1. Finshi Yehova engacita pa kuti afikilishe ubufwayo bwakwe?

YEHOVA kuti aba conse ico alefwaya ukuba pa kuti afikilishe ubufwayo bwakwe. Ku ca kumwenako, Yehova kuti aba Kasambilisha, kuti aba Kasansamusha, kabili kuti aba Kabila wa mbila nsuma. Kuti aba ne fintu fimbi pa kuti afikilishe ubufwayo bwakwe. (Esa. 48:17; 2 Kor. 7:6; Gal. 3:8) Lelo ilingi line abomfya abantunse pa kufikilisha ubufwayo bwakwe. (Mat. 24:14; 28:19, 20; 2 Kor. 1:3, 4) Na kabili Yehova kuti atupeela amano na maka ya kuba ifyo alefwaya tube pa kuti ifyo alefwaya ficitike. Ifi twalandapo e bupilibulo bwe shina lyakwe nga fintu abengi abasambilila ifya mu Baibolo balandapo.

2. (a) Finshi nalimo fingalenga twalatwishika ico Yehova atusuminishisha ukulamubombela? (b) Finshi twalasambilila muli cino cipande?

² Bonse tufwaya ukuti Yehova aletubomfya pa kuti acite ifyo afwaya, lelo bamo kuti balatwishika ico Yehova abasuminishisha ukulamubombela. Mulandu nshi bengalatwishikila? Ni co bamona ukuti nalimo te kuti bamubombele pa mulandu wa kuti nabakula, pa mulandu ne fyo ifintu fyaba, nelyo pa mulandu ne fyo baba. Bambi bena kuti balamona ukuti balabombesha kabili tabalingile ukubomba imilimo na imbi. Muli cino cipande twalasambilila pa fyo Yehova engalenga twalafwaya ukumubombela, ne fyo engatupeela amaka pa kuti afikilishe ubufwayo bwakwe. Twalasambilila na pa malyashi ya mu Baibolo ayalanga ifyo Yehova alengele ababomfi bakwe abaume na banakashi balafwaya ukumubombela,  ne fyo abapeele amaka pa kuti bacitepo cimo. Na pa kulekelesha twalasambilila ifyo twingacita pa kuti twingaleka Yehova aletubomfya pa kufikilisha ubufwayo bwakwe.

3. Ukulingana na mashiwi yaba pe lembo lya Abena Filipi 2:13, finshi Yehova engacita pa kuti alenge tufwaye ukucitapo cimo?

³ Belengeni Abena Filipi 2:13. * Yehova kuti alenga twalafwaya ukucitapo cimo. Finshi acita pa kulenga tulefwaya ukucitapo cimo? Tutile twaishiba ukuti uwa bwananyina mu cilonganino twaba alekabila ubwafwilisho nelyo imilimo imo ilefwaikwa ukubombwa. Nangu tutile baeluda batweba ukuti kuli icifulo cimbi ica kubilamo imbila nsuma ukuli ukukabila. Nalimo ifi kuti fyalenga twalayipusha atuti, ‘Finshi mfwile ukucita pa kuti ningafwilishako?’ Na kabili finshi twingacita nga batupeela umulimo uwakosa, lelo tatwishibe nga kuti twaubomba ukulingana ne fyo ufwile ukubombwa? Nangu nga twabelenga amashiwi yamo aya mu Cebo ca kwa Lesa, kuti twalayipusha atuti, ‘Kuti nabomfya shani aya mashiwi pa kwafwako abantu?’ Yehova takatupatikishe ukucitapo cimo. Lelo nga amona ukuti tuletontonkanya pa fyo twingacita, akalenga tukafwaye ukukonka ifyo twabelenga kabili tukafwaye no kucitapo cimo.

