kumulambula. E calengele ukuti alebombela sana Yehova na bantu banankwe. Finshi alecita ifilanga ukuti alebombesha? Paulo akoseleshe Timote ukuti alelunduluka pa kuti alesambilisha bwino ilyo alebila imbila nsuma na lintu alesambilisha mu cilonganino. Na kabili Paulo aebele Timote ukuti abe umuntu uo aba bwananyina abaice na bakalamba bengalapashanya. Timote balimupeele ne milimo imo iyali iyakosa pamo nga ukufunda aba bwananyina ukwabula no kubapita mu mbali, pa nshita imo ine ukubalanga ukuti alibatemenwe. (1 Tim. 4:11-16; 2 Tim. 4:1-5) Inshita shimo abantu tabalemona imilimo iyo Timote alebomba kabili tabaletasha pali iyi milimo, lelo alicetekele ukuti Yehova ali no kumulambula.—Rom. 2:6, 7.
12. Cinshi cilenga baeluda batwalilile ukubombesha mu cilonganino? (Moneni ne cikope.)
12 Muno nshiku baeluda nabo kuti bacetekela ukuti Yehova alamona imilimo babomba kabili alatasha pali iyi milimo. Ukulunda pa mulimo wa kucema, ukusambilisha, no kubila imbila nsuma, baeluda abengi balafwilishako na mu mulimo wa makuule kabili balafwilishako ilyo kwaba amasanso ayakalamba. Baeluda bambi baliba na mwi Bumba lya aba Kupempula Abalwele na mu ma Komiti ya Kumfwaninamo ne Fipatala. Baeluda abaitemenwa ukubomba imilimo ya musango uyu balishiba ukuti icilonganino ca kwa Yehova te ca muntu iyo. E ico balabomba no mweo onse imilimo ya mu cilonganino kabili balicetekela sana ukuti Lesa akabalambula pa milimo babomba.—Kol. 3:23, 24.
Lesa wa mweo akamulambula nga mulebombesha mu cilonganino (Moneni paragrafu 12-13)
13. Bushe Yehova omfwa shani pa fyo tumucitila?
13 Kwena te bonse abengaba baeluda. Lelo bonse twalikwata ifyo twingapeela Yehova. Lesa wesu alatemwa nga ca kuti tulemubombela apapela amaka yesu. Alatasha nga ca kuti twasangwilako ku mulimo wa mwi sonde lyonse nangu umusangulo wesu wingaba uunono shani. Alatemwa nga amona twaimya ukuboko pa kuti twasukepo ilyo tulelongana nangu ca kuti tuli ba nsoni, kabili alatemwa nga ca kuti twaelela umuntu uutulufyenye. Nga ca kuti mumona kwati tamubombesha umulimo wa kwa Yehova nge fyo mwingafwaya ukubombesha, mulecetekela ukuti Yehova alatasha pali ifyo fine mumubombela. Alimutemwa pali ifi fine mukumanisha ukucita mu mulimo wakwe, kabili akamulambwilapo.—Luka 21:1-4.
TWALILILENI UKUBA CIBUSA WA KWA LESA WA MWEO
14. Bushe ukuba ifibusa fya kwa Yehova kulenga shani twatwalilila ukuba aba cishinka kuli ena? (Moneni ne cikope.)
14 Nga ca kuti twaba sana ifibusa na Yehova, cikatwangukila ukutwalilila ukuba aba cishinka kuli ena. Ifi fine e fyo cali kuli Yosefe. Alikaninine fye ndai ukucita ubulalelale. Alishibe ukuti ifyo ali no kucita fyali no kukuma Lesa kabili talefwaya ukumukalifya. (Ukute. 39:9) Pa kuti twingaba ifibusa fya kwa Yehova, tulingile ukulakwatako inshita iya kulapepa kuli ena, ne nshita ya kulaisambilisha Icebo cakwe. Nga tulecita ifi bucibusa bwesu na ena bukakosa. Nga twaba na bucibusa ubwakosa na Yehova nga filya Yosefe ali, tatwakafwaye ukucita nangu cimo icingamukalifya.—Yako. 4:8.
