1-2. Bushe Yehova acindamika shani ababomfi bakwe aba cishinka?

 BUSHE Yehova mumumona shani? Nalimo kuti mwayasuka amuti, ‘Yehova ni Tata, ni Lesa wandi, kabili ni Cibusa wandi.’ Kwaliba amashiwi na yambi ayo mwingabomfya pa kulondolola Yehova. Lelo bushe kuti mwatila, kuti mwaba abeni ba kwa Yehova?

² Imfumu Davidi yalingenye Yehova ku muntu uulepokelela abeni, kabili yalingenye ababomfi ba kwa Yehova aba cishinka ku beni abo bapokelele. Yaipwishe ati: “Mwe Yehova, nani engaba umweni mwi tenti lyenu? Nani engekala mu lupili lwenu ulwa mushilo?” (Amalu. 15:1) Aya mashiwi yalelangilila ukutila kuti twaba abeni ba kwa Yehova, e kutila ifibusa fyakwe. Ala Yehova alitucindamika!

YEHOVA AFWAYA TWABA ABENI BAKWE

3. Nani abalilepo ukuba umweni wa kwa Yehova, kabili Yehova na uyu umweni baleumfwa shani?

³ Ilyo Yehova ashilabumba ifintu fyonse, ali fye eka. Lelo pa nshita imo, alipokelele Umwana wakwe ibeli mwi tenti lyakwe ilya mampalanya. Yehova alitemenwe sana pa kupokelela Umwana wakwe ibeli muli ili itenti. Baibo itila Yehova ‘alitemenwe sana’ Umwana wakwe. Uyu Mwana wakwe uwali umweni wa kubalilapo mwi tenti lyakwe ilya mampalanya, ‘alesekelela pa cinso cakwe inshita yonse.’—Amapi. 8:30.

4. Ni bani bambi abaishileba abeni mwi tenti lya kwa Yehova?

⁴ Pa numa, Yehova abumbile bamalaika kabili nabo bene baishileba abeni bakwe. Baibo ita bamalaika ukuti “abana  baume aba kwa Lesa” kabili babalondolola ukuti balasekelela pa mulandu wa kuti baliba na Yehova. (Yobo 38:7; Dan. 7:10) Pa myaka iingi, abali fye abeni ba kwa Lesa ni bamalaika abo aleikala nabo ku muulu. Lyena aishilebumba abantu kabili nabo bene baishileba abeni bakwe. Mu kupita kwa nshita, bamo abaishileba abeni ba kwa Yehova ni Enoke, Noa, Abrahamu, na Yobo. Baibo ita aba ababomfi ba kwa Lesa ukuti ifibusa fya kwa Lesa, nelyo abale-enda “na Lesa wa cine.”—Ukute. 5:24; 6:9; Yobo 29:4; Esa. 41:8.

5. Finshi tusambilila ku busesemo ubwaba pali Esekiele 37:​26, 27?

⁵ Pa myaka iingi, Yehova alitwalilila ukwita ifibusa fyakwe pa kuti babe abeni bakwe. (Belengeni Esekiele 37:​26, 27.) Ku ca kumwenako, ku mashiwi yaba mu busesemo bwa kwa Esekiele, tusambililako ukuti Yehova alafwaisha ababomfi bakwe aba cishinka baba ifibusa sana na ena. Alilaya ukuti ‘akapangana nabo icipangano ca mutende.’ Ubu ubusesemo bulanda pa nshita ilyo abakwata isubilo lya kwikala ku muulu na abakwata isubilo lya kwikala pe sonde bali no kuba mwi tenti lyakwe ilya mampalanya ngo “mukuni umo.” (Yoh. 10:16) Ifi fine e filecitika muno nshiku!

YEHOVA ALATUSAKAMANA KONSE UKO TWINGABA

6. Bushe umuntu aba shani umweni mwi tenti lya kwa Yehova, kabili bushe itenti lya kwa Yehova lisangwa fye mu cifulo cimo?

⁶ Ilyo balelemba Baibo, mwi tenti e mo abantu baletuushisha kabili itenti lyalebacingilila nga ca kuti imiceele taili bwino. Uuli mwi tenti ale-enekela ukuti uumupokelele alamusakamana bwino. Nga twaipeela kuli Yehova tuba abeni mwi tenti lyakwe ilya mampalanya. (Amalu. 61:4) Tulakwata ifya kulya fya ku mupashi ifingi kabili tulaba ifibusa na bantu ababa abeni mwi tenti lya kwa Yehova. Itenti lya kwa Yehova ilya mampalanya talyaba fye mu cifulo cimo. Nalimo mwaliyapo ku calo cimbi, limbi mu kulongana kwa citungu ukwaibela, kabili mwalimonanapo na bantu ababa ne nsansa pa mulandu wa kuti baliba mwi tenti lya kwa Lesa. Itenti lya kwa Lesa kuti lyaba konse ukwaba ababomfi bakwe aba cishinka.—Ukus. 21:3.

7. Cinshi twingalandila ukuti ababomfi ba kwa Lesa aba cishinka abafwa bacili beni mwi tenti lya kwa Yehova? (Moneni ne cikope.)