4. Finshi Yehova engacita pa kutupeela amaka ya kucitapo cimo?

⁴ Na kabili Yehova kuti atupeela amaka ya kucitapo cimo. (Esa. 40:29) Kuti atupeela umupashi wa mushilo uwingalenga twaishiba ifya kubomba bwino imilimo. (Ukufu. 35:30-35) Yehova kuti abomfya icilonganino cakwe pa kutusambilisha ifya kubomba imilimo imo. Nga ca kuti tatwishibe bwino ifya kubomba imilimo imo, tulemulomba pa kuti aletwafwa. Na kabili inshita fye yonse kuti mwalomba Shifwe wa ku muulu “amaka yacila aya bantunse.” (2 Kor. 4:7; Luka 11:13) Mu Baibolo mwaliba amalyashi ayalanda pa baume na banakashi abo Yehova alengele balafwaya ukumubombela kabili abo apeele amaka ya kucitapo cimo. Ilyo tulesambilila pali aya malyashi, muletontonkanya pa fyo Yehova engacita kuli imwe nga filya acitile kuli aba.

5. Finshi tulesambilila pa fyo Yehova apeele Mose umulimo wa kulubula abantu bakwe na lintu amupeele?

⁵ Yehova alengele Mose aba kalubula wa bena Israele. Lelo ni lilali Yehova amupeele uyu mulimo? Bushe ni lintu Mose alemona ukuti alifikilepo pa numa ya ‘kusambilishiwa amano yonse aya bena Egupti’? (Imil. 7:22-25) Awe. Yehova apeele Mose uyu mulimo ilyo alengele aba uwaicefya kabili uwafuuka. (Imil. 7:30, 34-36) Yehova alengele Mose aba uwashipa pa kulanda ne mfumu ya Egupti iyali na maka sana. (Ukufu. 9:13-19) Finshi tulesambilila pa fyo Yehova apeele Mose umulimo na lintu amupeele? Abo Yehova apeela imilimo bantu abaibikilishako pa kuti bakwate imibele iyo akwata na bashintilila pa maka yakwe.—Fil. 4:13.

6. Finshi tulesambilila ku fyo Yehova alengele Barsilai ayafwilisha Imfumu Davidi?

⁶ Pa numa ya myaka iingi sana ukutula apo Yehova alengele Mose alubula abena Israele, Yehova alengele Barsilai apeela Imfumu Davidi ifyo yalekabila. Davidi na bantu bakwe bali ‘ne nsala kabili balinakile, kabili bali ne cilaka’ ilyo balefulumuka Abishalomu umwana wa kwa Davidi. Pali iyi nshita Barsilai ali mukalamba, lelo ena pamo na bantu bambi baliibikile mu kapoosa mweo pa kuti bapeele Davidi na abo ali nabo ifyo balekabila. Barsilai tatontonkenye ukuti apo ali mukalamba, Yehova te kuti amulenge acitepo cimo pa kwafwa abantu ba kwa Yehova. Lelo alibomfeshe ifyo akwete pa kwafwa abantu ba kwa Lesa abalekabila fimo. (2 Sam. 17:27-29) Finshi tulesambilila kuli ili  lyashi? Nampo nga tuli bakalamba nelyo iyo, Yehova kuti alenga twacitapo cimo pa kwafwa aba bwananyina, nampo nga bantu twaba nabo mu calo nelyo nga ba ku calo cimbi abalekabila ubwafwilisho. (Amapi. 3:27, 28; 19:17) Nangu ca kuti te kuti tubafwe mu kulungatika, nalimo kuti twasangwilako ku mulimo wa mwi sonde lyonse pa kuti icilonganino ca kwa Yehova cakwata indalama isha kushitamo ifilefwaikwa, pa kwafwa abalekabila ubwafwilisho konse uko bali.—2 Kor. 8:14, 15; 9:11.

