ICIPANDE CA KUSAMBILILAMO 46
ULWIMBO 49 Ukulenga Umutima wa kwa Yehova Ukusekelela
Bamunyinefwe—Bushe Mulebombesha pa Kuti Mwingafikapo Ukuba Ababomfi Batumikila?
“Mwaliba insansa ishingi mu kupeela ukucila mu kupokelela.”—IMIL. 20:35.
IFYO TWALASAMBILILAPO
Cino cipande calakoselesha bamunyinefwe ababatishiwa ukuti balebombesha pa kuti bengafikapo ukuba ababomfi batumikila.
1. Bushe umutumwa Paulo alemona shani ababomfi batumikila?
ABABOMFI batumikila balabomba imilimo iyacindama mu filonganino. Ukwabula no kutwishika umutumwa Paulo alicindike ababomfi batumikila pa mulandu ne milimo balebomba. Ku ca kumwenako, ilyo alembeele Abena Kristu mu Filipi kalata, aliposeshe ababomfi batumikila na baeluda mu kulungatika.—Fil. 1:1.
2. Bushe munyinefwe uwe shina lya kuti Luis omfwa shani pa kuba umubomfi utumikila mu cilonganino?
2 Bamunyinefwe abengi ababatishiwa nampo nga baice nelyo bakalamba balatemwa ukubomba imilimo iyo ababomfi batumikila babomba mu cilonganino. Ku ca kumwenako, munyinefwe uwe shina lya kuti Devan bamusontele ukuba umubomfi utumikila ninshi ali ne myaka 18. Lelo munyinefwe uwe shina lya kuti Luis ena bamusontele ukuba umubomfi utumikila ilyo acilileko panono imyaka 50. Munyinefwe Luis alandile ifyo bamunyinefwe abengi bengalanda. Alandile ati: “Naliba ne nsansa sana ifi mombela bamunyinefwe na bankashi imilimo iyo ababomfi batumikila babomba mu cilonganino, balinanga ukuti balintemwa sana kanshi na ine e nshila ningabalangilamo ukuti nalibatemwa!”
3. Mepusho nshi twala-asuka muli cino cipande?
3 Nga ca kuti mwalibatishiwa nomba pali ino nshita tamuli babomfi batumikila, bushe kuti mwabombesha pa kuti mwingafikapo ukuba umubomfi utumikila? Finshi fingalenga mwalafwaisha ukuba umubomfi utumikila? Bushe Baibo ilanda ukuti mibele nshi mufwile ukukwata pa kuti mwingafikapo ukuba umubomfi utumikila? Twala-asuka aya mepusho muli cino cipande. Nomba natubalilepo ukulanda pa milimo iyo ababomfi batumikila babomba.
MILIMO NSHI ABABOMFI BATUMIKILA BABOMBA?
4. Milimo nshi ababomfi batumikila babomba? (Moneni ne cikope.)
4 Umubomfi utumikila ni munyinefwe uwabatishiwa uo umupashi wa mushilo usonta pa kuti aleafwa baeluda ilyo balebomba imilimo iyacindama mu cilonganino. Ababomfi batumikila bamo balashininkisha ukuti bakasabankanya nabakwata icifulo ca kubombelamo ne mpapulo isha kubomfya mu mulimo wa kubila imbila nsuma. Bambi balawamya Amayanda ya Bufumu no kuwamya ifileonaika. Na kabili ababomfi batumikila balaba bakapyunga kabili balabombela ku fisoselo ilyo aba bwananyina balelongana. Imilimo iingi iyo ababomfi batumikila babomba ya kwafwa aba mu cilonganino. Icacilapo ukucindama ca kuti ababomfi batumikila balitemwa Yehova kabili balakonka amafunde yakwe. Na kabili balitemwa sana aba bwananyina. (Mat. 22:37-39) Bushe munyinefwe uwabatishiwa kuti acita shani pa kuti afikepo ukuba umubomfi utumikila?
Ababomfi batumikila balapashanya Yesu nga ca kuti baleipeelesha ukubombela aba mu cilonganino (Moneni paragrafu 4)
5. Bushe munyinefwe uwabatishiwa kuti acita shani pa kuti afikepo ukuba umubomfi utumikila?
5 Baibo yalilanda pa mibele iyo munyinefwe uwabatishiwa afwile ukukwata pa kuti engafikapo ukuba umubomfi utumikila. (1 Tim. 3:8-10, 12, 13) Kuti mwafikapo ukuba umubomfi utumikila nga ca kuti muleisambilisha pali iyi mibele. Lyena mufwile ukuibikilishako pa kuti mwingakwata iyi imibele. Nomba mufwile ukubalilapo ukubika sana amano ku co mulefwaila ukuba umubomfi utumikila.