⁷ Finshi twingalanda pa babomfi ba kwa Lesa aba cishinka abafwa? Bushe nabo bene kuti twatila bacili abeni mwi tenti lya kwa Yehova? Ee! Cinshi twingalandila ifi? Pantu  Yehova acili alebukisha abantu ba musango uyu. Yesu alondolwele ati: “Nangu fye ni Mose alilandilepo pa kubuushiwa kwa bafwa, mu lyashi ililanda pa cimpusa ca myunga, ilyo aitile Yehova ati ‘Lesa wa kwa Abrahamu, Lesa wa kwa Isaki kabili Lesa wa kwa Yakobo.’ Te Lesa wa bafwa iyo, lelo wa ba mweo, pantu ena bonse abamona fye ukuti ba mweo.”—Luka 20:​37, 38.

TUNONKELAMO SHANI MU KUBA ABENI BA KWA YEHOVA, LELO FINSHI AFWAYA TULECITA?

8. Bushe abeni ababa mwi tenti lya kwa Yehova banonkelamo shani?

⁸ Nga filya fine uuli mwi tenti atuusha kabili limucingilila nga ca kuti imiceele taili bwino, e fyo ne tenti lya kwa Yehova ilya mampalanya licingilila abalimo ku fingalenga bucibusa bwabo na Yehova bwapwa, kabili alalenga bakwata ne subilo lya cine cine. Nga twatwalilila ukuba ifibusa fya kwa Yehova, Satana te kuti acite nangu cimo icingalenga bucibusa bwesu na Yehova bwapwa. (Amalu. 31:23; 1 Yoh. 3:8) Mu calo cipya, Yehova takalecingilila fye ababomfi bakwe ku fingalenga bucibusa bwabo na ena bwapwa lelo akalabacingilila na ku mfwa.—Ukus. 21:4.

9. Finshi Yehova enekela ababa abeni mwi tenti lyakwe ukulacita?

⁹ Ala Yehova alitucindamika ifi atwita pa kuti tube abeni mwi tenti lyakwe, kuti twaba ifibusa fyakwe umuyayaya. Finshi tufwile ukucita pa kuti tutwalilile ukuba abeni mwi tenti lya kwa Yehova? Nga ca kuti bamo balimwitile ku mwabo kuti mwafwaya ukwishiba ifyo balemwenekela ukulacita. Ku ca kumwenako, uumwitile kuti aenekela ukuti mufuule insapato ilyo mushilaingila mu ng’anda kabili kuti mwaitemenwa ukucita ifi. Ifi fine e fyo caba, kuti twafwaya ukwishiba ifyo Yehova enekela abafwaya ukutwalilila ukuba mwi tenti lyakwe ukulacita. Pa mulandu wa kuti twalitemwa Yehova, tulacita “ifya kumusekesha.” (Kol. 1:10) Na kabili nangu ca kuti tumona Yehova ukuti ni Cibusa wesu, twalishiba ukuti ni Lesa wesu, ni Shifwe, uo tulingile ukulacindika. (Amalu. 25:14) Tatufwile ukulaba ici icishinka kabili tufwile ukulamucindika inshita yonse. Nga tulemucindika sana tatwakulafwaya ukulacita nangu fimo ifingamukalifya. Ukwabula no kutwishika tufwaya ‘ukulaenda bufuuke bufuuke’ na Lesa wesu.—Mika 6:8.

YEHOVA TALI NA KAPAATULULA KU BENA ISRAELE ILYO BALI MU MATOLOLO

10-11. Bushe ifyo Yehova alecitila abena Israele ilyo bali mu matololo ya Sinai filanga shani ukuti taba na kapaatulula?

¹⁰ Yehova taba na kapaatulula ku beni bakwe. (Rom. 2:11) Kuti twasambilila ifyo Yehova ashaba na kapaatulula ku fyo alecitila abena Israele ilyo bali mu matololo ya Sinai.

¹¹ Ilyo Yehova alubwile abantu bakwe mu busha mu Egupti, alisontele bashimapepo aba kubombela pe tenti ilya mushilo. Alisontele na bena Lebi ukuti balebomba imilimo imbi pali ili itenti lya mushilo. Bushe Yehova alesakamana sana abalebombela pali ili itenti nelyo abaleikala mupepi ne ili tenti ukucila ifyo alesakamana bambi? Awe! Yehova taba na kapaatulula.

12. Bushe ifyo Yehova alecitila uluko lwa bena Israele ilyo bali mu matololo fyalelanga shani ukuti taba na kapaatulula? (Ukufuma 40:38) (Moneni ne cikope.)

