ELENGANYENI ukuti uulolekesha pa miceele aishiba ukuti ku ncende ukwikala abantu abengi kwalaba imfula ya citalawe. Pa mulandu wa kuti alitemwa abantu, abombesha apapela amaka yakwe pa kuti abacenjesheko ilyo ishilatendeka ukuloka.

Ifi fine e fyo na Yehova alecita muno nshiku. Alecenjeshako abantu bonse mwi sonde ku cintu icacila na pa mfula ya citalawe iyo abalolekesha pa miceele bengabacenjeshako. Finshi Yehova alecita pa kusoka abantu? Na kabili finshi fingalenga twashininkisha ukuti Yehova alesokela libela abantu pa kuti bacitepo cimo? Pa kuti twishibe amasuko, natubalilepo ukulanda pa fyo Yehova asokele abantu kale.

Mu nshita balelemba Baibolo, Yehova alesokela limo abantu abashalekonka amafunde yakwe ku mufulo fye pa “cikuuku ca mwela” nelyo pa fyo ali no kubapingula. (Yer. 30:23) Lyonse alesokela limo abantu abashalemumfwila kabili alebeba ne fyo balingile ukucita pa kuti balemumfwila. (2 Isha. 17:12-15; Nehe. 9:29, 30) Pa kuti abantu baluke, ilingi line Yehova alebomfya ababomfi bakwe aba cishinka pano isonde pa kweba abantu ukuti balingile ukwangufyanya ukwaluka.—Amose 3:7.

Ku ca kumwenako, Yehova abomfeshe Noa pa kubilisha ubupingushi bwakwe. Pa myaka iingi Noa taletiina ukusoka abantu abali ne mibele yabipa kabili abali abankalwe pa Lyeshi ilyali no kwisa. (Ukute. 6:9-13, 17) Kabili aleeba abantu ifyo balingile ukucita pa kuti bapusuke. Noa alebila sana ica kuti bamwishibe ukuti ‘aleshimikila abantu pa fyalungama.’—2 Pet. 2:5.

Nangu ca kuti Noa alebombesha pa kusoka abantu, abengi abali pa calo ilyo Ilyeshi lishilaisa tababikileko amano ku mbila iyo Lesa amwebele ukubila. Ifi bacitile fyalangile ukuti tabakwete icitetekelo nangu panono. E ico balifwile ilyo Ilyeshi ‘lyaishile no kubasenda bonse.’ (Mat. 24:39; Heb. 11:7) Kanshi tabakwete akabepekesho ka kulanda ukuti Lesa tabasokele.

Inshita shimbi, Yehova alesoka abantu ninshi kwashala fye inshita iinono ukuti “icikuuku ca mwela” nelyo ubupingushi butendeke. Nangu alecita ifi, bonse abo ali no kupingula alebapeela inshita iyalinga iya kuti baluke. Ifi fine e fyo acitile ilyo ashilaleta ifinkunka 10 pa bena Egupti, alebasokela libela. Ku ca kumwenako, Yehova atumine Mose na Aarone ukuyasoka Farao na babomfi bakwe pa cinkunka calenga 7 icaonawile ifintu ifingi. Apo ici icinkunka cali no kutendeka ubushiku bwakonkelepo, bushe Lesa alibapeela inshita ya kufwaya umwa kuuba pa kuti bapusuke imfula ya mabwe? Baibolo itila: “Onse uwatiinine amashiwi ya kwa Yehova pa babomfi ba kwa Farao alengele ababomfi bakwe ne fitekwa fyakwe ukubutukila mu mayanda, lelo uushabikile amashiwi ya kwa Yehova mu mutima wakwe alekele ababomfi bakwe ne fitekwa fyakwe mu mpanga.” (Ukufu. 9:18-21) Cailanga fye apabuuta tutu ukuti Yehova alibapeele inshita iyalinga pa kuti bonse abakonkele ifyo abebele becula sana nge fyo abashakonkele baculile.