CINSHI MULEFWAILA UKUBA UMUBOMFI UTUMIKILA?
6. Cinshi cifwile ukulenga mulefwaya ukuba umubomfi utumikila? (Mateo 20:28; moneni ne cikope.)
6 Tontonkanyeni pali Yesu uo tufwile ukulapashanya sana. Icalelenga alecita fyonse ifyo alecita, ni co alitemenwe Wishi na bantu. Ukutemwa atemenwe Wishi na bantu kwalengele alebombesha kabili alebomba ne milimo iyo abantu bamona ukuti ya panshi. (Belengeni Mateo 20:28; Yoh. 13:5, 14, 15) Nga ca kuti ukutemwa e kwalenga mufwaye ukuba umubomfi utumikila, Yehova akamwafwa pa kuti mukafikepo ukuba umubomfi utumikila.—1 Kor. 16:14; 1 Pet. 5:5.
Filya Yesu acitile, alesambilisha abatumwa bakwe ukuti balingile ukuba abaicefya no kulabombela abantu ukucila ukulafwaya ififulo fya pa muulu (Moneni paragrafu 6)
7. Mulandu nshi munyinefwe ashilingile ukulafwaila ukuba umubomfi utumikila pa mulandu fye wa kuti alefwaya abantu balemumona ukuti alicindama?
7 Muli cino calo, abantu balakumbwa abantu abaimona ukuti balicindama. Lelo ifi te fyo caba mu cilonganino ca kwa Yehova. Uwa bwananyina uwatemwa abantu nge fyo Yesu abatemenwe, tamona ukuti afwile ukukwata icifulo ca pa muulu nelyo abantu balemumona ukuti alicindama. Nga ca kuti umuntu uufwaya ukuti abantu balemumona ukuti alicindama ukucila bambi bamusonta ukuba umubomfi utumikila mu cilonganino, nalimo kuti alakaana ukubombela abantu ba kwa Yehova imilimo iimoneka ukuti ya panshi. Kuti alamona ukuti alicindama sana tafwile ukubomba imilimo ya musango uyu. (Yoh. 10:12) Yehova te kuti apaale munyinefwe uulefwaya ukuba umubomfi utumikila pa mulandu wa kuti alefwaya abantu balemumona ukuti alicindama sana.—1 Kor. 10:24, 33; 13:4, 5.
8. Bushe Yesu afundile shani abatumwa bakwe?
8 Inshita shimo na bali ifibusa sana na Yesu balefwaya ukukwata imilimo imo, lelo ico balefwaila ukukwata iyi milimo ni co balefwaya ukulumbuka. Tontonkanyeni pa fyo Yakobo na Yohane abali abatumwa aba kwa Yesu bacitile. Balombele Yesu ukuti akabapeele ififulo fyacindama mu Bufumu bwakwe. Yesu tabatashishe pali ifi bamulombele. Lelo alondolwelele abatumwa bakwe bonse 12 ati: “Onse uufwaya ukuba umukalamba pali imwe, afwile ukulamubombela, na onse uufwaya ukuba uwa ntanshi pali imwe, afwile ukulamubombela imwe bonse.” (Marko 10:35-37, 43, 44) Bamunyinefwe abafwaya ukuba ababomfi batumikila pa mulandu wa kuti balefwaya ukulabombela aba bwananyina, balafwa sana aba mu cilonganino.—1 Tes. 2:8.
FINSHI FINGALENGA MWALAFWAISHA UKUFIKAPO UKUBA UMUBOMFI UTUMIKILA?
9. Kuti mwacita shani pa kuti mulefwaisha ukufikapo ukuba umubomfi utumikila?
9 Ukwabula no kutwishika mwalitemwa Yehova kabili mulafwaya no kulabombela aba bwananyina. Nomba nalimo te kuti mufwaye ukulabomba imilimo iyo ababomfi batumikila babomba. Kuti mwacita shani pa kuti mulefwaya ukulabomba imilimo imo iyo abatumikila babomba? Tontonkanyeni pa fyo mwingalasekelela nga mulebombela aba bwananyina. Yesu atile: “Mwaliba insansa ishingi mu kupeela ukucila mu kupokelela.” (Imil. 20:35) Yesu alecita ifi alandile. Alesekelela ilyo alebombela abantu, kabili na imwe bene kuti mulesekelela.