Nga mwaba cibusa wa kwa Lesa wa mweo mukatwalilila ukuba aba cishinka kuli ena (Moneni paragrafu 14-15)
15. Finshi twingasambilila ku fyo abena Israele bacitile ilyo bali mu matololo? (AbaHebere 3:12)
15 Abaleka ukucetekela Yehova balaleka bwangu ukuba aba cishinka kuli ena. Tontonkanyeni pa fyo abena Israele bacitile ilyo bali mu matololo. Balishibe ukuti Yehova e ko aba, lelo batendeke ukulatwishika nga ca kuti ali no kulabapeela ifyo balekabila. Baipwishe no kuti: “Bushe Yehova ali na ifwe nelyo iyo?” (Ukufu. 17:2, 7) Ici calengele bapondokele Lesa. Ukwabula no kutwishika, te kuti tufwaye ukucita ifyo bacitile.—Belengeni AbaHebere 3:12.
16. Cinshi cingalenga catukosela ukutwalilila ukuba ne citetekelo cakosa?
16 Ifintu fya muli cino calo filalenga catukosela ukutwalilila ukuba ifibusa fya kwa Yehova. Abantu abengi batila takwaba Lesa. Ilingi line abashikonka ifyo Lesa afwaya bamoneka kwati ifintu filabendela bwino. Nga twamona ifintu filebendela bwino, kuti catukosela ukutwalilila ukuba ne citetekelo. Nangu ca kuti twalisumina ukuti Lesa e ko aba, nalimo kuti twatendeka ukulatwishika nga kuti atwafwa. Uwalembele Amalumbo 73 na o alyumfwilepo ifi inshita imo. Alemona abantu abashalekonka amafunde ya kwa Lesa ifintu filebendela bwino. Ici calengele alatwishika nga ca kuti cali fye bwino ukulabombela Lesa.—Amalu. 73:11-13.
17. Finshi tufwile ukucita pa kuti tutwalilile ukuba ifibusa fya kwa Yehova?
17 Cinshi calengele uwalembele Amalumbo 73 aaluke mu fyo aletontonkanya? Atontonkenye pa fyali no kucitikila abantu abalekele ukucetekela Yehova. (Amalu. 73:18, 19, 27) Alitontonkenye na pa busuma bwaba mu kubombela Lesa. (Amalu. 73:24) Na ifwe bene kuti twalatontonkanya pali fyonse ifyo Yehova atucitila. Twelenganye ifyo twingaba nga ca kuti tatwalebombela Yehova. Nga tuleibukisha ubusuma ubwaba mu kubombela Yehova, tukatwalilila ukuba aba cishinka kuli ena. Lyena tukalanda nge fyo uwaimbile Amalumbo alandile, uwatile: “Lelo ine nalimona ukuti ukupalama kuli Lesa kusuma.”—Amalu. 73:28.
18. Mulandu nshi tushilingile ukutiinina ifili no kucitika ku ntanshi?
18 Muli shino nshiku sha kulekelesha kuti twashipikisha amesho yonse ayo twingakwata, pantu ‘tubombela Lesa wa mweo kabili uwa cine.’ (1 Tes. 1:9) Lesa wesu alitubikako amano kabili lyonse akulatwafwa. Talekeleshe ababomfi bakwe aba cishinka ku numa, kabili na muno nshiku mwine takalekeleshe fwe babomfi bakwe. Nomba line kuli no kuba ubucushi ubukalamba ubushabala abubako pano isonde. Na lyo line, Yehova akalatwafwa. (Esa. 41:10) E ico bonse natube “abashipa no kulanda atuti: ‘Yehova e kaafwa wandi; nshakatiine.’” —Heb. 13:5, 6.
ULWIMBO 3 Mulatupeela Amaka, Twashintilila Pali Imwe