7. Finshi Yehova acitiile Simeone, kabili ifi kuti fyatukoselesha shani?

⁷ Yehova alaile Simeone uwali umwaume umukalamba kabili uwa cishinka uwali mu Yerusalemu ukuti taali no kufwa mpaka akamone Mesia. Ifi Yehova alaile Simeone fifwile fyalimukoseleshe nga nshi pantu alilolelele Mesia pa myaka iingi. Filya Simeone ali ne cishinka na fintu ashipikishe fyalengele Yehova amulambula. Bushiku bumo, “umupashi walimutungulwile” kwi tempele. Pe tempele amwene Yesu ninshi ali akanya, kabili Yehova alengele Simeone asobela ukuti aka akanya kali no kuba Kristu. (Luka 2:25-35) Nangu ca kuti Simeone afwile taikele imyaka iingi ica kuti amona na uko Yesu alebomba umulimo wa kubila imbila nsuma, alitashishe pe shuko akwete, kabili ku ntanshi akalambulwa apakalamba! Mu calo cipya, uyu mwaume uwali ne cishinka akamona ifyo inko shonse isha pe sonde shikapaalwa ilyo Yesu akalateka. (Ukute. 22:18) Na ifwe bene tulatasha pa milimo yonse iyo Yehova atupeela.

8. Bushe Yehova kuti alenga shani twacitapo cimo nga fintu acitile kuli Barnaba?

⁸ Mu nshita ya batumwa, Yosefe uwali kapekape aliipeeleshe ukubombela Yehova. (Imil. 4:36, 37) Nalimo pa mulandu wa kuti Yosefe alekoselesha sana abantu, abatumwa bambi bamwinike ukuti Barnaba. Ili shina lyalola mu kuti “Umwana wa Cisansamushi.” Natulande pa fya kumwenako fimo. Ilyo Sauli ayalwike aba Umwina Kristu, aba bwananyina abengi balemutiina pantu aishibikwe ukuti alecusha abasambi ba kwa Yesu. Nomba Barnaba ena aliile ku kwafwa Sauli kabili Sauli afwile alimutashishe sana pa cikuuku cakwe. (Imil. 9:21, 26-28) Pa numa, baeluda bamwene ukuti aba bwananyina ku Antioke wa ku Siria balekabila ukubakoselesha. Nani batumineko? Ni Barnaba! Uyu basalile e walingile. Baibolo itila Barnaba, atendeke “ukukoselesha bonse ukutwalilila aba cishinka kuli Shikulu no mutima umo.” (Imil. 11:22-24) Na muno nshiku mwine, Yehova kuti alenga twaba ‘abana ba cisansamushi’ ku Bena Kristu banensu. Ku ca kumwenako, kuti alenga twasansamusha abafwililwe. Nelyo kuti alenga twayapempula uwa bwananyina uulwele nelyo uusakamikwe sana, nangu twamutuminako foni no kumweba amashiwi ya ku musansamusha. Bushe mukaleka Yehova akamulenge ukucitapo cimo nga fintu acitile kuli Barnaba?—1 Tes. 5:14.

9. Finshi tulesambilila ku fyo Yehova ayafwile munyinefwe Vasily ukuba kacema umusuma?

⁹ Yehova alengele munyinefwe uwe shina lya kuti Vasily aba kacema umusuma. Ilyo munyinefwe Vasily bamusontele ukuba eluda ninshi ali ne myaka 26, alemona kwati tafikilepo ukwafwilisha aba bwananyina mu fya kwa Lesa, maka maka abalekwata amafya. Lelo balimusambilishe bwino kuli baeluda abaishibe bwino ifya kucema impaanga. Na kabili alisambilile ifingi ilyo aile ku Isukulu lya Butumikishi bwa Bufumu. Uyu munyinefwe alibombeshe pa kuti alebomba bwino umulimo wa bueluda. Ku ca kumwenako, alilembele ifyo apangile ukucita. Nga afishapo cimo pa fyo alembele, aleshipilako. Ino nshita atila: “Ifyo naletiina kale, pali lelo e filenga ndesekelela. Yehova nga angafwa ukusanga ilembo ilyo ningabelenga pa kusansamusha munyinefwe nelyo nkashi mu cilonganino, ndatemwa nga nshi.” Bamunyinefwe, nga ca kuti na  imwe mwaleka Yehova alamulenga ukucitapo cimo nga filya munyinefwe Vasily acitile, Yehova kuti alenga mwalabomba imilimo iikalamba mu cilonganino.