10. Bushe Yesu alangile shani ukuti aleba ne nsansa pa mulandu wa kuti alebombela abantu? (Marko 6:31-34)
10 Natulande pali cimo icalelanga ukuti Yesu aleitemenwa ukubombela abantu. (Belengeni Marko 6:31-34.) Bushiku bumo Yesu na basambi bakwe balinakile. Baleya ku ncende imo uko balefwaya ukuba fye beka pa kuti bengatushako. Lelo ibumba lya bantu lyalibatangilile pantu balefwaya ukuti Yesu abasambilishe. Yesu nga alefwaya nga alibebele ukuti tabasambilishe. Pantu na kuba ena na basambi bakwe “tabakwete ne nshita ya kutushako nangu ya kuti fye balyeko ifya kulya.” Lelo alafwaya nga apelelele fye pa kubasambilisha ifintu ifinono, abeba no kuti babwelelemo. Nomba pa mulandu wa kuti alitemenwe abantu, ‘alitendeke ukubasambilisha ifintu ifingi, kabili alitwalilile ukubasambilisha mpaka ne nshita yapwa.’ (Marko 6:35) Ico abasambilishishe ifi te pa mulandu wa kuti alingile ukucita ifi, lelo ni co “alibomfwilile uluse.” Alefwaya ukubasambilisha pa mulandu wa kuti alibatemenwe. Yesu alesekelela nga nshi pa mulandu wa kuti alebombela abantu.
11. Bushe Yesu ayafwile shani abantu mu fyo balekabila? (Moneni ne cikope.)
11 Ilyo Yesu alebombela abali mwi bumba, tapelelele fye pa kubasambilisha. Lelo alibapeele ne fyo balekabila. Alifushishe ifya kulya mu cipesha mano kabili aebele abasambi bakwe ukuti bapeele abantu. (Marko 6:41) Ifi acitile alesambilisha abasambi bakwe ifya kulabombela abantu. Kabili alibalangilile ukuti imilimo imo pamo nge yo ababomfi batumikila babomba yalicindama. Tontonkanyeni pa fyo abasambi ba kwa Yesu batemenwe pa kubombela pamo na Yesu umulimo wa kupeela abantu ifya kulya ica kuti “bonse baliliile baikuta no kwikuta”! (Marko 6:42) Ici ca kumwenako fye cimo pa fyo Yesu alebika sana amano ku fyo abantu balekabila ukucila ukubika amano ku fyo ena alekabila. Ifi fine e fyo alecita ilyo ali pano isonde. (Mat. 4:23; 8:16) Yesu aleba ne nsansa ilyo alesambilisha abantu na lintu alebafwa mu fyo balekabila. Ukwabula no kutwishika na imwe bene mwakulasekelela nga nshi nga ca kuti ico mulefwaila ukubela umubomfi utumikila kulabombela aba bwananyina.
Nga ca kuti mwalitemwa Yehova kabili mulefwaisha ukulabombela aba bwananyina, mukalaitemenwa ukubomba imilimo yonse iyo bamupeela (Moneni paragrafu 11) a
12. Mulandu nshi tushifwile ukulamwena ukutila takwaba imilimo nangu imo iyo twingabomba mu cilonganino?
12 Nga ca kuti mumona ukuti takwaba umulimo uo mwaishiba sana, tamufwile ukufuupuka. Mulandu nshi? Pantu ukwabula no kutwishika mwalikwata imibele imo iingalenga mwala-afwa aba mu cilonganino. Nalimo kuti mwatontonkanya pa fyo Paulo alandile pali 1 Abena Korinti 12:12-30. Lyena kuti mwalomba Yehova ukuti amwafwe pa kuti mumone ifyo mwingalakonka ifyaba pali ili ilembo. Amashiwi ayo Paulo alandile yalangilila fye apabuuta tuutu ukuti mwalikwata umulimo uwacindama mu filonganino nga filya fine bonse aba mu filonganino bakwata. Nga ca kuti pali ino nshita tamufikilepo ukuba umubomfi utumikila, tekwesha ukunenuka lelo mufwile ukucita ifyo mwingakumanisha pa kuti mulebombela Yehova kabili muleafwa na ba bwananyina. Kuti mwacetekela ukuti baeluda bakamona ifyo mwaba kabili bakamupeela imilimo iyo balemona ukutila kuti mwakumanisha ukubomba.—Rom. 12:4-8.
