YESU asobele ukuti mu nshiku sha ku mpela abasambi bakwe bali no kulobolola ifingi. (Mat. 9:37; 24:14) Natulande pa fyo ifyo asobele filefikilishiwa mu nshila iyaibela mu citungu ca Transcarpathia, mu calo ca Ukraine. Mu matauni yatatu fye ayapalamana ayaba muli ici citungu mwaba ifilonganino 50 na bakasabankanya ukucila pali 5,400. * Ala muli ici citungu mwaliba ba Nte abengi ica kuti pa bantu 4 umo ni Nte!

Bushe abantu ba muli aya matauni baba shani? Munyinefwe Vasile atile: “Abantu kuno balicindika Baibolo, balitemwa umulinganya, indupwa shalikatana sana, kabili balafwana sana. Nomba te lyonse basumina ifyo twasuminamo. Lelo nga mwabalanga fimo mu Baibolo balakutika sana.”

Kwena aba bwananyina balakwata amafya yamo ilyo balebila imbila nsuma nangu ca kuti muli iyi ncende mwaliba bakasabankanya abengi. Ku ca kumwenako, mu cilonganino cimo mwaba bakasabankanya 134 lelo muli ici cifulo mwaba fye amayanda ya bantu 50! Bushe bakasabankanya bacita shani pa kuti baleshimikila abantu imbila nsuma?

Aba bwananyina abengi balaipeelesha pa kuti balebila mu ncende umwaba ukukabila. Munyinefwe Ionash uuli ne myaka 90 alandile ati: “Kasabankanya umo muli ici cifulo alingile ukubila pa mayanda yabili. Mbila mu mushi, lelo ilyo nali no bumi ubusuma, naleya mu kubila ku cifulo ukushaba aba kubila imbila nsuma apalepa amakilomita 160 kabili nalebila mu ciHungarian.” Bakasabankanya bafwile ukuipeelesha pa kuti basambilishe abantu abekala mu ncende shimbi. Ba Ionash na kabili batile: “Pa kuti nicelwa ukunina ishitima, nalebuuka ku ma 04:00 kabili nalebila mpaka 18:00 ilyo ishitima lyalebwelelamo. Nalecita ifi fine pa nshiku shibili nelyo shitatu mu mulungu.” Bushe balemona ukuti baleicusha fye ifi balebombesha? Batile: “Nali ne nsansa nga nshi ilyo nalebila imbila nsuma. Nalyafwile ulupwa ulwaleikala kuli ilya ncende ukusambilila icine.”

Kwena te ba bwananyina bonse mu filonganino muli iyi ncende abengakumanisha ukubila ku ncende ishaba ukutali. Lelo bonse fye ukubikako fye na bakalamba, balabombesha mu fifulo umo ifilonganino fyabo fibilamo imbila nsuma. Ifi bacita fyalengele hafu ya bantu bonse abekala muli aya amatauni basangwa ku Cibukisho mu 2017. Ukwabula no kutwishika, konse fye uko twingalabila imbila nsuma kuti twaba “abacincila pe mu mulimo wa kwa Shikulu.”—1 Kor. 15:58.