Farao na babomfi bakwe nabo alibasokele ilyo icinkunka calenga 10 cishilacitika. Lelo balikeene ukukonka ifyo abasokele ku mufulo fye. (Ukufu. 4:22, 23) Icafuminemo ca kuti amabeli yabo ayaume yalifwile. Ala calibipile nga nshi! (Ukufu. 11:4-10; 12:29) Bushe balikwete inshita ya kwaluka ilyo icinkunka cishilacitika? Ee, balikwete! Mose alyangufyenye ukusoka abena Israele pa cinkunka calenga  10 icali no kucitika, kabili alibebele ne fyo balingile ukucita pa kuti bapusuke ne ndupwa shabo. (Ukufu. 12:21-28) Pa mulandu wa kuti balyumfwilile Yehova, abantu abali amamilioni yatatu, e kutila abena Israele na “bantu abengi nga nshi” abashali abena Israele e lyo na bena Egupti, bonse balipuswike bulya ubupingushi kabili balifumine mu Egupti.—Ukufu. 12:38.

Ifi twalandapo fyonse fyalanga fye ukuti lyonse Yehova alepeela abantu inshita iyalinga pa kuti baluke. (Amala. 32:4) Mulandu nshi alecitila ifi? Umutumwa Petro alondolwele ukuti Yehova “tafwaya umuntu nangu umo ukonaika lelo afwaya ukuti bonse bakalapile.” (2 Pet. 3:9) Ca cine, Lesa alesakamana abantu bakwe. Alefwaya balapila kabili bayaluka ilyo ubupingushi bwakwe tabulafika.—Esa. 48:17, 18; Rom. 2:4.

Na muno nshiku mwine, abantu bonse bafwile ukukonka ifyo Yehova alesoka abantu mwi sonde lyonse. Ilyo Yesu ali pano isonde alandile ukuti Yehova ali no konaula cino calo ilyo kukaba “ubucushi ubukalamba.” (Mat. 24:21) Ilyo alelanda pali ubu bucushi, asobele ukwabula ukupita na mu mbali ifyo abasambi bakwe bali no kumona kabili ifili no kucitika ilyo ubucushi bukalamba bulepalama. E ico Yesu alilandile ifikalamba ifilecitika muno nshiku.—Mat. 24:3-12; Luka 21:10-13.

Pali ino nshita Yehova alekoselesha abantu bonse ukusalapo ukulamubombela no kulamumfwila pa kuti bakapusuke ubucushi bukalamba. Afwaya ifintu filewamina abamumfwila pali ino nshita kabili fikabawamine na mu calo cipya umukaba ubulungami. (2 Pet. 3:13) Pa kuti abantu bacetekele ifyo Yehova abalaya, alibapeela imbila iingabapususha, iyi mbila, ni ‘mbila nsuma ya Bufumu,’ iyo Yesu asobele ukuti yali no ‘kubilwa ku bantu bonse aba pe sonde ku kuba ubunte ku nko shonse.’ (Mat. 24:14) Lesa aliteyanya ababomfi bakwe pa kuti balecita “ubunte,” nelyo balebila imbila iyafuma kuli ena mu fyalo nalimo 240. Yehova afwaya abantu abengi nga nshi baumfwa ifyo alebasoka pa kuti bakapusuke “icikuuku ca mwela” nelyo ubupingushi bwakwe.—Sefa. 1:14, 15; 2:2, 3.

Kanshi tatulingile ukutwishika nampo nga Yehova alapeela abantu inshita iyalinga pa kuti baluke nelyo iyo. Ifyo twalandapo nafilanga bwino bwino ukuti alabapeela. Lelo icikalamba ico tufwile ukutontonkanyapo ca kuti: Bushe abantu bakakonka ifyo Lesa abasoka ilyo kucili inshita? Apo tuli ntumi sha kwa Lesa natutwalilile ukwafwa abantu pa kuti bakapusuke impela ya cino calo.