13. Finshi twingalanda pa mibele iyo ababomfi batumikila balingile ukukwata?
13 Tontonkanyeni na pali cimbi ico mulingile ukulaibikilishishako pa kuti mwingafikapo ukuba umubomfi utumikila. Imibele iyo ababomfi batumikila bafwile ukukwata e yo na Bena Kristu bonse bafwile ukukwata. Abena Kristu bonse balingile ukuba ifibusa fya kwa Yehova, bafwile ukulaitemenwa ukupeela abantu kabili bafwile ukulacita ifingalenga Yehova alasekelela. Kanshi mufwile mwalikwata kale iyi imibele. Nomba mibele nshi munyinefwe uwabatishiwa afwile ukukwata pa kuti engafikapo ukuba umubomfi utumikila?
IMIBELE IYO MULINGILE UKUKWATA PA KUTI MUFIKEPO UKUBA UMUBOMFI UTUMIKILA
14. Bushe amashiwi ya kuti “ukulabika amano ku fintu” yalola mwi? (1 Timote 3:8-10, 12)
14 Nomba natulande pa mibele imo iyo Baibo yalandapo pali 1 Timote 3:8-10, 12. (Belengeni.) Umubomfi utumikila alingile “ukulabika amano ku fintu.” Aya amashiwi kuti yapilibula no kuti alacita ifintu ifingalenga abantu “bamucindika.” Lelo ici tacipilibula ukuti umubomfi utumikila tafwile ukulaseka na bantu. (Luk. Mil. 3:1, 4) Lelo alingile ukulabika sana amano ku milimo yonse iyo bamupeela. Nga ca kuti aba bwananyina bamwishiba ukuti mulabomba bwino imilimo yonse iyo bamupeela, bakamucetekela kabili bakamucindika.
15. Bushe amashiwi ya kuti ‘tafwile ukuba uwa ndimi shibili’ na ya kuti ‘tafwile ukuba uwatemwisha ubunonshi bwa bufumfuntungu’ yalola mwi?
15 Amashiwi ya kuti, ‘tafwile ukuba uwa ndimi shibili’ yalola mu kuti afwile ukuba uwa cishinka, umufumacumi kabili uo abantu bengacetekela. Aya amashiwi yalola na mu kuti umubomfi utumikila alafikilisha ifyo alaya kabili tabepa abantu. (Amapi. 3:32) Amashiwi ya kuti “tabafwile ukuba abatemwisha ubunonshi bwa bufumfuntungu” yalola mu kuti umubomfi utumikila afwile ukuba uwa cishinka mu fyo acita amakwebo na mu fyo abomfya indalama. Umubomfi utumikila tafwile ukulapangila indalama pa ba bwananyina.
16. (a) Bushe amashiwi ya kuti ‘tafwile ukutemwisha umwangashi uwingi’ yalola mwi? (b) Bushe amashiwi ya kuti ukuba na ‘kampingu iyasanguluka’ yalola mwi?
16 Amashiwi ya kuti ‘tafwile ukutemwisha umwangashi uwingi’ yalola mu kuti umubomfi utumikila tafwile ukulanwa ubwalwa ubwingi kabili tafwile ukwishibikwa ukuti alanwa sana. Amashiwi ya kuti afwile ukuba na “kampingu iyasanguluka” yalola mu kuti umubomfi utumikila afwile ukulakonka amafunde ya kwa Yehova muli fyonse ifyo acita. Nangu ca kuti ababomfi batumikila tabapwililika, balaba ifibusa na Lesa. Ne ci cilenga baleba na kampingu iyasanguluka.