10. Finshi Abigaili acitile, kabili finshi mwingasambililako ku fyo acitile?

¹⁰ Davidi na baume ali nabo balifulumwike Imfumu Shauli kabili balekabila ubwafwilisho. Abaume abali na Davidi baile mu kulomba ifya kulya kuli Nabali uwali umukankaala mu Israele. Tabatiinine ukuyamulomba pantu balicingilile impaanga shakwe mu matololo. Lelo Nabali tabapeele nangu cimo pantu ali na kaso. Davidi alikalipe nga nshi ica kuti alefwaya ukulofya Nabali na baume bonse abali mu ng’anda yakwe. (1 Sam. 25:3-13, 22) Nomba Abigaili muka Nabali uwali uwayemba ali uwashilimuka. Abigaili alishipile kabili awile pa makasa ya kwa Davidi no kumupaapaata ukuti e landula pa kuti eba no mulandu wa mulopa. Ali ne cikuuku pa kweba Davidi ukuti ashiile Yehova uyu mulandu. Amashiwi ayasuma ayo Abigaili alandile ne fyo acitile fyalifikile Davidi pa mutima. Davidi alilwike ukuti Yehova e watumine Abigaili. (1 Sam. 25:23-28, 32-34) Imibele iisuma iyo Abigaili akwete yalengele Yehova amulenga ukucita ifyo alefwaya. Na ino ine nshita bankashi abeluka kabili abalanda amashiwi ayasuma, Yehova kuti alenga bakosha indupwa shabo e lyo na ba mu cilonganino.—Amapi. 24:3; Tito 2:3-5.

11. Finshi abana banakashi ba kwa Shalumu bacitile, kabili ni bani babapashanya muno nshiku?

¹¹ Pa numa ya myaka iingi, abana banakashi ba kwa Shalumu bali pa bo Yehova alengele bakuula ifibumba fya Yerusalemu cipya cipya. (Nehe. 2:20; 3:12) Nangu ca kuti Shalumu ali mwana wa mfumu, abana bakwe baliibikile mu kapoosa mweo pa kuti babombe uyu mulimo uwali uwakosa. (Nehe. 4:15-18) Tabali nga bashimucindikwa abena Tekoa ‘abashanakiile ku kubomba’ uyu mulimo! (Nehe. 3:5) Elenganyeni ifyo batemenwe ilyo bapwishishe umulimo wa kukuula ifibumba fya Yerusalemu mu nshiku fye 52! (Nehe. 6:15) Na muno nshiku mwine bankashi abaitemenwa ukubomba imilimo iyaibela pamo nga ukukuula no kuwamya ifikuulwa fya kwa Yehova balaba ne nsansa. Pa kuti uyu mulimo ubombwe, tulakabila aba bankashi abaishiba sana imilimo, abacincila, kabili aba cishinka.

12. Finshi Yehova engalenga twacita nga filya acitile kuli Tabita?

¹² Yehova alengele Tabita alebomba “imilimo isuma iingi nga nshi kabili aali kapekape,” maka maka kuli bamukamfwilwa. (Imil. 9:36) Apo ali ni kapekape kabili uwa cikuuku nga nshi, ilyo afwile abantu abengi balimulooseshe. Lelo balitemenwe nga nshi ilyo umutumwa Petro amubuushishe. (Imil. 9:39-41) Finshi tulesambilila kuli Tabita? Nampo nga muli baice nelyo muli bakalamba, nga muli baume nangu muli banakashi, bonse fye kuti twacitapo fimo pa kwafwa bamunyinefwe na bankashi.—Heb. 13:16.

