BUSHE cilamukosela ukuisambilisha Baibo cila mulungu? Bushe inshita shimo mulomfwa ubunang’ani bwa kuisambilisha Baibo? Bonse fye inshita shimo tulomfwa ifi. Nomba tontonkanyeni pa fintu fimo ifyo tucita lyonse pamo nga ukusamba. Pa kusamba tulapoosapo inshita na maka, lelo nga twasamba tulomfwa bwino sana. Ukuisambilisha Baibo kuti twakulinganya ku fyo tumfwa nga ‘twaisangulwila ku menshi, e kutila ku cebo ca kwa Lesa.’ (Efes. 5:26) Natulande pali fimo ifyo twingacita pa kuti tuleisambilisha Baibo lyonse:

• Muletantika inshita ya kuisambilisha. Ukuisambilisha Baibo kwaba pa fintu “ifyacilapo ukucindama” ifyo Umwina Kristu alingile ukubikako amano. (Fil. 1:10) Pa kuti muleibukisha inshita iyo mwatantika ukuisambilisha, kuti cawama mwabika apo mwalemba ifyo mwatantika apa kutila kuti mulepamona bwangu. Nelyo kuti mwabika alamu pali foni nelyo tabuleti pa kuti ilemwibukishako inshita ya kuisambilisha nga yapalama.

• Muletontonkanya pa fingalenga mwabikako amano ilyo muleisambilisha. Bushe cilamukosela ukuisambilisha pa nshita iitali, nelyo mukumanisha fye ukuisambilisha pa nshita iinono? Mwe bene mwali-ishiba bwino. Muletantika inshita ya kuisambilisha ukulingana ne fyo mwaba. Nga ca kuti inshita ya kuisambilisha mwatantika yafika e lyo muleumfwa ubunang’ani bwa kuisambilisha, bushe te kuti ciwame nga mwaisambilishako fye nangu pa mamineti 10? Fingi mukaisambilisha mu mamineti 10, ukucila ukukanaisambilisha nangu cimo. Kabili nga mwatendeka ukuisambilisha, kuti mwafwaya ukutwalilila ukuisambilisha.—Fil. 2:13.

• Mulesalila limo ifyo mulefwaya ukuisambilishapo. Nga ca kuti inshita ya kuisambilisha yafika e lyo mwatendeka ukutontonkanya pa fyo mwalaisambilishapo, ninshi ‘tamulebomfya bwino inshita yenu.’ (Efes. 5:16) Bushe te kuti ciwame mwalembela limo amalyashi mulefwaya ukuisambilishapo? Ku ca kumwenako, nga ca kuti pali fimo ifyo mushumfwikishe, kuti mwafilemba pa kuti mukesesambililapo inshita imbi. Nga mwapwisha ukuisambilisha, nalimo kuti mwalembelapo na fimbi ifyo mwingafwaya ukuisambilishapo inshita imbi.

• Mulealulako fimo. Nga mwatantika inshita ya kuisambilisha, inshita shimo kuti mwa-alulako fimo. Ku ca kumwenako, kuti mwa-alulako inshita mupoosa pa kuisambilisha Baibo, ubushiku nelyo ifyo musala ukuisambilishapo. Icacindama te bushiku muisambilisha, inshita mupoosapo, nelyo ifyo muisambilisha, lelo kulaisambilisha lyonse.

Mulafuma ifisuma nga tuleisambilisha cila mulungu. Bucibusa bwesu na Yehova bulakoselako, tuleshiba ifya kusala bwino ifya kucita, kabili tulakoseleshiwa sana.—Yosh. 1:8