¹² Umwina Israele onse ali no kuba cibusa wa kwa Yehova, nampo nga alebombela pe tenti lya mushilo, aleikala mupepi ne tenti lya mushilo nelyo iyo. Ku ca kumwenako, Yehova aleshininkisha ukuti uluko  lonse lulemona intumba ye kumbi ne ntumba ya mulilo ifyaleba pa muulu wa ili tenti lya mushilo. (Belengeni Ukufuma 40:38.) Kanshi intumba ye kumbi nga yatampa ukwenda, abena Israele bonse kumo na baleikalila ukutali baleimona. Lyena baletampa ukulonga ifipe, balefumya amatenti yabo no kutendeka ukwendela pamo na bena Israele banabo. (Impe. 9:​15-23) Bonse baleumfwa iciunda ca mapenga yabili aya silfere, icalelangilila ukuti bonse balingile ukutampa ukwenda. (Impe. 10:2) Cailanga fye apabuuta tuutu ukuti ukwikala mupepi ne tenti lya mushilo takwalepilibula ukuti ninshi umuntu ni cibusa sana na Yehova ukucila abaleikala ukutali ne tenti lya mushilo. Lelo, umwina Israele onse mu luko ali no kuba umweni wa kwa Yehova kabili ali no kucetekela ukuti Yehova ali no kulamutungulula no kulamucingilila. Ifi fine e fyo caba na muno nshiku, te mulandu no ko twikala Yehova alitutemwa, alatusakamana kabili alatucingilila.

IFILANGA UKUTI YEHOVA TABA NA KAPAATULULA MUNO NSHIKU

13. Cinshi twingalandila ukuti Yehova taba na kapaatulula na muno nshiku mwine?

¹³ Ababomfi ba kwa Lesa bamo muno nshiku bekalila mupepi no kwabela amaofesi yakalamba nelyo ukwabela ama Bethel. Na kuba bamo babombela na pali aya yene amaofesi. Ici cilenga balebomba imilimo iingi iibombwa muli aya maofesi kabili cilenga balebombela pamo na batungulula mu cilonganino. Bamo ni bakangalila wa muputule, bambi balabomba imilimo imbi mu mulimo wa nshita yonse uwaibela. Nga ca kuti tamwakwatako ishuko lya kubombako imilimo ya musango uyu, na imwe bene kuti mwacetekela ukuti mucili abeni ba kwa Yehova kabili alimutemwa. Alimwishiba bwino kabili alamupeela ifyo mukabila. (1 Pet. 5:7) Yehova alapeela ababomfi bakwe bonse ifya kulya fya ku mupashi, alabatungulula kabili alabacingilila.

14. Ni nshila nshi na imbi iyo Yehova alangilamo ukuti taba na kapaatulula?

 ¹⁴ Inshila na imbi iyo Yehova alangilamo ukuti taba na kapaatulula muno nshiku, kulenga abantu mwi sonde lyonse bakwata ishuko lya kubelenga Baibo. Amalembo ya Mushilo pa kubalilapo bayalembele mu lulimi lwa ciHebere, iciAramaiki, ne ciGriki. Bushe ici cilolele mu kuti ababelenga ishi ndimi shitatu umo Baibo yalembelwe pa kubala kuti baba ifibusa sana na Yehova ukucila abashaishiba ukubelenga ishi indimi? Awe te mo calola.—Mat. 11:25.

15. Finshi filanga ukuti Yehova taba na kapaatulula? (Moneni ne cikope.)

¹⁵ Icilenga twaba ifibusa fya kwa Yehova, te masambililo twakwata nelyo ni co twalishiba indimi shitatu isho Baibo yalembelwemo pa kubala. Lelo Yehova alapeela abantu bonse pano isonde amano yakwe, nampo nga balisambilila sana nelyo iyo. Baibo Icebo cakwe calipilibulwa mu ndimi ishingi. E ico abantu mu calo conse kuti baishiba ifyo isambilisha kabili kuti baishiba ifyo bafwile ukucita pa kuti babe ifibusa fyakwe.—2 Tim. 3:​16, 17.

TWALILILENI UKUBA ABENI BA KWA YEHOVA

16. Ukulingana na Imilimo 10:​34, 35, finshi tufwile ukucita pa kuti Yehova engatupokelela?

¹⁶ Ala Yehova alitucindamika ifi atwita ukuba abeni mwi tenti lyakwe ilya mampalanya. Wa cikuuku nga nshi, alitutemwa icine cine, kabili takwaba uwingatupokelela bwino ukucila ifyo Yehova atupokelela. Na kabili taba na kapaatulula, alapokelela fye bonse te mulandu no ko bekala, inkulilo yabo, amasambililo bakwata, uluko lwabo, umutundu wabo, imyaka yabo, nampo nga baume nelyo banakashi. Lelo abo Yehova asuminisha fye ukuba abeni bakwe, bantu abamumfwila.—Belengeni Imilimo 10:​34, 35.

17. Ni kwi twingasanga fimbi ifyo tufwile ukulacita pa kuti twingatwalilila ukuba mwi tenti lya kwa Yehova?

¹⁷ Nga fintu Baibo ilanda pa Amalumbo 15:​1, Davidi aipwishe ati: “Mwe Yehova, nani engaba umweni mwi tenti lyenu? Nani engekala mu lupili lwenu ulwa mushilo?” Lyena Yehova abomfeshe Davidi wine pa kwasuka aya amepusho. Mu cipande cikonkelepo tukalanda pali fimo fimo ifyo tufwile ukulacita pa kuti Yehova engatupokelela mwi tenti lyakwe ilya mampalanya.