17. Bushe amashiwi ya kuti “babale babeshe pa kuti bamone nga nabalinga” yalola mwi? (1 Timote 3:10; moneni ne cikope.)
17 Amashiwi ya kuti “babale babeshe pa kuti bamone nga nabalinga” yalola mu kuti baeluda balimona kale ukuti umuntu alabomba bwino imilimo iyo bamupeela kabili kuti bamucetekela. E ico baeluda nga bamupeela umulimo, mufwile ukubikako sana amano no kukonka ifyo bamweba ne fyo icilonganino ca kwa Yehova calanda ukuti e fyo mufwile ukubomba uyo milimo. Muleshininkisha ukuti namwishiba ifyo mufwile ukubomba uyo mulimo ne nshita mufwile uku-upwishishapo. Nga mulebomba bwino imilimo iyo balemupeela, aba bwananyina mu cilonganino bakalamona kabili bakalamutasha pa fyo mulelunduluka. Baeluda muleshininkisha ukuti mulesambilisha bamunyinefwe ababatishiwa imilimo. (Belengeni 1 Timote 3:10.) Bushe mu cilonganino mwaba mwaliba bamunyinefwe ababatishiwa abali ne myaka 15 nelyo ukucepako? Bushe lyonse balaisambilisha Baibo, kabili balapekanya bwino ilyo bashilaisa mu kulongana. Bushe lyonse nga mulelongana balasukapo kabili bushe lyonse balabila imbila nsuma? Nga balacita ifi, kuti mwalabapeelako imilimo iyo bengakumanisha ukubomba ukulingana no mushinku wabo. Nga mulecita ifi, ninshi mule-esha aba bamunyinefwe pa kuti ‘mumone nga nabalinga.’ Lyena ilyo bakafisha imyaka pa kati ka 17 na 19 kuti bafikapo ukuba ababomfi batumikila.
Nga ca kuti baeluda balepeela bamunyinefwe ababatishiwa imilimo, ninshi ‘balebesha’ pa kuti bamone nga nabalinga (Moneni paragrafu 17)
18. Bushe amashiwi ya kuti “tabali no mulandu” yalola mwi?
18 Amashiwi ya kuti “tabali no mulandu” yalola mu kuti umuntu te kuti bamutunganye ukuti alicita ulubembu ulukalamba. Kwena inshita shimo Abena Kristu kuti bababepesha. Yesu balemubepesha ubufi kabili alisobele ukuti abasambi bakwe nabo bali no kulababepesha. (Yoh. 15:20) Lelo nga ca kuti namukwata imibele iisuma nge yo Yesu akwete, aba mu cilonganino bakamucetekela.—Mat. 11:19.
19. Bushe amashiwi ya kuti “umwaume uwakwata umukashi umo” yalola mwi?
19 “Umwaume uwakwata umukashi umo.” Nga ca kuti mwalyupa, mufwile ukulakonka filya fine Yehova atantika ukuti umwaume afwile ukuupa fye umwanakashi umo. (Mat. 19:3-9) Umwaume Umwina Kristu tafwile ukucita ubucende. (Heb. 13:4) Aya amashiwi yalola na mu kuti umwaume afwile ukuba uwa cishinka ku mwina mwakwe lyonse, tafwile ukulalanga abanakashi bambi icintemwa.—Yobo 31:1.
20. Bushe umwaume kuti atungulula shani bwino aba mu ng’anda yakwe?
20 “Uutungulula bwino abana bakwe na ba mu ng’anda yakwe.” Nga ca kuti mwalikwata ulupwa, mufwile ukulabomba bwino imilimo yenu yonse. Lyonse muletungulula amapepo ya lupwa. Libili libili mulebomba na bena mwenu na bana umulimo wa kubila imbila nsuma. Muleafwa abana benu pa kuti bengaba ifibusa na Yehova. (Efes. 6:4) Nga ca kuti umwaume alasunga bwino ulupwa lwakwe ninshi kuti asunga bwino ne cilonganino.—Linganyeniko 1 Timote 3:5.
21. Finshi mwingacita nga ca kuti pali ino nshita tamuli babomfi batumikila?
21 Bamunyinefwe nga ca kuti pali ino nshita tamuli babomfi batumikila, kuti cawama mwabelenga cino cipande mu mutima nteeka no kupepelapo kuli Yehova. Pitulukeni bwino mu mibele iyo umubomfi utumikila afwile ukukwata kabili muibikilisheko pa kuti mwingakwata iyo mibele. Tontonkanyeni pa fyo mwatemwa Yehova na bamunyinenwe na bankashi. Mulecita ifingalenga mwatemenwako aba bwananyina kabili muletontonkanya pa co mulefwaila ukulabombela aba bwananyina. (1 Pet. 4:8, 10) Ibikilisheniko pa kuti mwingaba ababomfi batumikila. Nga mwacita ifi mukalasekelela sana ilyo mukalabombela aba bwananyina mu cilonganino.E ico Yehova nalemupaala pa fyo mulebombesha pa kuti mwingafikapo ukuba umubomfi utumikila!—Fil. 2:13.
ULWIMBO 17 “Ndefwaya”
a UBULONDOLOSHI BWA FIKOPE : Ku kuso, Yesu alebombela abantu, ku kulyo, umubomfi utumikila ale-ensha munyinefwe umukalamba pa kacinga ka balemana.