13. Finshi Yehova alengele ba Ruth abali ne nsoni bacita, kabili finshi balandile?

¹³ Nkashi uwe shina lya kuti Ruth uwali uwa nsoni alefwaya ukuba mishonari. Ilyo ali umwaice alebutauka fye pa kupeela abantu amatrakiti ku ng’anda ne ng’anda. Atile: “Nalitemenwe sana ukubomba uyu mulimo.” Lelo calemukosela sana ukulanda na bantu pa mayanda no kubebako pa Bufumu bwa kwa Lesa. Nangu ca kuti ba Ruth bali ne nsoni, baishileba bapainiya ba nshita yonse ilyo bali ne myaka 18. Mu 1946 balile ku Isukulu lya Baibolo Ilya Gileadi Ilya Watchtower. Ilyo bapwishishe isukulu baile mu kubombela ku Hawaii kabili pa numa baile mu kubombela ku Japan. Yehova alilengele ba Ruth babila sana imbila nsuma muli filya fyalo. Pa numa ya kubombela  Yehova pa myaka mupepi na 80, ba Ruth batile: “Yehova alankosha sana. Alilenga naleka ukuba uwa mwenso. Nalishininkisha ukuti Yehova kuti alenga umuntu uuli onse uwa mucetekela acita ifyo alefwaya acite.”

14. Nga fintu ilembo lya Abena Kolose 1:29 lilanda, finshi tufwile ukucita pa kuti Yehova alenge tube ifyo alefwaya tube?

¹⁴ Ukutula fye na kale Yehova alalenga ababomfi bakwe baba ifyo alefwaya babe pa kuti babombe imilimo yalekanalekana. Inga imwe, bushe akalenga mukabe cinshi? Ifyo muipeelesha pa kuti mulebombesha e fikalenga mukabe ifyo akafwaya ukuti mube. (Belengeni Abena Kolose 1:29.) Nga mulefwaya, Yehova kuti alenga mwaba kabila uwacincila, kasambilisha umusuma, kasansamusha, umubomfi uwaishiba sana imilimo, cibusa umusuma, nelyo kuti alenga mwaba conse ico engafwaya mwaba pa kuti acite ifyo alefwaya.

15. Ukulingana ne fyo ilembo lya kwa 1 Timote 4:12, 15 lilanda, finshi bamunyinefwe abacaice balingile ukulalomba Yehova?

¹⁵ Inga mwe bamunyinefwe bacaice finshi mulingile ukucita? Ababomfi batumikila aba kubomba imilimo na imbi balefwaikwa sana. Mu filonganino ifingi baeluda balifula ukucila ababomfi batumikila. Bushe bamunyinefwe mwe bacaice te kuti mufwaye ukulabombako imilimo na imbi mu cilonganino? Inshita shimo, bamunyinefwe bamo batila, “Ine nalitemwa ifi fine naba kasabankanya.” Na imwe nga mutontonkanya ifi, mulelomba Yehova pa kuti amulenge ukulafwaya ukufikapo ukuba umubomfi utumikila kabili amupeele amaka ya kubomba umulimo wakwe. (Luk. Mil. 12:1) Tulefwaya mulebombako imilimo mu cilonganino!—Belengeni 1 Timote 4:12, 15.

16. Finshi tulingile ukulalomba Yehova, kabili mulandu nshi?

¹⁶ Yehova kuti alenga mwaba conse ico alefwaya mube pa kuti acite ifyo alefwaya. Kanshi mulemulomba pa kuti alelenga mulefwaya ukubomba umulimo wakwe, kabili mulemulomba pa kuti alemupeela amaka ya kumubombela. Nampo nga muli baice nelyo nga muli bakalamba, mulebomfya inshita yenu, amaka yenu, ne fyo mwakwata ku kucindika Yehova. (Luk. Mil. 9:10) Nga bamweba ukuti kuli imilimo na imbi iilefwaikwa ukubombwa mu cilonganino, mwilakaana pa mulandu wa kutontonkanya ukutila te kuti mubombe. Ala lishuko ilikalamba twakwata ilya kubombela Shifwe uwatutemwa apo twingapesha pa kuti tulemupeela umucinshi uo alinga ukupokelela!